Nikhil Kumaraswamy: ಕನ್ನಡ ಸರಿಯಾಗಿ ಬರಲ್ವಾ; ತಪ್ಪು ಪದ ಬಳಸಿ ಟ್ರೋಲ್​ ಆದ ನಿಖಿಲ್​ ಕುಮಾರಸ್ವಾಮಿ

ಸೆಲೆಬ್ರಿಟಿಗಳು ಮಾಡುವ ಸಣ್ಣಪುಟ್ಟ ತಪ್ಪುಗಳನ್ನು ಅಭಿಮಾನಿಗಳು ಗಮನಿಸುತ್ತಿರುತ್ತಾರೆ. ಅವರು ಸಾಮಾಜಿಕ ಜಾಲತಾಣದಲ್ಲಿ ಹಾಕುವ ಪೋಸ್ಟ್​ಗಳಲ್ಲಿ ಕಾಣಿಸುವ ಚಿಕ್ಕಪುಟ್ಟ ತಪ್ಪುಗಳೂ ಟ್ರೋಲ್​ಗಳಿಗೆ ಆಹಾರವಾಗುತ್ತವೆ. ಈಗ ಈ ಸಾಲಿಗೆ ಕನ್ನಡದ ಖ್ಯಾತ ನಟ ನಿಖಿಲ್​ ಕುಮಾರಸ್ವಾಮಿ ಹೊಸ ಸೇರ್ಪಡೆ. ಅವರು ಸಾಮಾಜಿಕ ಜಾಲತಾಣದಲ್ಲಿ ಮಾಡಿದ ಎಡವಟ್ಟಿನಿಂದ ಈಗ ಟ್ರೋಲ್​ ಆಗುತ್ತಿದ್ದಾರೆ.

ಅನೇಕ ಸ್ಟಾರ್​ಗಳು ಕನ್ನಡವನ್ನು ತಪ್ಪಾಗಿ ಬರೆದು ಅಭಿಮಾನಿಗಳಿಂದ ಪಾಠ ಹೇಳಿಸಿಕೊಂಡಿದ್ದಾರೆ. ನಿಖಿಲ್​ ಕುಮಾರಸ್ವಾಮಿ ವಿಚಾರದಲ್ಲೂ ಈಗ ಅದೇ ಆಗಿದೆ. ಅವರ ಶಬ್ದ ಬಳಕೆ ಪ್ರಯೋಗ ತಪ್ಪಾಗಿದ್ದು, ಸಾಕಷ್ಟು ಟ್ರೋಲ್​ ಆಗುತ್ತಿದ್ದಾರೆ.

ರೈಡರ್​ ಚಿತ್ರದ ಶೂಟಿಂಗ್​ಗಾಗಿ ನಿಖಿಲ್​ ಕುಮಾರಸ್ವಾಮಿ ಲಡಾಖ್​​ಗೆ ತೆರಳಿದ್ದಾರೆ. ಬೇಸಿಗೆ ಆದರೂ, ಲಡಾಖ್​​ ಹಿಮಾಚ್ಛಾದಿತವಾಗಿದೆ. ಈ ದೃಶ್ಯಗಳನ್ನು ಕಣ್ತುಂಬಿಕೊಂಡಿರುವ ನಿಖಿಲ್​ ಇದೇ ಖುಷಿಗೆ ಫೋಟೋ ಪೋಸ್ಟ್​ ಮಾಡಿದ್ದಾರೆ. ‘ರೈಡರ್​​ ಚಿತ್ರ ಚಿತ್ರಿಕರಣ ವೇಳೆ ಲೇಹ್ ಲಡಾಖ್​ನಲ್ಲಿ ಕಂಡು ಬಂದ ಅದ್ಭುತ ಮನಮೋಹಕ ದೃಶ್ಯ’ ಎಂದು ಅವರು ಬರೆಯಬೇಕಿತ್ತು. ಆದರೆ, ಅವರು ಬರೆದಿದ್ದೇ ಬೇರೆ. ಮನಮೋಹಕ ಪದದ ಬದಲು ಅವರು ಮನಕಲಕುವ ದೃಶ್ಯ ಎಂದು ಬರೆದಿದ್ದಾರೆ. ಕೆಲವು ಕಡೆ ಕಾಗುಣಿತದ ತಪ್ಪು ಕೂಡ ಆಗಿದೆ.

ಯಾವುದಾದರೂ ದುರಂತ ನಡೆದರೆ ಮನಕಲಕುವ ಎನ್ನುವ ಶಬ್ದ ಪ್ರಯೋಗ ಮಾಡಲಾಗುತ್ತದೆ. ಆದರೆ,ಪ್ರಕೃತಿ ಸೌಂದರ್ಯ ಸವಿಯುತ್ತಾ ನಿಂತಿರುವ ಫೋಟೋಗೆ ಮನಕಲಕುವ ಎನ್ನುವ ಶಬ್ದ ಬಳಕೆ ಮಾಡಿದ್ದು, ಅಭಿಮಾನಿಗಳ ಗಮನಕ್ಕೆ ಬಂದಿದೆ.

ಇದರಲ್ಲಿ ಮನಕಲುಕುವ ದೃಶ್ಯ ಏನಿದೆ ಸಾರ್… ಮನತಣಿಸುವ ದೃಶ್ಯ ಅಲ್ವಾ ಎಂದು ಕೆಲವರು ಪ್ರಶ್ನೆ ಮಾಡಿದ್ದಾರೆ. ಕೆಲವರು ಸಾರ್ ಅದು ಮನಕಲುಕುವ ದೃಶ್ಯ ಅಲ್ಲ ಮನಮೋಹಕ ದೃಶ್ಯ ಎಂದು ಕಿವಿಮಾತು ಹೇಳಿದ್ದಾರೆ. ಕೆಲವರು ಕನ್ನಡ ಸರಿಯಾಗಿ ಬರಲ್ವ ಸರ್ ಎಂದು ಪ್ರಶ್ನೆ ಮಾಡಿದ್ದಾರೆ.

ಪೋಸ್ಟ್​ ಮಾಡಿದ ಅರ್ಧ ಗಂಟೆ ನಂತರದಲ್ಲಿ ನಿಖಿಲ್​ಗೆ ತಪ್ಪಿನ ಅರಿವಾಗಿದೆ. ‘ರೈಡರ ಚಿತ್ರ ಚಿತ್ರಿಕರಣ ವೇಳೆ ಲೇ ಲಡಾಕನಲ ಕಂಡು ಬಂದಂತ ಅದ್ಭುತ ದೃಶ್ಯ’ ಎಂದು ಆದ ತಪ್ಪನ್ನು ಸರಿಪಡಿಸಲು ಪ್ರಯತ್ನಿಸಿದ್ದಾರೆ. ಆದರೆ ಈ ಸರಿಪಡಿಸುವ ಪ್ರಯತ್ನದಲ್ಲಿಯೂ ಕಾಗುಣಿತದ ದೋಷಗಳು ಅವರ ಗಮನಕ್ಕೆ ಬಂದಿಲ್ಲವಲ್ಲ ಎಂದು ಅಭಿಮಾನಿಗಳು ಬೇಸರ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಏರ್​ಪೋರ್ಟ್ ಚಾಲಕ ಆತ್ಮಹತ್ಯೆ; ಪ್ರತಾಪ್ ಕುಟುಂಬಕ್ಕೆ ಧೈರ್ಯ ತುಂಬಿದ ಜೆಡಿಎಸ್ ಯುವನಾಯಕ ನಿಖಿಲ್ ಕುಮಾರಸ್ವಾಮಿ

Published On - 6:50 pm, Sun, 11 April 21