ದರ್ಶನ್​ ಬರೋತನಕ ‘ಮ್ಯಾಟ್ನಿ’ ಸಮಾರಂಭ; ಬಂದ್ಮೇಲೆ ‘ಡಿ ಬಾಸ್​’ ಪ್ರೋಗ್ರಾಂ: ಸತೀಶ್​ ನೀನಾಸಂ

ಜನಪ್ರಿಯ ನಟ ಸತೀಶ್​ ನೀನಾಸಂ ಅವರು ‘ಮ್ಯಾಟ್ನಿ’ (Matinee) ಸಿನಿಮಾದಲ್ಲಿ ಮುಖ್ಯ ಭೂಮಿಕೆ ನಿಭಾಯಿಸಿದ್ದಾರೆ. ಅವರಿಗೆ ಜೋಡಿಯಾಗಿ ರಚಿತಾ ರಾಮ್​, ಅದಿತಿ ಪ್ರಭುದೇವ ಅಭಿನಯಿಸಿದ್ದಾರೆ. ಮನೋಹರ್​ ಕಾಂಪಲ್ಲಿ ಅವರು ಈ ಸಿನಿಮಾಗೆ ನಿರ್ದೇಶನ ಮಾಡಿದ್ದಾರೆ. ಪಾರ್ವತಿ ಎಸ್​. ಗೌಡ ನಿರ್ಮಾಣ ಮಾಡಿರುವ ಈ ಚಿತ್ರದ ಟ್ರೇಲರ್​ ಲಾಂಚ್​ ಕಾರ್ಯಕ್ರಮ ಇಂದು (ಮಾರ್ಚ್​ 27) ನಡೆದಿದೆ. ಬೆಂಗಳೂರಿನ ಖಾಸಗಿ ಮಾಲ್​ನಲ್ಲಿ ನಡೆದ ಟ್ರೇಲರ್​ ಲಾಂಚ್​ ಇವೆಂಟ್​ಗೆ ನಟ ದರ್ಶನ್​ (Darshan) ಅವರು ಮುಖ್ಯ ಅತಿಥಿಯಾಗಿ ಆಗಮಿಸಿದ್ದಾರೆ. ಅವರಿಗೆ ಡಾಲಿ ಧನಂಜಯ್​ ಸಾಥ್​ ನೀಡಿದ್ದಾರೆ. ತಮ್ಮ ಸಿನಿಮಾಗೆ ಸಪೋರ್ಟ್​ ಮಾಡಲು ಬಂದ ದರ್ಶನ್​ ಅವರಿಗೆ ಸತೀಶ್​ (Sathish Ninasam) ಧನ್ಯವಾದ ಅರ್ಪಿಸಿದ್ದಾರೆ. ‘ಡಿ ಬಾಸ್​’ ನೀಡಿದ ಬೆಂಬಲದ ಬಗ್ಗೆ ಅವರು ಮಾತನಾಡಿದ್ದಾರೆ.

‘ಶ್ರೀರಂಗಪಟ್ಟಣದಲ್ಲಿ ನಡೆದ ‘ಬೆಳ್ಳಿ ಪರ್ವ’ ಕಾರ್ಯಕ್ರಮಕ್ಕೆ ನಾನು ಹೋಗಿದ್ದೆ. ಊಟ ಮಾಡುವಾಗ ದರ್ಶನ್​ ಸರ್​ ಒಂದು ಮಾತು ಕೇಳಿದರು. ಮ್ಯಾಟ್ನಿ ಸಿನಿಮಾ ಯಾಕೆ ಇನ್ನೂ ರಿಲೀಸ್​ ಮಾಡಿಲ್ಲ? ಮೊದಲು ರಿಲೀಸ್​ ಮಾಡಿ ಅಂದ್ರು. ನೀವೇ ಟ್ರೇಲರ್​ ಲಾಂಚ್​ಗೆ ಬರಬೇಕು ಸರ್​ ಅಂತ ನಾನು ಕೇಳಿಕೊಂಡೆ. ‘ನೀವು ಕರೆಯೋದೇ ಬೇಡ, ನಾನು ಬರ್ತೀನಿ’ ಅಂತ ಅವರು ಹೇಳಿದರು’ ಎಂದು ಆ ದಿನವನ್ನು ಸತೀಶ್​ ನೀನಾಸಂ ನೆನಪಿಸಿಕೊಂಡಿದ್ದಾರೆ.

ಇದನ್ನೂ ಓದಿ: ಮನಾಲಿ ಚಳಿಯಲ್ಲಿ ಸತೀಶ್​-ಅದಿತಿ ಪ್ರಭುದೇವ; ‘ಮ್ಯಾಟ್ನಿ’ ಚಿತ್ರದ ಹೊಸ ಹಾಡು ರಿಲೀಸ್​

‘ನಂತರ ನಾನು ದರ್ಶನ್​ ಸರ್​ಗೆ ಫೋನ್​ ಮಾಡಿದೆ. ‘ಯಾವ ಡೇಟ್​ ಆದರೂ ಪರವಾಗಿಲ್ಲ ನಾನು ಬರುತ್ತೇನೆ’ ಅಂತ ಅವರು ಹೇಳಿದರು. ಅದಾಗಲೇ ರಚಿತಾ ರಾಮ್​ ಅವರು ಮಾತನಾಡಿದ್ದರು. ದರ್ಶನ್​ ಅವರಿಗೆ ನಾನು ಯಾವಾಗಲೂ ಋಣಿ ಆಗಿರುತ್ತೇನೆ. ‘ಬ್ಯೂಟಿಫುಲ್​ ಮನಸುಗಳು’ ಚಿತ್ರದಿಂದ ಇಲ್ಲಿಯತನಕ ನಾವು ಯಾವಾಗ ಕರೆದರೂ ಬರಲ್ಲ ಅಂತ ಅವರು ಹೇಳಿಲ್ಲ. ಅವರ ಪ್ರೀತಿ, ವಿಶ್ವಾಸ, ನಂಬಿಕೆಯನ್ನು ನಾನು ಯಾವಾಗಲೂ ಉಳಿಸಿಕೊಳ್ಳುತ್ತೇನೆ’ ಎಂದಿದ್ದಾರೆ ಸತೀಶ್​.

ಸತೀಶ್​ ನೀನಾಸಂ ಮಾತಾಡಿದ ವಿಡಿಯೋ ಇಲ್ಲಿದೆ:

‘ಸ್ಪೆಷಲ್​ ಗೆಸ್ಟ್​ ಆಗಿ ಬಂದಿರುವ ನನ್ನ ಗೆಳೆಯ ಡಾಲಿ ಧನಂಜಯ್​ ಯಾವಾಗಲೂ ಜೊತೆಯಾಗಿ ನಿಲ್ಲುತ್ತಾನೆ. ಅವನಿಗೂ ಸ್ಪೆಷಲ್​ ಥ್ಯಾಂಕ್ಸ್​. ತಮ್ಮನ್ನು ಪ್ರೀತಿಸುವವರ ಜೊತೆ ದರ್ಶನ್​ ಯಾವಾಗಲೂ ಇರುತ್ತಾರೆ. ಅವರು ಬರುವ ತನಕ ಮಾತ್ರ ಇದು ನಮ್ಮ ಮ್ಯಾಟ್ನಿ ಸಿನಿಮಾದ ಸಮಾರಂಭ ಆಗಿತ್ತು. ಅವರು ಬಂದ್ಮೇಲೆ ಇದು ಡಿ ಬಾಸ್​ ಪ್ರೋಗ್ರಾಂ ಆಯಿತು. ಅದು ಸಂತೋಷ್​. ಅವರು ಇದ್ದ ಕಡೆಯಲ್ಲಿ ಒಂದು ಸೆಲೆಬ್ರೇಷನ್​ ಇರುತ್ತದೆ. ಅದು ಖಂಡಿತಾ ಬೇಕು. ಮ್ಯಾಟ್ನಿ ಸಿನಿಮಾಗೆ ಇಂದು ದೊಡ್ಡ ಶಕ್ತಿ ಸಿಕ್ಕಿದೆ. ಅವರು ಬಂದಿದ್ದಕ್ಕೆ ದೊಡ್ಡ ಮಟ್ಟಕ್ಕೆ ರೀಚ್​ ಆಗಿದೆ’ ಎಂದು ಸತೀಶ್​ ನೀನಾಸಂ ಹೇಳಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.