ಶೀಘ್ರವೇ ಪ್ರಾರಂಭವಾಗಲಿದೆ ಬಿಗ್ಬಾಸ್ ಕನ್ನಡ ಒಟಿಟಿ ಸೀಸನ್ 2?
Bigg Boss Kannada OTT: ಬಿಗ್ಬಾಸ್ ಕನ್ನಡ ಸೀಸನ್ 10 ಇತ್ತೀಚೆಗಷ್ಟೆ ಮುಗಿದಿದೆ. ಬಿಗ್ಬಾಸ್ ಕನ್ನಡ ಇತಿಹಾಸದಲ್ಲಿಯೇ ಸೀಸನ್ 10 ಅತ್ಯಂತ ಯಶಸ್ವಿ ಶೋ ಆಗಿದೆ. ಇದೀಗ ಬಿಗ್ಬಾಸ್ ಕನ್ನಡ ಒಟಿಟಿ ಸೀಸನ್ 2 ಆರಂಭಿಸುವ ಯೋಜನೆ ಸಿದ್ಧವಾಗುತ್ತಿದೆ.
Updated on: Feb 08, 2024 | 10:12 PM
ಬಿಗ್ಬಾಸ್ (BiggBoss) ಕನ್ನಡ ಸೀಸನ್ 10 ಕೆಲ ದಿನಗಳ ಹಿಂದಷ್ಟೆ ಮುಕ್ತಾಯವಾಗಿದೆ. ಕಿಚ್ಚ ಸುದೀಪ್ ಅವರೇ ಹೇಳಿದಂತೆ ಸೀಸನ್ 10 ಈವರೆಗಿನ ಬಿಗ್ಬಾಸ್ ಕನ್ನಡ ಸೀಸನ್ಗಳಲ್ಲಿಯೇ ಅತ್ಯಂತ ಯಶಸ್ವಿ, ಅತ್ಯಂತ ಜನಪ್ರಿಯ ಸೀಸನ್. ಅದು ನಿಜವೂ ಹೌದು, ಫಿನಾಲೆ ವೇಳೆಗಾಗಲೇ ಒಬ್ಬೊಬ್ಬರ ಸ್ಪರ್ಧಿಗೆ ಎರಡು ಕೋಟಿ, ಮೂರು ಕೋಟಿ ಮತಗಳು ಬಂದಿದ್ದವು. ಬಿಗ್ಬಾಸ್ನಿಂದ ಹೊರಬಂದ ಮೇಲಂತೂ ಸ್ಪರ್ಧಿಗಳು ಸೆಲೆಬ್ರಿಟಿಗಳೇ ಆಗಿಬಿಟ್ಟಿದ್ದಾರೆ. ಬಿಗ್ಬಾಸ್ ಸೀಸನ್ 10ರ ಯಶಸ್ಸು ಕಂಡು ಇದೀಗ ಬಿಗ್ಬಾಸ್ ಒಟಿಟಿಯನ್ನು ಪುನಃ ಆರಂಭಿಸುವ ಆಲೋಚನೆ ಆಯೋಜಕರಲ್ಲಿ ಮೂಡಿದೆ.
ಬಿಗ್ಬಾಸ್ ಒಟಿಟಿ ಸೀಸನ್ ಈಗಾಗಲೇ ಹಿಂದಿಯಲ್ಲಿ ಪ್ರಸಾರವಾಗಿದೆ. ಕನ್ನಡದಲ್ಲಿಯೂ ಸಹ ಬಿಗ್ಬಾಸ್ ಒಟಿಟಿ ಒಂದು ಸೀಸನ್ ನಡೆದಿದೆ. ಇದೀಗ ಇದೇ ಸೀಸನ್ನ ಎರಡನೇ ಭಾಗವನ್ನು ಪ್ರಾರಂಭಿಸಲು ಯೋಜನೆ ಸಿದ್ಧವಾಗುತ್ತಿದೆ. ಮೊದಲ ಬಿಗ್ಬಾಸ್ ಒಟಿಟಿ ಸೀಸನ್ 2022ರಲ್ಲಿ ನಡೆದಿತ್ತು. 42 ದಿನಗಳ ಕಾಲ ನಡೆದ ಈ ಶೋನಲ್ಲಿ ರೂಪೇಶ್ ಶೆಟ್ಟಿ, ರಾಕೇಶ್ ಅಡಿಗ, ಆರ್ಯವರ್ಧನ್ ಗುರೂಜಿ ಹಾಗೂ ಸಾನ್ಯಾ ಐಯ್ಯರ್ ಅವರುಗಳು ಚಾಂಪಿಯನ್ಗಳಾಗಿ, ಬಿಗ್ಬಾಸ್ ಟಿವಿ ಸೀಸನ್ಗೆ ಆಯ್ಕೆ ಆಗಿದ್ದರು. ಟಿವಿ ಸೀಸನ್ನಲ್ಲೂ ಚೆನ್ನಾಗಿ ಆಡಿದ್ದ ರಾಕೇಶ್ ಅಡಿಗ ಹಾಗೂ ರೂಪೇಶ್ ಫಿನಾಲೆಗೆ ಬಂದರು. ರೂಪೇಶ್ ವಿನ್ನರ್ ಆಗಿದ್ದರು.
ಇದನ್ನೂ ಓದಿ:ಬಿಗ್ಬಾಸ್ ಕನ್ನಡ 10ರ ಸ್ಪರ್ಧಿಗಳ ಆಯ್ಕೆ ಹೇಗೆ ನಡೆಯಿತು? ನಿರ್ದೇಶಕರ ಉತ್ತರ
ಅದೇ ರೀತಿ ಈಗ ಬಿಗ್ಬಾಸ್ ಕನ್ನಡ ಒಟಿಟಿ ಸೀಸನ್ 2 ಪ್ರಾರಂಭಿಸಲು ಆಯೋಜಕರು ಯೋಜನೆ ಹಾಕಿದ್ದು, ಮೊದಲ ಸೀಸನ್ನಂತೆ ಇದನ್ನೂ ಸಹ 42 ದಿನಗಳ ಕಡಿಮೆ ಅವಧಿಗೆ ನಡೆಸಲು ನಿರ್ಧರಿಸಿದ್ದಾರೆ ಎನ್ನಲಾಗುತ್ತಿದೆ. ಕಳೆದ ಬಾರಿ ವೂಟ್ನಲ್ಲಿ ಬಿಗ್ಬಾಸ್ ಕನ್ನಡ ಒಟಿಟಿ ಸೀಸನ್ 1 ಪ್ರಸಾರವಾಗಿತ್ತು. ಆ ಶೋ ಅನ್ನೂ ಸಹ ಕಿಚ್ಚ ಸುದೀಪ್ ಅವರೇ ನಿರೂಪಣೆ ಮಾಡಿದ್ದರು. ಆದರೆ ಈ ಬಾರಿ ಬಿಗ್ಬಾಸ್ ಒಟಿಟಿ ಸೀಸನ್ 2 ಜಿಯೋ ಸಿನಿಮಾಸ್ ಒಟಿಟಿಯಲ್ಲಿ ಲೈವ್ ಪ್ರಸಾರವಾಗಲಿದೆ ಎನ್ನಲಾಗುತ್ತಿದೆ. ಈ ಸೀಸನ್ ಅನ್ನೂ ಸಹ ಕಿಚ್ಚ ಸುದೀಪ್ ಅವರೇ ನಿರೂಪಣೆ ಮಾಡಲಿದ್ದಾರೆ.
ಕೆಲವು ದಿನಗಳ ಹಿಂದೆಯಷ್ಟೆ 114 ದಿನಗಳ ವರೆಗೆ ಬಿಗ್ಬಾಸ್ ಕನ್ನಡ ಸೀಸನ್ 10ನ್ನು ಪ್ರೇಕ್ಷಕರು ನೋಡಿದ್ದಾರೆ. ಈಗ ಮತ್ತೆ ಒಟಿಟಿ ಸೀಸನ್ ಆರಂಭವಾದರೆ ಅದನ್ನು ಜನ ನೋಡುತ್ತಾರೆಯೇ, ಟಿವಿ ಬಿಗ್ಬಾಸ್ಗೆ ಸಿಕ್ಕ ಜನಪ್ರಿಯತೆ ಒಟಿಟಿಗೆ ಸಿಗುತ್ತದೆಯೇ? ಕಾದು ನೋಡಬೇಕಿದೆ. ಅಂದಹಾಗೆ, ಇದೇ ಪ್ರಶ್ನೆಗಳನ್ನಿಟ್ಟುಕೊಂಡು ಪ್ರಾರಂಭವಾಗಿದ್ದ ಈ ಹಿಂದಿನ ಬಿಗ್ಬಾಸ್ ಕನ್ನಡ ಒಟಿಟಿ ಸೀಸನ್ 1 ಸಖತ್ ಆಗಿ ಜನಪ್ರಿಯವಾಗಿತ್ತು, ಈಗ ಜಿಯೋ ಫ್ರೀ ಸಹ ಇರುವ ಕಾರಣ ಈ ಸೀಸನ್ ಸಹ ಯಶಸ್ವಿಯಾಗುವ ಸಾಧ್ಯತೆ ಹೆಚ್ಚಿದೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
