ಕೋಟಿ ಲೆಕ್ಕದಲ್ಲಿ ಸಾಲ, ವಾಪಸ್​ ಕೊಡದಿದ್ದರೇ ಕಾರು​ ಮಾಯ: ಇದು ಜೈಲುಹಕ್ಕಿ ಸಂಜನಾ ಬಡ್ಡಿ ವ್ಯವಹಾರ

ಬೆಂಗಳೂರು: ಸ್ಯಾಂಡಲ್‌ವುಡ್‌ಗೆ ಡ್ರಗ್ಸ್ ಜಾಲದ ನಂಟು ಆರೋಪ ಕೇಸ್​ಗೆ ಸಂಬಂಧಿಸಿದಂತೆ ನಟಿ ಸಂಜನಾ ಗಲ್ರಾನಿ ವಿಚಾರಣೆ ವೇಳೆ ಮತ್ತಷ್ಟು ಮಾಹಿತಿ ಬೆಳಕಿಗೆ ಬಂದಿದೆ. ಸಂಜನಾ ಗಲ್ರಾನಿ ನಟನೆ ಜೊತೆಗೆ ಕೋಟಿ ಕೋಟಿ ರೂಪಾಯಿ ಬಡ್ಡಿ ವ್ಯವಹಾರ ಸಹ ನಡೆಸುತ್ತಿದ್ದರಂತೆ.

ಸಂಜನಾ ನಗರದ ಪ್ರತಿಷ್ಠಿತ ಉದ್ಯಮಿಗಳಿಗೆ ಮತ್ತು ಪ್ರತಿಷ್ಠಿತ ಮಾಲ್ ಮಾಲೀಕರಿಗೆ ಸಾಲ ನೀಡುತ್ತಿದ್ದ ಮಾಹಿತಿ ಲಭ್ಯವಾಗಿದ್ದು 20ಕ್ಕೂ ಹೆಚ್ಚು ಜನರಿಗೆ ಸಂಜನಾ ಸಾಲ ನೀಡಿದ್ದಾರೆ ಎಂದು ತಿಳಿದುಬಂದಿದೆ. ಸಂಜನಾ ಮನೆ ಮೇಲೆ ಸಿಸಿಬಿ ಅಧಿಕಾರಿಗಳು ದಾಳಿ ನಡೆಸಿದ್ದ ವೇಳೆ ಹಲವು ಚೆಕ್‌ಗಳು ಪತ್ತೆಯಾಗಿತ್ತಂತೆ. ಇದನ್ನು ಆಧರಿಸಿ ED ಅಧಿಕಾರಿಗಳು ವಿಚಾರಣೆ ನಡೆಸಿದ ವೇಳೆ ಮಾಹಿತಿ ಸಿಕ್ಕಿದೆ.

ಉದ್ಯಮಿಗಳಿಗೆ ಸಾಲ ನೀಡಿ ಬಡ್ಡಿ ವಸೂಲಿ ಮಾಡ್ತಿದ್ದ ಸಂಜನಾ ಸಾಲ ವಸೂಲಾತಿಗೆ ನಾಲ್ವರನ್ನ ಕೆಲಸಕ್ಕೆ ಸಹ ಇಟ್ಟುಕೊಂಡಿದ್ದರಂತೆ. ಇದಲ್ಲದೆ, ಉದ್ಯಮಿಗಳು ಹಾಗೂ ಶಾಪಿಂಗ್ ಮಾಲ್​ ಮಾಲೀಕರು ಒಂದು ವೇಳೆ ಸಾಲ ಅಥವಾ ಬಡ್ಡಿ ಮರುಪಾವತಿಸದಿದ್ದರೇ ಅವರ ಲಕ್ಷಾಂತರ ರೂಪಾಯಿ ಮೌಲ್ಯದ ಐಷಾರಾಮಿ ಕಾರ್​ಗಳನ್ನ ಎತ್ತಾಕಿಕೊಂಡು ಹೋಗ್ತಿದ್ದರಂತೆ ಅನ್ನೋ ಮಾಹಿತಿಯೂ ಸಿಕ್ಕಿದೆ.