ಹೆಚ್ಚುತ್ತಿರುವ ಗುದ ಕ್ಯಾನ್ಸರ್, ಇದು ಮಾರಣಾಂತಿಕವೇ? ಲಕ್ಷಣಗಳು, ರೋಗ ಪತ್ತೆ, ಚಿಕಿತ್ಸೆ ಬಗ್ಗೆ ಇಲ್ಲಿದೆ ಸಂಪೂರ್ಣ ಮಾಹಿತಿ

ವೈದ್ಯಕೀಯ ವಿಜ್ಞಾನವು ಮುಂದುವರಿದಂತೆಲ್ಲ ವಿವಿಧ ಕ್ಯಾನ್ಸರ್‌ಗಳ (Cancer) ಕುರಿತ ನಮ್ಮ ತಿಳುವಳಿಕೆ ಕೂಡ ಹೆಚ್ಚಾಗುತ್ತದೆ. ರೋಗಿಗಳ ಆರೈಕೆ ಮತ್ತು ಚಿಕಿತ್ಸಾ ತಂತ್ರಗಳನ್ನು ಹೆಚ್ಚಿಸಲು ನಮಗೆ ಅನುವು ಮಾಡಿಕೊಡುತ್ತದೆ. ಸಾಮಾನ್ಯವಾಗಿ ಕಡೆಗಣಿಸಲ್ಪಡುವ ಕ್ಯಾನ್ಸರ್ ವಿಧಗಳಲ್ಲಿ ಗುದದ ಕ್ಯಾನ್ಸರ್ (Anal Cancer) ಕೂಡ ಒಂದಾಗಿದೆ. ಇತ್ತೀಚೆಗೆ ಈ ಕ್ಯಾನ್ಸರ್ ಪ್ರಮಾಣ ಹೆಚ್ಚಳದಿಂದಾಗಿ ಗಮನಹರಿಸಬೇಕಾದ ಅಗತ್ಯ ಬಂದೊದಗಿದೆ. ಒಬ್ಬ ಆನ್ಕೊಲೊಜಿಸ್ಟ್ ಆಗಿ, ಈ ಕ್ಯಾನ್ಸರ್​​ನ ಜಟಿಲತೆಗಳನ್ನು, ಅದರ ಮೂಲ ಕಾರಣಗಳಿಂದ ಹಿಡಿದು ಲಭ್ಯವಿರುವ ಚಿಕಿತ್ಸಾ ಆಯ್ಕೆಗಳ ಬಗ್ಗೆ ಬೆಳಕುಚೆಲ್ಲುವುದು ಅನಿವಾರ್ಯವೆಂದು ಭಾವಿಸುತ್ತೇನೆ.

ಗುದ ಕ್ಯಾನ್ಸರ್ ಮಾರಣಾಂತಿಕವೇ?

ಗುದದ ಕ್ಯಾನ್ಸರ್ ಮಾರಣಾಂತಿಕವಾಗಿದ್ದು, ಅದು ಗುದದ ಅಂಗಾಂಶಗಳಲ್ಲಿ ಆರಂಭವಾಗುತ್ತದೆ. ವಿಸರ್ಜನಾ ವ್ಯವಸ್ಥೆಗಳ ಪ್ರಮುಖ ಭಾಗವಾದ ಗುದದ್ವಾರವು ಸೆಲ್ಯುಲಾರ್ ರೂಪಾಂತರಗಳಿಗೆ ಒಳಗಾಗುವುದರಿಂದ ಗೆಡ್ಡೆಗಳ ರಚನೆಗೆ ಕಾರಣವಾಗಬಹುದು. ಇತರ ಕ್ಯಾನ್ಸರ್‌ಗಳಂತೆ, ಆರಂಭದಲ್ಲೇ ಪತ್ತೆ ಹಚ್ಚಿ ಚಿಕಿತ್ಸೆ ಪಡೆಯುವುದು ಬಹು ಮುಖ್ಯವಾಗಿದೆ.

ಗುದ ಕ್ಯಾನ್ಸರ್​ಗೆ ಕಾರಣವೇನು? ಅಪಾಯಗಳೇನು?

ಗುದದ ಕ್ಯಾನ್ಸರ್​​ಗೆ ನಿಖರವಾದ ಕಾರಣ ಏನೆಂಬುದು ಇನ್ನೂ ತಿಳಿದಿಲ್ಲ. ಆದರೆ, ಕ್ಯಾನ್ಸರ್​ ಅಪಾಯವನ್ನು ಹೆಚ್ಚಿಸುವ ಹಲವಾರು ಅಂಶಗಳನ್ನು ಗುರುತಿಸಲಾಗಿದೆ. ಹ್ಯೂಮನ್ ಪ್ಯಾಪಿಲೋಮವೈರಸ್ (HPV) ಸೋಂಕು, ವಿಶೇಷವಾಗಿ HPV-16 ಮತ್ತು HPV-18 ನಂತಹ ಕೆಲವು ಗುದದ ಕ್ಯಾನ್ಸರ್‌ಗೆ ಕಾರಣವಾಗುವುದು ತಿಳಿದುಬಂದಿದೆ. ಈ ಲೈಂಗಿಕವಾಗಿ ಹರಡುವ ಸೋಂಕು ಗರ್ಭಕಂಠದ ಕ್ಯಾನ್ಸರ್‌ಗೆ ಕೂಡ ಪ್ರಮುಖ ಕಾರಣವಾಗಿದೆ. ಇದು ಗುದದ ಕ್ಯಾನ್ಸರ್ ಬೆಳವಣಿಗೆಯಲ್ಲಿ ಕೂಡ ಪಾತ್ರವನ್ನು ವಹಿಸುತ್ತದೆ.

ದುರ್ಬಲಗೊಂಡ ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಹೊಂದಿರುವ ವ್ಯಕ್ತಿಗಳಲ್ಲಿ, (ಉದಾಹರಣೆಗೆ; HIV/AIDS, ಸೋಂಕುಗಳು) ಅಸಹಜ ಜೀವಕೋಶದ ಬೆಳವಣಿಗೆಯ ವಿರುದ್ಧ ಹೋರಾಡುವ ಕಡಿಮೆ ಸಾಮರ್ಥ್ಯದಿಂದಾಗಿ ಗುದದ ಕ್ಯಾನ್ಸರ್ ಬೆಳವಣಿಗೆ ಹೊಂದುವ ಸಾಧ್ಯತೆ ಹೆಚ್ಚು. ಇಷ್ಟೇ ಅಲ್ಲದೆ, ಧೂಮಪಾನ ಮತ್ತು ಹಲವು ಮಂದಿಯ ಜತೆ ಲೈಂಗಿಕ ಸಂಪರ್ಕ ಹೊಂದುವ ಜೀವನಶೈಲಿಯ ಅಂಶಗಳು ಅಪಾಯವನ್ನು ಹೆಚ್ಚಿಸಬಹುದು.

ಗುದ ಕ್ಯಾನ್ಸರ್​​​ನ ಲಕ್ಷಣಗಳೇನು?

ಗುದದ ಕ್ಯಾನ್ಸರ್​​​ನ ಲಕ್ಷಣಗಳನ್ನು ಗುರುತಿಸುವುದು ಆರಂಭಿಕ ರೋಗನಿರ್ಣಯ ಮತ್ತು ಪರಿಣಾಮಕಾರಿ ಚಿಕಿತ್ಸೆಗೆ ಪ್ರಮುಖವಾಗಿದೆ. ಸಾಮಾನ್ಯವಾಗಿ ಕರುಳಿನ ಚಲನೆಯ ಸಮಯದಲ್ಲಿ ಗುದದ್ವಾರ ಅಥವಾ ಗುದನಾಳದಿಂದ ರಕ್ತಸ್ರಾವವಾಗುವುದು ಸಾಮಾನ್ಯ ಲಕ್ಷಣವಾಗಿದೆ. ನಿರಂತರವಾದ ನೋವು, ತುರಿಕೆ, ಅಥವಾ ಗುದದ ಪ್ರದೇಶದಲ್ಲಿ ತುಂಬಿದಂಥ ಭಾವನೆ ಕೂಡ ರೋಗದ ಸೂಚಕವಾಗಿರಬಹುದು.

ರೋಗನಿರ್ಣಯದ ವಿಧಾನಗಳು

ಇತರ ಕ್ಯಾನ್ಸರ್​​​​ಗಳಂತೆಯೇ, ಗುದದ ಕ್ಯಾನ್ಸರ್ ರೋಗನಿರ್ಣಯವು ಬಹು-ಹಂತದ ಪ್ರಕ್ರಿಯೆಯನ್ನು ಒಳಗೊಂಡಿರುತ್ತದೆ. ರೋಗಲಕ್ಷಣಗಳು ಮತ್ತು ಒಟ್ಟಾರೆ ಆರೋಗ್ಯವನ್ನು ನಿರ್ಣಯಿಸಲು ಸಂಪೂರ್ಣ ವೈದ್ಯಕೀಯ ಇತಿಹಾಸ ಮತ್ತು ದೈಹಿಕ ಪರೀಕ್ಷೆಯನ್ನು ನಡೆಸಲಾಗುತ್ತದೆ. ರೋಗನಿರ್ಣಯದ ಸಾಧನಗಳು ಅನೋಸ್ಕೋಪಿ / ಪ್ರೊಕ್ಟೊಸ್ಕೋಪಿಯನ್ನು ಒಳಗೊಂಡಿರುತ್ತವೆ. ಅಲ್ಲಿ ತೆಳುವಾದ, ಹೊಂದಿಕೊಳ್ಳುವ ಟ್ಯೂಬ್ ಮೂಲಕ ಗುದದ್ವಾರದ ಹೊರಭಾಗವನ್ನು ಪರೀಕ್ಷಿಸಲು ಬಳಸಲಾಗುತ್ತದೆ. ಹೆಚ್ಚುವರಿಯಾಗಿ, ಕ್ಯಾನ್ಸರ್ ಕೋಶಗಳ ಉಪಸ್ಥಿತಿಯನ್ನು ಖಚಿತಪಡಿಸಲು ಯಾವುದೇ ಅನುಮಾನಾಸ್ಪದ ಗಾಯಗಳ ಬಯಾಪ್ಸಿಗಳನ್ನು ನಡೆಸಲಾಗುತ್ತದೆ.

ಆಧುನಿಕ ಚಿಕಿತ್ಸಾ ಮಾರ್ಗಗಳು

ಗುದದ ಕ್ಯಾನ್ಸರ್‌ಗೆ ಚಿಕಿತ್ಸೆ ನೀಡುವ ತಂತ್ರವು ರೋಗದ ಹಂತ ಮತ್ತು ರೋಗಿಯ ಒಟ್ಟಾರೆ ಆರೋಗ್ಯದ ಆಧಾರದ ಮೇಲೆ ಬದಲಾಗುತ್ತದೆ. ಕೆಲವು ಪ್ರಾಥಮಿಕ ಚಿಕಿತ್ಸಾ ವಿಧಾನಗಳು ಇಲ್ಲಿವೆ:

ಕೀಮೋರಡಿಯೇಶನ್: ಈ ಸಂಯೋಜಿತ ವಿಧಾನವು ವಿಕಿರಣ ಚಿಕಿತ್ಸೆಯ ಜೊತೆಗೆ ಕೀಮೋಥೆರಪಿಯನ್ನು ನಿರ್ವಹಿಸುವುದನ್ನು ಒಳಗೊಂಡಿರುತ್ತದೆ. ಇದು ಸಾಮಾನ್ಯವಾಗಿ ಗುದದ ಕ್ಯಾನ್ಸರ್‌ಗೆ ಆದ್ಯತೆಯ ಚಿಕಿತ್ಸೆಯಾಗಿದೆ ಮತ್ತು ಗೆಡ್ಡೆಗಳನ್ನು ಕುಗ್ಗಿಸುವ ಮತ್ತು ಕ್ಯಾನ್ಸರ್ ಕೋಶಗಳನ್ನು ನಿರ್ಮೂಲನೆ ಮಾಡುವ ಗುರಿಯನ್ನು ಹೊಂದಿದೆ.

ಶಸ್ತ್ರಚಿಕಿತ್ಸೆ: ಕೆಮೊರೇಡಿಯೇಶನ್‌ಗೆ ಪ್ರತಿಕ್ರಿಯಿಸದ ಪ್ರಕರಣಗಳಿಗೆ ಅಥವಾ ಮರುಕಳಿಸುವ ಕ್ಯಾನ್ಸರ್‌ನ ನಿದರ್ಶನಗಳಲ್ಲಿ ಶಸ್ತ್ರಚಿಕಿತ್ಸಾ ವಿಧಾನಗಳನ್ನು ಶಿಫಾರಸು ಮಾಡಬಹುದು. ಗುದದ ಕಾರ್ಯವನ್ನು ಸಂರಕ್ಷಿಸುವ ಸಂದರ್ಭದಲ್ಲಿ ಶಸ್ತ್ರಚಿಕಿತ್ಸೆಯು ಕ್ಯಾನ್ಸರ್ ಅಂಗಾಂಶವನ್ನು ತೆಗೆದುಹಾಕುವುದನ್ನು ಒಳಗೊಂಡಿರುತ್ತದೆ.

ಇಮ್ಯುನೊಥೆರಪಿ: ಮುಂದುವರಿದ ಗುದದ ಕ್ಯಾನ್ಸರ್ ಚಿಕಿತ್ಸೆಗಾಗಿ ಇಮ್ಯುನೊಥೆರಪಿ ಔಷಧಿಗಳನ್ನು ಅನ್ವೇಷಿಸಲಾಗುತ್ತಿದೆ. ಈ ಔಷಧಿಗಳು ಕ್ಯಾನ್ಸರ್ ಕೋಶಗಳನ್ನು ಗುರಿಯಾಗಿಸಲು ಮತ್ತು ನಾಶಮಾಡಲು ದೇಹದ ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಹೆಚ್ಚಿಸುತ್ತವೆ.

ರೋಗ ತಡೆಗಟ್ಟುವ ಕ್ರಮಗಳನ್ನು ಅಳವಡಿಸಿಕೊಳ್ಳುವುದು: ಗುದದ ಕ್ಯಾನ್ಸರ್ ಬೆಳವಣಿಗೆಯನ್ನು ನಾವು ಸಂಪೂರ್ಣವಾಗಿ ತಡೆಯಲು ಸಾಧ್ಯವಾಗದಿದ್ದರೂ, ಅಪಾಯವನ್ನು ಕಡಿಮೆ ಮಾಡಲು ಕ್ರಮಗಳನ್ನು ತೆಗೆದುಕೊಳ್ಳಬಹುದು. ಸುರಕ್ಷಿತ ಲೈಂಗಿಕ ಅಭ್ಯಾಸಗಳು ಮತ್ತು HPV ವ್ಯಾಕ್ಸಿನೇಷನ್​ಗಳು ಗುದ ಕ್ಯಾನ್ಸರ್ ಸೇರಿದಂತೆ HPV-ಸಂಬಂಧಿತ ಕ್ಯಾನ್ಸರ್​​ಗಳ ಸಾಧ್ಯತೆಗಳನ್ನು ಗಣನೀಯವಾಗಿ ಕಡಿಮೆ ಮಾಡುತ್ತದೆ. ನಿಯಮಿತ ಸ್ಕ್ರೀನಿಂಗ್‌ಗಳು ಆರಂಭದಲ್ಲೇ ಪತ್ತೆಗೆ ನಿರ್ಣಾಯಕವಾಗಿವೆ. ಇದು ವಿಶೇಷವಾಗಿ ದುರ್ಬಲಗೊಂಡ ಪ್ರತಿರಕ್ಷಣಾ ವ್ಯವಸ್ಥೆಗಳು ಅಥವಾ ಹಿಂದಿನ HPV ಸೋಂಕಿನಿಂದ ಹೆಚ್ಚಿನ ಅಪಾಯದಲ್ಲಿರುವ ವ್ಯಕ್ತಿಗಳಿಗೆ ಮುಖ್ಯವಾಗಿದೆ.

ಇದನ್ನೂ ಓದಿ: ಪ್ರತಿದಿನ ತಾಮ್ರದ ಪಾತ್ರೆಯಲ್ಲಿ ನೀರು ಕುಡಿಯುವುದು ಆರೋಗ್ಯಕ್ಕೆ ಒಳ್ಳೆಯದಲ್ಲ ಏಕೆ? ಈ ಪಾತ್ರೆಯಲ್ಲಿ ಯಾರೆಲ್ಲ ನೀರು ಕುಡಿಯಬಾರದು

ಗುದದ ಕ್ಯಾನ್ಸರ್ ಬಗ್ಗೆ ಕಡಿಮೆ ತಿಳಿದಿದ್ದರೂ, ಎಚ್ಚರಿಕೆಯಿಂದ ಇರಬೇಕಾದ ಮತ್ತು ನಿರ್ವಹಣೆಯ ಅಗತ್ಯವಿದೆ. ಅಪಾಯಕಾರಿ ಲಕ್ಷಣಗಳನ್ನು ಅರ್ಥಮಾಡಿಕೊಳ್ಳುವ ಮೂಲಕ, ರೋಗಲಕ್ಷಣಗಳನ್ನು ಗುರುತಿಸುವ ಮೂಲಕ ಮತ್ತು ನಮ್ಮ ಆರೋಗ್ಯದ ಬಗ್ಗೆ ಜಾಗರೂಕರಾಗಿರುವುದರ ಮೂಲಕ, ನಾವು ಆರಂಭಿಕ ರೋಗನಿರ್ಣಯ ಮತ್ತು ಪರಿಣಾಮಕಾರಿ ಚಿಕಿತ್ಸೆಗೆ ಕೊಡುಗೆ ನೀಡಬಹುದು. ಆರೋಗ್ಯ ವೃತ್ತಿಪರರಾಗಿ, ನಮ್ಮ ಬದ್ಧತೆಯು ಗುದದ ಕ್ಯಾನ್ಸರ್‌ನಿಂದ ಬಾಧಿತರಾದ ಎಲ್ಲರಿಗೂ ಸುಧಾರಿತ ಆರೈಕೆ ಮತ್ತು ಫಲಿತಾಂಶಗಳ ಅನ್ವೇಷಣೆಯಲ್ಲಿ ಸ್ಥಿರವಾಗಿದೆ.

– ಡಾ. ನೀತಿ ಕೃಷ್ಣ ರೈಜದ (ಲೇಖಕರು ಹಿರಿಯ ನಿರ್ದೇಶಕರು, ಮೆಡಿಕಲ್ ಆನ್ಕೊಲೊಜಿ & ಹೆಮಟೊ ಆನ್ಕೊಲೊಜಿ, ಫೋರ್ಟಿಸ್ ಆಸ್ಪತ್ರೆ, ರಿಚ್ಮಂಡ್ ರಸ್ತೆ, ಬೆಂಗಳೂರು)