ನೀವಿಲ್ಲದೇ ನಾನು ಜೀರೋ: ‘ಕಲ್ಕಿ 2898 ಎಡಿ’ ಯಶಸ್ಸಿನ ಹಿಂದಿರುವ ವ್ಯಕ್ತಿಗಳಿಗೆ ಪ್ರಭಾಸ್​ ಧನ್ಯವಾದ

ಸತತ ಸೋಲುಗಳಿಂದ ಕಂಗೆಟ್ಟಿದ್ದ ನಟ ಪ್ರಭಾಸ್​ ಅವರಿಗೆ ‘ಕಲ್ಕಿ 2898 ಎಡಿ’ ಸಿನಿಮಾದಿಂದ ದೊಡ್ಡ ಸಕ್ಸಸ್​ ಸಿಕ್ಕಿದೆ. ಈ ಖುಷಿಯಲ್ಲಿ ಅವರು ತೇಲಾಡುತ್ತಿದ್ದಾರೆ. ಜೂನ್​ 27ರಂದು ಬಿಡುಗಡೆಯಾದ ಈ ಸಿನಿಮಾ ಹಲವು ದಾಖಲೆಗಳನ್ನು ಬರೆದಿದೆ. ನಿರ್ದೇಶಕ ನಾಗ್​ ಅಶ್ವಿನ್ ಅವರ ಕೆಲಸಕ್ಕೆ ಪ್ರೇಕ್ಷಕರು ಮೆಚ್ಚುಗೆ ಸೂಚಿಸಿದ್ದಾರೆ. ಈವರೆಗೂ ಅತಿಹೆಚ್ಚು ಕಲೆಕ್ಷನ್​ ಮಾಡಿದ ಭಾರತದ 6ನೇ ಸಿನಿಮಾ ಎಂಬ ಖ್ಯಾತಿಗೆ ‘ಕಲ್ಕಿ 2898 ಎಡಿ’ ಸಿನಿಮಾ ಪಾತ್ರವಾಗಿದೆ. ಈ ಖುಷಿಯಲ್ಲಿ ಪ್ರಭಾಸ್​ ಅವರು ಧನ್ಯವಾದ ತಿಳಿಸಿದ್ದಾರೆ.

‘ಕಲ್ಕಿ 2898 ಎಡಿ’ ಸಿನಿಮಾದ ಅಧಿಕೃತ ಸೋಶಿಯಲ್​ ಮೀಡಿಯಾ ಖಾತೆಯಲ್ಲಿ ಪ್ರಭಾಸ್​ ಅವರ ಈ ವಿಡಿಯೋ ಹಂಚಿಕೊಳ್ಳಲಾಗಿದೆ. ಮೊದಲಿಗೆ ತಮ್ಮ ಕೈಹಿಡಿದ ಅಭಿಮಾನಿಗಳಿಗೆ ಪ್ರಭಾಸ್​ ಧನ್ಯವಾದ ಅರ್ಪಿಸಿದ್ದಾರೆ. ಬಳಿಕ ನಿರ್ದೇಶಕ ನಾಗ್​ ಅಶ್ವಿನ್​, ನಿರ್ಮಾಪಕರಾದ ಅಶ್ವಿನಿ ದತ್, ಪ್ರಿಯಾಂಕಾ, ಸ್ವಪ್ನಾ ಅವರಿಗೆ ಪ್ರಭಾಸ್​ ಥ್ಯಾಂಕ್ಸ್​ ಹೇಳಿದ್ದಾರೆ. ಚಿತ್ರದ ಗೆಲುವಿಗಾಗಿ ಅಭಿಮಾನಿಗಳು ಅಭಿನಂದನೆ ಸಲ್ಲಿಸುತ್ತಿದ್ದಾರೆ.

‘ನನ್ನ ಅಭಿಮಾನಿಗಳಿಗೆಲ್ಲ ಹಾಯ್.. ಈ ದೊಡ್ಡ ಯಶಸ್ಸಿಗಾಗಿ ಧನ್ಯವಾದಗಳು. ನೀವು ಇಲ್ಲದಿದ್ದರೆ ನಾನು ಜೀರೋ. 5 ವರ್ಷಗಳ ಕಾಲ ಕಷ್ಟಪಟ್ಟಿರುವ ನಾಗ್​ ಅಶ್ವಿನ್​ ಅವರಿಗೆ ಕೂಡ ಥ್ಯಾಂಕ್ಸ್​. ಇಂಥ ದೊಡ್ಡ ಸಿನಿಮಾ ಮಾಡಿದ್ದಕ್ಕಾಗಿ ನಿರ್ಮಾಪಕ ಅಶ್ವಿನಿ ದತ್ ಅವರಿಗೆ ನಾವು ಧನ್ಯವಾದ ಹೇಳಲೇಬೇಕು. ಅವರು ಅತಿ ಧೈರ್ಯವಂತ ನಿರ್ಮಾಪಕರು. ಅವರು ಖರ್ಚು ಮಾಡಿದ್ದನ್ನು ನೋಡಿ ನನಗೇ ಚಿಂತೆ ಆಗಿತ್ತು’ ಎಂದು ಪ್ರಭಾಸ್​ ಹೇಳಿದ್ದಾರೆ.

ಇದನ್ನೂ ಓದಿ: ಪ್ರಭಾಸ್​ ಮೇಲೆ ದಿಶಾ ಪಟಾನಿಗೆ ಪ್ರೀತಿ? ನಟಿಯ ಹೊಸ ಟ್ಯಾಟೂ ನೋಡಿ ಜನರಿಗೆ ಅಚ್ಚರಿ

‘ಸರ್​ ನೀವು ತುಂಬ ಖರ್ಚು ಮಾಡುತ್ತಿದ್ದೀರಿ ಅಂತ ಅಶ್ವಿನಿ ದತ್​ ಅವರಿಗೆ ನಾನು ಹೇಳಿದ್ದೆ. ಅದಕ್ಕೆ ಉತ್ತರಿಸಿದ್ದ ಅವರು, ಇಲ್ಲ.. ಇಲ್ಲ.. ನಾವು ದೊಡ್ಡ ಹಿಟ್​ ನೀಡುತ್ತೇವೆ, ಚಿಂತೆ ಬೇಡ, ನಾವು ಅತ್ಯುತ್ತಮ ಗುಣಮಟ್ಟದ ಸಿನಿಮಾ ಮಾಡಬೇಕು ಅಂತ ಅವರು ಹೇಳಿದ್ದರು. ಸ್ವಪ್ನಾ ಮತ್ತು ಪ್ರಿಯಾಂಕಾ ಅವರಿಗೂ ಧನ್ಯವಾದಗಳು. ಈ ನಿರ್ಮಾಪಕರು ಹಾಗೂ ನಿರ್ದೇಶಕರಿಗೆ ನಾನು ಥ್ಯಾಂಕ್ಸ್​ ಹೇಳಬೇಕು. ಯಾಕೆಂದರೆ ಭಾರತೀಯ ಚಿತ್ರರಂಗದ ದಿಗ್ಗಜರ ಜೊತೆ ಸಿನಿಮಾ ಮಾಡಲು ನನಗೆ ಅವಕಾಶ ಮಾಡಿಕೊಟ್ಟರು’ ಎಂದಿದ್ದಾರೆ ಪ್ರಭಾಸ್​.

‘ಅಮಿತಾಭ್​ ಬಚ್ಚನ್​, ಕಮಲ್​ ಹಾಸನ್​ ಅವರನ್ನು ನೋಡಿಕೊಂಡು ನಾವೆಲ್ಲ ಬೆಳೆದವರು. ಅವರಿಂದ ನಾವು ಸಾಕಷ್ಟು ಕಲಿತಿದ್ದೇವೆ. ಅತಿ ಸುಂದರಿ ದೀಪಿಕಾ ಪಡುಕೋಣೆ ಅವರಿಗೂ ಧನ್ಯವಾದ. ನಾವು ಇದಕ್ಕಿಂತ ದೊಡ್ಡದಾದ ಪಾರ್ಟ್​ 2 ಮಾಡುತ್ತೇವೆ. ನನ್ನ ಅಭಿಮಾನಿಗಳಿಗೆ ಮತ್ತೊಮ್ಮೆ ಧನ್ಯವಾದ. ನಿಮ್ಮೆಲ್ಲರನ್ನು ನಾನು ಪ್ರೀತಿಸುತ್ತೇನೆ’ ಎಂದು ಪ್ರಭಾಸ್​ ಅವರು ಈ ವಿಡಿಯೋ ಪೂರ್ಣಗೊಳಿಸಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.