‘ಆಪರೇಷನ್ ಡ್ರೀಮ್ ಥಿಯೇಟರ್’ ಸಿನಿಮಾದ ವಿಶೇಷತೆಗಳೇನು?

ಶಿವರಾಜ್ ಕುಮಾರ್ (Shiva Rajkumar), ಡಾಲಿ ಧನಂಜಯ್ (Daali Dhananjay) ನಟಿಸುತ್ತಿರುವ ‘666 ಆಪರೇಷನ್ ಡ್ರೀಮ್ ಥಿಯೇಟರ್’ ಸದ್ಯದ ಕನ್ನಡದ ಬಹು ನಿರೀಕ್ಷಿತ ಸಿನಿಮಾಗಳಲ್ಲಿ ಒಂದೆನಿಸಿಕೊಂಡಿದೆ. ಹೇಮಂತ್ ರಾವ್ ಅವರು ‘ಸಪ್ತ ಸಾಗರದಾಚೆ ಎಲ್ಲೊ’ ಅಂಥಹಾ ಬ್ಲಾಕ್ ಬಸ್ಟರ್ ಸಿನಿಮಾಗಳನ್ನು ನೀಡಿದ ಬಳಿಕ ‘666 ಆಪರೇಷನ್ ಡ್ರೀಮ್ ಥಿಯೇಟರ್’ ನಿರೀಕ್ಷೆ ಹೆಚ್ಚಾಗಿದೆ. ಸಿನಿಮಾದ ಟೀಸರ್ ಇತ್ತೀಚೆಗಷ್ಟೆ ಬಿಡುಗಡೆ ಆಗಿದ್ದು, ಟೀಸರ್ ನೋಡಿದವರಿಗೆ ಸಿನಿಮಾದ ಬಗ್ಗೆ ಕುತೂಹಲದ ಜೊತೆಗೆ ಕೆಲವು ಗೊಂದಲಗಳು ಸಹ ಹುಟ್ಟಿಕೊಂಡಿವೆ. ಇದೀಗ ಹೇಮಂತ್ ರಾವ್ ಅವರು ಸಿನಿಮಾದ ಬಗ್ಗೆ ಮಾತನಾಡಿದ್ದು, ಕೆಲ ಸುಳಿವುಗಳನ್ನು ನೀಡಿದ್ದಾರೆ.

ಸಂದರ್ಶನದಲ್ಲಿ ತಮ್ಮ ಮುಂದಿನ ಸಿನಿಮಾ ಬಗ್ಗೆ ಮಾತನಾಡಿರುವ ಹೇಮಂತ್ ರಾವ್, ತಾವು ನಿರ್ದೇಶಿಸಿದ್ದ ಮೊಟ್ಟ ಮೊದಲ ಕಿರುಚಿತ್ರದಲ್ಲಿ ಬರುವ ಸಣ್ಣ ಸನ್ನಿವೇಶವನ್ನು ಆಧರಿಸಿ ತಾವು ಈ ಕತೆಯನ್ನು ಬರೆದಿರುವುದಾಗಿ ಹೇಳಿಕೊಂಡಿದ್ದಾರೆ. ಅಲ್ಲದೆ, ಈ ಸಿನಿಮಾ ಯಾವುದೇ ಸಿನಿಮಾ ಒಳಗಿನ ಸಿನಿಮಾ ಅಲ್ಲ ಅಥವಾ ಕನಸಿನ ಬಗೆಗೆ ಇರುವ ಸಿನಿಮಾ ಸಹ ಅಲ್ಲ ಎಂದಿದ್ದಾರೆ. ಆ ಮೂಲಕ ಇನ್ನಷ್ಟು ಕುತೂಹವನ್ನು ಸಿನಿಮಾದ ಬಗ್ಗೆ ಮೂಡಿಸಿದ್ದಾರೆ.

ಟೀಸರ್ ನೋಡಿದವರು, ಇದು ಸಿನಿಮಾದ ಒಳಗೆ ನಡೆಯುವ ಸಿನಿಮಾದ ಕತೆ ಇರಬಹುದು ಎಂದು ಕೆಲವರು ಊಹಿಸಿದ್ದರೆ, ಇನ್ನು ಕೆಲವರು ಇದು ಕನಸಿಗೆ ಸಂಬಂಧಿಸಿದ ಸಿನಿಮಾ ಎಂದಿದ್ದರು. ಆದರೆ ಈ ಎರಡೂ ವಾದಗಳನ್ನು ನಿರ್ದೇಶಕ ಹೇಮಂತ್ ರಾವ್ ಅಲ್ಲಗಳೆದಿದ್ದು, ಇದು ಹಲವು ವಿಷಯಗಳನ್ನು ಒಳಗೊಂಡ ಸಿನಿಮಾ ಆಗಿರಲಿದೆ’ ಎಂದಿದ್ದಾರೆ.

ಇದನ್ನೂ ಓದಿ:‘ಕರಾವಳಿ’ ಸಿನಿಮಾ ವಿವಾದ: ಪ್ರಜ್ವಲ್ ದೇವರಾಜ್ ಪರ ನಿಂತ ಮೇಘನಾ ರಾಜ್

ಸಿನಿಮಾದ ಚಿತ್ರೀಕರಣ ಬಹುತೇಕ ಮುಗಿದಿದ್ದು, ಇನ್ನು ಕೇವಲ 20 ದಿನಗಳ ಚಿತ್ರೀಕರಣವಷ್ಟೆ ಬಾಕಿ ಉಳಿದಿದೆ ಎಂದಿರುವ ಹೇಮಂತ್, ಇದು 70-80ರ ದಶಕದಲ್ಲಿ ನಡೆಯುವ ಕತೆಯಾದ್ದರಿಂದ ಆಗಿನ ಕಾಲದ ಫೀಲ್ ಕೊಡಲು ಭಿನ್ನ-ಭಿನ್ನ ರೀತಿಯ ಅಪರೂಪದ ಲೆನ್ಸ್​​ಗಳನ್ನು ಬಳಸಿ ಶೂಟಿಂಗ್ ಮಾಡಿದ್ದೇವೆ. ಒಂದಂತೂ ಬಹಳ ಹಳೆಯ ಕಾಲದ ಲೆನ್ಸ್ ಅನ್ನು ಬಳಸಿದ್ದೇವೆ’ ಎಂದಿದ್ದಾರೆ. ಜೊತೆಗೆ ಈ ಸಿನಿಮಾದ ಶೂಟಿಂಗ್​​ಗಾಗಿ ಸುಮಾರು 25 ಭಿನ್ನ-ಭಿನ್ನ ರೀತಿಯ ಸೆಟ್​​ಗಳನ್ನು ಸಹ ಅವರು ಹಾಕಿದ್ದರಂತೆ.

ಸಿನಿಮಾನಲ್ಲಿ ಫನ್ ಇದೆ, ಥ್ರಿಲ್ಲರ್ ಇದೆ, ಎಮೋಷನ್ಸ್ ಇವೆ, ಜೊತೆಗೆ ಆಕ್ಷನ್, ಡ್ಯಾನ್ಸ್ ಸಹ ಇದೆ ಎಂದಿರುವ ಹೇಮಂತ್ ರಾವ್, ತಾವು ವಿಶೇಷವಾಗಿ ಈ ಸಿನಿಮಾದ ಆಕ್ಷನ್ ಬಗ್ಗೆ ಹೆಚ್ಚು ಜಾಗೃತೆ ವಹಿಸಿ ಶೂಟ್ ಮಾಡಿರುವುದಾಗಿ ಹೇಳಿದ್ದಾರೆ ಅಲ್ಲದೆ, ಸಿನಿಮಾಕ್ಕಾಗಿ ಒಂದು ಡ್ಯಾನ್ಸ್ ಹಾಡನ್ನು ಸಹ ಶೂಟ್ ಮಾಡಿದ್ದು ಅದರ ಅನುಭವವೂ ಅದ್ಭುತವಾಗಿತ್ತು. ಆ ಹಾಡು ಸಹ ಬಲು ಚೆನ್ನಾಗಿ ಮೂಡಿ ಬಂದಿದೆ ಎಂದಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ