Ranbir Kapoor: ‘ಬ್ರಹ್ಮಾಸ್ತ್ರ ನೋಡಿ ಅಂತ ನಾನು ಎಲ್ಲರ ಮನೆಗೆ ಹೋಗಿ ಬೇಡಿಕೊಳ್ಳಬೇಕಾ?’: ಸಿಟ್ಟಾದ ರಣಬೀರ್ ಕಪೂರ್
Brahmastra OTT Release Date: ‘ಬ್ರಹ್ಮಾಸ್ತ್ರ’ ಚಿತ್ರದ ನಟ ರಣಬೀರ್ ಕಪೂರ್ ಅವರು ಕೂಗಾಡುತ್ತಿರುವ ವಿಡಿಯೋ ವೈರಲ್ ಆಗಿದೆ. ‘ಕಟು ಸತ್ಯಗಳು’ ಎಂದು ಅವರ ಮಡದಿ ಆಲಿಯಾ ಭಟ್ ಅವರು ಇದಕ್ಕೆ ಕ್ಯಾಪ್ಷನ್ ನೀಡಿದ್ದಾರೆ.
Updated on: Oct 26, 2022 | 4:09 PM
ನಟ ರಣಬೀರ್ ಕಪೂರ್ (Ranbir Kapoor) ಅವರು ಬಾಲಿವುಡ್ನಲ್ಲಿ ಸ್ಟಾರ್ ಹೀರೋ ಆಗಿ ಮೆರೆಯುತ್ತಿದ್ದಾರೆ. ಅವರು ನಟಿಸಿದ ‘ಬ್ರಹ್ಮಾಸ್ತ್ರ’ (Brahmastra) ಸಿನಿಮಾ ಸೂಪರ್ ಹಿಟ್ ಆಗಿದೆ. ಚಿತ್ರಮಂದಿರದಲ್ಲಿ ಭರ್ಜರಿ ಕಲೆಕ್ಷನ್ ಮಾಡಿದ ಬಳಿಕ ಆ ಸಿನಿಮಾ ಈಗ ಒಟಿಟಿಗೆ ಬರುತ್ತಿದೆ. ಈ ಸಲುವಾಗಿ ಮತ್ತೆ ಪ್ರಚಾರ ಮಾಡಲು ಚಿತ್ರತಂಡ ಪ್ಲ್ಯಾನ್ ಮಾಡಿದೆ. ಆದರೆ ಪ್ರಚಾರ ಮಾಡಲು ರಣಬೀರ್ ಕಪೂರ್ ಅವರಿಗೆ ಮನಸ್ಸು ಇಲ್ಲ. ಈಗಾಗಲೇ ಹಿಟ್ ಆಗಿರುವ ಚಿತ್ರಕ್ಕೆ ಮತ್ತೆ ಪ್ರಮೋಷನ್ ಯಾಕೆ ಬೇಕು ಎಂಬುದು ಅವರ ವಾದ. ಅದೇ ಕಾನ್ಸೆಪ್ಟ್ ಇಟ್ಟುಕೊಂಡು ಒಂದು ವಿಡಿಯೋ ಮಾಡಲಾಗಿದೆ. ಆ ವಿಡಿಯೋ ವೈರಲ್ ಆಗಿದ್ದು, ನಟಿ ಆಲಿಯಾ ಭಟ್ (Alia Bhatt) ಸೇರಿದಂತೆ ಅನೇಕರು ಬಗೆಬಗೆಯಲ್ಲಿ ಕಮೆಂಟ್ ಮಾಡಿದ್ದಾರೆ.
ಪ್ರಮೋಷನ್ ಟೀಮ್ ಜೊತೆ ರಣಬೀರ್ ಕಪೂರ್ ಅವರು ಫೋನ್ನಲ್ಲಿ ಮಾತನಾಡುತ್ತಾರೆ. ‘ಆಗಲ್ಲ ಅಣ್ಣಾ.. ನನಗೆ ಸಾಕಾಗಿದೆ. ಬ್ರಹ್ಮಾಸ್ತ್ರ ಸಿನಿಮಾನೂ ಸಾಕು, ನಿರ್ದೇಶಕ ಅಯಾನ್ ಮುಖರ್ಜಿ ಸಹವಾಸವೂ ಸಾಕು. ಬ್ರಹ್ಮಾಸ್ತ್ರ ಚಿತ್ರ ಡಿಸ್ನಿ ಪ್ಲಸ್ ಹಾಟ್ ಸ್ಟಾರ್ನಲ್ಲಿ ಬರುತ್ತಿದೆ ಎಂದ ಮಾತ್ರಕ್ಕೆ ಮತ್ತೆ ನಾವು ಪ್ರಚಾರಕ್ಕೆ ಬರಬೇಕಾ’ ಎಂದು ರಣಬೀರ್ ಕಪೂರ್ ಅವರು ಕೂಗಾಡುತ್ತಿರುವ ದೃಶ್ಯ ಈ ವಿಡಿಯೋದಲ್ಲಿದೆ.
‘ಈಗ ನಾನೇನು ಮಾಡಬೇಕು? ಡಿಸ್ನಿ ಪ್ಲಸ್ ಹಾಟ್ ಸ್ಟಾರ್ನಲ್ಲಿ ಬ್ರಹ್ಮಾಸ್ತ್ರ ಸಿನಿಮಾ ನೋಡಿ ಅಂತ ಪ್ರತಿಯೊಬ್ಬರ ಮನೆಗೆ ಹೋಗಿ ನಾನು ಬೇಡಿಕೊಳ್ಳಬೇಕಾ? ಬೆಳಕು ಬರುತ್ತಿದೆ.. ಹ್ಯಾಪಿ ದೀಪಾವಳಿ ಎನ್ನಬೇಕಾ? ಬೆಳಕು ಬಂದಾಗಿದೆ. ಬ್ರಹ್ಮಾಸ್ತ್ರ ದೊಡ್ಡ ಹಿಟ್ ಆಗಿದೆ. ಬ್ರಹ್ಮಾಸ್ತ್ರ ಪ್ರಚಾರ ಮಾಡೋದು ಬಿಟ್ಟರೆ ನನ್ನ ಬದುಕಿನಲ್ಲಿ ಬೇರೆ ಏನೂ ಇಲ್ಲ ಅಂತ ಅಯಾನ್ ಮುಖರ್ಜಿ ಅಂದುಕೊಂಡಿದ್ದಾರಾ? ತಂದೆ ಆಗ್ತಾ ಇದ್ದೀನಿ. ನನ್ನ ಬದುಕಿನ ಅತಿ ದೊಡ್ಡ ಕ್ಷಣ ಇದು’ ಎಂದು ರಣಬೀರ್ ಕಪೂರ್ ಕಿರುಚಾಡುತ್ತಾರೆ.
ಇದಾಗ ತಕ್ಷಣ ಅಯಾನ್ ಮುಖರ್ಜಿಯ ಕಾಲ್ ಬರುತ್ತದೆ. ತಕ್ಷಣವೇ ಮೆತ್ತಗಾಗುವ ರಣಬೀರ್ ಕಫೂರ್, ‘ಹೌದು, ಹೌದು.. ನಾವು ಪ್ರಮೋಷನ್ ಮಾಡಬೇಕು’ ಅಂತ ಒಪ್ಪಿಕೊಳ್ಳುತ್ತಾರೆ. ಫೋನ್ ಕರೆ ಕಟ್ ಮಾಡಿದ ಬಳಿಕ ತಲೆ ಚಚ್ಚಿಕೊಳ್ಳುತ್ತಾರೆ. ಪ್ರಚಾರಕ್ಕಾಗಿಯೇ ಮಾಡಿದ ಈ ವಿಡಿಯೋ ಸಖತ್ ಫನ್ನಿ ಆಗಿದೆ. ಆಲಿಯಾ ಭಟ್ ಅವರು ಇದನ್ನು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಅಪ್ಲೋಡ್ ಮಾಡಿಕೊಂಡಿದ್ದಾರೆ. ‘ಕಟು ಸತ್ಯಗಳು’ ಎಂದು ಅವರು ಕ್ಯಾಪ್ಷನ್ ನೀಡಿದ್ದಾರೆ.
ಡಿಸ್ನಿ ಪ್ಲಸ್ ಹಾಟ್ ಸ್ಟಾರ್ನಲ್ಲಿ ನವೆಂಬರ್ 4ರಂದು ‘ಬ್ರಹ್ಮಾಸ್ತ್ರ’ ಸಿನಿಮಾ ಸ್ಟ್ರೀಮಿಂಗ್ ಆರಂಭಿಸಲಿದೆ. ಅಮಿತಾಭ್ ಬಚ್ಚನ್, ನಾಗಾರ್ಜುನ, ಶಾರುಖ್ ಖಾನ್, ಮೌನಿ ರಾಯ್ ಮುಂತಾದವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಕಳಪೆ ಗ್ರಾಫಿಕ್ಸ್ ಕಾರಣಕ್ಕೆ ಈ ಚಿತ್ರದ ಟ್ರೇಲರ್ ಅನ್ನು ಟ್ರೋಲ್ ಮಾಡಲಾಗಿತ್ತು. ಆದರೆ ಸಿನಿಮಾ ಸೂಪರ್ ಹಿಟ್ ಆಯಿತು.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
