ಬನ್ಸಾಲಿ ಹೊಸ ಚಿತ್ರಕ್ಕೆ ರಣಬೀರ್ ಕಪೂರ್ ಹೀರೋ; ಶೂಟಿಂಗ್ಗೂ ಮೊದಲೇ ಷರತ್ತುಗಳ ಪಟ್ಟಿ ಇಟ್ಟ ನಟ
ಬನ್ಸಾಲಿ ಅವರು ರಣಬೀರ್ ಕಪೂರ್ಗೆ ಈ ಮೊದಲು ‘ಬೈಜು ಬವ್ರಾ’ ಸಿನಿಮಾ ಆಫರ್ನ ನೀಡಿದ್ದರು. ಆದರೆ, ಈ ಕಥೆ ಅವರಿಗೆ ಎಗ್ಸೈಟಿಂಗ್ ಅನಿಸಲಿಲ್ಲ. ಆ ಬಳಿಕ ‘ಲವ್ ಆ್ಯಂಡ್ ವಾರ್’ ಚಿತ್ರದ ಆಫರ್ ನೀಡಲಾಯಿತು. ಈ ಸಿನಿಮಾನ ರಣಬೀರ್ ಒಪ್ಪಿದ್ದಾರೆ.
Updated on: Jan 31, 2024 | 7:58 AM
ಸಂಜಯ್ ಲೀಲಾ ಬನ್ಸಾಲಿ ಸಿನಿಮಾದಲ್ಲಿ ಕೆಲಸ ಮಾಡೋ ಅವಕಾಶ ಎಲ್ಲರಿಗೂ ಸಿಗುವುದಿಲ್ಲ. ಈ ರೀತಿ ಅವಕಾಶ ಸಿಕ್ಕಾಗ ಹೀರೋಗಳು ಮುಂದೆ ಬಂದು ಖುಷಿಖುಷಿಯಿಂದ ಸಿನಿಮಾ ಮಾಡುತ್ತಾರೆ. ಈಗ ಸಂಜಯ್ ಲೀಲಾ ಬನ್ಸಾಲಿ ಹಾಗೂ ರಣಬೀರ್ ಕಪೂರ್ ಒಟ್ಟಾಗಿ ಸಿನಿಮಾ ಮಾಡುತ್ತಿದ್ದಾರೆ. ಈ ಚಿತ್ರಕ್ಕೆ ‘ಲವ್ ಆ್ಯಂಡ್ ವಾರ್’ (Love & War) ಎನ್ನುವ ಶೀರ್ಷಿಕೆ ಇಡಲಾಗಿದೆ. ಈ ಸಿನಿಮಾದ ಶೂಟಿಂಗ್ ಆರಂಭಕ್ಕೂ ಮೊದಲೇ ರಣಬೀರ್ ಕಪೂರ್ ಅವರು ಒಂದಷ್ಟು ಷರತ್ತುಗಳನ್ನು ಹಾಕಿದ್ದಾರೆ. ಈ ಷರತ್ತನ್ನು ಪೂರೈಸಲು ಬನ್ಸಾಲಿ ಸಮ್ಮತಿ ಕೊಟ್ಟಿದ್ದಾರೆ.
ಬನ್ಸಾಲಿ ಹಾಗೂ ರಣಬೀರ್ ಕಪೂರ್ ಈ ಮೊದಲು ‘ಸಾವರಿಯಾ’ ಸಿನಿಮಾದಲ್ಲಿ ಒಟ್ಟಾಗಿ ಕೆಲಸ ಮಾಡಿದ್ದರು. ಈ ಸಿನಿಮಾ ರಿಲೀಸ್ ಆಗಿದ್ದು 2007ರಲ್ಲಿ. ಇದಾದ ಹಲವು ವರ್ಷಗಳ ಬಳಿಕ ಇಬ್ಬರೂ ಮತ್ತೆ ಒಂದಾಗಿದ್ದಾರೆ. ‘ಸಾವರಿಯಾ’ ಮಾಡುವಾಗ ರಣಬೀರ್ ಕಪೂರ್ ಇನ್ನೂ ಯಂಗ್ ಆಗಿದ್ದರು. ಈಗ ಅವರು ಸೂಪರ್ಸ್ಟಾರ್. ಇತ್ತೀಚೆಗೆ ರಿಲೀಸ್ ಆದ ‘ಅನಿಮಲ್’ ಸಿನಿಮಾದಿಂದ ಅವರು ದೊಡ್ಡ ಗೆಲುವು ಕಂಡಿದ್ದಾರೆ. ಹೀಗಾಗಿ ಬನ್ಸಾಲಿಗೆ ಕಂಡೀಷನ್ ಹಾಕಿದ್ದಾರೆ. ‘ಸಾವರಿಯಾ’ ಸಂದರ್ಭದಲ್ಲಿ ಆದ ಕೆಲವು ತಪ್ಪುಗಳು ಈಗ ಆಗದಂತೆ ನೋಡಿಕೊಳ್ಳಲು ಮುಂದಾಗಿದ್ದಾರೆ.
ರಣಬೀರ್ ಕಪೂರ್ ಅವರಿಗೆ ಈ ಮೊದಲು ‘ಬೈಜು ಬವ್ರಾ’ ಸಿನಿಮಾ ಆಫರ್ನ ನೀಡಿದ್ದರು ಬನ್ಸಾಲಿ. ಆದರೆ, ಈ ಕಥೆ ಅವರಿಗೆ ಎಗ್ಸೈಟಿಂಗ್ ಅನಿಸಲಿಲ್ಲ. ಆ ಬಳಿಕ ‘ಲವ್ ಆ್ಯಂಡ್ ವಾರ್’ ಚಿತ್ರದ ಆಫರ್ ನೀಡಲಾಯಿತು. ಈ ಚಿತ್ರವನ್ನು ರಣಬೀರ್ ಒಪ್ಪಿದ್ದಾರೆ. ಈ ಸಿನಿಮಾದಲ್ಲಿ ಆಲಿಯಾ ಭಟ್ ಹಾಗೂ ವಿಕ್ಕಿ ಕೌಶಲ್ ಕೂಡ ನಟಿಸಲಿದ್ದಾರೆ.
ಸಂಜಯ್ ಲೀಲಾ ಬನ್ಸಾಲಿ ಸಿನಿಮಾ ಶೂಟಿಂಗ್ ಆರಂಭಿಸಿದರೆ ಅದು ಪೂರ್ಣಗೊಳ್ಳೋಕೆ ಸಾಕಷ್ಟು ಸಮಯ ಹಿಡಿಯುತ್ತದೆ. ಅವರು ಅಂದುಕೊಂಡ ದಿನಾಂಕದಂದು ಶೂಟಿಂಗ್ ಪೂರ್ಣಗೊಳಿಸಲ್ಲ. ಆದರೆ, ಈ ಬಾರಿ ಹಾಗಾಗಬಾರದು ಅನ್ನೋದು ರಣಬೀರ್ ಕಪೂರ್ ಷರತ್ತು. ಅವರು 270 ದಿನಗಳ ಕಾಲ್ಶೀಟ್ ನೀಡಿದ್ದಾರೆ. ಈ ವರ್ಷ ನವೆಂಬರ್ನಲ್ಲಿ ಸಿನಿಮಾ ಶೂಟಿಂಗ್ ಆರಂಭಿಸಿ, 2025ರ ಜುಲೈನಲ್ಲಿ ಸಿನಿಮಾ ಪೂರ್ಣಗೊಳಿಸುವ ಸೂಚನೆ ನೀಡಿದ್ದಾರೆ. 2025ರ ಆಗಸ್ಟ್ ತಿಂಗಳಲ್ಲಿ ಬೇರೆ ಕಮಿಟ್ಮೆಂಟ್ ಆರಂಭಿಸಲಿದ್ದಾರೆ.
ಇನ್ನು, ಶೂಟಿಂಗ್ ಸಮಯವನ್ನು ಸರಿಯಾಗಿ ಫಿಕ್ಸ್ ಮಾಡಲು ರಣಬೀರ್ ಕಪೂರ್ ಸೂಚಿಸಿದ್ದಾರೆ. ‘ಸಾವರಿಯಾ’ ಸಿನಿಮಾ ಶೂಟಿಂಗ್ ಸಂದರ್ಭದಲ್ಲಿ ಅವರು ಹೆಚ್ಚುವರಿಯಾಗಿ ಕೆಲಸ ಮಾಡಬೇಕಿತ್ತು. ಆದರೆ, ಈ ಬಾರಿ ಆ ರೀತಿ ಆಗದಂತೆ ನೋಡಿಕೊಳ್ಳಲು ಅವರು ಮುಂದಾಗಿದ್ದಾರೆ. ಇನ್ನು, ಸೆಟ್ನಲ್ಲಿ ಶಿಸ್ತು ಇರುವಂತೆ ಅವರು ಸೂಚಿಸಿದ್ದಾರೆ. ಇದೆಲ್ಲಾ ಷರತ್ತಿಗೆ ಸಂಜಯ್ ಲೀಲಾ ಬನ್ಸಾಲಿ ಒಪ್ಪಿಗೆ ಸೂಚಿಸಿದ್ದಾರೆ.
ಇದನ್ನೂ ಓದಿ: 2024ನೇ ಸಾಲಿನ ಫಿಲ್ಮ್ಫೇರ್ ಅವಾರ್ಡ್: ರಣಬೀರ್ ಅತ್ಯುತ್ತಮ ನಟ, ಆಲಿಯಾ ಅತ್ಯುತ್ತಮ ನಟಿ
ರಣಬೀರ್ ಕಪೂರ್ ಹಾಗೂ ಆಲಿಯಾ ಭಟ್ ‘ಬ್ರಹ್ಮಾಸ್ತ್ರ’ ಸಿನಿಮಾದಲ್ಲಿ ಒಟ್ಟಾಗಿ ನಟಿಸಿದ್ದರು. ಈಗ ಈ ಜೋಡಿ ಮತ್ತೆ ಹೊಸ ಚಿತ್ರಕ್ಕಾಗಿ ಒಂದಾಗಿದೆ. ಇವರಿಬ್ಬರನ್ನು ಮತ್ತೊಮ್ಮೆ ತೆರೆಮೇಲೆ ನೋಡಲು ಫ್ಯಾನ್ಸ್ ಕಾದಿದ್ದಾರೆ. ‘ಲವ್ ಆ್ಯಂಡ್ ವಾರ್’ ಸಿನಿಮಾ ನವೆಂಬರ್ನಲ್ಲಿ ಆರಂಭ ಆಗಲಿದೆ. 2025ರ ಕೊನೆಯಲ್ಲಿ ಈ ಚಿತ್ರ ರಿಲೀಸ್ ಆಗೋ ಸಾಧ್ಯತೆ ಇದೆ.
ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
