Met Gala: ಪ್ರಿಯಾಂಕಾ ಚೋಪ್ರಾ ಧರಿಸಿದ್ದ ನೆಕ್ಲೆಸ್ ಬೆಲೆ 204 ಕೋಟಿ! ಏನಿದರ ವಿಶೇಷತೆ?
Met Gala 2023: ಮೆಟ್ ಗಾಲಾ 2023ಯಲ್ಲಿ ಪ್ರಿಯಾಂಕಾ ಚೋಪ್ರಾ ಧರಿಸಿದ್ದ ವಜ್ರದ ಆಭರಣದ ಬೆಲೆ 204 ಕೋಟಿ! ಈ ವಜ್ರಕ್ಕೆ ಇಷ್ಟೋಂದು ಬೆಲೆ ಏಕೆ?
Updated on:May 02, 2023 | 10:02 PM
ಸಿನಿಮಾ ನಟಿಯರು ಭಾರಿ ದುಬಾರಿ ಉಡುಗೆಗಳನ್ನು ಧರಿಸುವುದು ಸಾಮಾನ್ಯ. ನಟಿಯರು ತೊಡುವ ಬಟ್ಟೆಗಳು, ಆಭರಣಗಳು ಅವುಗಳ ಬೆಲೆಗಳು ಆಗಾಗ್ಗೆ ಸದ್ದು ಮಾಡುತ್ತಿರುತ್ತವೆ. ಯಾವುದೇ ನಟಿಯರು ತೊಡುವ ಬಟ್ಟೆ, ಆಭರಣಗಳ ಬೆಲೆ ಹೆಚ್ಚೆಂದ್ರೆ ಕೋಟಿ, ಎರಡು ಕೋಟಿ ತೀರ ಹೆಚ್ಚೆಂದರೆ ಹತ್ತು ಕೋಟಿ ಇರಬಹುದು ಆದರೆ ನಟಿ ಪ್ರಿಯಾಂಕಾ ಚೋಪ್ರಾ (Priyanka Chopra) ಇತ್ತೀಚೆಗಿನ ಕಾರ್ಯಕ್ರಮವೊಂದರಲ್ಲಿ ಬರೋಬ್ಬರಿ 204 ಕೋಟಿ ರುಪಾಯಿ ಬೆಲೆಯ ಆಭರಣವನ್ನು ಧರಿಸಿದ್ದರು. ಅಷ್ಟು ದುಬಾರಿ ಮೊತ್ತದ ಈ ಆಭರಣದ ವಿಶೇಷತೆಯೇನು?
ನಟಿ ಪ್ರಿಯಾಂಕಾ ಚೋಪ್ರಾ, ಇತ್ತೀಚೆಗಷ್ಟೆ ನಡೆದ ಮೆಟ್ ಗಾಲಾ 2023 (Met Gala 2023) ಫ್ಯಾಷನ್ ಕಾರ್ಯಕ್ರಮದಲ್ಲಿ ಪತಿ ನಿಕ್ ಜೋನಸ್ (Nick Jonas) ಜೊತೆಗೆ ಭಾಗವಹಿಸಿದ್ದರು. ಕಪ್ಪು ಬಣ್ಣದ ಗೌನ್ ಮಾದರಿಯ ಗ್ಲಾಮರಸ್ ಉಡುಗೆ ತೊಟ್ಟಿದ್ದ ಪ್ರಿಯಾಂಕಾ, ಕೈಗೆ ಬಿಳಿಯ ಬಣ್ಣದ ಗವಸು ಧರಿಸಿದ್ದರು. ಆದರೆ ಅತಿ ಹೆಚ್ಚು ಗಮನ ಸೆಳೆದಿದ್ದು ಪ್ರಿಯಾಂಕಾ ಕೊರಳಲ್ಲಿದ್ದ ಧರಿಸಿದ್ದ ಹೊಳೆಯುವ ನೆಕ್ಲೆಸ್. ಬಿಳಿ ಬಣ್ಣದ ಆದರೆ ಅಂಚಿನಲ್ಲಿ ತಿಳಿ ನೀಲಿ ಬಣ್ಣದಲ್ಲಿ ಹೊಳೆಯುತ್ತಿದ್ದ ವಜ್ರದ ನೆಕ್ಲೆಸ್ ಧರಿಸಿದ್ದರು ಪ್ರಿಯಾಂಕಾ ಚೋಪ್ರಾ, ಈ ನೆಕ್ಲೆಸ್ ಬೆಲೆ ಬರೋಬ್ಬರಿ 204 ಕೋಟಿ ರುಪಾಯಿಗಳು. ನೆಕ್ಲೆಸ್ಗೆ ಇಷ್ಟು ದುಬಾರಿ ಮೌಲ್ಯ ಬರುವುದಕ್ಕೆ ಆ ತಿಳಿ ನೀಲಿ ಬಣ್ಣದ ವಜ್ರವೇ ಕಾರಣ.
ಪ್ರಿಯಾಂಕಾ ಧರಿಸಿರುವ ಇಡೀಯ ನೆಕ್ಲೆಸ್ ವಜ್ರದ್ದೇ ಆದರೂ ನೆಕ್ಲೆಸ್ನ ತುದಿಯಲ್ಲಿ ತೂಗುತ್ತಿರುವ ತಿಳಿ ನೀಲಿ ಬಣ್ಣದ ವಜ್ರದ ತುಣುಕಿಗೆ ಭಾರಿ ದೊಡ್ಡ ಬೆಲೆ. ಇದು ಬಲ್ಗರಿಯನ್ ಲಗೂನಾ ಬ್ಲೂ ಡೈಮೆಂಡ್. ವಿಶ್ವದಲ್ಲಿಯೇ ಅತಿ ಹೆಚ್ಚು ಬೆಲೆಗೆ ಹರಾಜಾದ ವಜ್ರದ ತುಣುಕುಗಳಲ್ಲಿ ಇದೂ ಒಂದು. 11.6 ಕ್ಯಾರೆಟ್ನ ಈ ವಜ್ರ ನೈಸರ್ಗಿಕ ತಿಳಿ ನೀಲಿ ಬಣ್ಣವನ್ನು ಹೊಂದಿದೆ, ಇದು ಅಪರೂಪದಲ್ಲಿ ಅಪರೂಪ. ಈ ಬಣ್ಣಕ್ಕೆ ಫ್ಯಾನ್ಸಿ ವಿವಿದ್ ಬ್ಲೂ ಎನ್ನಲಾಗುತ್ತದೆ ಜೊತೆಗೆ ಲಗೂನಾ ಬ್ಲೂ ಎಂದೂ ಕರೆಯಲಾಗುತ್ತದೆ.
1970 ರಲ್ಲಿ ಮೊದಲ ಬಾರಿಗೆ ಇಟ್ಯಾಲಿಯನ್ ಫ್ಯಾಷನ್ ಹೌಸ್ ಬಲ್ಗರಿ, ಲಗೂನ್ ಬ್ಲೂ ವಜ್ರವನ್ನು ಮಾರಾಟ ಮಾಡಿತ್ತು, ಆಗಿನ ಕಾಲಕ್ಕೆ ಅತಿ ಹೆಚ್ಚು ಬೆಲೆಗೆ ಮಾರಾಟವಾದ ಬಲ್ಗರಿ ಆಭರಣ ಎಂಬ ಖ್ಯಾತಿಗೆ ಈ ವಜ್ರದ ತುಣುಕು ಪಡೆದುಕೊಂಡಿತ್ತು. ಎಲ್ಲ ವಜ್ರಗಳಲ್ಲಂತ ಈ ಲಗೂನ್ ಬ್ಲೂ. ಭೂಮಿಯ ಬಹು ಆಳದಲ್ಲಿ ಈ ನೀಲಿ ಬಣ್ಣದ (ಅಥವ ಇನ್ಯಾವುದೇ ಬಣ್ಣದ) ವಜ್ರಗಳು ದೊರಕುತ್ತವೆ. ಅತಿಯಾದ ಒತ್ತಡದಿಂದಾಗಿ ಇವುಗಳ ಬಣ್ಣ ಬದಲಾಗಿರುತ್ತದೆ. ಇವುಗಳ ಸಂರಚನೆಯಲ್ಲಿಯೂ (ಕಾರ್ಬನ್ ಸ್ಟ್ರಕ್ಚರ್) ಸಣ್ಣ ವ್ಯತ್ಯಾಸವಿರುತ್ತದೆ. ಸಾಮಾನ್ಯ ಬಿಳಿ ವಜ್ರಗಳಿಗೆ ಹೋಲಿಸಿದರೆ ನೀಲಿ ವಜ್ರಗಳು ಅಪರೂಪದ. ಅದರಲ್ಲಿಯೂ 10 ಕ್ಕಿಂತಲೂ ಹೆಚ್ಚಿನ ಕ್ಯಾರೆಟ್ ಹೊಂದಿರುವ ವಜ್ರಗಳು ಸಿಗುವುದು ವಿರಳದಲ್ಲಿ ವಿರಳ.
ಇದನ್ನೂ ಓದಿ:Met Gala 2023: ಕೋಟಿ ಕೋಟಿ ಬೆಲೆ ಬಾಳುವ ಬಟ್ಟೆಯಲ್ಲಿ ಅಂಬಾನಿ ಏಕೈಕ ಪುತ್ರಿ, ಈ ಉಡುಪಿನ ವಿಶೇಷತೆ ಇಲ್ಲಿದೆ ನೋಡಿ
ಈ ಹಿಂದೆ ದೊರಕಿದ್ದ 15.6 ಕ್ಯಾರೆಟ್ನ ‘ದಿ ಡಿ ಬೀರ್ಸ್ ಬ್ಲೂ’ ವಜ್ರವು 458 ಕೋಟಿಗೆ ಮಾರಾಟವಾಗಿತ್ತು, 12.03 ಕ್ಯಾರೆಟ್ ಇದ್ದ ಬ್ಲೂ ಮೂನ್ ಆಫ್ ಜೋಸೆಫೈನ್ ವಜ್ರವು 392 ಕೋಟಿ ರುಪಾಯಿಗಳಿಗೆ ಮಾರಾಟವಾಗಿತ್ತು. 1970 ರಲ್ಲಿ ಬಲ್ಗರಿಯು ಭಾರಿ ಶ್ರೀಮಂತ ಕುಟುಂಬವೊಂದಕ್ಕೆ ಈ ವಜ್ರವನ್ನು ಉಂಗುರ ರೂಪದಲ್ಲಿ ಮಾರಾಟ ಮಾಡಿತ್ತು. ಹಲವು ವರ್ಷಗಳ ಕಾಲ ಅದೇ ಕುಟುಂಬದಲ್ಲಿ ಇದ್ದ ಈ ವಜ್ರ ಇದೀಗ ಮೆಟ್ ಗಾಲಾನಲ್ಲಿ ಮತ್ತೆ ಪ್ರದರ್ಶಿತಗೊಂಡಿದೆ ಅದೂ ಪ್ರಿಯಾಂಕಾ ಚೋಪ್ರಾರ ಕೊರಳಿನಲ್ಲಿ ತೂಗಿ. ಮೆಟ್ ಗಾಲಾನಲ್ಲಿ ಈ ವಜ್ರವನ್ನು ಪ್ರದರ್ಶನಕ್ಕೆ ಇಡಲಾಗಿದ್ದು, ಮೆಟ್ ಗಾಲಾ ಬಳಿಕ ಇದು ಮತ್ತೆ ಹರಾಜಾಗಲಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 7:43 pm, Tue, 2 May 23
