ದಿಲ್ ರಾಜು ಜೊತೆ ಸಿನಿಮಾ ಮಾಡಲಿದ್ದಾರೆ ಯಶ್, ಆದರೆ ಯಾವಾಗ?

ನಿನ್ನೆ (ಆಗಸ್ಟ್ 22) ಹೈದರಾಬಾದ್​​ನಲ್ಲಿ ‘ಟಾಕ್ಸಿಕ್’ (Toxic) ಸಿನಿಮಾದ ಪ್ರೀ ರಿಲೀಸ್ ಕಾರ್ಯಕ್ರಮ ಭಾರಿ ಅದ್ಧೂರಿಯಾಗಿ ನಡೆದಿದೆ. ತೆಲುಗು ರಾಜ್ಯಗಳಲ್ಲಿ ಸಿನಿಮಾ ವಿತರಣೆ ಮಾಡಲಿರುವ ಖ್ಯಾತ ವಿತರಕ ಮತ್ತು ನಿರ್ಮಾಪಕ ದಿಲ್ ರಾಜು ಸೇರಿದಂತೆ ‘ಟಾಕ್ಸಿಕ್’ ಸಿನಿಮಾದ ಪ್ರಮುಖ ನಟ, ನಟಿಯರು, ನಿರ್ಮಾಪಕರು, ತಂತ್ರಜ್ಞರು ಕಾರ್ಯಕ್ರಮದಲ್ಲಿ ಭಾಗಿ ಆಗಿದ್ದರು. ಈ ವೇಳೆ ದಿಲ್ ರಾಜು ಅವರು ಯಶ್ ಅವರ ಬಗ್ಗೆ ಮಾತನಾಡುತ್ತಾ, ‘ಯಶ್ ಈಗಾಗಲೇ ತಮ್ಮ ಜೊತೆ ಸಿನಿಮಾ ಮಾಡಲು ಒಪ್ಪಿಕೊಂಡಿದ್ದಾರೆ’ ಎಂದರು.

ಯಶ್ ಅವರನ್ನು ಅವರ ದೂರದೃಷ್ಟಿ, ಮಹಾತ್ವಾಕಾಂಕ್ಷೆ, ಸಿನಿಮಾ ಬಗ್ಗೆ ಪ್ರೀತಿ, ಫ್ಯಾಷನ್ ಅನ್ನು ಬಹುವಾಗಿ ಕೊಂಡಾಡಿದ ದಿಲ್ ರಾಜು, ‘ಟಾಕ್ಸಿಕ್’ ಸಿನಿಮಾದ ಕೆಲ ದೃಶ್ಯಗಳನ್ನೂ ನೋಡಿಯೇ, ಯಶ್ ಹಾಗೂ ಕೆವಿಎನ್ ವೆಂಕಟ್ ಅವರು ಹೇಳಿದ ದರ ಕೊಟ್ಟು ವಿತರಣೆ ಹಕ್ಕು ಖರೀದಿ ಮಾಡಿದ್ದೇನೆ ಎಂದರು. ‘ಕೆಜಿಎಫ್ 2’ ಅನ್ನೂ ಮೀರಿಸುವ ರೀತಿಯ ಸಿನಿಮಾ ಇದಾಗಲಿದೆ ಎಂದು ಭರವಸೆ ವ್ಯಕ್ತಪಡಿಸಿದರು. ಅದೇ ಕಾರ್ಯಕ್ರದಲ್ಲಿ ನಿರೂಪಕಿ ಸುಮಾ ಅವರು, ‘ಯಶ್ ಅವರೊಟ್ಟಿಗೆ ತೆಲುಗು ಸಿನಿಮಾ ಯಾವಾಗ ಮಾಡುತ್ತೀರ?’ ಎಂದು ದಿಲ್ ರಾಜು ಅವರನ್ನು ಪ್ರಶ್ನೆ ಮಾಡಿದರು.

ಅದಕ್ಕೆ ಉತ್ತರಿಸಿದ ನಿರ್ಮಾಪಕ ದಿಲ್ ರಾಜು, ‘ಈಗ ಬಗ್ಗೆ ನಾವು ಮೊದಲೇ ಮಾತನಾಡಿಕೊಂಡಿದ್ದೇವೆ. ಯಶ್ ಸಹ ಓಕೆ ಎಂದಿದ್ದಾರೆ. ಖಂಡಿತ ಸಿನಿಮಾ ಮಾಡೋಣ, ಒಳ್ಳೆಯ ಕತೆ ಬರಲಿ, ನಾವು ಸಿನಿಮಾ ಮಾಡುವ ಕತೆ ನಮ್ಮನ್ನು ಹುಡುಕಿಕೊಂಡು ಬರುತ್ತದೆ. ಅಲ್ಲಿಯ ವರೆಗೆ ಕಾಯೋಣ ಎಂದಿದ್ದಾರೆ’ ಎಂದರು ದಿಲ್ ರಾಜು. ಆ ಮೂಲಕ ಯಶ್ ಅವರೊಟ್ಟಿಗೆ ಸಿನಿಮಾ ಮಾಡಲು ತಾವು ರೆಡಿ ಹಾಗೂ ಯಶ್ ಸಹ ಇದಕ್ಕೆ ಒಪ್ಪಿಗೆ ಸೂಚಿಸಿದ್ದಾರೆ ಎಂದರು.

ಇದನ್ನೂ ಓದಿ:ಬಿಡುಗಡೆಗೂ ಮೊದಲೇ ‘ಧುರಂಧರ್ 2’ ದಾಖಲೆ ಮುರಿದ ‘ಟಾಕ್ಸಿಕ್’ ಸಿನಿಮಾ

ಯಶ್, ಒಂದು ಸಿನಿಮಾ ಮಾಡಲು ನಾಲ್ಕೈದು ವರ್ಷಗಳನ್ನೇ ತೆಗೆದುಕೊಳ್ಳುತ್ತಾರೆ. ‘ಕೆಜಿಎಫ್ 2’ ಸಿನಿಮಾ 2022 ರಲ್ಲಿ ಬಿಡುಗಡೆ ಆಗಿತ್ತು. ಈಗ ನಾಲ್ಕೂ ವರ್ಷಗಳ ಬಳಿಕ ಅವರ ‘ಟಾಕ್ಸಿಕ್’ ರಿಲೀಸ್ ಆಗಲಿದೆ. ಆದರೆ ಯಶ್ ಅಭಿಮಾನಿಗಳಿಗೆ ಖುಷಿ ಸುದ್ದಿಯೆಂದರೆ ಇದೇ ವರ್ಷ ಅವರು ನಟಿಸಿರುವ ‘ರಾಮಾಯಣ’ ಸಹ ಬಿಡುಗಡೆ ಆಗಲಿದೆ. ನಾಲ್ಕು ವರ್ಷ ಕಾದಿದ್ದಕ್ಕೆ ಒಂದೇ ವರ್ಷದಲ್ಲಿ ಎರಡೆರಡು ಸಿನಿಮಾಗಳು ಬಿಡುಗಡೆ ಆಗುತ್ತವೆ.

ಇನ್ನು ದಿಲ್ ರಾಜು ಸಹ ಬಹಳ ದೊಡ್ಡ ನಿರ್ಮಾಪಕ. 400 ಕ್ಕೂ ಹೆಚ್ಚು ಸಿನಿಮಾಗಳಣ್ನು ವಿತರಣೆ ಮಾಡಿದ್ದಾರೆ. 60ಕ್ಕೂ ಹೆಚ್ಚು ಸಿನಿಮಾಗಳನ್ನು ನಿರ್ಮಾಣ ಮಾಡಿದ್ದಾರೆ. ರಾಮ್ ಚರಣ್, ಅಲ್ಲು ಅರ್ಜುನ್, ಪ್ರಭಾಸ್, ವೆಂಕಟೇಶ್, ಜೂ ಎನ್​​ಟಿಆರ್, ಪವನ್ ಕಲ್ಯಾಣ್ ಹೀಗೆ ತೆಲುಗಿನ ಬಹುತೇಕ ಸ್ಟಾರ್ ನಟರುಗಳ ಜೊತೆಗೆ ಒಂದಕ್ಕಿಂತಲೂ ಹೆಚ್ಚು ಸಿನಿಮಾಗಳನ್ನು ಮಾಡಿದ್ದಾರೆ. ಇದೀಗ ವಿಜಯ್ ದೇವರಕೊಂಡ ನಟನೆಯ ‘ರೌಡಿ ಜನಾರ್ಧನ್’ ಸಿನಿಮಾ ನಿರ್ಮಾಣ ಮಾಡುತ್ತಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ