ಏರಿಕೆ ಆಗುತ್ತಿದೆ ‘ರಾಮಾಯಣ’ ಗಳಿಕೆ, ಮೂರು ದಿನಕ್ಕೆ ಗಳಿಸಿದ್ದೆಷ್ಟು?

ರಣ್​​ಬೀರ್ ಕಪೂರ್, ಸಾಯಿ ಪಲ್ಲವಿ ಮತ್ತು ಯಶ್ ನಟಿಸಿ ನಿತೇಶ್ ತಿವಾರಿ ನಿರ್ದೇಶನ ಮಾಡಿರುವ ಬಹುನಿರೀಕ್ಷಿತ ‘ರಾಮಾಯಣ: ಭಾಗ 1’ ಇದೇ ಗುರುವಾರ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗಿದೆ. ಭಾರಿ ನಿರೀಕ್ಷೆಗಳ ಮೂಲಕ ಬಿಡುಗಡೆ ಆದ ಈ ಸಿನಿಮಾ ಮೊದಲ ದಿನ ನಿರೀಕ್ಷಿತ ಗಳಿಕೆಯನ್ನು ಮಾಡಿರಲಿಲ್ಲ. ಮೊದಲ ದಿನ ವಿಶ್ವ ಬಾಕ್ಸ್ ಆಫೀಸ್​​ನಲ್ಲಿ ಸುಮಾರು 129 ಕೋಟಿ ರೂಪಾಯಿ ಗಳಿಸಿದ್ದು, ಇದು ಸಾಧಾರಣ ಮೊತ್ತ ಎನ್ನಲಾಗಿತ್ತು. ಆದರೆ ಆ ನಂತರದ ಎರಡು ದಿನಗಳಲ್ಲಿ ಗಳಿಕೆಯಲ್ಲಿ ಏರಿಕೆ ಕಂಡಿದೆ. ಶನಿವಾರ ಒಂದೇ ದಿನ 45% ಏರಿಕೆ ಆಗಿದೆ. ಆ ಮೂಲಕ ಮೂರು ದಿನಕ್ಕೆ ಉತ್ತಮ ಮೊತ್ತದ ಗಳಿಕೆಯನ್ನು ಮಾಡಿದೆ ಸಿನಿಮಾ.

‘ರಾಮಾಯಣ’ ಸಿನಿಮಾ ಬಿಡುಗಡೆಯಾದ ಮೂರು ದಿನಗಳಲ್ಲೇ ಭಾರತದಲ್ಲಿ 182.70 ಕೋಟಿ ನೆಟ್ ಗಳಿಕೆ ಮಾಡಿದೆ ಎಂದು ಸಿನಿಮಾ ಗಳಿಕೆ ಟ್ರ್ಯಾಕ್ ಮಾಡುವ ಸ್ಯಾಕ್ನಿಲ್ಕ್ ಅಂದಾಜಿಸಿದೆ. ಮೊದಲ ದಿನ ಭಾರತದಲ್ಲಿ 64.85 ಕೋಟಿ ಗಳಿಸಿದ್ದ ಚಿತ್ರ, ಎರಡನೇ ದಿನ 48.05 ಕೋಟಿಗೆ ಇಳಿದಿತ್ತು. ಆದರೆ ಶನಿವಾರ ಮೂರನೇ ದಿನ ಶೇ 45ರಷ್ಟು ಜಿಗಿತ ಕಂಡು 69.80 ಕೋಟಿ ಬಾಚಿಕೊಂಡಿದೆ. ಇದು ಮೊದಲ ದಿನದ ಗಳಿಕೆಯನ್ನೂ ಮೀರಿಸಿದೆ. ಆ ಮೂಲಕ ‘ರಾಮಾಯಣ’ ಸಿನಿಮಾಕ್ಕೆ ಜನ ಸ್ಪಂದನೆ ದೊರಕುತ್ತಿರುವುದು ಸ್ಪಷ್ಟವಾಗಿ ಗೋಚರಿಸುತ್ತಿದೆ.

ವಿಶ್ವ ಬಾಕ್ಸ್ ಆಫೀಸ್​​ ಗಳಿಕೆ ನೋಡುವುದಾದರೆ ಮೂರು ದಿನಗಳಲ್ಲಿ ಸುಮಾರು 375.50 ಕೋಟಿ ಗಳಿಕೆ ಮಾಡಿದೆ ಈ ಸಿನಿಮಾ. ಮೊದಲ ದಿನವೇ ವಿಶ್ವಾದ್ಯಂತ 130 ಕೋಟಿ ಗಳಿಸಿರುವುದಾಗಿ ಚಿತ್ರತಂಡ ತಿಳಿಸಿತ್ತು. ವಿದೇಶಗಳಲ್ಲಿ ಎರಡೇ ದಿನದಲ್ಲಿ 10 ಮಿಲಿಯನ್ ಡಾಲರ್ ಗಡಿ ದಾಟಿದ್ದು, ಉತ್ತರ ಅಮೆರಿಕ ಮುಂಚೂಣಿಯಲ್ಲಿದೆ.

ಇದನ್ನೂ ಓದಿ:ಎರಡೇ ದಿನಕ್ಕೆ 221 ಕೋಟಿ ರೂಪಾಯಿ ಗಳಿಸಿದ ‘ರಾಮಾಯಣ’ ಸಿನಿಮಾ; ಕನ್ನಡದಲ್ಲೆಷ್ಟು?

ಸಿನಿಮಾದ ಕನ್ನಡ ಆವೃತ್ತಿಗೂ ಉತ್ತಮ ಪ್ರತಿಕ್ರಿಯೆ ಸಿಕ್ಕಿದ್ದು. ಮೂರನೇ ದಿನ ಕನ್ನಡದಲ್ಲಿ 6.30 ಕೋಟಿ ರೂ ಗಳಿಕೆಯಾಗಿದ್ದು, ಥಿಯೇಟರ್ ಭರ್ತಿ ಪ್ರಮಾಣ ಶೇ 66.5ರಷ್ಟಿತ್ತು. ತೆಲುಗಿನಲ್ಲಿ 6 ಕೋಟಿ ಗಳಿಕೆಯಾಗಿದೆ. ತಮಿಳು ಮತ್ತು ಮಲಯಾಳಂ ಆವೃತ್ತಿಗಳಲ್ಲಿ ಭರ್ತಿ ಪ್ರಮಾಣ ಕ್ರಮವಾಗಿ ಶೇ 78.5 ಮತ್ತು ಶೇ 83ರಷ್ಟಿತ್ತು. ಒಟ್ಟು ನೆಟ್ ಗಳಿಕೆಯಲ್ಲಿ ಹಿಂದಿ ಆವೃತ್ತಿಯ ಪಾಲು ಸುಮಾರು ಶೇ 74ರಷ್ಟಿದೆ.

ದೀಪಾವಳಿ ರಜೆ ಮತ್ತು ವಾರಾಂತ್ಯದ ಕಾರಣ ಭಾನುವಾರವೂ ಚಿತ್ರಮಂದಿರಗಳಲ್ಲಿ ಉತ್ತಮ ಜನಸಂದಣಿ ನಿರೀಕ್ಷಿಸಲಾಗಿದೆ. ಹೀಗಾಗಿ ಮೊದಲ ವಾರಾಂತ್ಯದ ಗಳಿಕೆ ಮತ್ತಷ್ಟು ಹೆಚ್ಚುವ ಸಾಧ್ಯತೆಯಿದೆ ಎಂಬುದು ವಿಶ್ಲೇಷಕರ ಲೆಕ್ಕಾಚಾರ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ