ರಕ್ಷಿತ್ ಶೆಟ್ಟಿಗೆ ರುಕ್ಮಿಣಿ ಜೊತೆ ಇದೇ ಮೊದಲ ಬಾರಿಗೆ ಸೀರಿಯಸ್ ಆಗಿ ಲವ್ ಆಗ್ತಿದೆ! ಏನ್ ಸಮಾಚಾರ?
ರಕ್ಷಿತ್ ಶೆಟ್ಟಿ ಮತ್ತು ರುಕ್ಮಿಣಿ ವಸಂತ್ 10 ದಿನಗಳ ಕಾಲ ವರ್ಕ್ಶಾಪ್ನಲ್ಲಿ ಪಾಲ್ಗೊಳ್ಳಲಿದ್ದಾರೆ. ಇಬ್ಬರ ನಡುವಿನ ಕೆಮಿಸ್ಟ್ರೀ ಚೆನ್ನಾಗಿ ಮೂಡಿಬರಬೇಕು ಎಂಬ ಉದ್ದೇಶದಿಂದ ಈ ವರ್ಕ್ಶಾಪ್ ಮಾಡಲಾಗುತ್ತಿದೆ.
‘ಸಿಂಪಲ್ ಸ್ಟಾರ್’ ರಕ್ಷಿತ್ ಶೆಟ್ಟಿ ಅವರು ತಮ್ಮದೇ ಆದ ಅಭಿಮಾನಿ ಬಳಗವನ್ನು ಸಂಪಾದಿಸಿಕೊಂಡಿದ್ದಾರೆ. ಇನ್ನು, ಅವರು ಲವ್ ಬಗ್ಗೆ ಮಾತು ಶುರುಮಾಡಿದರೆ ಎಲ್ಲರ ಕಿವಿ ಚುರುಕಾಗುತ್ತದೆ. ಅಂದಹಾಗೆ, ಈಗ ರಕ್ಷಿತ್ ಒಂದು ಸೀರಿಯಸ್ ಲವ್ ಸ್ಟೋರಿ ಬಗ್ಗೆ ಮಾತನಾಡಿದ್ದಾರೆ. ಇದು ನಟಿ ರಕ್ಮಿಣಿ ವಸಂತ್ ಜೊತೆಗಿನ ಪ್ರೇಮ್ ಕಹಾನಿ ಎಂಬುದು ವಿಶೇಷ.
ರಕ್ಷಿತ್ ಶೆಟ್ಟಿಗೂ ರುಕ್ಮಿಣಿಗೂ ನಿಜ ಜೀವನದಲ್ಲಿ ಲವ್ ಆಯ್ತಾ? ಹಾಗೇನೂ ಇಲ್ಲ. ಇದು ಸಿನಿಮಾ ಕಥೆಯಲ್ಲಿನ ಲವ್ ಸ್ಟೋರಿ. ಇವರಿಬ್ಬರು ಜೊತೆಯಾಗಿ ‘ಸಪ್ತ ಸಾಗರದಾಚೆ ಎಲ್ಲೋ’ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಇದು ಒಂದು ಪೇಮಕಥೆಯ ಸಿನಿಮಾ ಆಗಿದ್ದು, ಆ ಬಗ್ಗೆ ರಕ್ಷಿತ್ ಒಂದಷ್ಟು ಮಾಹಿತಿ ಬಿಟ್ಟುಕೊಟ್ಟಿದ್ದಾರೆ. ಆ ಮೂಲಕ ಚಿತ್ರದ ಬಗ್ಗೆ ನಿರೀಕ್ಷೆ ಮೂಡುವಂತೆ ಮಾಡಿದ್ದಾರೆ.
‘ಮೊದಲ ಬಾರಿಗೆ ನಾನು ಒಂದು ಸೀರಿಯಸ್ ಲವ್ ಸ್ಟೋರಿ ಕಥೆಯ ಸಿನಿಮಾದಲ್ಲಿ ನಟಿಸುತ್ತಿದ್ದೇನೆ. ಇದಕ್ಕೆ ಹೇಮಂತ್ ರಾವ್ ನಿರ್ದೇಶನ ಮಾಡುತ್ತಿದ್ದಾರೆ. ಅವರ ಜೊತೆ ನಾನು ಗೋಧಿಬಣ್ಣ ಸಾಧಾರಣ ಮೈಕಟ್ಟು ಸಿನಿಮಾದಲ್ಲಿ ಕೆಲಸ ಮಾಡಿದ್ದೆ. ಅವರು ಎಮೋಷನ್ಗಳನ್ನು ಚೆನ್ನಾಗಿ ಚಿತ್ರಿಸುತ್ತಾರೆ ಎಂಬುದು ಗೊತ್ತಿದೆ. ಆದರೆ ಅವರು ಇಂಥ ಒಂದು ಸೀರಿಯಸ್ ಲವ್ಸ್ಟೋರಿಯನ್ನು ತೆರೆ ಮೇಲೆ ಹೇಗೆ ತೋರಿಸುತ್ತಾರೆ ಎಂಬ ಕುತೂಹಲ ನನಗೆ ಇದೆ’ ಎಂದಿದ್ದಾರೆ ರಕ್ಷಿತ್ ಶೆಟ್ಟಿ.
‘ಇದು ಅದ್ಭುತವಾದ ಕಥೆ. ಒಬ್ಬ ನಟನಾಗಿ ನನಗೆ ಇದು ಹೆಚ್ಚು ಖುಷಿ ನೀಡಿದೆ. ಎರಡು ಶೇಡ್ನ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದೇನೆ. ಮೊದಲಾರ್ಧ ಒಂದು ರೀತಿ, ದ್ವಿತೀಯಾರ್ಧ ಇನ್ನೊಂದು ರೀತಿ ಇರಲಿದ್ದೇನೆ. ಆ ಎರಡೂ ಶೇಡ್ನ ಅನಾವರಣ ಮಾಡಲು ನಾನು ಕಾಯುತ್ತಿದ್ದೇನೆ. ಇಲ್ಲಿಯವರೆಗೆ ನಾನು ಇಷ್ಟು ಸೀರಿಯಸ್ ಆದ ಲವ್ಸ್ಟೋರಿಯ ಸಿನಿಮಾದಲ್ಲಿ ನಟಿಸಿರಲಿಲ್ಲ. ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿ, ಕಿರಿಕ್ ಪಾರ್ಟಿ ಸಿನಿಮಾಗಳಲ್ಲಿ ತುಂಬ ಫನ್ನಿ ಆಗಿತ್ತು. ಆದರೆ ಈ ಸಿನಿಮಾದಲ್ಲಿ ಗಂಭೀರವಾಗಿರಲಿದೆ’ ಎಂಬುದು ರಕ್ಷಿತ್ ಶೆಟ್ಟಿ ಮಾತು.
ಈ ಪಾತ್ರಕ್ಕಾಗಿ ರುಕ್ಮಿಣಿ ಮತ್ತು ರಕ್ಷಿತ್ ತಯಾರಿ ನಡೆಸಬೇಕಿದೆ. ‘ಲವ್ ಸ್ಟೋರಿ ಸಿನಿಮಾ ಮಾಡುವಾಗ ನಟ-ನಟಿಯ ಮಧ್ಯೆ ಕೆಮಿಸ್ಟ್ರೀ ತುಂಬ ಮುಖ್ಯ ಆಗುತ್ತದೆ. ಅದಕ್ಕಾಗಿ ನಾನು ಮತ್ತು ರುಕ್ಮಿಣಿ 10 ದಿನಗಳ ಕಾಲ ವರ್ಕ್ಶಾಪ್ನಲ್ಲಿ ಪಾಲ್ಗೊಳ್ಳಲಿದ್ದೇವೆ’ ಎಂದು ರಕ್ಷಿತ್ ಮಾಹಿತಿ ನೀಡಿದ್ದಾರೆ. ಇನ್ನು, ಅವರು ‘777 ಚಾರ್ಲಿ’ ಸಿನಿಮಾದ ಕೆಲಸಗಳಲ್ಲೂ ಬ್ಯುಸಿ ಆಗಿದ್ದಾರೆ. ಅದರ ಶೂಟಿಂಗ್ ಮುಗಿದಿದ್ದು, ಡಬ್ಬಿಂಗ್ ಕೆಲಸಗಳು ಚಾಲ್ತಿಯಲ್ಲಿವೆ. ಆ ಚಿತ್ರದ ಬಗ್ಗೆಯೂ ಅಭಿಮಾನಿಗಳಲ್ಲಿ ಹೆಚ್ಚಿನ ನಿರೀಕ್ಷೆ ಇದೆ.
ಇದನ್ನೂ ಓದಿ: ‘ಕಿರಿಕ್ ಪಾರ್ಟಿ 2’ ಸಿನಿಮಾಗಾಗಿ ಕಾಯುತ್ತಿದ್ದೀರಾ? ಹಾಗಾದರೆ ಇಲ್ಲಿದೆ ರಕ್ಷಿತ್ ಶೆಟ್ಟಿ ನೀಡಿದ ಗುಡ್ ನ್ಯೂಸ್!
8 ವರ್ಷಗಳ ಹಿಂದೆ ಶುರುವಾದ ಲವ್ಸ್ಟೋರಿ ಬಗ್ಗೆ ರಕ್ಷಿತ್ ಶೆಟ್ಟಿ ಮನದಾಳದ ಮಾತು!