ಕಂಗನಾ ರಣಾವತ್ ನಟನೆಯ ‘ಸ್ಕೇರಿ ಪಿಕ್ಚರ್’ ಟೈಟಲ್ ಟೀಸರ್ ಬಿಡುಗಡೆ ಮಾಡಿದ ರಾಣಾ ದಗ್ಗುಬಾಟಿ
ಸುರೇಶ್ ಬಾಬು ಅವರ ಬೆಂಬಲ ಮತ್ತು ಕಂಗನಾ ರಣಾವತ್ ಅವರ ಮುಖ್ಯ ಭೂಮಿಕೆಯೊಂದಿಗೆ, ‘ಸ್ಕೇರಿ ಪಿಕ್ಚರ್’ ಚಿತ್ರವು ‘ಸುರೇಶ್ ಪ್ರೊಡಕ್ಷನ್ಸ್’ ಸಂಸ್ಥೆಯ ಹೊಸ ಸಾಹಸವಾಗಿ ಮೂಡಿಬರುತ್ತಿದೆ. ರಾಣಾ ದಗ್ಗುಬಾಟಿ ಅವರು ಈ ಸಿನಿಮಾದ ಟೈಟಲ್ ಟೀಸರ್ ಬಿಡುಗಡೆ ಮಾಡಿದ್ದಾರೆ. ಆ ಬಗ್ಗೆ ಇಲ್ಲಿದೆ ಮಾಹಿತಿ..
ನಟ ಹಾಗೂ ನಿರ್ಮಾಪಕ ರಾಣಾ ದಗ್ಗುಬಾಟಿ ಅವರು ಬಾಲಿವುಡ್ ನಟಿ ಕಂಗನಾ ರಣಾವತ್ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿರುವ ಮುಂಬರುವ ಹಾರರ್ ಸಿನಿಮಾ ‘ಸ್ಕೇರಿ ಪಿಕ್ಚರ್’ ಚಿತ್ರದ ಮೊದಲ ಝಲಕ್ ಅನಾವರಣಗೊಳಿಸಿದ್ದಾರೆ. ನವೆಂಬರ್ 13ರ ಶುಕ್ರವಾರದಂದು ರಾಣಾ ಅವರು ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಈ ಚಿತ್ರದ ಫಸ್ಟ್ ಲುಕ್ ಹಂಚಿಕೊಂಡಿದ್ದಾರೆ. ಹಾರರ್, ನಿಗೂಢತೆ ಮತ್ತು ಮೂಢನಂಬಿಕೆಗಳಿಗೆ ಹೆಸರಾದ ‘ಫ್ರೈಡೇ ದಿ 13th’ ದಿನದಂದೇ ಈ ಘೋಷಣೆ ಹೊರಬಿದ್ದಿರುವುದು ಚಿತ್ರದ ಥೀಮ್‌ಗೆ ಮತ್ತಷ್ಟು ಮೆರುಗು ನೀಡಿದೆ.
ದಶಕಗಳಿಂದ ಮುಖ್ಯವಾಹಿನಿಯ ತೆಲುಗು ಸಿನಿಮಾ ಮತ್ತು ಕೌಟುಂಬಿಕ ಮನರಂಜನಾ ಚಿತ್ರಗಳಿಗೆ ಹೆಸರಾಗಿರುವ ‘ಸುರೇಶ್ ಪ್ರೊಡಕ್ಷನ್ಸ್’ ಬ್ಯಾನರ್ ಅಡಿಯಲ್ಲಿ ಹಿರಿಯ ನಿರ್ಮಾಪಕ ಸುರೇಶ್ ಬಾಬು ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ‘ಸ್ಕೇರಿ ಪಿಕ್ಚರ್’ ಮೂಲಕ ಈ ಪ್ರತಿಷ್ಠಿತ ನಿರ್ಮಾಣ ಸಂಸ್ಥೆ ಇದೇ ಮೊದಲ ಬಾರಿಗೆ ಹಾರರ್ ಪ್ರಕಾರಕ್ಕೆ ಕಾಲಿಡುತ್ತಿದ್ದು, ಹೊಸ ರೀತಿಯ ಕಥಾಹಂದರದತ್ತ ಮುಖಮಾಡಿದೆ.
ಸಿನಿಮಾ ಬಗ್ಗೆ, ತಮ್ಮ ಯೋಜನೆಗಳ ಬಗ್ಗೆ ಮಾತನಾಡಿದ ರಾಣಾ ದಗ್ಗುಬಾಟಿ, ‘ಸ್ಕೇರಿ ಪಿಕ್ಚರ್ ಚಿತ್ರದ ಮೂಲಕ ಹಾರರ್ ಪ್ರಕಾರವನ್ನು ಪ್ರೀತಿಸುವ ನಿರ್ದೇಶಕರಿಗೆ ನಿರಂತರ ನಿರ್ಮಾಣ ಬೆಂಬಲ ಮತ್ತು ಬಿಡುಗಡೆಯ ಅವಕಾಶಗಳನ್ನು ಕಲ್ಪಿಸುವುದು ನಮ್ಮ ಉದ್ದೇಶವಾಗಿದೆ. ಭಾರತವು ಪ್ರತಿಯೊಂದು ಪ್ರಕಾರದಲ್ಲೂ ವೈವಿಧ್ಯತೆಯನ್ನು ಹೊಂದಿದೆ, ಹಾರರ್ ಕೂಡ ಇದಕ್ಕೆ ಹೊರತಲ್ಲ. ಪ್ರತಿಯೊಂದು ಪ್ರದೇಶಕ್ಕೂ ತನ್ನದೇ ಆದ ಭಯ, ಕಥೆಗಳು ಮತ್ತು ಅವುಗಳನ್ನು ಹೇಳುವ ವಿಭಿನ್ನ ಶೈಲಿಗಳಿವೆ. ಸೈಕಲಾಜಿಕಲ್, ಕ್ರೀಚರ್, ಹಾರರ್-ಕಾಮಿಡಿ, ಸೋಶಿಯಲ್ ಹಾರರ್ ಅಥವಾ ನಿರ್ದೇಶಕರು ತರುವ ಯಾವುದೇ ಹೊಸ ಬಗೆಯ ಕಥೆಗಳಿಗೆ ನಾವು ಮುಕ್ತವಾಗಿದ್ದೇವೆ’ ಎಂದು ತಿಳಿಸಿದ್ದಾರೆ.
ತೆಲುಗಿನ ಖ್ಯಾತ ನಿರ್ದೇಶಕ ರವಿ ಬಾಬು ಈ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳುತ್ತಿದ್ದು, ಇದು ಹಿಂದಿ ಚಿತ್ರರಂಗದಲ್ಲಿ ಅವರ ಮೊದಲ ನಿರ್ದೇಶನದ ಸಿನಿಮಾವಾಗಿದೆ. ಈ ಹಿಂದೆ ‘ಅನಸೂಯ’ ಮತ್ತು ‘ಅವುನು’ ಅಂತಹ ಯಶಸ್ವಿ ತೆಲುಗು ಹಾರರ್ ಚಿತ್ರಗಳನ್ನು ನಿರ್ದೇಶಿಸಿರುವ ರವಿ ಬಾಬು, ಈಗ ಕಂಗನಾ ರಣಾವತ್ ಅವರೊಂದಿಗೆ ಕೈಜೋಡಿಸಿ ಹಾರರ್ ಪ್ರಕಾರದಲ್ಲಿ ವಿಭಿನ್ನ ಪ್ರಯೋಗಕ್ಕೆ ಮುಂದಾಗಿದ್ದಾರೆ.
ಇದನ್ನೂ ಓದಿ: ಅಶ್ಲೀಲ ಎಐ ಕಂಟೆಂಟ್ ವಿರುದ್ಧ ದೆಹಲಿ ಹೈಕೋರ್ಟ್ ಮೆಟ್ಟಿಲೇರಿದ ನಟಿ ಕಂಗನಾ ರಣಾವತ್
ಕೇವಲ ಈ ಒಂದು ಸಿನಿಮಾ ಮಾತ್ರವಲ್ಲದೆ, ಭಾರತದಲ್ಲಿ ಹಾರರ್ ಸಿನಿಮಾ ನಿರ್ಮಾಣಕ್ಕಾಗಿ ಒಂದು ಪ್ರತ್ಯೇಕ ವೇದಿಕೆಯನ್ನು ನಿರ್ಮಿಸುವ ಯೋಜನೆಯನ್ನು ರಾಣಾ ದಗ್ಗುಬಾಟಿ ಹೊಂದಿದ್ದಾರೆ. ‘ಸುರೇಶ್ ಪ್ರೊಡಕ್ಷನ್ಸ್’ ಮತ್ತು ‘ಸ್ಪಿರಿಟ್ ಮೀಡಿಯಾ’ ಮೂಲಕ, ಈ ಪ್ರಕಾರದಲ್ಲಿ ಕೆಲಸ ಮಾಡುವ ನಿರ್ದೇಶಕರಿಗೆ ನಿಯಮಿತ ನಿರ್ಮಾಣ ಬೆಂಬಲ ಮತ್ತು ಚಿತ್ರಮಂದಿರಗಳಲ್ಲಿ ಸಿನಿಮಾ ಬಿಡುಗಡೆ ಮಾಡುವ ಅವಕಾಶಗಳನ್ನು ಒದಗಿಸುವ ಗುರಿಯನ್ನು ಅವರು ಹೊಂದಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.