‘ಆ ಪಾತ್ರ ಮಾಡುವುದಿಲ್ಲ’: ದೊಡ್ಡ ಹಾಲಿವುಡ್ ಆಫರ್ ಕೈಬಿಟ್ಟಿದ್ದ ಹಿರಿಯ ನಟ

ಭಾರತದ ನಟ-ನಟಿಯರಿಗೆ ಹಾಲಿವುಡ್ (Hollywood)​ ಮೇಲೆ ವಿಪರೀತ ಮೋಹ. ಹಾಲಿವುಡ್ ಅವಕಾಶ ಎಂದರೆ ಸಾಕು ಹಿಂದೆ-ಮುಂದೆ ಯೋಚಿಸದೆ ಹಾರಿ ಬಿಡುತ್ತಾರೆ. ಹಾಲಿವುಡ್ ಸಹ ಭಾರತದ ಖ್ಯಾತ ನಟರನ್ನು ವಿಲನ್​​ಗಳಾಗಿ ಅಥವಾ ಸಾಧಾರಣ ಪೋಷಕ ನಟರ ಪಾತ್ರಗಳನ್ನೇ ನೀಡುವುದು ಹೆಚ್ಚು. ಪ್ರಿಯಾಂಕಾ ಚೋಪ್ರಾ, ಐಶ್ವರ್ಯಾ ರೈ ಸಹ ಹಾಲಿವುಡ್ ಸಿನಿಮಾಗಳಲ್ಲಿ ವಿಲನ್ ಪಾತ್ರಗಳನ್ನು ಮಾಡಿದ್ದಾರೆ. ಆದರೆ ಭಾರತದ ಹಿರಿಯ ನಟರೊಬ್ಬರು ಬಲು ದೊಡ್ಡ ಹಾಲಿವುಡ್ ಸಿನಿಮಾ ಅವಕಾಶವನ್ನು ನಿರಾಕರಿಸಿದ್ದರು. ಅದಕ್ಕೆ ನೀಡಿದ ಕಾರಣ ಹೆಮ್ಮೆ ಪಡುವಂಥಹದ್ದು.

ನಾನಾ ಪಟೇಕರ್ ಬಾಲಿವುಡ್​ನ ಬಲು ಹಿರಿಯ ನಟ. ಕೇವಲ ತಮ್ಮ ನಟನೆಯಿಂದಲೇ ದೊಡ್ಡ ಅಭಿಮಾನಿ ವರ್ಗವನ್ನು ಪಡೆದುಕೊಂಡಿರುವವರು ನಾನಾ ಪಟೇಕರ್. ಹಾಲಿವುಡ್​ನ ದೊಡ್ಡ ನಟ ‘ಟೈಟ್ಯಾನಿಕ್’ ಖ್ಯಾತಿಯ ಲಿಯಾನಾರ್ಡೊ ಡಿ ಕ್ಯಾಪ್ರಿಯೊ ಅವರೊಟ್ಟಿಗೆ ಸಿನಿಮಾನಲ್ಲಿ ನಟಿಸುವ ದೊಡ್ಡ ಅವಕಾಶ ನಾನಾ ಪಟೇಕರ್ ಅವರನ್ನು ಅರಸಿ ಬಂದಿತ್ತು. ಆದರೆ ನಾನಾ ಪಟೇಕರ್ ಹೇಳಿದ್ದು ಒಂದೇ ಮಾತು, ‘ನಾನು ಅಂಥಹಾ ಪಾತ್ರಗಳಲ್ಲಿ ನಟಿಸಲ್ಲ’ ಎಂದು. ಯಾವುದು ಆ ಪಾತ್ರ.

2007 ರಲ್ಲಿ ನಾನಾ ಪಟೇಕರ್ ಅವರು ಅಮೆರಿಕನ್ ನಿರ್ದೇಶಕ ನಿರ್ದೇಶಿಸಿದ್ದ ಭಾರತೀಯ ಸಿನಿಮಾ ‘ದಿ ಪೂಲ್’ನಲ್ಲಿ ನಟಿಸಿದ್ದರು. ಇದೇ ಸಿನಿಮಾನಲ್ಲಿ ಗದಗದ ಮುಂಡರಗಿಯ ಯುವಕ ವೆಂಕಟೇಶ್ ಮುಖ್ಯ ಪಾತ್ರದಲ್ಲಿ ನಟಿಸಿದ್ದ. ಆ ಸಿನಿಮಾಕ್ಕೆ ಅಂತರಾಷ್ಟ್ರೀಯ ಪ್ರಶಸ್ತಿ ಧಕ್ಕಿತ್ತು. ಆ ಸಿನಿಮಾವನ್ನು ಹಾಲಿವುಡ್​ನ ಖ್ಯಾತ ನಿರ್ದೇಶಕ ರೆಡ್ಲಿ ಸ್ಕಾಟ್ ಅವರು ನೋಡಿದ್ದರು. ಅವರಿಗೆ ನಾನಾ ಪಟೇಕರ್ ಪಾತ್ರ ಬಹಳ ಇಷ್ಟವಾಯ್ತು. ಅದೇ ಸಮಯದಲ್ಲಿ ಅವರು ಲಿಯೊನಾರ್ಡೊ ಡಿ ಕ್ರಾಪ್ರಿಯೊ ಜೊತೆಗೆ ‘ಬಾಡಿ ಆಫ್ ಲೈಸ್’ ಸಿನಿಮಾ ಮಾಡುತ್ತಿದ್ದರು.

ಇದನ್ನೂ ಓದಿ:ಹೈದರಾಬಾದ್​ ಮೇಲೆ ಕಣ್ಣು ಹಾಕಿದ ಬಾಲಿವುಡ್, ಹಾಲಿವುಡ್: ಕಾರಣ?

‘ದಿ ಪೂಲ್’ ಸಿನಿಮಾಕ್ಕೆ ನಾನಾ ಪಟೇಕರ್ ಅವರನ್ನು ಒಪ್ಪಿಸಿದ್ದ ಅನುರಾಗ್ ಕಶ್ಯಪ್ ಅವರಿಗೆ ಮೇಲ್ ಮಾಡಿದ್ದ ರೆಡ್ಲಿ ಸ್ಕಾಟ್ ‘ಬಾಡಿ ಆಫ್ ಲೈಸ್’ ಸಿನಿಮಾದ ಪಾತ್ರಕ್ಕೆ ನಾನಾ ಪಟೇಕರ್ ಬೇಕಾಗಿದ್ದರೆ ಎಂದು ಮೇಲ್ ಮಾಡಿದ್ದರು. ಕೂಡಲೇ ಅನುರಾಗ್ ಅವರು ನಾನಾ ಪಟೇಕರ್ ಬಳಿ ಹೋಗಿ ಖ್ಯಾತ ನಿರ್ದೇಶಕ ರೆಡ್ಲಿ ಸ್ಕಾಟ್ ಅವರ ಸಿನಿಮಾನಲ್ಲಿ ಅವಕಾಶ ಸಿಕ್ಕಿದೆ ಎಂದರಂತೆ. ಆದರೆ ಕತೆ ಕೇಳಿದ ಬಳಿಕ ತಾವು ಭಯೋತ್ಪಾದಕನ ಪಾತ್ರ ಮಾಡುವುದಿಲ್ಲ ಎಂದು ಹೇಳಿಬಿಟ್ಟರಂತೆ. ಅನುರಾಗ್ ಕಶ್ಯಪ್, ನಾನಾ ಪಟೇಕರ್ ಅವರನ್ನು ಒಪ್ಪಿಸುವ ಪ್ರಯತ್ನ ಮಾಡಿದರಾದರೂ ನಾನಾ ಪಟೇಕರ್ ಅವರು ತಮ್ಮ ನಿರ್ಧಾರದ ಬಗ್ಗೆ ಅಚಲವಾಗಿದ್ದರಂತೆ.

ಕೊನೆಗೆ ನಾನಾ ಪಟೇಕರ್ ಮಾಡಬೇಕಿದ್ದ ಪಾತ್ರ ನಟ ಮಾರ್ಕ್ ಸ್ಟ್ರಾಂಗ್ ನಿರ್ವಹಿಸಿದರು. ‘ಬಾಡಿ ಆಫ್ ಲೈಸ್’ ಸಿನಿಮಾ ದೊಡ್ಡ ಹಿಟ್ ಆಯ್ತು. ವಿಶ್ವದ ಅತ್ಯುತ್ತಮ ಗೂಢಚಾರಿ ಸಿನಿಮಾಗಳಲ್ಲಿ ಒಂದೆನಿಸಿಕೊಂಡಿತು.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ