‘ಫರ್ಹಾನಾ’ ಸಿನಿಮಾ ವಿವಾದ: ನಟಿ ಐಶ್ವರ್ಯಾ ರಾಜೇಶ್​ಗೆ ಪೊಲೀಸ್​ ಭದ್ರತೆ

‘ದಿ ಕೇರಳ ಸ್ಟೋರಿ‘ (The Kerala Story) ಸಿನಿಮಾ ವಿವಾದ ಎಬ್ಬಿಸಿರುವ ಬೆನ್ನಲ್ಲೆ ತಮಿಳಿನ ಮತ್ತೊಂದು ಸಿನಿಮಾ ಸಹ ವಿವಾದಕ್ಕೆ ಗುರಿಯಾಗಿದೆ. ಎರಡೂ ಸಿನಿಮಾಗಳನ್ನು ಮುಸ್ಲಿಂ ಸಮುದಾಯ ವಿರೋಧಿಸುತ್ತಿದೆ. ಕೆಲವು ದಿನಗಳ ಹಿಂದಷ್ಟೆ ‘ಫರ್ಹಾನಾ‘ (Farhana) ಹೆಸರಿನ ತಮಿಳು ಸಿನಿಮಾ ಬಿಡುಗಡೆ ಆಗಿದ್ದು, ಸಿನಿಮಾಕ್ಕೆ ಕೆಲವು ಮೂಲಭೂತವಾದಿ ವ್ಯಕ್ತಿಗಳು ವಿರೋಧ ವ್ಯಕ್ತಪಡಿಸಿದ್ದಾರೆ. ಅದರ ಬೆನ್ನಲ್ಲೆ ಸಿನಿಮಾದ ನಟಿ ಐಶ್ವರ್ಯಾ ರಾಜೇಶ್​ಗೆ ಪೊಲೀಸ್ ಭದ್ರತೆ ಒದಗಿಸಲಾಗಿದೆ.

ಫರ್ಹಾನಾ ಸಿನಿಮಾದಲ್ಲಿ ಐಶ್ವರ್ಯಾ ರಾಜೇಶ್ ನಾಯಕಿಯಾಗಿ ನಟಿಸಿದ್ದು, ಸಿನಿಮಾದ ವಿರುದ್ಧ ಮುಸ್ಲಿಂ ಸಮುದಾಯದ ಕೆಲ ಮುಖಂಡರು ಆಕ್ಷೇಪ ವ್ಯಕ್ತಪಡಿಸಿ ಪ್ರತಿಭಟನೆಯ ಬೆದರಿಕೆ ಒಡ್ಡಿರುವ ಹಿನ್ನೆಲೆಯಲ್ಲಿ ನಟಿಗೆ ಭದ್ರತೆ ನೀಡಲಾಗಿದೆ. ‘ದಿ ಕೇರಳ ಸ್ಟೋರಿ’ ಸಿನಿಮಾದ ನಟಿ ಅದಾ ಶರ್ಮಾಗೂ ಸಹ ಪೊಲೀಸರು ಭದ್ರತೆ ಒದಗಿಸಿದ್ದಾರೆ.

ಫರ್ಹಾನಾ ಸಿನಿಮಾವು ಮುಸ್ಲಿಂ ಗೃಹಿಣಿಯೊಬ್ಬಳ ಕತೆಯನ್ನು ಒಳಗೊಂಡಿದೆ. ಬಡತನದ ಕುಟುಂಬದ ಸೊಸೆ ಫರ್ಹಾನಾ, ತನ್ನ ಪರಿಸ್ಥಿತಿ ತನ್ನ ಮಕ್ಕಳಿಗೆ ಬರಬಾರದೆಂಬ ಕಾರಣಕ್ಕೆ ಲೈಂಗಿಕತೆ ಕುರಿತಾಗಿ ಮಾತನಾಡುವ ಕಾಲ್ ಸೆಂಟರ್​ ಸೇರಿಕೊಳ್ಳುತ್ತಾಳೆ. ಅಲ್ಲಿ ಆಕೆ ಎದುರಿಸುವ ಸಮಸ್ಯೆಗಳು, ಆ ವೃತ್ತಿಯಿಂದಾಗಿ ಕುಟುಂಬದವರಿಂದ ಎದುರಿಸುವ ಸಮಸ್ಯೆ, ಬ್ಲಾಕ್​ಮೇಲರ್ ಒಬ್ಬನಿಗೆ ಎದುರಿಸುವ ಸಮಸ್ಯೆಗಳನ್ನು ಫರ್ಹಾನಾ ಹೇಗೆ ನಿಭಾಯಿಸುತ್ತಾಳೆ ಎಂಬುದೇ ಸಿನಿಮಾದ ಕತೆ. ಸಿನಿಮಾವು ಮೇ 12 ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಕಂಡಿದೆ.

ಇಂಡಿಯನ್ ನ್ಯಾಷನಲ್ ಲೀಗ್ ಮತ್ತು ಇನ್ನು ಕೆಲವು ಮುಸ್ಲಿಂ ಸಂಘಟನೆಗಳು ಸಿನಿಮಾದ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿದ್ದು, ಈ ಸಿನಿಮಾವು ಮುಸ್ಲಿಂ ಮಹಿಳೆಯರನ್ನು ಕೆಟ್ಟದಾಗಿ ಚಿತ್ರಿಸಿದೆ ಹಾಗೂ ಸಿನಿಮಾದಿಂದ ಮುಸ್ಲಿಂ ಮಹಿಳೆಯರ ಬಗ್ಗೆ ಕೆಟ್ಟ ಸಂದೇಶ ಸಮಾಜಕ್ಕೆ ರವಾನೆ ಆಗುತ್ತದೆ ಎಂದು ಆರೋಪಿಸಿದ್ದಾರೆ.

ಫರ್ಹಾನಾ ಸಿನಿಮಾ ನಿರ್ಮಾಪಕರು ಸಹ ವಿವಾದದ ಬಗ್ಗೆ ಪ್ರತಿಕ್ರಿಯಿಸಿದ್ದು, “ಸಿಬಿಎಫ್​ಸಿಯಿಂದ ಸೆನ್ಸಾರ್ ಮಾಡಲಾದ ಫರ್ಹಾನಾ ಬಗ್ಗೆ ಕೆಲವು ಜನರು ಸೃಷ್ಟಿಸಿದ ವಿವಾದಗಳು ನಮಗೆ ತುಂಬಾ ನೋವನ್ನುಂಟುಮಾಡಿದೆ. ಫರ್ಹಾನಾ ಸಿನಿಮಾವು ಯಾವುದೇ ಧರ್ಮ ಅಥವಾ ಅವರ ಭಾವನೆಗಳಿಗೆ ವಿರುದ್ಧವಾಗಿಲ್ಲ. ನಮ್ಮ ಗುರಿ ಉತ್ತಮ ಚಲನಚಿತ್ರಗಳನ್ನು ನೀಡುವುದಷ್ಟೆ, ನಿರ್ದಿಷ್ಟ ಧಾರ್ಮಿಕ ಭಾವನೆಗಳಿಗೆ ಮತ್ತು ನಂಬಿಕೆಗಳಿಗೆ ವಿರುದ್ಧವಾದ ವಿಷಯಗಳಿಗೆ ನಾವು ಎಂದಿಗೂ ಘಾಸಿ ಉಂಟು ಮಾಡಿಲ್ಲ. ಮಾನವೀಯತೆ ಮತ್ತು ಮಾನವೀಯತೆಗೆ ವಿರುದ್ಧವಾದ ಕಥೆಗಳನ್ನು ನಾವು ಹೇಳುವುದಿಲ್ಲ. ನಮ್ಮ ಸಿನಿಮಾದ ಬಗ್ಗೆ ವಿವಾದಗಳನ್ನು ಸೃಷ್ಟಿಸುತ್ತಿರುವ ನಮ್ಮ ಸಹೋದರ ಸಹೋದರಿಯರು ಇದನ್ನು ಅರ್ಥಮಾಡಿಕೊಳ್ಳಬೇಕು. ನಮ್ಮ ತಮಿಳುನಾಡು ಧಾರ್ಮಿಕ ಸೌಹಾರ್ದತೆಯ ಸ್ವರ್ಗ, ಕಲಾಕೃತಿಗಳನ್ನು ಪೋಷಿಸುತ್ತಿರುವ ನಾಡು, ಸೆನ್ಸಾರ್ ಆದ ಚಿತ್ರವನ್ನು ಅಪಾರ್ಥಗಳಿಂದ ವಿರೋಧಿಸಿ ವಿವಾದ ಸೃಷ್ಟಿಸುವುದು ಸರಿಯಲ್ಲ, ವಿರೋಧಿಸುವವರಿಗೆ ಸರಿಯಾದ ತಿಳುವಳಿಕೆ ಇಲ್ಲ ಎನಿಸುತ್ತದೆ. ನೂರಾರು ಜನರ ಶ್ರಮದಿಂದ ಚಿತ್ರ ನಿರ್ಮಿಸಲಾಗಿದೆ. ಯಾವುದೇ ದೋಷವಿಲ್ಲದ ಚಿತ್ರವನ್ನು ತಮಿಳು ಅಭಿಮಾನಿಗಳು ಬೆಂಬಲಿಸುತ್ತಾರೆ ಎಂಬ ಭರವಸೆ ಇದೆ” ಎಂದಿದ್ದಾರೆ.

ಫರ್ಹಾನಾ ಸಿನಿಮಾವನ್ನು ನೆಲ್ಸನ್ ವೆಂಕಟೇಸನ್ ನಿರ್ದೇಶನ ಮಾಡಿದ್ದಾರೆ. ಪ್ರಕಾಶ್ ಬಾಬು ಹಾಗೂ ಎಸ್​ಆರ್ ಬಾಬು ಈ ಸಿನಿಮಾಕ್ಕೆ ಬಂಡವಾಳ ಹೂಡಿದ್ದಾರೆ. ಸಿನಿಮಾದಲ್ಲಿ ಐಶ್ವರ್ಯಾ ರಾಜೇಶ್ ಜೊತೆಗೆ ಸೆಲ್ವ ರಾಘವನ್, ಜಿತಿನ್ ರಮೇಶ್, ಅನುಮೋಲ್, ಐಶ್ವರ್ಯಾ ದತ್ತ ನಟಿಸಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ