‘GST ಪಾವತಿಸಿದ್ದೀರಾ?’ ಎಂದು ಕೆಬಿಸಿ ವೇದಿಕೆಯಲ್ಲೇ ಅಮಿತಾಭ್ರನ್ನು ಪ್ರಶ್ನಿಸಿದ ಮಹಿಳಾ ಅಧಿಕಾರಿ; ಮುಂದೇನಾಯ್ತು?
ಕೆಬಿಸಿ13ರ ವೇದಿಕೆಯಲ್ಲಿ ಅಮಿತಾಭ್ ಬಚ್ಚನ್ ಅವರನ್ನು ಜಿಎಸ್ಟಿ ಪಾವತಿಸಿದ್ದೀರಾ ಎಂದು ಮಹಿಳಾ ಅಧಿಕಾರಿಯೊಬ್ಬರು ಪ್ರಶ್ನಿಸಿದ್ದಾರೆ. ಮುಂದೇನಾಯ್ತು? ಕುತೂಹಲಕರ ಸಂದರ್ಭದ ಮಾಹಿತಿ ಇಲ್ಲಿದೆ.
KBC 13: ಬಾಲಿವುಡ್ನ ಖ್ಯಾತ ನಟ ಅಮಿತಾಭ್ ಬಚ್ಚನ್ ನಡೆಸಿಕೊಡುವ ಕೌನ್ ಬನೇಗಾ ಕರೋಡ್ಪತಿಯ 13ನೇ ಸೀಸನ್ ಬಹಳ ಮಜವಾಗಿ ಮೂಡಿಬರುತ್ತಿದೆ. ಇತ್ತೀಚಿನ ಎಪಿಸೋಡ್ನಲ್ಲಿ ಅಮಿತಾಭ್ ಬಚ್ಚನ್ ಪೇಚಿಗೆ ಸಿಲುಕಿದ ಪ್ರಸಂಗ ನಡೆದಿದ್ದು, ಎಲ್ಲರ ಗಮನ ಸೆಳೆದಿದೆ. ಅಷ್ಟಕ್ಕೂ ಆಗಿದ್ದೇನು? ಇಲ್ಲಿದೆ ಮಾಹಿತಿ. ಕೆಬಿಸಿಯ ಸಂಚಿಕೆಯೊಂದಕ್ಕೆ ಜಿಎಸ್ಟಿ ಮಹಿಳಾ ಇನ್ಸ್ಪೆಕ್ಟರ್ ಸಂಧ್ಯಾ ಎಂಬುವವರು ಸ್ಪರ್ಧಿಯಾಗಿ ಬಂದಿದ್ದರು. ಅಲ್ಲಿ ಆಕೆ ಅಮಿತಾಭ್ ಬಳಿ ನೀವು ಸರಿಯಾಗಿ ಜಿಎಸ್ಟಿ ಪಾವತಿಸುತ್ತಿದ್ದೀರಾ ಎಂದು ಪ್ರಶ್ನಿಸಿದ್ದಾರೆ. ಆಗ ಅಮಿತಾಭ್ ಕ್ಷಣಕಾಲ ಸ್ತಂಭೀಭೂತರಾಗಿದ್ದಾರೆ.
ಸ್ಪರ್ಧೆಯ ನಡುವೆ ಅಮಿತಾಭ್ ಮಹಿಳಾ ಅಧಿಕಾರಿಗೆ ‘ಸ್ಟೇಟ್ ಟ್ಯಾಕ್ಸ್ ಇನ್ಸ್ಪೆಕ್ಟರ್’ ಅಂದರೆ ಏನೆಂದು ವಿವರಿಸಿ ಎಂದು ಕೇಳಿದರು. ಆಗ ಮಹಿಳಾ ಅಧಿಕಾರಿಯು ಹಿಂದಿಯಲ್ಲಿ, ‘‘ಸರ್, ನಾನೊಬ್ಬಳು ಜಿಎಸ್ಟಿ ಡಿಪಾರ್ಟ್ಮೆಂಟ್ನಲ್ಲಿ ಸ್ಟೇಟ್ ಟ್ಯಾಕ್ಸ್ ಇನ್ಸ್ಪೆಕ್ಟರ್ ಆಗಿದ್ದೇನೆ. ನನ್ನ ಕೆಲಸ ಒಳ್ಳೆಯ ವ್ಯಕ್ತಿಗಳಿಗೆ ಸಹಾಯ ಮಾಡುವುದು ಮತ್ತು ಕೆಟ್ಟ ವ್ಯಕ್ತಿಗಳಿಗೆ ಶಿಕ್ಷೆಯಾಗುವಂತೆ ಮಾಡುವುದು. ಸರಿಯಾಗಿ ತೆರಿಗೆ ಪಾವತಿಸುವವರಿಗೆ ಸಹಾಯ ಮಾಡುತ್ತೇನೆ; ಅಂತೆಯೇ ತೆರಿಗೆ ಕಟ್ಟದೇ ಕಪ್ಪು ಹಣ ಇಟ್ಟವರನ್ನು ಕಂಡುಹಿಡಿದು ಶಿಕ್ಷೆಯಾಗುವಂತೆ ಮಾಡುತ್ತೇವೆ’’ ಎಂದು ಆಕೆ ನುಡಿದಿದ್ದಾರೆ.
ಆಗ ಅಮಿತಾಭ್, ‘‘ಅಂದರೆ ನೀವು ಕೆಟ್ಟ ವ್ಯಕ್ತಿಗಳನ್ನು ಒಳ್ಳೆಯ ವ್ಯಕ್ತಿಗಳಾಗಿ ಬದಲಾಯಿಸುತ್ತೀರಿ ಎಂದಾಯಿತು… ಒಂದು ವೇಳೆ ಜಿಎಸ್ಟಿಯನ್ನು ಸರಿಯಾದ ಸಮಯಕ್ಕೆ ಕಟ್ಟದೇ ಇದ್ದರೆ, ಅವರಿಗೆ ದಂಡ ಹಾಕುತ್ತೀರಲ್ಲವೇ?’’ ಎಂದು ಪ್ರಶ್ನಿಸಿದ್ದಾರೆ. ಆಗ ಅವರು ಹೌದು ₹ 10,000ದ ವರೆಗೂ ದಂಡ ಹಾಕುತ್ತೇವೆ ಎಂದಿದ್ದಾರೆ. ತಕ್ಷಣ, ಅಮಿತಾಭ್ರಿಗೆ ಮರು ಪ್ರಶ್ನೆ ಮಾಡಿದ ಅಧಿಕಾರಿ, ‘‘ನೀವು ಜಿಎಸ್ಟಿ ಕಟ್ಟಿದ್ದೀರಿ ತಾನೆ?’’ ಎಂದು ಪ್ರಶ್ನಿಸಿದ್ದಾರೆ. ಈ ಪ್ರಶ್ನೆಗೆ ಅಮಿತಾಭ್ ಒಂದರೆ ಕ್ಷಣ ಸುಮ್ಮನೆ ಕುಳಿತಿದ್ದಾರೆ.
ನಂತರ ಬಿಗ್ಬಿ ಮಹಿಳಾ ಅಧಿಕಾರಿಗೆ ಉತ್ತರ ನೀಡಿದ್ದಾರೆ. ‘‘ಮೇಡಮ್, ನಾನು ತೆರಿಗೆ ಕಟ್ಟದೇ ಇದ್ದಿದ್ದರೆ ನನ್ನನ್ನು ಇಲ್ಲಿ ಕೂರಲು ಬಿಡುತ್ತಿದ್ದರೇ? ನಿಮ್ಮಂಥ ಅಧಿಕಾರಿಗಳು ಹಿಡಿದು ನನ್ನನ್ನು ಕಂಬಿಯ ಹಿಂದೆ ದೂಡುತ್ತಿದ್ದರು’’ ಎಂದು ಅಮಿತಾಭ್ ನಕ್ಕಿದ್ದಾರೆ. ಈ ಅನಿರೀಕ್ಷಿತ ಪ್ರಶ್ನೋತ್ತರಕ್ಕೆ ಎಲ್ಲರೂ ಮನದುಂಬಿ ನಗಾಡಿದ್ದಾರೆ.
ಈ ಎಲ್ಲವುಗಳ ಹೊರತಾಗಿಯೂ ಸಂಧ್ಯಾ, ಸ್ಪರ್ಧೆಯಲ್ಲಿ ದೊಡ್ಡ ಮೊತ್ತವನ್ನು ಗಳಿಸಲಿಲ್ಲ. ₹ 40,000ದ ಪ್ರಶ್ನೆಗೆ ತಪ್ಪಾದ ಉತ್ತರ ನೀಡಿದ ಅವರು, ₹ 10,000ಕ್ಕೆ ಸ್ಪರ್ಧೆಯನ್ನು ಮುಗಿಸಿದರು.
ಇದನ್ನೂ ಓದಿ:
ನಾಗ ಚೈತನ್ಯ-ಸಾಯಿ ಪಲ್ಲವಿ ಪಾಲಿಗೆ ಇದು ಬಿಗ್ ಡೇ; ಈಗಲಾದರೂ ಬರುತ್ತಾರಾ ಸಮಂತಾ?
‘ಲವ್ ಮಾಕ್ಟೇಲ್’ ನೋಡುವಂತೆ ರವಿ ಡಿ. ಚನ್ನಣ್ಣನವರ್ಗೆ ಪತ್ನಿಯ ಒತ್ತಾಯ; ದಕ್ಷ ಅಧಿಕಾರಿಗೆ ಸಿನಿಮಾ ಇಷ್ಟ ಆಯ್ತಾ?
(A contestant asked Amitabh that whether he paid GST and Amitabh went speechless at a moment)