ಕಂಗನಾ ಕುಟುಂಬದ ಆಸ್ತಿ ಖರೀದಿಸಿದ ಮೃಣಾಲ್​ ಠಾಕೂರ್​; ಇದಪ್ಪ ಬೆಳವಣಿಗೆ ಅಂದ್ರೆ

ನಟಿ ಮೃಣಾಲ್​ ಠಾಕೂರ್​ (Mrunal Thakur) ಅವರು ಬಹುಬೇಡಿಕೆಯ ನಟಿಯಾಗಿ ಬೆಳೆದು ನಿಂತಿದ್ದಾರೆ. ಬಾಲಿವುಡ್​ನಲ್ಲಿ ಮಾತ್ರವಲ್ಲದೇ ದಕ್ಷಿಣ ಭಾರತದಲ್ಲೂ ಅವರು ಸೂಪರ್​ ಸ್ಟಾರ್​ ಆಗಿದ್ದಾರೆ. ಸಿನಿಮಾದಿಂದ ಸಿನಿಮಾಗೆ ಅವರ ಸಂಭಾವನೆ ಕೂಡ ಹೆಚ್ಚಾಗುತ್ತಿದೆ. ಅದಕ್ಕೆ ತಕ್ಕಂತೆ ಅವರ ಜೀವನ ಶೈಲಿ ಬದಲಾಗುತ್ತಿದೆ. ಈಗ ಅವರು ಮುಂಬೈನ ದುಬಾರಿ ಏರಿಯಾಗಳಲ್ಲಿ ಆಸ್ತಿ ಖರೀದಿ (Mrunal Thakur Property) ಮಾಡುತ್ತಿದ್ದಾರೆ. ಬಹುಕೋಟಿ ರೂಪಾಯಿ ಮೊತ್ತದ ಫ್ಲ್ಯಾಟ್​ ಕೊಂಡುಕೊಳ್ಳುವ ಮೂಲಕ ಮೃಣಾಲ್​ ಠಾಕೂರ್​ ಸುದ್ದಿ ಆಗಿದ್ದಾರೆ. ಅಚ್ಚರಿ ಏನೆಂದರೆ, ಈಗ ಅವರು ಖರೀದಿ ಮಾಡಿರುವುದು ಕಂಗನಾ ರಣಾವತ್​ (Kangana Ranaut) ಕುಟುಂಬಕ್ಕೆ ಸೇರಿದ ಪ್ರಾಪರ್ಟಿ! ಈ ಸುದ್ದಿ ಕೇಳಿದ ಮೃಣಾಲ್​ ಠಾಕೂರ್​ ಅಭಿಮಾನಿಗಳು ‘ವಾವ್​.. ಇದಪ್ಪ ಬೆಳವಣಿಗೆ ಅಂದ್ರೆ’ ಎಂದು ಹೊಗಳುತ್ತಿದ್ದಾರೆ.

ಮುಂಬೈನ ಅಂದೇರಿಯಲ್ಲಿ ಕಂಗನಾ ರಣಾವತ್​ ಅವರ ತಂದೆ ಅಮರ್​ದೀಪ್​ ರಣಾವತ್​ ಒಡೆತನದಲ್ಲಿ ಇದ್ದ ಎರಡು ಫ್ಲಾಟ್​ಗಳನ್ನು ಮೃಣಾಲ್​ ಠಾಕೂರ್​ ಖರೀದಿ ಮಾಡಿದ್ದಾರೆ. ಇದರ ಬೆಲೆ ಅಂದಾಜು 10 ಕೋಟಿ ರೂಪಾಯಿ ಎಂದು ಹೇಳಲಾಗುತ್ತಿದೆ. ಮೃಣಾಲ್​ ಠಾಕೂರ್​ ಅವರು ಶೀಘ್ರದಲ್ಲೇ ಈ ಅಪಾರ್ಟ್​ಮೆಂಟ್​ಗೆ ಶಿಫ್ಟ್​ ಆಗಲಿದ್ದಾರೆ. ಸದ್ಯಕ್ಕೆ ಇಂಟೀರಿಯರ್​ ಡಿಸೈನ್​ ಕೆಲಸಗಳು ನಡೆಯುತ್ತಿವೆ ಎಂದು ವರದಿ ಆಗಿದೆ.

ಇದನ್ನೂ ಓದಿ: ಸೀತಾ ಮಹಾಲಕ್ಷ್ಮಿಯ ನೆನಪಿನಲ್ಲಿ ರಾಮ್​; ಹೇಗಿದೆ ಮೃಣಾಲ್​ ಠಾಕೂರ್​-ದುಲ್ಕರ್​ ಸಲ್ಮಾನ್​ ನಡುವಿನ ಬಾಂಧವ್ಯ?

ಮೃಣಾಲ್​ ಠಾಕೂರ್​ ಅವರು ಬಣ್ಣದ ಬದುಕು ಆರಂಭಿಸಿದ್ದು ಹಿಂದಿ ಕಿರುತೆರೆಯಿಂದ. ಬಳಿಕ ಅವರಿಗೆ ಬಾಲಿವುಡ್​ ಸಿನಿಮಾಗಳಲ್ಲಿ ನಟಿಸುವ ಚಾನ್ಸ್​ ಸಿಕ್ಕಿತು. ಸಿಕ್ಕ ಅವಕಾಶವನ್ನು ಸಮರ್ಥವಾಗಿ ಬಳಸಿಕೊಂಡು ತಮ್ಮ ಪ್ರತಿಭೆ ಏನೆಂಬುದನ್ನು ಸಾಬೀತು ಮಾಡಿದ ಅವರಿಗೆ ದಕ್ಷಿಣ ಭಾರತದಿಂದಲೂ ಆಫರ್​ ಸಿಗಲಾರಂಭಿಸಿತು. ಈಗ ಮೃಣಾಲ್​ ಠಾಕೂರ್​ ಅವರ ಕೈ ತುಂಬ ಸಿನಿಮಾಗಳಿವೆ. ಬಹುಕೋಟಿ ರೂಪಾಯಿ ಸಂಭಾವನೆ ಪಡೆಯುವ ಮಟ್ಟಕ್ಕೆ ಅವರು ಬೆಳೆದಿದ್ದಾರೆ.

ಇದನ್ನೂ ಓದಿ: ‘ಸೀತಾ ರಾಮಂ’ ಸುಂದರಿ ಮೃಣಾಲ್​ ಠಾಕೂರ್​ ಜೊತೆ ಬಾದ್​ಷಾ ಪ್ರೀತಿ-ಪ್ರೇಮ? ಸಿಕ್ತು ಸ್ಪಷ್ಟನೆ

ಹಿಂದಿಯಲ್ಲಿ ‘ಸೂಪರ್​ 30’, ‘ಬಾಟ್ಲಾ ಹೌಸ್​’, ‘ತೂಫಾನ್​’, ‘ಜರ್ಸಿ’, ‘ಲಸ್ಟ್​ ಸ್ಟೋರೀಸ್​ 2’ ಮುಂತಾದ ಸಿನಿಮಾಗಳಲ್ಲಿ ಮೃಣಾಲ್​ ಠಾಕೂರ್​ ನಟಿಸಿದ್ದಾರೆ. ತೆಲುಗಿನಲ್ಲಿ ಅವರು ನಟಿಸಿದ ಮೊದಲ ಸಿನಿಮಾ ‘ಸೀತಾ ರಾಮಂ’ ಸೂಪರ್​ ಹಿಟ್​ ಆಯಿತು. ಆ ಸಿನಿಮಾದಲ್ಲಿ ಮೃಣಾಲ್​ ಠಾಕೂರ್​ ಮಾಡಿದ ಸೀತಾ ಮಹಾಲಕ್ಷ್ಮೀ ಅಲಿಯಾಸ್​ ಪ್ರಿನ್ಸೆಸ್​ ನೂರ್​ ಜಹಾನ್​ ಪಾತ್ರ ಜನಮೆಚ್ಚುಗೆ ಪಡೆಯಿತು. 2023ರಲ್ಲಿ ತೆರೆಕಂಡ ‘ಹಾಯ್​ ನಾನ್ನ’ ಚಿತ್ರ ಕೂಡ ಹಿಟ್​ ಆಯಿತು. ಈಗ ಅವರು ವಿಜಯ್​ ದೇವರಕೊಂಡ ಜೊತೆ ‘ಫ್ಯಾಮಿಲಿ ಸ್ಟಾರ್​’ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ದಿನದಿಂದ ದಿನಕ್ಕೆ ಅವರ ಖ್ಯಾತಿ ಹೆಚ್ಚಾಗುತ್ತಿದೆ. ಇನ್​ಸ್ಟಾಗ್ರಾಮ್​ನಲ್ಲಿ ಸದ್ಯಕ್ಕೆ ಅವರನ್ನು ಒಂದು ಕೋಟಿಗೂ ಅಧಿಕ ಮಂದಿ ಫಾಲೋ ಮಾಡುತ್ತಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.