ರಾಜಮೌಳಿ ‘ವಾರಾಣಸಿ’ ಸಿನಿಮಾದ ಡಬ್ಬಿಂಗ್ಗೆ ಎಐ ಬದಲು 1500 ಧ್ವನಿಗಳ ಆಡಿಷನ್
ಎಸ್. ಎಸ್. ರಾಜಮೌಳಿ ನಿರ್ದೇಶನದ 'ವಾರಾಣಸಿ' ಸಿನಿಮಾದ ಡಬ್ಬಿಂಗ್ಗೆ ಎಐ ತಂತ್ರಜ್ಞಾನ ಬಳಸದೆ 1500 ನೈಜ ಧ್ವನಿ ಕಲಾವಿದರ ಆಡಿಷನ್ ನಡೆಸಲಾಗುತ್ತಿದೆ. ಮಹೇಶ್ ಬಾಬು ಹಾಗೂ ಪ್ರಿಯಾಂಕಾ ಚೋಪ್ರಾ ನಟನೆಯ ಈ ಜಾಗತಿಕ ಸಿನಿಮಾ 50 ಭಾಷೆಗಳಲ್ಲಿ ಹಾಗೂ 120 ದೇಶಗಳಲ್ಲಿ 2027ರ ಏಪ್ರಿಲ್ 7ರಂದು ಅದ್ದೂರಿಯಾಗಿ ಬಿಡುಗಡೆಯಾಗಲಿದೆ.
ಮುಖ್ಯಾಂಶಗಳು
- ಡಬ್ಬಿಂಗ್ಗೆ ಎಐ ಬೇಡ ಅಂದ ರಾಜಮೌಳಿ
- 1,500 ನೈಜ ಧ್ವನಿಗಳ ಶೋಧ
- 50 ಭಾಷೆಗಳಲ್ಲಿ 'ವಾರಾಣಸಿ' ಜಾದೂ
ದಿಗ್ಗಜ ನಿರ್ದೇಶಕ ಎಸ್. ಎಸ್. ರಾಜಮೌಳಿ (SS Rajamouli) ತಮ್ಮ ಬಹುನಿರೀಕ್ಷಿತ ‘ವಾರಾಣಸಿ’ ಸಿನಿಮಾದ ಪ್ರತಿಯೊಂದು ವಿಭಾಗದಲ್ಲೂ ಕ್ರಾಂತಿಕಾರಿ ಹೆಜ್ಜೆ ಇಡುತ್ತಿದ್ದಾರೆ. ಮಹೇಶ್ ಬಾಬು, ಪ್ರಿಯಾಂಕಾ ಚೋಪ್ರಾ ಹಾಗೂ ಪೃಥ್ವಿರಾಜ್ ಸುಕುಮಾರನ್ ಪ್ರಮುಖ ಪಾತ್ರಗಳಲ್ಲಿ ನಟಿಸುತ್ತಿರುವ ಈ ಚಿತ್ರದ ಡಬ್ಬಿಂಗ್ಗಾಗಿ ಅವರು ಎಐ (AI) ತಂತ್ರಜ್ಞಾನವನ್ನು ಸಂಪೂರ್ಣವಾಗಿ ತಿರಸ್ಕರಿಸಿದ್ದಾರೆ. ಮೂಲ ನಟರ ಭಾವನೆಗಳನ್ನು ಪ್ರತಿಯೊಂದು ಭಾಷೆಯಲ್ಲೂ ತಲುಪಿಸಲು ನಿಜವಾದ ಕಲಾವಿದರ ಧ್ವನಿಗಳನ್ನೇ ಬಳಸಲು ನಿರ್ಧರಿಸಿದ್ದಾರೆ.
ರಾಜಮೌಳಿ ಅವರ ಪ್ರಕಾರ ಡಬ್ಬಿಂಗ್ ಅಂದರೆ ಕೇವಲ ಸಂಭಾಷಣೆ ಅನುವಾದ ಮಾಡುವುದು ಅಥವಾ ತುಟಿ ಚಲನೆಗೆ ಧ್ವನಿ ಹೊಂದಿಸುವುದು ಅಲ್ಲ. ಪ್ರತಿಯೊಂದು ಭಾಷೆಯಲ್ಲೂ ಪಾತ್ರದ ವ್ಯಕ್ತಿತ್ವ, ಉದ್ದೇಶ ಮತ್ತು ಭಾವನೆಗಳು ಪ್ರೇಕ್ಷಕರಿಗೆ ತಲುಪಬೇಕು. ಈ ಕಾರಣಕ್ಕಾಗಿ 1500ಕ್ಕೂ ಹೆಚ್ಚು ಧ್ವನಿ ಕಲಾವಿದರ ಧ್ವನಿ ಸ್ಯಾಂಪಲ್ಗಳನ್ನು ಪರಿಶೀಲಿಸಿ ಅಂತಿಮವಾಗಿ ಕಲಾವಿದರನ್ನು ಆಯ್ಕೆ ಮಾಡಲಾಗುತ್ತಿದೆ.
ಈ ಬೃಹತ್ ಸಿನಿಮಾ ವಿಶ್ವದಾದ್ಯಂತ ಸುಮಾರು 120 ದೇಶಗಳಲ್ಲಿ ಬಿಡುಗಡೆಯಾಗಲಿದೆ. ಒಟ್ಟು 50ಕ್ಕೂ ಹೆಚ್ಚು ಭಾಷೆಗಳಿಗೆ ಚಿತ್ರವನ್ನು ಡಬ್ ಮಾಡಲು ಯೋಜನೆ ರೂಪಿಸಲಾಗಿದೆ. ತೆಲುಗು, ಹಿಂದಿ, ತಮಿಳು, ಮಲಯಾಳಂ, ಬೆಂಗಾಲಿ ಮಾತ್ರವಲ್ಲದೆ ಫ್ರೆಂಚ್, ಸ್ಪ್ಯಾನಿಷ್, ಜರ್ಮನ್, ಅರೇಬಿಕ್, ಜಪಾನೀಸ್ ಹಾಗೂ ಕೊರಿಯನ್ ಭಾಷೆಗಳಲ್ಲಿ ಚಿತ್ರ ಮೂಡಿಬರಲಿದೆ. ಶಾರುಖ್ ಖಾನ್ ಅವರ ‘ಪಠಾನ್’ ನಂತರ 120ಕ್ಕೂ ಹೆಚ್ಚು ದೇಶಗಳಲ್ಲಿ ತೆರೆಕಾಣುತ್ತಿರುವ ಎರಡನೇ ಭಾರತೀಯ ಸಿನಿಮಾ ಎಂಬ ಹೆಗ್ಗಳಿಕೆಗೆ ಇದು ಪಾತ್ರವಾಗಲಿದೆ.
ಇದನ್ನೂ ಓದಿ: ರಾಜಮೌಳಿ ಸಹಾಯಕನ ಸಿನಿಮಾಗೆ ಗ್ರೀನ್ ಸಿಗ್ನಲ್ ಕೊಟ್ಟ ನಟ ಅಜಿತ್?
ವಿ. ವಿಜಯೇಂದ್ರ ಪ್ರಸಾದ್ ಮತ್ತು ಎಸ್.ಎಸ್. ಕಾಂಚಿ ಅವರ ಕಥೆಗೆ ರಾಜಮೌಳಿ ಚಿತ್ರಕಥೆ ಬರೆದಿದ್ದಾರೆ. ಕೆ.ಎಲ್. ನಾರಾಯಣ ಹಾಗೂ ಎಸ್.ಎಸ್. ಕಾರ್ತಿಕೇಯ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಈ ಸಿನಿಮಾ ಮೂಲಕ ಪ್ರಿಯಾಂಕಾ ಚೋಪ್ರಾ ತೆಲುಗು ಚಿತ್ರರಂಗಕ್ಕೆ ಪದಾರ್ಪಣೆ ಮಾಡುತ್ತಿದ್ದಾರೆ. ಜಾಗತಿಕ ಮಟ್ಟದಲ್ಲಿ ಸದ್ದು ಮಾಡಲು ಸಜ್ಜಾಗಿರುವ ‘ವಾರಾಣಸಿ’ ಸಿನಿಮಾ 2027ರ ಏಪ್ರಿಲ್ 7ರಂದು ಜಾಗತಿಕವಾಗಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.