ಕೆಮ್ಮಿ ಕೆಮ್ಮಿ ಸುಸ್ತಾಯ್ತ?; ಅಡುಗೆ ಮನೆಯಲ್ಲೇ ಇದೆ ಪರಿಹಾರ

ಚಳಿಗಾಲ ಪ್ರಾರಂಭವಾಗುತ್ತಿದ್ದಂತೆ ನಮ್ಮಲ್ಲಿ ಅನೇಕರು ಅಲರ್ಜಿಗಳು ಮತ್ತು ಮಾಲಿನ್ಯದ ಅಡ್ಡಪರಿಣಾಮಗಳನ್ನು ಎದುರಿಸುತ್ತಾರೆ. ಚಳಿಗಾಲದ ಸಂದರ್ಭದಲ್ಲಿ ಶೀತ ಮತ್ತು ಕೆಮ್ಮು ಸಾಕಷ್ಟು ಸಾಮಾನ್ಯವಾಗಿದೆ. ಈಗಂತೂ ಎಲ್ಲಿ ನೋಡಿದರೂ ವೈರಲ್ ಜ್ವರದ ಕಾಟ. ಈ ಸಂದರ್ಭದಲ್ಲಿ ಜ್ವರ, ಶೀತ, ಕೆಮ್ಮು ಒಬ್ಬರಿಂದ ಒಬ್ಬರಿಗೆ ಹರಡುವುದು ಸುಲಭ. ಕೆಮ್ಮು ಮತ್ತು ಶೀತದಿಂದ ಆರಾಮ ಪಡೆಯಲು ಅಡುಗೆ ಮನೆಯಲ್ಲೇ ಇರುವ ಕೆಲವು ವಸ್ತುಗಳನ್ನು ಬಳಸಬಹುದು.

ನಮ್ಮ ಅಜ್ಜಿಯರು ಈ ಪದಾರ್ಥಗಳನ್ನು ವಿವಿಧ ಉದ್ದೇಶಗಳಿಗಾಗಿ ಬಳಸುತ್ತಿದ್ದರು. ಗಾಯವನ್ನು ವಾಸಿಮಾಡಲು ಅಥವಾ ಗಂಟಲಿನ ಕಿರಿಕಿರಿಯಿಂದ ಪರಿಹಾರವನ್ನು ಕಂಡುಕೊಳ್ಳಲು ಇವುಗಳನ್ನು ಬಳಸುತ್ತಿದ್ದರು. ನೀವು ಸಹ ಈ ಕೆಳಗಿನ ಪದಾರ್ಥಗಳನ್ನು ಯಾವುದೇ ತೊಂದರೆಯಿಲ್ಲದೆ ಬಳಸಬಹುದು. ಇವು ರೋಗನಿರೋಧಕ ಶಕ್ತಿಯನ್ನು ಕೂಡ ಹೆಚ್ಚಿಸುತ್ತವೆ.

ಇದನ್ನೂ ಓದಿ: ಶೀತ ಬಾರದಂತೆ ತಡೆಗಟ್ಟುವ 5 ಮುನ್ನೆಚ್ಚರಿಕಾ ಕ್ರಮಗಳಿವು

ಶುಂಠಿ ಪುಡಿ ಹಾಕಿ ಕುದಿಸಿದ ನೀರು:

ಶುಂಠಿ ಪುಡಿ ಹಾಕಿ ಕುದಿಸಿದ ನೀರು ಜೀರ್ಣಕಾರಿ ಸಮಸ್ಯೆಗಳಿಂದ ಪರಿಹಾರವನ್ನು ನೀಡುತ್ತದೆ. ಇದು ಗಂಟಲು ನೋವು, ಗಂಟಲ ಕಿರಿಕಿರಿ, ಕೆಮ್ಮು, ಕಫವನ್ನು ಕಡಿಮೆ ಮಾಡುತ್ತದೆ. ಒಂದು ಪಾತ್ರೆಯಲ್ಲಿ ಈ ಕಷಾಯವನ್ನು ಮಾಡಿಟ್ಟುಕೊಂಡರೆ ಇಡೀ ದಿನ ಆಗಾಗ ಒಂದೆರಡು ಸಿಪ್ ಕುಡಿಯುತ್ತಿದ್ದರೆ ಗಂಟಲಿಗೆ ಆರಾಮ ಎನಿಸುತ್ತದೆ.

ಶುಂಠಿ ನೀರಿಗೆ ಬೇಕಾಗುವ ಸಾಮಗ್ರಿಗಳು:

1 ಲೀಟರ್ ನೀರು

1/2 ಟೀಚಮಚ ಶುಂಠಿ ಪುಡಿ

ತಾಜಾ ಶುಂಠಿಯ ತುಂಡು

ಇದನ್ನು ಮಾಡುವುದು ಹೇಗೆ?:

– ನೀರನ್ನು ಕುದಿಸಿ. ಮೇಲೆ ತಿಳಿಸಿದ ಪ್ರಮಾಣದಲ್ಲಿ ತಾಜಾ ಶುಂಠಿ ಮತ್ತು ಅದರ ಪುಡಿಯನ್ನು ಸೇರಿಸಿ.

– ಆ ಮಿಶ್ರಣವನ್ನು 10 ನಿಮಿಷಗಳ ಕಾಲ ಕುದಿಸಿ. ಇದರಿಂದ ಶುಂಠಿಯ ಎಲ್ಲಾ ಪೌಷ್ಟಿಕಾಂಶದ ಸಾರಗಳು ನೀರಿನೊಂದಿಗೆ ಮಿಶ್ರಣವಾಗುತ್ತವೆ.

– ನಂತರ ಅದನ್ನು ಸೋಸಿಕೊಳ್ಳಿ. ಅದನ್ನು ಸೇವಿಸುವ ಮೊದಲು ಸ್ವಲ್ಪ ತಣ್ಣಗಾಗಲು ಬಿಡಿ. ಈ ನೀರನ್ನು ಪ್ಲಾಸ್ಟಿಕ್ ಪಾತ್ರೆ ಅಥವಾ ಲೋಟದ ಬದಲು ಸ್ಟೀಲ್ ಪಾತ್ರೆಯಲ್ಲೇ ಹಾಕಿಡುವುದು ಉತ್ತಮ. ನಂತರ ಇದನ್ನು ಸೇವಿಸಿ.

ಇದನ್ನೂ ಓದಿ: ಶೀತ ಮತ್ತು ಕೆಮ್ಮು ಇದೆಯೇ? ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು 5 ಆರೋಗ್ಯಕರ ಸೂಪ್‌ಗಳು

ಅರಿಶಿನದ ನೀರಿನಿಂದ ಗಾರ್ಗ್ಲ್ ಮಾಡಿ:

ನಿರಂತರ ಕೆಮ್ಮಿಗೆ ಮತ್ತೊಂದು ಮನೆಮದ್ದು ಅರಿಶಿನ ನೀರಿನಿಂದ ಗಾರ್ಗ್ಲಿಂಗ್ ಮಾಡುವುದು. ಕಹಿಯಾದ ಆಧುನಿಕ ಔಷಧವನ್ನು ಬಳಸಲು ಮುಖ ಸಿಂಡರಿಸುವ ಮಕ್ಕಳಿಗೆ ಇದು ಬೆಸ್ಟ್​ ಆಯ್ಕೆ.

ಅರಿಶಿನ ನೀರಿನ ಗಾರ್ಗಲ್ ಮಿಶ್ರಣಕ್ಕೆ ಬೇಕಾದ ಪದಾರ್ಥಗಳು:

ಅರಿಶಿನ 1 ಟೀಚಮಚ

1 ಗ್ಲಾಸ್ ನೀರು

ಅರಿಶಿನ ನೀರಿನ ಗಾರ್ಗಲ್ ಮಿಶ್ರಣವನ್ನು ಹೇಗೆ ಮಾಡುವುದು?:

– ಮೊದಲು ನೀರನ್ನು ಕುದಿಸಿ ಮತ್ತು ಅದಕ್ಕೆ ಅರಿಶಿನ ಸೇರಿಸಿ.

– ಆ ಮಿಶ್ರಣವನ್ನು 3-5 ನಿಮಿಷಗಳ ಕಾಲ ಜ್ವಾಲೆಯ ಮೇಲೆ ಇರಿಸಿ. ಇದರಿಂದ ಅರಿಶಿನವು ಸಂಪೂರ್ಣವಾಗಿ ಕರಗುತ್ತದೆ.

– ಆ ಮಿಶ್ರಣ ತಣ್ಣಗಾದ ನಂತರ ವಯಸ್ಕರು ದಿನಕ್ಕೆ ಗರಿಷ್ಠ 3 ಬಾರಿ ಗಾರ್ಗ್ಲ್ ಮಾಡಬಹುದು. ಮಕ್ಕಳು ದಿನಕ್ಕೆ ಒಮ್ಮೆ ಮಾತ್ರ ಇದನ್ನು ಮಾಡಬೇಕು. ಏಕೆಂದರೆ ಅವರಿಗೆ ಒಂದು ಸಣ್ಣ ಡೋಸ್ ಸಾಕು.

ಇನ್ನಷ್ಟು ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ