ಯಶ್​ ನಟನೆಯ ‘ಟಾಕ್ಸಿಕ್​’ ಚಿತ್ರದ ನಾಯಕಿಯರ ಬಗ್ಗೆ ಮುಂದುವರಿದಿದೆ ಗೊಂದಲ

ನಟ ಯಶ್​ ಅವರು ‘ಟಾಕ್ಸಿಕ್​’ (Toxic) ಸಿನಿಮಾದ ಮೇಲೆ ಸಂಪೂರ್ಣ ಗಮನ ಹರಿಸಿದ್ದಾರೆ. ‘ಕೆವಿಎನ್​ ಪ್ರೊಡಕ್ಷನ್ಸ್​’ ಈ ಸಿನಿಮಾಗೆ ಬಂಡವಾಳ ಹೂಡುತ್ತಿದೆ. ಮಲಯಾಳಂ ನಿರ್ದೇಶಕಿ ಗೀತು ಮೋಹನ್​ದಾಸ್​ ಅವರು ಈ ಸಿನಿಮಾದ ನಿರ್ದೇಶನದ ಜವಾಬ್ದಾರಿ ಹೊತ್ತುಕೊಂಡಿದ್ದಾರೆ. ಯಶ್​ (Yash) ಅವರನ್ನು ಹೊರತುಪಡಿಸಿ ಬೇರೆ ಯಾವುದೇ ಕಲಾವಿದರ ಆಯ್ಕೆ ಬಗ್ಗೆ ಇನ್ನೂ ಅಧಿಕೃತ ಮಾಹಿತಿ ಸಿಕ್ಕಿಲ್ಲ. ಆದರೆ ಸೋಶಿಯಲ್​ ಮೀಡಿಯಾದಲ್ಲಿ ಹಲವು ಬಗೆಯ ಅಂತೆ-ಕಂತೆಗಳು ಹರಿದಾಡುತ್ತಿವೆ. ಸಾಯಿ ಪಲ್ಲವಿ, ಕರೀನಾ ಕಪೂರ್​ ಖಾನ್​ ಮುಂತಾದ ನಟಿಯರ ಹೆಸರು ಕೇಳಿಬರುತ್ತಿದೆ. ಆದರೆ ಇದನ್ನೆಲ್ಲ ನಿರ್ಮಾಣ ಸಂಸ್ಥೆ ತಳ್ಳಿಹಾಕಿದೆ.

‘ಟಾಕ್ಸಿಕ್​’ ಒಂದು ಸಾಧಾರಣ ಸಿನಿಮಾ ಅಲ್ಲ. ಹಾಗಾಗಿ ಈ ಚಿತ್ರದ ಮೇಲೆ ಜನರಿಗೆ ಸಿಕ್ಕಾಪಟ್ಟೆ ಎಗ್ಸೈಟ್​ಮೆಂಟ್​ ಇದೆ. ಸದ್ಯಕ್ಕೆ ಚಿತ್ರತಂಡದಿಂದ ಅಧಿಕೃತವಾಗಿ ಪಾತ್ರವರ್ಗದ ಬಗ್ಗೆ ಘೋಷಣೆ ಆಗಿಲ್ಲ. ಅಷ್ಟರೊಳಗೆ ನಾಯಕಿಯ ಆಯ್ಕೆ ಆಗಿದೆ ಎಂದು ಕೆಲವರು ಸುದ್ದಿ ಹಬ್ಬಿಸಿದ್ದಾರೆ. ಬಹುತೇಕ ಸಾಯಿ ಪಲ್ಲವಿ ಅಥವಾ ಕರೀನಾ ಕಪೂರ್​ ಹೆಸರು ಅಂತಿಮ ಎಂದು ತಿಳಿದುಕೊಂಡಿದ್ದ ಎಲ್ಲರಿಗೂ ನಿರ್ಮಾಣ ಸಂಸ್ಥೆಯ ಸ್ಪಷ್ಟನೆ ಕೇಳಿದ ಬಳಿಕ ಹೊಸ ಹೊಸ ಪ್ರಶ್ನೆ ಹುಟ್ಟಿಕೊಂಡಿವೆ.

‘ಟಾಕ್ಸಿಕ್​’ ಸಿನಿಮಾದ ಶೂಟಿಂಗ್​ ಸೆಟ್​ನಿಂದ ಯಶ್​ ಫೋಟೋಗಳು ಲೀಕ್​

ಯಶ್ ಅವರು ‘ಟಾಕ್ಸಿಕ್’ ಒಪ್ಪಿಕೊಳ್ಳಲು ಸಾಕಷ್ಟು ಸಮಯ ತೆಗೆದುಕೊಂಡರು. ಈಗ ಈ ಸಿನಿಮಾದ ಅಪ್​ಡೇಟ್​ ನೀಡುವಲ್ಲಿಯೂ ತಡವಾಗುತ್ತಿದೆ. ಗಾಸಿಪ್​ಗಳನ್ನು ನಂಬುವುದೋ ಬಿಡುವುದೋ ಎಂದು ಸಿನಿಪ್ರಿಯರಲ್ಲಿ ಗೊಂದಲ ಮೂಡಿದೆ. ಇತ್ತೀಚೆಗೆ ಈ ಸಿನಿಮಾದ ಶೂಟಿಂಗ್​ ತಯಾರಿ ವೇಳೆ ಯಶ್​ ಮತ್ತು ಗೀತು ಮೋಹನ್​ದಾಸ್​ ಅವರು ಗೋವಾದಲ್ಲಿ ಕಾಣಿಸಿಕೊಂಡ ಫೋಟೋ ಹಾಗೂ ವಿಡಿಯೋ ವೈರಲ್​ ಆಗಿತ್ತು.

ಹೊಸ ಕಲಾವಿದರಿಗೆ ‘ಟಾಕ್ಸಿಕ್​’ ಸಿನಿಮಾದಲ್ಲಿ ಅವಕಾಶ ಕೊಡಲಾಗುತ್ತಿದೆ. ಆಡಿಷನ್​ಗೆ ಕರೆ ನೀಡಲಾಗಿದೆ. 25ರಿಂದ 75 ವರ್ಷ ವಯಸ್ಸಿನ ಪುರುಷರು, 12ರಿಂದ 16 ವರ್ಷ ವಯಸ್ಸಿನ ಮಕ್ಕಳು, 23ರಿಂದ 65 ವರ್ಷ ವಯಸ್ಸಿನ ಮಹಿಳೆಯರು ಆಡಿಷನ್​ ನೀಡಬಹುದು. ಒಂದು ಇಂಟ್ರಡಕ್ಷನ್​ ವಿಡಿಯೋ ಮತ್ತು ಒಂದು ನಿಮಿಷ ನಟನೆ ತೋರಿಸುವ ವಿಡಿಯೋವನ್ನು 8618706590 ನಂಬರ್​ಗೆ ವಾಟ್ಸಪ್​ ಮೂಲಕ ಕಳಿಸಬೇಕು. ಮಾರ್ಚ್​ 25 ಕಡೆಯ ದಿನಾಂಕ ಎಂದು ಸೋಶಿಯಲ್​ ಮೀಡಿಯಾದಲ್ಲಿ ‘ಕೆವಿಎನ್​ ಪ್ರೊಡಕ್ಷನ್ಸ್​’ ಮಾಹಿತಿ ಹಂಚಿಕೊಂಡಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.