ಒಣ ಕೆಮ್ಮು ಮತ್ತು ಕಫದ ಕೆಮ್ಮಿಗೆ ಮನೆಮದ್ದುಗಳು ಯಾವುವು? ಚಳಿಗಾಲದಲ್ಲಿ ಈ ಸಲಹೆಗಳು ಉಪಯುಕ್ತ

ಚಳಿಗಾಲದಲ್ಲಿ ಒಣ ಕೆಮ್ಮು, ಕಫ, ಗಂಟಲು ಕೆರತದಂತಹ ಸಮಸ್ಯೆಗಳು ಹೆಚ್ಚಾಗಿ ಕಾಣಿಸಿಕೊಳ್ಳುತ್ತವೆ. ಅಳಲೆಕಾಯಿ, ಲವಂಗ, ತುಳಸಿ, ಜೇನುತುಪ್ಪ ಮತ್ತು ಉಪ್ಪು ನೀರಿನಿಂದ ಬಾಯ ಮುಕ್ಕಳಿಸುವುದು ಸೇರಿದಂತೆ ಹಲವು ಮನೆಮದ್ದುಗಳನ್ನು ಹಿಂದಿನಿಂದಲೂ ಬಳಸಲಾಗುತ್ತಿದೆ. ಇವು ಕೆಲವರಿಗೆ ತಾತ್ಕಾಲಿಕ ಉಪಶಮನ ನೀಡಬಹುದು. ಆದರೆ ಕೆಮ್ಮು ತೀವ್ರವಾಗಿದ್ದರೆ ಅಥವಾ ದೀರ್ಘಕಾಲ ಮುಂದುವರಿದರೆ ವೈದ್ಯರ ಸಲಹೆ ಪಡೆಯುವುದು ಅತ್ಯಗತ್ಯ.

ಒಣ ಕೆಮ್ಮು ಮತ್ತು ಕಫದ ಕೆಮ್ಮಿಗೆ ಮನೆಮದ್ದುಗಳು ಯಾವುವು? ಚಳಿಗಾಲದಲ್ಲಿ ಈ ಸಲಹೆಗಳು ಉಪಯುಕ್ತ
Winter Cough Remedies
Image Credit source: Getty Images

Updated on: Nov 20, 2026 | 4:26 PM

ಚಳಿಗಾಲದಲ್ಲಿ ಕೆಮ್ಮು, ಗಂಟಲು ಕೆರತ ಮತ್ತು ಕಫದ ಸಮಸ್ಯೆಗಳು ಹೆಚ್ಚಾಗಿ ಕಾಣಿಸಿಕೊಳ್ಳುತ್ತವೆ. ಹವಾಮಾನದಲ್ಲಿನ ಬದಲಾವಣೆ, ವೈರಸ್ ಸೋಂಕುಗಳು ಹಾಗೂ ಒಣ ಗಾಳಿಯಿಂದ ಗಂಟಲು ಕಿರಿಕಿರಿ ಉಂಟಾಗಬಹುದು. ಮಕ್ಕಳಿಂದ ಹಿಡಿದು ವಯಸ್ಕರವರೆಗೆ ಹಲವರು ಈ ಸಮಸ್ಯೆಯಿಂದ ಬಳಲುತ್ತಾರೆ. ಇಂತಹ ಸಂದರ್ಭಗಳಲ್ಲಿ ಕೆಲವು ಸರಳ ಮನೆಮದ್ದುಗಳು ಗಂಟಲಿನ ಕಿರಿಕಿರಿ ಮತ್ತು ಕೆಮ್ಮಿನಿಂದ ತಾತ್ಕಾಲಿಕ ಉಪಶಮನ ನೀಡಬಹುದು. ಹಾಗಾದರೆ ಅವು ಯಾವವು ಮತ್ತು ಅದನ್ನು ಬಳಸುವುದು ಹೇಗೆ ಎಂಬುದನ್ನು ಸ್ಟೋರಿ ಮೂಲಕ ತಿಳಿದುಕೊಳ್ಳಿ.

ಕೆಮ್ಮಿನಲ್ಲಿ ಎರಡು ವಿಧ

ಸಾಮಾನ್ಯವಾಗಿ ಕೆಮ್ಮನ್ನು ಒಣ ಕೆಮ್ಮು ಮತ್ತು ಕಫದ ಕೆಮ್ಮು ಎಂದು ಎರಡು ವಿಧಗಳಾಗಿ ವಿಂಗಡಿಸಲಾಗುತ್ತದೆ. ಒಣ ಕೆಮ್ಮಿನಲ್ಲಿ ಗಂಟಲಿನಲ್ಲಿ ತುರಿಕೆ ಅಥವಾ ಕಿರಿಕಿರಿ ಕಾಣಿಸಿಕೊಳ್ಳಬಹುದು. ಕಫದ ಕೆಮ್ಮಿನಲ್ಲಿ ಶ್ವಾಸನಾಳದಲ್ಲಿ ಸಂಗ್ರಹವಾಗಿರುವ ಕಫ ಅಥವಾ ಸಿಂಬಳ ಹೊರಬರಲು ಕೆಮ್ಮು ಉಂಟಾಗುತ್ತದೆ. ಹಾಗಾಗಿ ಕೆಮ್ಮಿನ ಕಾರಣವನ್ನು ತಿಳಿದುಕೊಂಡು ಸೂಕ್ತ ಆರೈಕೆ ಮಾಡುವುದು ಬಹಳ ಮುಖ್ಯ.

Loading...

ಒಣ ಕೆಮ್ಮಿಗೆ ಅಳಲೆಕಾಯಿಯ ಬಳಕೆ

ಸಾಂಪ್ರದಾಯಿಕವಾಗಿ ಅಳಲೆಕಾಯಿ, ಸಂಸ್ಕೃತದಲ್ಲಿ ಇದನ್ನು ಹರೀತಕಿ (Haritaki) ಎಂದು ಕರೆಯಲಾಗುತ್ತದೆ. ಇದನ್ನು ಗಂಟಲು ಸಂಬಂಧಿತ ಸಮಸ್ಯೆಗಳಿಗೆ ಮನೆಮದ್ದಾಗಿ ಬಳಸಲಾಗುತ್ತದೆ. ಅಳಲೆಕಾಯಿಯ ಸಣ್ಣ ತುಂಡನ್ನು ಜಗಿಯುವ ಪದ್ಧತಿಯೂ ಇದೆ. ಆದರೆ ಇದು ಕೆಮ್ಮನ್ನು ಗುಣಪಡಿಸುತ್ತದೆ ಎಂಬುದಕ್ಕೆ ಸಾಕಷ್ಟು ವೈಜ್ಞಾನಿಕ ಸಾಕ್ಷ್ಯಗಳಿಲ್ಲ. ಇದನ್ನು ಬಳಸುವ ಮೊದಲು ಅದರ ಸುರಕ್ಷತೆಯ ಬಗ್ಗೆ ತಿಳಿದುಕೊಳ್ಳುವುದು ಉತ್ತಮ.

ಇದನ್ನೂ ಓದಿ: ಬಾಯಿ ಹುಣ್ಣು ಸಮಸ್ಯೆಗೆ ಜೇನುತುಪ್ಪ, ತುಪ್ಪ, ಅರಿಶಿನ ಬಳಸಬಹುದೇ? ಈ ಮನೆಮದ್ದುಗಳ ಬಗ್ಗೆ ತಿಳಿಯಿರಿ

ಲವಂಗದಿಂದ ಗಂಟಲಿನ ಕಿರಿಕಿರಿಗೆ ಪರಿಹಾರ

ಲವಂಗವನ್ನು ಹಿಂದಿನಿಂದಲೂ ಗಂಟಲಿನ ಕಿರಿಕಿರಿ ನಿವಾರಣೆಗೆ ಬಳಸಲಾಗುತ್ತದೆ. ಲವಂಗದಲ್ಲಿರುವ ಕೆಲವು ಸಂಯುಕ್ತಗಳು ಉರಿಯೂತದ ಗುಣಗಳನ್ನು ಹೊಂದಿದ್ದರೂ, ಲವಂಗವನ್ನು ಜಗಿಯುವುದರಿಂದ ಕೆಮ್ಮು ಸಂಪೂರ್ಣ ಗುಣವಾಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ. ಅತಿಯಾಗಿ ಲವಂಗ ಸೇವಿಸುವುದನ್ನು ತಪ್ಪಿಸಬೇಕು.

ಉಪ್ಪು ನೀರಿನಿಂದ ಬಾಯಿ ಮುಕ್ಕಳಿಸುವುದು

ಉಗುರು ಬೆಚ್ಚಗಿನ ನೀರಿಗೆ ಸ್ವಲ್ಪ ಉಪ್ಪು ಬೆರೆಸಿ ಬಾಯಿ ಮುಕ್ಕಳಿಸುವುದರಿಂದ ಗಂಟಲಿನ ನೋವು ಮತ್ತು ಕಿರಿಕಿರಿಗೆ ತಾತ್ಕಾಲಿಕ ಉಪಶಮನ ದೊರೆಯಬಹುದು. ಈ ವಿಧಾನವನ್ನು ವಯಸ್ಕರು ಮತ್ತು ಸುರಕ್ಷಿತವಾಗಿ ಮುಕ್ಕಳಿಸಿ ಉಗುಳಬಲ್ಲ ಮಕ್ಕಳು ಮಾತ್ರ ಅನುಸರಿಸಬೇಕು.

ತುಳಸಿ, ಜೇನುತುಪ್ಪ ಮತ್ತು ವೀಳ್ಯದೆಲೆ

ಸಾಮಾನ್ಯವಾಗಿ ತುಳಸಿ ಮತ್ತು ಜೇನುತುಪ್ಪವನ್ನು ಸಾಂಪ್ರದಾಯಿಕವಾಗಿ ಕೆಮ್ಮಿನ ಆರೈಕೆಗೆ ಬಳಸಲಾಗುತ್ತದೆ. ಜೇನುತುಪ್ಪ ಗಂಟಲಿನ ಕಿರಿಕಿರಿಯನ್ನು ಕಡಿಮೆ ಮಾಡಲು ಮತ್ತು ಕೆಮ್ಮಿನ ತೀವ್ರತೆಯನ್ನು ತಾತ್ಕಾಲಿಕವಾಗಿ ತಗ್ಗಿಸಲು ನೆರವಾಗಬಹುದು. ವೀಳ್ಯದೆಲೆಗೆ ಜೇನುತುಪ್ಪ ಹಚ್ಚಿ ಸೇವಿಸುವ ಪದ್ಧತಿಯೂ ಇದೆ, ಆದರೆ ಈ ಸಂಯೋಜನೆಯ ಪರಿಣಾಮ ಎಲ್ಲರಲ್ಲಿಯೂ ಒಂದೇ ರೀತಿಯಾಗಿರುವುದಿಲ್ಲ.

ಸೂಚನೆ: ಒಂದು ವರ್ಷದೊಳಗಿನ ಮಕ್ಕಳಿಗೆ ಜೇನುತುಪ್ಪ ನೀಡಬಾರದು. ಕೆಮ್ಮು ದೀರ್ಘಕಾಲ ಮುಂದುವರಿದರೆ, ಉಸಿರಾಟದ ತೊಂದರೆ, ಎದೆನೋವು, ಹೆಚ್ಚಿನ ಜ್ವರ ಅಥವಾ ರಕ್ತದೊಂದಿಗೆ ಕೆಮ್ಮು ಕಂಡುಬಂದರೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

ಪ್ರೀತಿ ಭಟ್​, ಗುಣವಂತೆ

ಪ್ರೀತಿ ಭಟ್ ಗುಣವಂತೆ – ಮೂಲತಃ ಹೊನ್ನಾವರದ ಗುಣವಂತೆಯವಳು. ಪತ್ರಿಕೋದ್ಯಮ ಮತ್ತು ಸಮೂಹ ಸಂವಹನದಲ್ಲಿ (M.C.J) ಎಂ.ಎ ಮಾಡಿದ್ದು ಪತ್ರಿಕಾ ರಂಗದಲ್ಲಿ 6 ವರ್ಷಗಳ ಅನುಭವವಿದೆ. ಸುದ್ದಿ ಬಿಡುಗಡೆ ವಾರ ಪತ್ರಿಕೆಯಲ್ಲಿ, ಉದಯವಾಣಿ ದಿನ ಪತ್ರಿಕೆಯಲ್ಲಿ ಕೆಲಸ ಮಾಡಿದ್ದೇನೆ. ಅದಾದ ಬಳಿಕ 2023ರಿಂದ ಟಿವಿ9 ಕನ್ನಡದಲ್ಲಿ ಕೆಲಸ ಮಾಡುತ್ತಿದ್ದೇನೆ. ಅಧ್ಯಾತ್ಮ, ಆರೋಗ್ಯ, ಜೀವನಶೈಲಿಗೆ ಸಂಬಂಧಿಸಿದ ಲೇಖನಗಳನ್ನು ಬರೆಯುವುದರಲ್ಲಿ ಆಸಕ್ತಿ ಹೊಂದಿದ್ದು, ಓದುಗರಿಗೆ ಉತ್ತಮ ಲೇಖನಗಳನ್ನು ಒದಗಿಸುವಲ್ಲಿ ಪ್ರೀತಿಯಿಂದ, ಪ್ರಾಮಾಣಿಕವಾಗಿ ಪ್ರಯತ್ನಿಸುತ್ತಿದ್ದೇನೆ. ಬರವಣಿಗೆ ಹೊರತು ಪಡಿಸಿದರೆ ನನ್ನ ಆಸಕ್ತಿಕರ ಕ್ಷೇತ್ರ ಪ್ರವಾಸ.

Read More
Loading...
Unable to load recommendations.
Follow Us