ರಾಜಮೌಳಿ ಸಹಾಯಕನ ಸಿನಿಮಾಗೆ ಗ್ರೀನ್ ಸಿಗ್ನಲ್ ಕೊಟ್ಟ ನಟ ಅಜಿತ್?

ಸಾಲು ಸಾಲು ಬ್ರ್ಯಾಂಡ್ ನ್ಯೂ ಸಿನಿಮಾಗಳನ್ನು ಘೋಷಿಸುವ ಮೂಲಕ ತಮಿಳು ಸೂಪರ್‌ಸ್ಟಾರ್ ಅಜಿತ್ ಕುಮಾರ್ ತಮ್ಮ ಅಭಿಮಾನಿಗಳಲ್ಲಿ ಭಾರಿ ಕುತೂಹಲ ಮೂಡಿಸಿದ್ದಾರೆ. ಪ್ರಸ್ತುತ ಅವರು ಆದಿಕ್ ರವಿಚಂದ್ರನ್ ನಿರ್ದೇಶನದ ‘ಡೇರ್ ಡೆವಿಲ್’ ಚಿತ್ರಕ್ಕೆ ಸಿದ್ಧತೆ ನಡೆಸುತ್ತಿದ್ದಾರೆ. ಈ ಬಿಗ್ ಬಜೆಟ್ ಸಿನಿಮಾದ ಚಿತ್ರೀಕರಣವು ಸೆಪ್ಟೆಂಬರ್ ತಿಂಗಳಿನಲ್ಲಿ ಹೈದರಾಬಾದ್‌ನಲ್ಲಿ ಆರಂಭವಾಗಲಿದೆ.

ಅಜಿತ್ ಅವರ ಮುಂದಿನ ಪ್ರಾಜೆಕ್ಟ್‌ಗಳ ಕುರಿತು ಕಾಲಿವುಡ್ ಅಂಗಳದಲ್ಲಿ ಭಾರಿ ಚರ್ಚೆ ನಡೆಯುತ್ತಿದೆ. ‘ಡೇರ್ ಡೆವಿಲ್’ ಪೂರ್ಣಗೊಂಡ ನಂತರ ಅಜಿತ್ ಮತ್ತೆ ವೆಂಕಟ್ ಪ್ರಭು ಅವರೊಂದಿಗೆ ಕೈಜೋಡಿಸಲಿದ್ದಾರೆ ಎಂಬ ವರದಿಗಳಿವೆ. ಈ ಹಿಂದೆ ಇವರಿಬ್ಬರ ಕಾಂಬಿನೇಷನ್‌ನಲ್ಲಿ ಮೂಡಿಬಂದಿದ್ದ ‘ಮಂಕಾಥ’ ಸಿನಿಮಾ ಇಂಡಸ್ಟ್ರಿ ಹಿಟ್ ಆಗಿತ್ತು. ಈ ಯಶಸ್ವಿ ಜೋಡಿ ಮತ್ತೆ ಒಂದಾಗುತ್ತಿರುವುದು ಅಭಿಮಾನಿಗಳ ನಿರೀಕ್ಷೆಯನ್ನು ಹೆಚ್ಚಿಸಿದೆ.

ಇಷ್ಟೇ ಅಲ್ಲದೆ ರಾಜಮೌಳಿ ಅವರ ಸಹಾಯಕ ನಿರ್ದೇಶಕರೊಬ್ಬರು ಅಜಿತ್ ಅವರಿಗೆ ಪ್ಯಾನ್-ಇಂಡಿಯಾ ಮಟ್ಟದ ಕಥೆಯನ್ನು ಹೇಳಿದ್ದಾರೆ. ಕಥೆಯ ಎಳೆ ಇಷ್ಟವಾಗಿದ್ದು ಪೂರ್ಣಪ್ರಮಾಣದ ವಿವರಣೆ ನೀಡುವಂತೆ ಅಜಿತ್ ಸೂಚಿಸಿದ್ದಾರೆ. ವೆಂಕಟ್ ಪ್ರಭು ಅವರ ಸಿನಿಮಾ ಮುಗಿದ ನಂತರ ಈ ಪ್ಯಾನ್ ಇಂಡಿಯಾ ಪ್ರಾಜೆಕ್ಟ್ ಸೆಟ್ಟೇರುವ ಸಾಧ್ಯತೆಯಿದೆ. ರಾಜಮೌಳಿ ಸಹಾಯಕ ಎಂಬ ಕಾರಣಕ್ಕೂ ಅಭಿಮಾನಿಗಳಿಗೆ  ಕಾರಣಕ್ಕೂ ಅಭಿಮಾನಿಗಳಿಗೆ ಸಾಕಷ್ಟು ಕುತೂಹಲ ಮೂಡಿದೆ.

ಇದನ್ನೂ ಓದಿ: ಅಜಿತ್ ಹಾಗೂ ನಯನತಾರಾ ನಡೆಗೆ ವಿತರಕರ ವಲಯದಲ್ಲಿ ಆಕ್ರೋಶ; ಮಾಡಿದ ತಪ್ಪೇನು?

ಇದರ ಜೊತೆಗೆ ಅಜಿತ್ ಅವರ ಕಾರ್ ರೇಸಿಂಗ್ ಜರ್ನಿ ಆಧಾರಿತ ‘ಗ್ಲಾಡಿಯೇಟರ್ಸ್’ ಎಂಬ ಡಾಕ್ಯುಮೆಂಟರಿ ಕೂಡ ಸಿದ್ಧವಾಗುತ್ತಿದೆ. ಇದು ಅವರ ಮೊದಲ ಓಟಿಟಿ ರಿಲೀಸ್ ಆಗುವ ನಿರೀಕ್ಷೆಯಿದೆ. ಒಟ್ಟಿನಲ್ಲಿ ‘ಡೇರ್ ಡೆವಿಲ್’, ವೆಂಕಟ್ ಪ್ರಭು ಸಿನಿಮಾ, ಪ್ಯಾನ್-ಇಂಡಿಯಾ ಚಿತ್ರ ಹಾಗೂ ‘ಗ್ಲಾಡಿಯೇಟರ್ಸ್’ ಡಾಕ್ಯುಮೆಂಟರಿ ಮೂಲಕ ಅಜಿತ್ ಸಾಲು ಸಾಲು ರೋಮಾಂಚಕ ಸಿನಿಮಾಗಳೊಂದಿಗೆ ಪ್ರೇಕ್ಷಕರ ಎದುರು ಬರಲು ಸಜ್ಜಾಗಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.