‘ಸಲಾರ್​’ ಬಿಡುಗಡೆಗೂ ಮುನ್ನವೇ ಅಬ್ಬರಿಸಲಿದೆ ‘ಡಂಕಿ’; ಪ್ರಭಾಸ್​ಗಿಂತ ಒಂದು ದಿನ ಮುಂಚೆ ಶಾರುಖ್​ ಖಾನ್​ ಆಗಮನ

ಈ ವರ್ಷದ ದೊಡ್ಡ ಬಾಕ್ಸ್​ ಆಫೀಸ್​ ಕ್ಲ್ಯಾಶ್​ಗೆ ದಿನಗಣನೆ ಶುರುವಾಗಿದೆ. ಒಂದು ದಿನದ ಅಕ್ಕಪಕ್ಕದಲ್ಲಿ ‘ಸಲಾರ್​’ (Salaar Movie) ಮತ್ತು ‘ಡಂಕಿ’ ಸಿನಿಮಾಗಳು ತೆರೆ ಕಾಣಲಿವೆ. ಈ ಎರಡೂ ಸಿನಿಮಾಗಳ ಮೇಲೆ ಭಾರಿ ನಿರೀಕ್ಷೆ ಇದೆ. 2023ರ ಕ್ರಿಸ್ಮಸ್​ ರಜೆಯ ಲಾಭ ಪಡೆಯಲು ಈ ಸಿನಿಮಾಗಳು ಪ್ಲ್ಯಾನ್​ ಮಾಡಿಕೊಂಡಿವೆ. ಎಲ್ಲವೂ ಅಂದುಕೊಂಡಂತೆ ಆಗಿದ್ದರೆ ಪ್ರಭಾಸ್​ ನಟನೆಯ ‘ಸಲಾರ್​’ ಹಾಗೂ ಶಾರುಖ್​ ಖಾನ್ (Shah Rukh Khan)​ ನಟನೆಯ ‘ಡಂಕಿ’ ಒಂದೇ ದಿನ ಬಿಡುಗಡೆ ಆಗಬೇಕಿತ್ತು. ಆದರೆ ಒಂದು ದಿನ ಮುಂಚಿತವಾಗಿ ‘ಡಂಕಿ’ (Dunki Movie) ತೆರೆಕಾಣಲಿದೆ.

ಸ್ಟಾರ್​ ನಟರು ಮಾತ್ರವಲ್ಲದೇ ಸ್ಟಾರ್​ ನಿರ್ದೇಶಕರ ಕಾರಣದಿಂದಲೂ ಈ ಸಿನಿಮಾಗಳು ಹೈಪ್​ ಸೃಷ್ಟಿ ಮಾಡಿವೆ. ‘ಸಲಾರ್​’ ಚಿತ್ರಕ್ಕೆ ಪ್ರಶಾಂತ್​ ನೀಲ್​ ನಿರ್ದೇಶನ ಮಾಡಿದ್ದಾರೆ. ‘ಕೆಜಿಎಫ್​: ಚಾಪ್ಟರ್​ 2’ ಸಿನಿಮಾದ ಬ್ಲಾಕ್​ ಬಸ್ಟರ್​ ಹಿಟ್​ ಬಳಿಕ ಅವರು ಈ ಸಿನಿಮಾ ನಿರ್ದೇಶಿಸಿರುವುದರಿಂದ ನಿರೀಕ್ಷೆ ಹೆಚ್ಚಾಗಿದೆ. ಹಾಗೆಯೇ, ‘ಡಂಕಿ’ ಸಿನಿಮಾಗೆ ರಾಜ್​ಕುಮಾರ್​ ಹಿರಾನಿ ಅವರು ಆ್ಯಕ್ಷನ್​-ಕಟ್​ ಹೇಳಿದ್ದಾರೆ. ‘3 ಈಡಿಯಟ್ಸ್​’, ‘ಪಿಕೆ’ ರೀತಿಯ ಸೂಪರ್​ ಹಿಟ್​ ಸಿನಿಮಾಗಳಿಂದ ಖ್ಯಾತಿ ಪಡೆದಿರುವ ರಾಜ್​ಕುಮಾರ್ ಹಿರಾನಿ ಅವರ ಕೆಲಸದ ಬಗ್ಗೆ ಸಿನಿಪ್ರಿಯರಿಗೆ ಭರವಸೆ ಇದೆ.

ಇದನ್ನೂ ಓದಿ: 3ನೇ ಗೆಲುವಿಗಾಗಿ ಗೆಟಪ್​ ಬದಲಿಸಿಕೊಂಡ ಶಾರುಖ್​ ಖಾನ್​; ‘ಡಂಕಿ’ ಟ್ರೇಲರ್​ ಹೇಗಿದೆ ನೋಡಿ

ಡಿಸೆಂಬರ್​ 21ರಂದು ವಿಶ್ವಾದ್ಯಂತ ‘ಡಂಕಿ’ ಸಿನಿಮಾ ರಿಲೀಸ್​ ಆಗಲಿದೆ. ಈ ಸಿನಿಮಾದಲ್ಲಿ ಶಾರುಖ್​ ಖಾನ್​, ತಾಪ್ಸಿ ಪನ್ನು, ವಿಕ್ಕಿ ಕೌಶಲ್​ ಮುಂತಾದವರು ನಟಿಸಿದ್ದಾರೆ. ಈ ಸಿನಿಮಾ ತೆರೆಕಂಡ ಮರುದಿನವೇ, ಅಂದರೆ ಡಿಸೆಂಬರ್​ 22ರಂದು ‘ಸಲಾರ್​’ ಬಿಡುಗಡೆ ಆಗಲಿದೆ. ಆ ಸಿನಿಮಾದಲ್ಲಿ ಪ್ರಭಾಸ್​ ಜೊತೆ ಶ್ರುತಿ ಹಾಸನ್​, ಪೃಥ್ವಿರಾಜ್​ ಸುಕುಮಾರನ್​ ಮುಂತಾದವರು ನಟಿಸಿದ್ದಾರೆ. ಈ ಎರಡೂ ಹೈವೋಲ್ಟೇಜ್​ ಸಿನಿಮಾಗಳ ಬಗ್ಗೆ ಸಿನಿಪ್ರಿಯರು ಸಖತ್​ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ.

ಇದನ್ನೂ ಓದಿ: ಶಾರುಖ್​ ಖಾನ್​ ಜೊತೆ ಮೊದಲ ಬಾರಿ ತೆರೆ ಹಂಚಿಕೊಂಡ ನಟಿ ತಾಪ್ಸಿ ಪನ್ನು

ಶಾರುಖ್​ ಖಾನ್​ ಅವರು 2023ರಲ್ಲಿ ಈಗಾಗಲೇ ಎರಡು ಸಿನಿಮಾಗಳಿಂದ ಗೆಲುವು ಕಂಡಿದ್ದಾರೆ. ‘ಜವಾನ್​’, ‘ಪಠಾಣ್​’ ಸಿನಿಮಾಗಳು ಸಾವಿರಾರು ಕೋಟಿ ರೂಪಾಯಿ ಗಳಿಸಿ ಬ್ಲಾಕ್​ ಬಸ್ಟರ್​ ಆಗಿವೆ. ಈಗ ಅವರು ಹ್ಯಾಟ್ರಿಕ್​ ಯಶಸ್ಸಿಗಾಗಿ ಕಾದಿದ್ದಾರೆ. ಅತ್ತ, ಪ್ರಭಾಸ್​ ಅವರು ಸತತ ಸೋಲು ಅನುಭವಿಸಿದ್ದಾರೆ. ಹಾಗಾಗಿ ಅವರಿಗೆ ‘ಸಲಾರ್​’ ಮೂಲಕ ಗೆಲ್ಲಲೇಬೇಕಾದ ಅನಿವಾರ್ಯತೆ ಇದೆ. ‘ಡಂಕಿ’ ಮತ್ತು ‘ಸಲಾರ್​’ ಸಿನಿಮಾದ ಟ್ರೇಲರ್​ ಬಿಡುಗಡೆಯಾಗಿ ಗಮನ ಸೆಳೆಯುತ್ತಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.