Jawan: ‘ಜವಾನ್​’ ಸಿನಿಮಾದ ಪ್ರಿವ್ಯೂನಲ್ಲಿ ಈ ಸುಂದರಿಗಾಗಿ ಹುಡುಕಾಡಿದ ಫ್ಯಾನ್ಸ್​; ಯಾರು ಈ ಬೆಡಗಿ?

ಬಾಲಿವುಡ್​ ಸಿನಿಪ್ರೇಮಿಗಳ ವಲಯದಲ್ಲಿ ಈಗ ‘ಜವಾನ್​’ ಸಿನಿಮಾದ್ದೇ ಸುದ್ದಿ. ಶಾರುಖ್​ ಖಾನ್​ (Shah Rukh Khan) ಅಭಿಮಾನಿಗಳಂತೂ ಹಗಲು-ರಾತ್ರಿ ಈ ಸಿನಿಮಾದ ಬಗ್ಗೆಯೇ ಮಾತನಾಡುತ್ತಿದ್ದಾರೆ. ಅಷ್ಟರಮಟ್ಟಿಗೆ ಈ ಚಿತ್ರದ ಬಗ್ಗೆ ಹೈಪ್​ ಹೆಚ್ಚಾಗಿದೆ. ಇತ್ತೀಚೆಗಷ್ಟೇ ‘ಜವಾನ್​’ ಸಿನಿಮಾದ ಪ್ರಿವ್ಯೂ (Jawan prevue) ವಿಡಿಯೋ ಬಿಡುಗಡೆ ಆಯಿತು. ಇದನ್ನು ನೋಡಿದ ಎಲ್ಲರೂ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಯೂಟ್ಯೂಬ್​ನಲ್ಲಿ 65 ಮಿಲಿಯನ್​ಗಿಂತಲೂ ಹೆಚ್ಚು ಬಾರಿ ವೀಕ್ಷಣೆ ಕಾಣುವ ಮೂಲಕ ಈ ವಿಡಿಯೋ ಧೂಳೆಬ್ಬಿಸುತ್ತಿದೆ. ಅಚ್ಚರಿ ಏನೆಂದರೆ, ಸೋಶಿಯಲ್​ ಮೀಡಿಯಾಲ್ಲಿ ಇನ್ನೊಂದು ಚರ್ಚೆ ಶುರುವಾಗಿದೆ. ‘ಜವಾನ್​’ ಪ್ರಿವ್ಯೂನಲ್ಲಿ ಓರ್ವ ಸುಂದರಿಗಾಗಿ ಪ್ರೇಕ್ಷಕರು ಹುಡುಕಾಡಿದ್ದಾರೆ. ಯಾರದು? ರಿಧಿ ಡೋಗ್ರಾ! ಯಾಕೆ ಈ ವಿಡಿಯೋದಲ್ಲಿ ರಿಧಿ ಡೋಗ್ರಾ (Ridhi Dogra) ಕಾಣಿಸಿಲ್ಲ ಎಂದು ಅನೇಕರು ಪ್ರಶ್ನೆ ಮಾಡುತ್ತಿದ್ದಾರೆ.

‘ಜವಾನ್​’ ಸಿನಿಮಾದಲ್ಲಿ ಬಹುತಾರಾಗಣ ಇದೆ. ಶಾರುಖ್​ ಖಾನ್​ ಜೊತೆ ದೀಪಿಕಾ ಪಡುಕೋಣೆ, ನಯನತಾರಾ, ವಿಜಯ್​ ಸೇತುಪತಿ, ರಿಧಿ ಡೋಗ್ರಾ ಕೂಡ ನಟಿಸಿದ್ದಾರೆ. ಪ್ರಿವ್ಯೂ ವಿಡಿಯೋದಲ್ಲಿ ರಿಧಿ ಡೋಗ್ರಾ ಅವರನ್ನು ಹೊರತುಪಡಿಸಿ ಈ ಎಲ್ಲ ಸ್ಟಾರ್​ಗಳೂ ಕಾಣಿಸಿಕೊಂಡಿದ್ದಾರೆ. ಹಾಗಾಗಿ ರಿಧಿ ಡೋಗ್ರಾ ಅವರ ಅಭಿಮಾನಿಗಳಿಗೆ ಕೊಂಚ ಬೇಸರ ಆಗಿದೆ. ಸೋಶಿಯಲ್​ ಮೀಡಿಯಾ ಮೂಲಕ ಈ ಬಗ್ಗೆ ರಿಧಿ ಡೋಗ್ರಾಗೆ ನೇರವಾಗಿ ಪ್ರಶ್ನೆ ಮಾಡಲಾಗಿದೆ.

You saw SRK 30 times. Bas what else is needed ??? https://t.co/Asx40z48XO

— Ridhi Dogra (@iRidhiDogra) July 11, 2023

‘ಪ್ರಿವ್ಯೂ ವಿಡಿಯೋದಲ್ಲಂತೂ ಇಲ್ಲ.. ಸಿನಿಮಾದಲ್ಲಾದರೂ ಇದ್ದೀರಿ ಅಲ್ವಾ’ ಎಂದು ಅಭಿಮಾನಿಯೊಬ್ಬರು ರಿಧಿ ಡೋಗ್ರಾಗೆ ಪ್ರಶ್ನಿಸಿದ್ದಾರೆ. ಅದಕ್ಕೆ ಉತ್ತರಿಸಿರುವ ಅವರು, ‘ಟ್ರೇಲರ್​ನಲ್ಲಿ ಕೂಡ ಇದ್ದೇನೆ. ಅದು ಎಲ್ಲಿ ಎಂಬುದು ನನಗೆ ಮಾತ್ರ ಗೊತ್ತು’ ಎಂದು ಟ್ವೀಟ್​ ಮಾಡಿದ್ದಾರೆ. ‘ನಾನು ಇದನ್ನು 30 ಬಾರಿ ನೋಡಿದ್ದೇನೆ. ಆದರೆ ನೀವು ಕಾಣಲೇ ಇಲ್ಲ’ ಎಂದು ಮತ್ತೋರ್ವ ಅಭಿಮಾನಿ ಟ್ವೀಟ್​ ಮಾಡಿದ್ದಾರೆ. ‘ನೀವು 30 ಸಲ ಶಾರುಖ್​ ಖಾನ್​ ಅವರನ್ನು ನೋಡಿದ್ದೀರಿ. ಅದಕ್ಕಿಂತ ಇನ್ನೇನು ಬೇಕು’ ಎಂದು ರಿಧಿ ಡೋಗ್ರಾ ಪ್ರತಿಕ್ರಿಯಿಸಿದ್ದಾರೆ.

ಇದನ್ನೂ ಓದಿ: Jawan: ‘ತಾಕತ್ತಿದ್ದರೆ ಜವಾನ್​ ಎದುರು ನಿಮ್ಮ ಸಿನಿಮಾ ರಿಲೀಸ್​ ಮಾಡಿ’: ವಿವೇಕ್​ ಅಗ್ನಿಹೋತ್ರಿಗೆ ನೇರ ಸವಾಲು

ಕಿರುತೆರೆ ಧಾರಾವಾಹಿ ಮತ್ತು ವೆಬ್​ ಸಿರೀಸ್​ಗಳಲ್ಲಿ ರಿಧಿ ಡೋಗ್ರಾ ಅವರು ನಟಿಸಿ ಫೇಮಸ್​ ಆಗಿದ್ದಾರೆ. ಅವರಿಗೆ ದೊಡ್ಡ ಫ್ಯಾನ್​ ಫಾಲೋಯಿಂಗ್​ ಇದೆ. ಇನ್​ಸ್ಟಾಗ್ರಾಮ್​ನಲ್ಲಿ ಅವರನ್ನು 18 ಲಕ್ಷಕ್ಕೂ ಅಧಿಕ ಜನರು ಫಾಲೋ ಮಾಡುತ್ತಿದ್ದಾರೆ. ಬಿಗ್​ ಬಾಸ್​ ಸ್ಪರ್ಧಿ ರಾಕೇಶ್​ ಬಾಪಟ್​ ಜೊತೆ ರಿಧಿ ಡೋಗ್ರಾಗೆ ಮದುವೆ ಆಗಿತ್ತು. ನಂತರ ಅವರು ಡಿವೋರ್ಸ್​ ಪಡೆದರು. ‘ಜವಾನ್​’ ಸಿನಿಮಾ ಬಿಡುಗಡೆ ಆದ ಬಳಿಕ ರಿಧಿ ಡೋಗ್ರಾಗೆ ಜನಪ್ರಿಯತೆ ಹೆಚ್ಚುವ ನಿರೀಕ್ಷೆ ಇದೆ. ಸೆಪ್ಟೆಂಬರ್​ 7ರಂದು ಈ ಚಿತ್ರ ರಿಲೀಸ್​ ಆಗಲಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.