Folic Acid: ಫೋಲಿಕ್ ಆ್ಯಸಿಡ್ ಬಗ್ಗೆ ನಿಮಗೆಷ್ಟು ಗೊತ್ತು?; ಇದರ ಮಹತ್ವ, ಅಡ್ಡ ಪರಿಣಾಮಗಳೇನು?

ಫೋಲಿಕ್ ಆ್ಯಸಿಡ್ ನೀರಿನಲ್ಲಿ ಕರಗುವ ವಿಟಮಿನ್ ಆಗಿದೆ. ಇದು B ಜೀವಸತ್ವಗಳಲ್ಲಿ ಒಂದಾಗಿದೆ. ನಿಮ್ಮ ದೇಹವು ಫೋಲಿಕ್ ಆ್ಯಸಿಡ್ (Folic Acid) ಅಥವಾ ಫೋಲೇಟ್ ಅನ್ನು ಉತ್ಪತ್ತಿ ಮಾಡಲು ಸಾಧ್ಯವಿಲ್ಲದ ಕಾರಣ ನಿಮ್ಮ ಆಹಾರದಿಂದಲೇ ನೀವು ಅದನ್ನು ಪಡೆಯಬೇಕು. ಕೆಲವು ಆಹಾರಗಳು ನೈಸರ್ಗಿಕವಾಗಿ ಫೋಲೇಟ್ ಅನ್ನು ಹೊಂದಿರುತ್ತವೆ. ಅಂತಹ ಆಹಾರವನ್ನು ಹೆಚ್ಚು ಸೇವಿಸಿದರೆ ದೇಹಕ್ಕೆ ಫೋಲಿಕ್ ಆ್ಯಸಿಡ್ ಸಿಗುತ್ತದೆ. ಮುಖ್ಯವಾಗಿ ಗರ್ಭಿಣಿಯರಿಗೆ ಈ ಫೋಲಿಕ್ ಆ್ಯಸಿಡ್ ಬಹಳ ಅಗತ್ಯವಾದುದು. ಫೋಲಿಕ್ ಆ್ಯಸಿಡ್ ಗರ್ಭದೊಳಗಿನ ಮಗುವಿನ ಬೆಳವಣಿಗೆಗೆ ಬಹಳ ಅತ್ಯಗತ್ಯವಾದುದು.

ಫೋಲಿಕ್ ಆ್ಯಸಿಡ್ ಹೆಚ್ಚಾಗಿರುವ ಆಹಾರ ಪದಾರ್ಥಗಳಿವು:

– ಸೊಪ್ಪು

– ಎಲೆಕೋಸು

– ಬಟಾಣಿ

– ಬ್ರೊಕೋಲಿ

– ಬಾಳೆಹಣ್ಣು

– ಕೋಸುಗಡ್ಡೆ

– ಬೆಣ್ಣೆಹಣ್ಣು

– ಸಿಟ್ರಸ್ ಹಣ್ಣುಗಳು

– ಮೊಟ್ಟೆಗಳು

ಇದು ಮಲ್ಟಿವಿಟಮಿನ್‌ಗಳಂತಹ ಆಹಾರದ ಸಪ್ಲಿಮೆಂಟ್​​ಗಳಲ್ಲೂ ಇರುತ್ತದೆ. ಫೋಲಿಕ್ ಆ್ಯಸಿಡ್ ಜೀವಕೋಶಗಳು ಬೆಳೆಯಲು, ವಿಭಜಿಸಲು ಮತ್ತು ಸರಿಯಾಗಿ ಕೆಲಸ ಮಾಡಲು ಸಹಾಯ ಮಾಡುತ್ತದೆ. ಇದು ಕೆಲವು ಪ್ರೋಟೀನ್​ಗಳನ್ನು ಉತ್ಪಾದಿಸುತ್ತದೆ. ಕೆಂಪು ರಕ್ತ ಕಣಗಳು ಹೆಚ್ಚಾಗಲು ಸಹಾಯ ಮಾಡುತ್ತದೆ. ರಕ್ತಹೀನತೆಯನ್ನು ತಡೆಗಟ್ಟುತ್ತದೆ. ಗರ್ಭಿಣಿಯರು ಸಾಕಷ್ಟು ಫೋಲೇಟ್ ಅನ್ನು ಪಡೆಯದಿದ್ದರೆ ಶಿಶುಗಳಲ್ಲಿ ಬೆಳವಣಿಗೆಯ ಮೇಲೆ ಪರಿಣಾಮ ಬೀರುತ್ತದೆ.

ಇದನ್ನೂ ಓದಿ: Brain Health: ಮೆದುಳಿನ ಆರೋಗ್ಯ ಸುಧಾರಣೆಗೆ ಈ ಕೆಲವು ಅಂಶಗಳನ್ನು ಪ್ರತಿನಿತ್ಯ ರೂಢಿಸಿಕೊಳ್ಳಿ

ವಯಸ್ಕರಿಗೆ ಪ್ರತಿದಿನ ಸುಮಾರು 400 ಎಂಸಿಜಿ ಡಿಎಫ್‌ಇ ಫೋಲಿಕ್ ಆ್ಯಸಿಡ್​/ ಫೋಲೇಟ್​ನ ಅಗತ್ಯವಿದೆ. ಗರ್ಭಾವಸ್ಥೆಯಲ್ಲಿ ಮತ್ತು ಹಾಲುಣಿಸುವ ಸಮಯದಲ್ಲಿ ಫೋಲೇಟ್ ಅಗತ್ಯವು ಹೆಚ್ಚಾಗುತ್ತದೆ. ನಿಮ್ಮ ದೇಹವು 15-30 ಮಿಗ್ರಾಂ ಫೋಲೇಟ್ ಅನ್ನು ಸಂಗ್ರಹಿಸುತ್ತದೆ. ಹೆಚ್ಚಿನ ಫೋಲೇಟ್ ನಿಮ್ಮ ಯಕೃತ್ತಿನಲ್ಲಿರುತ್ತದೆ. ಉಳಿದವು ನಿಮ್ಮ ರಕ್ತ ಮತ್ತು ಅಂಗಾಂಶಗಳಲ್ಲಿರುತ್ತದೆ.

ತುಂಬಾ ಕಡಿಮೆ ಫೋಲೇಟ್ ಅನ್ನು ಸೇವಿಸುವುದರಿಂದ ರಕ್ತಹೀನತೆ, ಭ್ರೂಣದ ಬೆಳವಣಿಗೆಯ ಸಮಸ್ಯೆಗಳು, ಮಾನಸಿಕ ದುರ್ಬಲತೆ, ದುರ್ಬಲಗೊಂಡ ಪ್ರತಿರಕ್ಷಣಾ ಕಾರ್ಯ ಮತ್ತು ಖಿನ್ನತೆಯಂತಹ ಸಮಸ್ಯೆಗಳು ಉಂಟಾಗುತ್ತದೆ. ಮಧುಮೇಹವನ್ನು ನಿಯಂತ್ರಣಕ್ಕೆ ತರಲು ಫೋಲೇಟ್ ಸಹಾಯ ಮಾಡುತ್ತದೆ. ಫೋಲೇಟ್ ಸೇವಿಸುವುದರಿಂದ ಗರ್ಭಿಣಿಯಾಗುವ ಮತ್ತು ಮಗುವನ್ನು ಹೆರುವ ಅವಕಾಶ ಹೆಚ್ಚಾಗಬಹುದು. ಉರಿಯೂತದ ಸಮಸ್ಯೆಗೂ ಫೋಲಿಕ್ ಆ್ಯಸಿಡ್ ಪರಿಣಾಮಕಾರಿ. ಫೋಲಿಕ್ ಆಸಿಡ್ ಮೂತ್ರಪಿಂಡದ ಕಾಯಿಲೆ ಇರುವವರಲ್ಲಿ ಹೋಮೋಸಿಸ್ಟೈನ್ ಮಟ್ಟವನ್ನು ಮತ್ತು ಹೃದ್ರೋಗದ ಅಪಾಯವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ಇನ್ನಷ್ಟು ಆರೋಗ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ