ನಿರ್ದೇಶಕನಾಗಿ ಗೆಲ್ಲುತ್ತಾರಾ ಸ್ಟಾರ್ ನಟ ಮೋಹನ್​ಲಾಲ್, ‘ಬರೋಜ್’ ಟ್ರೇಲರ್ ಹೇಗಿದೆ?

ದಕ್ಷಿಣ ಭಾರತದ ಸೂಪರ್ ಸ್ಟಾರ್​ಗಳಲ್ಲಿ ಒಬ್ಬರು ಮೋಹನ್​ಲಾಲ್, ಅಭಿನಯದಲ್ಲಿ, ಕತೆಗಳನ್ನು ಆಯ್ದುಕೊಳ್ಳುವ ವಿಧಾನದಲ್ಲಿ ಮೋಹನ್ ಲಾಲ್ ಅವರನ್ನು ಮೀರಿಸುವ ಸೂಪರ್ ಸ್ಟಾರ್​ಗಳು ಕಡಿಮೆ. ನಟನಾಗಿ, ನಿರ್ಮಾಪಕನಾಗಿ ದೊಡ್ಡ ಗೆಲುವು ಕಂಡಿರುವ ಮೋಹನ್ ಲಾಲ್ ಇದೇ ಮೊದಲ ಬಾರಿಗೆ ನಿರ್ದೇಶನಕ್ಕೆ ಇಳಿದಿದ್ದಾರೆ. ಅದೂ ‘ಬರೋಜ್’ ಹೆಸರಿನ ಬಹಳ ಭಿನ್ನವಾದ ಸಿನಿಮಾದ ಮೂಲಕ. ಮಾಯಾ ಲೋಕ ಮತ್ತು ವಾಸ್ತವದ ಕತೆಯನ್ನು ಒಳಗೊಂಡ ಭಿನ್ನವಾದ ಕತೆಯುಳ್ಳ ಸಿನಿಮಾ ಇದು.

40 ವರ್ಷಗಳ ವೃತ್ತಿಜೀವನಲ್ಲಿ 360ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಮೋಹನ್‌ಲಾಲ್ ನಟಿಸಿದ್ದಾರೆ. ಹಲವು ರಾಜ್ಯ ಪ್ರಶಸ್ತಿ, ರಾಷ್ಟ್ರಪ್ರಶಸ್ತಿಗಳನ್ನು ಗಳಿಸಿದ್ದಾರೆ. ನಟನೆ ಮೂಲಕ ದೇಶದ ಗಮನ ಸೆಳೆದಿರುವ ಮೋಹನ್ ಲಾಲ್ ಈಗ ‘ಬರೋಜ್‌’ ಸಿನಿಮಾ ಮೂಲಕ ನಿರ್ದೇಶಕನ ಕ್ಯಾಪ್‌ ಧರಿಸಿದ್ದಾರೆ. ಸಿನಿಮಾದ ಟ್ರೈಲರ್ ಕೆಲ ದಿನದ ಹಿಂದಷ್ಟೆ ಬಿಡುಗಡೆ ಆಗಿದ್ದು, ಅಮಿತಾಬ್ ಬಚ್ಚನ್ ಆದಿಯಾಗಿ ಹಲವು ಭಾಷೆಗಳ ತಾರೆಯರು ಟ್ರೇಲರ್ ಅನ್ನು ಮೆಚ್ಚಿಕೊಂಡಿದ್ದಾರೆ.

‘ಬರೋಜ್’ ನಿರ್ದೇಶಕರಾಗಿ ಮೋಹನ್‌ಲಾಲ್‌ಗೆ ಮೊದಲ ಸಿನಿಮಾ. ನಿರ್ದೇಶನದ ಜೊತೆಗೆ ಸಿನಿಮಾದ ನಾಯಕನ ಪಾತ್ರದಲ್ಲಿಯೂ ಮೋಹನ್ ಲಾಲ್ ನಟಿಸಿದ್ದಾರೆ. ‘ಬರೋಜ್’ ಎಂಬುದು ನಿಧಿ ಕಾಯುವ ಭೂತದ ಹೆಸರು. ಶತಮಾನಗಳಿಂದಲೂ ವಾಸ್ಕೋಡಿಗಾಮನ ಅರಮನೆಯಲ್ಲಿ ನಿಧಿ ಕಾಯುವ ಭೂತಕ್ಕೂ ಒಂದು ಕತೆ ಇದೆ. ಈ ಭೂತದ ಕರ್ತವ್ಯ ನಿಷ್ಠೆಗೆ ಸವಾಲೊಂದು ಎದುರಾಗಿದೆ. ಸಿನಿಮಾದ ಟ್ರೈಲರ್ ನೋಡಿದರೆ ಇದೊಂದು ಬಹಳ ಥ್ರಿಲ್ಲರ್ ಅಂಶಗಳುಳ್ಳ ಜೊತೆಗೆ ಅದ್ಭುತ ವಿಎಫ್​ಎಕ್ಸ್​ ಸಹ ಇರುವ ಸಿನಿಮಾ ಎಂಬುದು ಖಾತ್ರಿ ಆಗುತ್ತಿದೆ.

ಇದನ್ನೂ ಓದಿ:ಮೋಹನ್ ಲಾಲ್, ಮಮ್ಮುಟಿಗಳ ದಾಖಲೆಗಳ ಮುರಿದ ಹುಡುಗರು ‘ಮಂಜ್ಞುಮಲ್ ಬಾಯ್ಸ್’

‘ಬರೋಜ್’ ಸಿನಿಮಾ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ತೆರೆಗೆ ಬರಲಿದೆ. ಸಿನಿಮಾ 3ಡಿ ಅವತರಣಿಕೆಯೂ ಬಿಡುಗಡೆ ಆಗಲಿದೆ. ಸಿನಿಮಾದಲ್ಲಿನ ಭೂತಕಾಲ, ವರ್ತಮಾನದ ಕಾಲದ ಕತೆ ಪ್ರೇಕ್ಷಕನನ್ನು ಹಿಡಿದಿಡುತ್ತದೆ ಎಂಬ ನಂಬಿಕೆ ಮೋಹನ್ ಲಾಲ್​ ಅವರದ್ದು. ಅಕ್ಷಯ್ ಕುಮಾರ್ ಅವರು ಈ ಸಿನಿಮಾದ ಹಿಂದಿ ಟ್ರೈಲರ್ ಅನ್ನು ಬಿಡುಗಡೆ ಮಾಡಿದ್ದಾರೆ. ಇದೀಗ ಕನ್ನಡದಲ್ಲಿಯೂ ಸಿನಿಮಾದ ಟ್ರೇಲರ್‌ ಬಿಡುಗಡೆ ಆಗಿ ವೈರಲ್ ಆಗುತ್ತಿದೆ.

ಮೋಹನ್ ಲಾಲ್ ಅವರ ಆಪ್ತ, ಮಾಜಿ ಡ್ರೈವರ್ ಆಂಟೋನಿ ಪೆರುಂಬವೂರ್ ಅವರ ಆಶೀರ್ವಾದ್ ಸಿನಿಮಾಸ್‌ನ ಮೂಲಕ ‘ಬರೋಜ್‌’ ಸಿನಿಮಾ ನಿರ್ಮಾಣ ಮಾಡುತ್ತಿದ್ದಾರೆ. ಪಿವಿಆರ್ ಪಿಕ್ಚರ್ಸ್ ಈ ಸಿನಿಮಾವನ್ನು ವಿತರಣೆ ಮಾಡಲಿದೆ. ಸಿನಿಮಾದಲ್ಲಿ ಮೋಹನ್ ಲಾಲ್ ಜೊತೆಗೆ ಪೃಥ್ವಿರಾಜ್ ಸುಕುಮಾರ್ ಸಹ ನಟಿಸಿದ್ದು, ಸಿನಿಮಾದಲ್ಲಿ ಹಲವು ವಿದೇಶಿ ನಟ-ನಟಿಯರು ಇದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ