Vijay Devarakonda: ರಿಲೀಸ್​ಗೂ ಮುನ್ನ 180 ಕೋಟಿ ರೂಪಾಯಿಗೂ ಹೆಚ್ಚು ಬಿಸ್ನೆಸ್​ ಮಾಡಿದ ‘ಲೈಗರ್’ ಸಿನಿಮಾ​

ನಟ ವಿಜಯ್​ ದೇವರಕೊಂಡ (Vijay Devarakonda) ಅವರು ದೊಡ್ಡ ಗೆಲುವಿನ ನಿರೀಕ್ಷೆಯಲ್ಲಿದ್ದಾರೆ. ಅವರು ನಟಿಸಿರುವ ‘ಲೈಗರ್’ ಸಿನಿಮಾ ವಿಶ್ವಮಟ್ಟದಲ್ಲಿ ಧೂಳೆಬ್ಬಿಸಲು ಬರುತ್ತಿದೆ. ಈಗಾಗಲೇ ರಿಲೀಸ್​ ಆಗಿರುವ ಹಾಡು ಮತ್ತು ಟ್ರೇಲರ್​ನಿಂದಾಗಿ ಸಿಕ್ಕಾಪಟ್ಟೆ ಹೈಪ್​ ಸೃಷ್ಟಿ ಆಗಿದೆ. ದಕ್ಷಿಣ ಭಾರತದಿಂದ ಇನ್ನೊಂದು ಸಿನಿಮಾ ಅಬ್ಬರಿಸುವುದರಲ್ಲಿ ಅನುಮಾನವೇ ಇಲ್ಲ ಎಂದು ‘ಲೈಗರ್​’ (Liger Movie) ಟ್ರೇಲರ್​ ನೋಡಿದ ಎಲ್ಲರೂ ಹೇಳುತ್ತಿದ್ದಾರೆ. ಸಿನಿಮಾ ಬಿಡುಗಡೆ ಆದ ಬಳಿಕ ಈ ಚಿತ್ರ ಎಷ್ಟು ಕಲೆಕ್ಷನ್​ ಮಾಡಲಿದೆ ಎಂಬುದನ್ನು ತಿಳಿಯುವ ಕುತೂಹಲ ಎಲ್ಲರಿಗೂ ಇದೆ. ಅಚ್ಚರಿ ಎಂದರೆ ರಿಲೀಸ್​ ಆಗೋದಕ್ಕಿಂತ ಮೊದಲೇ ಈ ಚಿತ್ರ 180 ಕೋಟಿ ರೂಪಾಯಿಗೂ ಹೆಚ್ಚು ಬಿಸ್ನೆಸ್​ ಮಾಡಿದೆ. ಈ ಚಿತ್ರಕ್ಕೆ ಪುರಿ ಜಗನ್ನಾಥ್​ (Puri Jagannadh) ನಿರ್ದೇಶನ ಮಾಡಿದ್ದು, ವಿಜಯ್​ ದೇವರಕೊಂಡ ಮತ್ತು ಅನನ್ಯಾ ಪಾಂಡೆ ಜೋಡಿಯಾಗಿ ನಟಿಸಿದ್ದಾರೆ.

ಈಗ ಪ್ಯಾನ್​ ​ಇಂಡಿಯಾ ಟ್ರೆಂಡ್​ ಜೋರಾಗಿದೆ. ಅದೇ ಮಾರ್ಗದಲ್ಲಿ ‘ಲೈಗರ್​’ ಸಿನಿಮಾ ಬರುತ್ತಿದೆ. ತೆಲುಗು, ಕನ್ನಡ, ಹಿಂದಿ, ಮಲಯಾಳಂ ಹಾಗೂ ತಮಿಳಿನಲ್ಲಿ ಈ ಚಿತ್ರ ರಿಲೀಸ್​ ಆಗುತ್ತಿದೆ. ಈಗಾಗಲೇ ಹಿಂದಿ ಹೊರತುಪಡಿಸಿ ಉಳಿದೆಲ್ಲ ಭಾಷೆಗಳ ವಿತರಣೆ ಹಕ್ಕುಗಳು ಬರೋಬ್ಬರಿ 80 ಕೋಟಿ ರೂಪಾಯಿಗೆ ಸೇಲ್​ ಆಗಿದೆ ಎಂಬ ಮಾಹಿತಿ ಹರಿದಾಡುತ್ತಿದೆ. ಆ ಮೂಲಕ ಬಿಡುಗಡೆಗೂ ಮುನ್ನವೇ ಚಿತ್ರಕ್ಕೆ ದೊಡ್ಡ ಮೊತ್ತ ಸಿಕ್ಕಂತಾಗಿದೆ.

ಇನ್ನು, ಹಿಂದಿ ವರ್ಷನ್​ ಹಕ್ಕುಗಳು ಸೇಲ್​ ಆಗುವುದು ಬಾಕಿ ಇದೆ. ಅದರಿಂದ ಕೂಡ ಬಹುಕೋಟಿ ರೂಪಾಯಿ ಆದಾಯ ಹರಿದುಬರುವ ನಿರೀಕ್ಷೆ ಇದೆ. ಉತ್ತರ ಭಾರತದ ಮಂದಿ ‘ಲೈಗರ್​’ ಚಿತ್ರದ ಮೇಲೆ ಹೆಚ್ಚು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಹಾಗಾಗಿ ಹಿಂದಿ ವರ್ಷನ್​ಗೆ ಭಾರಿ ಬೇಡಿಕೆ ಬಂದಿದೆ. ಈ ಡೀಲ್​ ಕೂಡ ಶೀಘ್ರವೇ ಕುದುರಲಿದೆ. ಆಗಸ್ಟ್​ 25ರಂದು ಚಿತ್ರಮಂದಿರಗಳಲ್ಲಿ ಅದ್ದೂರಿಯಾಗಿ ಈ ಸಿನಿಮಾ ರಿಲೀಸ್​ ಆಗಲಿದೆ.

‘ಲೈಗರ್​’ ಸಿನಿಮಾದ ಆಡಿಯೋ ಹಕ್ಕುಗಳನ್ನು ಸೋನಿ ಮ್ಯೂಸಿಕ್​ ಕಂಪನಿ ಖರೀದಿಸಿದೆ. ಅದರಿಂದ ಬರೋಬ್ಬರಿ 14 ಕೋಟಿ ರೂಪಾಯಿ ಆದಾಯ ಬಂದಿದೆ ಎನ್ನಲಾಗಿದೆ. ಚಿತ್ರ ಬಿಡುಗಡೆ ಆಗಿ ಹಲವು ದಿನಗಳು ಕಳೆದ ಬಳಿಕ ಒಟಿಟಿಯಲ್ಲಿ ಮತ್ತು ಟಿವಿಯಲ್ಲಿ ಪ್ರಸಾರ ಮಾಡಲು ಬರೋಬ್ಬರಿ 85 ಕೋಟಿ ರೂಪಾಯಿಗಳಿಗೆ ಹಕ್ಕುಗಳನ್ನು ಖ್ಯಾತ ಸಂಸ್ಥೆಯೊಂದು ಖರೀದಿಸಿದೆ​ ಎಂದು ವರದಿ ಆಗಿದೆ. ಎಲ್ಲ ಸೇರಿದರೆ 180 ಕೋಟಿ ರೂಪಾಯಿಗಿಂತಲೂ ಹೆಚ್ಚು ಆದಾಯ ಬಂದಂತಾಗಿದೆ.