ಶ್ರೀಮಂತ ವೇಶ್ಯೆಯರ ಪಾತ್ರದಲ್ಲಿ ಫೇಮಸ್ ನಟಿಯರು; ಇದು ‘ಹೀರಾಮಂಡಿ’ ಕಹಾನಿ
ಬಹುನಿರೀಕ್ಷಿತ ‘ಹೀರಾಮಂಡಿ’ ವೆಬ್ ಸರಣಿಯ ಫಸ್ಟ್ ಲುಕ್ ವಿಡಿಯೋ ಬಿಡುಗಡೆ ಆಗಿದೆ. ‘ಹೀರಾಮಂಡಿ’ ಶೀರ್ಷಿಕೆಯ ಜೊತೆ ‘ದಿ ಡೈಮಂಡ್ ಬಜಾರ್’ ಎಂಬ ಟ್ಯಾಗ್ ಲೈನ್ ಗಮನ ಸೆಳೆಯುತ್ತದೆ. ನೆಟ್ಫ್ಲಿಕ್ಸ್ನಲ್ಲಿ ಈ ವೆಬ್ ಸಿರೀಸ್ ಬಿಡುಗಡೆ ಆಗಲಿದೆ. ವೈಭವದಿಂದ ಕೂಡಿರುವ ಫಸ್ಟ್ ಲುಕ್ ವಿಡಿಯೋದಲ್ಲಿ ಸೋನಾಕ್ಷಿ ಸಿನ್ಹಾ, ರಿಚಾ ಚಡ್ಡಾ, ಅದಿತಿ ರಾವ್ ಹೈದರಿ, ಮನೀಶಾ ಕೊಯಿರಾಲಾ ಮುಂತಾದ ನಟಿಯರ ಗೆಟಪ್ ಗಮನ ಸೆಳೆಯುವಂತಿದೆ.
ನಿರ್ದೇಶಕ ಸಂಜಯ್ ಲೀಲಾ ಬನ್ಸಾಲಿ (Sanjay Leela Bhansali) ಅವರು ಏನೇ ಮಾಡಿದರೂ ಅಲ್ಲೊಂದು ವಿಶೇಷ ಇದ್ದೇ ಇರುತ್ತದೆ. ಅವರ ಪ್ರತಿ ಸಿನಿಮಾ ಕೂಡ ವೈಭವದಿಂದ ಕೂಡಿರುತ್ತದೆ. ಇದೇ ಮೊದಲ ಬಾರಿಗೆ ಸಂಜಯ್ ಲೀಲಾ ಬನ್ಸಾಲಿ ಅವರು ವೆಬ್ ಸಿರೀಸ್ ನಿರ್ದೇಶನ ಮಾಡಿದ್ದಾರೆ. ‘ಹೀರಾಮಂಡಿ’ (Heeramandi) ಶೀರ್ಷಿಕೆಯ ಈ ಸೀರಿಸ್ನಲ್ಲಿ ಬಾಲಿವುಡ್ನ ಅನೇಕ ನಟಿಯರು ಬಣ್ಣ ಹಚ್ಚಿದ್ದಾರೆ. ಮನೀಶಾ ಕೊಯಿರಾಲಾ, ಸೋನಾಕ್ಷಿ ಸಿನ್ಹಾ, ರಿಚಾ ಚಡ್ಡಾ, ಅದಿತಿ ರಾವ್ ಹೈದರಿ ಸೇರಿದಂತೆ ಅನೇಕ ನಟಿಯರು ಈ ಸಿರೀಸ್ನಲ್ಲಿ ನಟಿಸಿದ್ದಾರೆ. ಅವರೆಲ್ಲ ಶ್ರೀಮಂತ ವೇಶ್ಯೆಯರ ಪಾತ್ರ ಮಾಡಿದ್ದಾರೆ ಎಂಬುದು ವಿಶೇಷ. ನೆಟ್ಫ್ಲಿಕ್ಸ್ (Netflix) ಮೂಲಕ ‘ಹೀರಾಮಂಡಿ’ ಬಿಡುಗಡೆ ಆಗಲಿದೆ. ಈಗ ಇದರ ಫಸ್ಟ್ ಲುಕ್ ವಿಡಿಯೋ ರಿಲೀಸ್ ಮಾಡಲಾಗಿದೆ.
‘ಹೀರಾಮಂಡಿ’ ವೆಬ್ ಸರಣಿಯ ಫಸ್ಟ್ ಲುಕ್ ವಿಡಿಯೋ ನೋಡಿದ ಪ್ರೇಕ್ಷಕರಿಗೆ ಸಖತ್ ಇಷ್ಟ ಆಗಿದೆ. ಗತ ಕಾಲದ ಕಹಾನಿಯನ್ನು ಇದು ಒಳಗೊಂಡಿದೆ. ಸ್ವಾತಂತ್ರ್ಯಪೂರ್ವದಲ್ಲಿ ಶ್ರೀಮಂತ ಗಿರಾಕಿಗಳನ್ನು ಹೊಂದಿದ್ದ ವೇಶ್ಯರ ಬದುಕಿನ ಬಗ್ಗೆ ‘ಹೀರಾಮಂಡಿ’ ವೆಬ್ ಸರಣಿಯಲ್ಲಿ ತೋರಿಸಲಾಗುವುದು. ಅವರ ಜೀವನದಲ್ಲಿನ ಪ್ರೀತಿ ಮತ್ತು ದ್ರೋಹದ ಕಥೆ ಇದರಲ್ಲಿ ಇರಲಿದೆ. ಶರ್ಮಿನ್ ಸೇಗಲ್, ಸಂಜೀದಾ ಶೇಖ್ ಕೂಡ ಇದರಲ್ಲಿ ನಟಿಸಿದ್ದಾರೆ.
ಬನ್ಸಾಲಿ ಹೊಸ ಚಿತ್ರಕ್ಕೆ ರಣಬೀರ್ ಕಪೂರ್ ಹೀರೋ; ಶೂಟಿಂಗ್ಗೂ ಮೊದಲೇ ಷರತ್ತುಗಳ ಪಟ್ಟಿ ಇಟ್ಟ ನಟ
‘ದೇವದಾಸ್’, ‘ಪದ್ಮಾವತ್’, ‘ಬಾಜಿರಾವ್ ಮಸ್ತಾನಿ’, ‘ಗಂಗೂಬಾಯಿ ಕಾಠಿಯಾವಾಡಿ’ ಮುಂತಾದ ಕ್ಲಾಸಿಕ್ ಸಿನಿಮಾಗಳನ್ನು ನೀಡಿರುವ ಸಂಜಯ್ ಲೀಲಾ ಬನ್ಸಾಲಿ ಅವರು ಇದೇ ಮೊದಲ ಬಾರಿಗೆ ವೆಬ್ ಸಿರೀಸ್ ನಿರ್ದೇಶನ ಮಾಡಿರುವುದರಿಂದ ‘ಹೀರಾಮಂಡಿ’ ಬಗ್ಗೆ ನಿರೀಕ್ಷೆ ಹೆಚ್ಚಾಗಿದೆ. ಅದ್ದೂರಿ ಬಜೆಟ್ನಲ್ಲಿ ಇದು ನಿರ್ಮಾಣ ಆಗಿದೆ. ಬನ್ಸಾಲಿ ಅವರ ಸಿನಿಮಾಗಳಲ್ಲಿ ಇರುವಂತಹ ಅದ್ದೂರಿತನ ‘ಹೀರಾಮಂಡಿ’ ಫಸ್ಟ್ ಲುಕ್ ವಿಡಿಯೋದಲ್ಲೂ ಕಾಣಿಸಿದೆ.
‘ಹೀರಾಮಂಡಿ’ ಫಸ್ಟ್ ಲುಕ್ ವಿಡಿಯೋ:
‘ಹೀರಾಮಂಡಿ’ ಶೀರ್ಷಿಕೆಗೆ ‘ದಿ ಡೈಮಂಡ್ ಬಜಾರ್’ ಎಂಬ ಟ್ಯಾಗ್ ಲೈನ್ ಇದೆ. ಈ ಸಿರೀಸ್ ಯಾವಾಗ ರಿಲೀಸ್ ಆಗಲಿದೆ ಎಂಬ ಬಗ್ಗೆ ಇನ್ನಷ್ಟೇ ಮಾಹಿತಿ ಸಿಗಬೇಕಿದೆ. ಆದಷ್ಟು ಬೇಗ ಇದನ್ನು ಬಿಡುಗಡೆ ಮಾಡಿ ಎಂದು ಫ್ಯಾನ್ಸ್ ಕಮೆಂಟ್ ಮಾಡುತ್ತಿದ್ದಾರೆ. ಫಸ್ಟ್ ಲುಕ್ ವಿಡಿಯೋದಲ್ಲಿ ಸೋನಾಕ್ಷಿ ಸಿನ್ಹಾ, ಮನೀಶಾ ಕೊಯಿರಾಲಾ, ರಿಚಾ ಚಡ್ಡಾ, ಅದಿತಿ ರಾವ್ ಹೈದರಿ ಮುಂತಾದ ನಟಿಯರ ಗೆಟಪ್ ಗಮನ ಸೆಳೆಯುವಂತಿದೆ. ಒಟಿಟಿಯಲ್ಲಿ ಈ ಸೀರಿಸ್ ಹೊಸ ದಾಖಲೆ ಬರೆಯಲಿದೆ ಎಂದು ಫ್ಯಾನ್ಸ್ ನಿರೀಕ್ಷಿಸುತ್ತಿದ್ದಾರೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ