ಅತ್ಯುತ್ತಮ ಕಮ್​ಬ್ಯಾಕ್, ಮೂರು ಸಿನಿಮಾಗಳಲ್ಲಿ ರಾಕೇಶ್ ಅಡಿಗ

ಬಿಗ್​ಬಾಸ್ ಕನ್ನಡದ ಈವರೆಗಿನ ಅತ್ಯುತ್ತಮ ಸೀಸನ್​ಗಳಲ್ಲಿ, 9ನೇ ಸೀಸನ್​ ಸಹ ಒಂದು. ಆ ಸೀಸನ್​ನಲ್ಲಿ ರೂಪೇಶ್ ಶೆಟ್ಟಿ ವಿಜೇತರಾಗಿದ್ದರು. ಆ ಸೀಸನ್​ನ ರನ್ನರ್ ಅಪ್ ರಾಕೇಶ್ ಅಡಿಗ. ಅಸಲಿಗೆ ರಾಕೇಶ್ ಅಡಿಗ ವಿನ್ನರ್ ಆಗಬೇಕಿತ್ತು ಎಂದು ಹಲವರು ವಾದಿಸಿದ್ದರು. ಆದರೆ ಸ್ವತಃ ರಾಕೇಶ್ ಅದನ್ನು ಒಪ್ಪಿರಲಿಲ್ಲ. ರಾಕೇಶ್​, ತಮ್ಮ ಸಾವಧಾನ, ಸಮಯೋಚಿತ ಮಾತು, ಪ್ರೀತಿಯಿಂದಲೇ ಶೋನ ಫೈನಲ್​ವರೆಗೆ ಬಂದಿದ್ದರು. ಸೀಸನ್ 9ರಲ್ಲಿ ರಾಕೇಶ್ ಎಷ್ಟೋ ವಾರ ನಾಮಿನೇಟ್ ಸಹ ಆಗಿರಲಿಲ್ಲ. ಆ ಸೀಸನ್​ನಿಂದ ಹೊರಬಂದ ಹಲವರು ಈಗ ಚಿತ್ರರಂಗದಲ್ಲಿ ಎತ್ತರೆತ್ತರಕ್ಕೆ ಏರುತ್ತಿದ್ದಾರೆ. ಆದರೆ ರಾಕೇಶ್ ಅಡಿಗ ಮಾತ್ರ ಎಲ್ಲೂ ಕಾಣಿಸಿಕೊಂಡಿರಲಿಲ್ಲ. ಆದರೆ ಈಗ ಒಂದು ಅದ್ಭುತ ಕಮ್​ಬ್ಯಾಕ್ ಮಾಡುತ್ತಾರೆ ರಾಕೇಶ್ ಅಡಿಗ.

ಅತ್ಯಂತ ಸಣ್ಣ ವಯಸ್ಸಿಗೆ ಜನಪ್ರಿಯತೆ, ಹಣ ಎಲ್ಲವನ್ನೂ ಕಂಡಿದ್ದ ರಾಕೇಶ್ ಅಡಿಗ, ಅವರೇ ಹೇಳಿಕೊಂಡಿರುವಂತೆ ಕೆಲವು ಕೆಟ್ಟ ಆಯ್ಕೆಗಳು, ಪ್ರಯೋಗಗಳ ಕಾರಣದಿಂದ ವೃತ್ತಿಯಲ್ಲಿ ಹಿನ್ನಡೆ ಅನುಭವಿಸಿದ್ದರು. ಬಿಗ್​ಬಾಸ್​ಗೆ ಬರುವ ಮುನ್ನ ಸಹ ಚಿತ್ರರಂಗದಿಂದ ದೂರಾಗಿ ಮೈಲ್ಡ್ ಡಿಪ್ರೆಶನ್​ಗೂ ಒಳಗಾಗಿದ್ದರು. ಆದರೆ ಬಿಗ್​ಬಾಸ್ ಮೂಲಕ ಮತ್ತೆ ಕರ್ನಾಟಕದ ಜನರಿಗೆ ಹತ್ತಿರವಾದರು. ಈಗ ಸಾಲು-ಸಾಲು ಸಿನಿಮಾಗಳ ಮೂಲಕ ತಮ್ಮಿಷ್ಟದ ನಟನೆಗೆ ಮರಳುತ್ತಿದ್ದಾರೆ.

ಇದನ್ನೂ ಓದಿ:ಬಿಗ್​ಬಾಸ್ ಮನೆಯ ಫೇಕ್ ಸ್ಪರ್ಧಿ ಯಾರು? ಊಸರವಳ್ಳಿ ಯಾರು?

ರಾಕೇಶ್ ಅಡಿಗ ನಟಿಸಿರುವ ‘ಮರ್ಯಾದೆ ಪ್ರಶ್ನೆ’ ಸಿನಿಮಾ ನವೆಂಬರ್ 22 ಕ್ಕೆ ಬಿಡುಗಡೆ ಆಗಲಿದೆ. ಸಿನಿಮಾದ ಟ್ರೇಲರ್ ನಿನ್ನೆಯಷ್ಟೆ ಬಿಡುಗಡೆ ಆಗಿದ್ದು, ಟ್ರೇಲರ್​ನಲ್ಲಿ ರಾಕೇಶ್ ಅಡಿಗರ ಪಾತ್ರ ಮತ್ತು ಅವರ ನಟನೆ ಬಹುವಾಗಿ ಗಮನ ಸೆಳೆಯುತ್ತಿದೆ. ಈ ಹಿಂದೆ ಹಲವು ರೀತಿಯ ಪಾತ್ರಗಳಲ್ಲಿ ನಟಿಸಿಯೂ ದೊಡ್ಡ ಯಶಸ್ಸು ಸಿಗದೆ ನಿರಾಸೆ ಅನುಭವಿಸಿದ್ದ ರಾಕೇಶ್, ಆ ಸಿಟ್ಟೆಲ್ಲವನ್ನೂ ಕೂಡಿಟ್ಟು ನಟಿಸಿದಂತೆ ಭಾಸವಾಗುತ್ತಿದೆ.

‘ಮರ್ಯಾದೆ ಪ್ರಶ್ನೆ’ ಸಿನಿಮಾದ ಬಳಿಕ ‘ನಾನು ಮತ್ತು ಗುಂಡ 2’ ಸಿನಿಮಾದಲ್ಲಿ ರಾಕೇಶ್ ಅಡಿಗ ನಟಿಸಿದ್ದು ಆ ಸಿನಿಮಾ ಸಹ ಶೀಘ್ರವೇ ಬಿಡುಗಡೆ ಆಗಲಿದೆ. ಅದರ ನಂತರ ಸ್ಟಾರ್ ನಟ ದುನಿಯಾ ವಿಜಯ್ ಎದುರು ವಿಲನ್ ಪಾತ್ರದಲ್ಲಿ ರಾಕೇಶ್ ಅಡಿಗ ನಟಿಸುತ್ತಿದ್ದಾರೆ. ಸಿನಿಮಾದ ಶೂಟಿಂಗ್ ಈಗಾಗಲೇ ನಡೆಯುತ್ತಿದ್ದು, ಸಿನಿಮಾಕ್ಕೆ ಇನ್ನೂ ಹೆಸರಿಟ್ಟಿಲ್ಲವಂತೆ. ಇದೊಂದು ಅತ್ಯದ್ಭುತ ಕಮ್​ಬ್ಯಾಕ್ ಆಗಲಿಗೆ ಎಂಬ ಗಾಢ ವಿಶ್ವಾಸದಲ್ಲಿದ್ದಾರೆ ರಾಕೇಶ್ ಅಡಿಗ. ಇವುಗಳ ಜೊತೆಗೆ ಬೇರೆ ಕೆಲವು ಸಿನಿಮಾಗಳಿಗೂ ಆಫರ್​ಗಳು, ಕತೆಗಳು ಸಹ ಬರುತ್ತಿವೆಯಂತೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ