Fixed deposits benefits: ಫಿಕ್ಸೆಡ್ ಡೆಪಾಸಿಟ್ನಿಂದ ಬಡ್ಡಿ ಹೊರತುಪಡಿಸಿ 5 ಅನುಕೂಲಗಳಿವು
ಬ್ಯಾಂಕ್ಗಳಲ್ಲಿ ಎಫ್.ಡಿ. ಇಡುವುದರಿಂದ ಬಡ್ಡಿ ರೂಪದಲ್ಲಿ ತಿಂಗಳು ತಿಂಗಳು ಆದಾಯ ಬರುತ್ತದೆ ಅನ್ನೋದು ಮಾತ್ರ ಅನುಕೂಲವಾ? ಅದನ್ನು ಹೊರತುಪಡಿಸಿ ಈ 5 ಅನುಕೂಲಗಳಿವೆ.
ಬ್ಯಾಂಕ್ನಲ್ಲಿ ಫಿಕ್ಸೆಡ್ ಡೆಪಾಸಿಟ್ (ಎಫ್.ಡಿ.) ಇಟ್ಟವರನ್ನು ಅದೇನೋ ದಡ್ಡರು ಅನ್ನೋ ಹಾಗೆ, ಇನ್ವೆಸ್ಟ್ಮೆಂಟ್ ಐಡಿಯಾಗಳೇ ಇಲ್ಲದ ಓಬೀರಾಯನ ಕಾಲದವರ ಥರ ನೋಡುವವರು ಹೆಚ್ಚಾಗಿದ್ದಾರೆ. ಷೇರು ಮಾರ್ಕೆಟ್, ಚಿನ್ನ, ರಿಯಲ್ ಎಸ್ಟೇಟ್, ಕ್ರಿಪ್ಟೋ ಕರೆನ್ಸಿಯೂ ಸೇರಿದಂತೆ ಇನ್ನೂ ಏನೇನೂ ಇನ್ವೆಸ್ಟ್ ಇನ್ಸ್ಟ್ರುಮೆಂಟ್ ಇದ್ದರೂ ಎಫ್.ಡಿ.ಯಲ್ಲಿ, ಅದರಲ್ಲೂ ಅಷ್ಟು ಕಡಿಮೆ ಬಡ್ಡಿ ತಗೊಂಡು ಏನು ಮಾಡುವುದಕ್ಕೆ ಸಾಧ್ಯ ಅನ್ನೋದು ಹಲವರ ಪ್ರಶ್ನೆ. ಅಂಥ ಹಲವರ ಪ್ರಶ್ನೆಗೆ ಈ ಲೇಖನದಲ್ಲಿ ಉತ್ತರ ಇದೆ. ಯಾವಾಗ ಮಾರ್ಕೆಟ್ನಲ್ಲಿ ಏರಿಳಿತಗಳು ಹೆಚ್ಚಿರುತ್ತವೋ ಆಗ ಎಫ್.ಡಿ. ಅತ್ಯುತ್ತಮ ಹೂಡಿಕೆ ದಾರಿ ಎನ್ನುತ್ತಾರೆ ತಜ್ಞರು. ಆರ್ಬಿಐ ಅಡಿಯಲ್ಲಿ ಬರುವ ನಂಬಿಕಸ್ತ ಕಮರ್ಷಿಯಲ್ ಬ್ಯಾಂಕ್ನಲ್ಲಿ ಎಫ್.ಡಿ. ಇಟ್ಟರೆ ರಾತ್ರಿ ಹೊತ್ತು ನೆಮ್ಮದಿಯಾಗಿ ನಿದ್ದೆ ಮಾಡಬಹುದು. ಒಂದೇನೆಂದರೆ ಬಡ್ಡಿ ದರ ಸ್ವಲ್ಪ ಕಡಿಮೆ ಬರುತ್ತದೆ, ಅಷ್ಟೇ.
ಹೆಚ್ಚಿನ ರಿಸ್ಕ್ ಇಲ್ಲದೆ, ತಿಂಗಳು ತಿಂಗಳು ಆದಾಯ ಬರಬೇಕು ಎಂದು ನಿರೀಕ್ಷೆ ಮಾಡುವವರ ಪಾಲಿಗೆ ಈಗಲೂ ಎಫ್ಡಿ ಹಾಟ್ ಫೇವರಿಟ್. ನಿಶ್ಚಿತ ಆದಾಯ, ಸುರಕ್ಷತೆ. ಇವೆರಡು ಬಿಟ್ಟು ಮತ್ತೇನು ಬೇಕು ಹೇಳಿ. ಓಹ್, ಒಂದ್ನಿಮಿಷ ತಾಳಿ. ಫಿಕ್ಸೆಡ್ ಡೆಪಾಸಿಟ್ ಅಂದರೆ ಅಷ್ಟೇ ಅಲ್ಲ. ಅದರ ಆಚೆಗೂ ಅನುಕೂಲಗಳಿವೆ. ಹಾಗೇ ಸರಳವಾಗಿ ಪಟ್ಟಿ ಮಾಡಿಕೊಂಡರೆ 5 ಅನುಕೂಲಗಳು ಛಕಾಛಕ್ ಸಿಕ್ಕಿಬಿಟ್ಟವು. ಏನು ಅವು ಎಂದು ತಿಳಿಯುವುದಕ್ಕೆ ಮುಂದೆ ಓದಿ.
ಓವರ್ಡ್ರಾಫ್ಟ್ ಅನುಕೂಲ ಬ್ಯಾಂಕ್ನಲ್ಲಿರುವ ಎಫ್ಡಿ ಮೇಲೆ ಗ್ರಾಹಕರಿಗೆ ಓವರ್ಡ್ರಾಫ್ಟ್ ವ್ಯವಸ್ಥೆ ಇದೆ. ಹೀಗೊಂದು ಅನುಕೂಲ ಇರುವುದರಿಂದ ಹೂಡಿಕೆದಾರರಿಗೆ ಹಣದ ತುರ್ತು ಇರುವಾಗ ಬ್ಯಾಂಕ್ನಿಂದ ಹಣ ಪಡೆಯಬಹುದು.
ಇನ್ಷೂರೆನ್ಸ್, ಹೆಲ್ತ್ಕೇರ್ ಅನುಕೂಲಗಳು ಈಚಿನ ದಿನಮಾನಗಳಲ್ಲಿ ಎಫ್.ಡಿ.ಗಳ ಮೇಲೆ ಮೌಲ್ಯವರ್ಧಿತ ಅನುಕೂಲಗಳನ್ನು ನೀಡುತ್ತವೆ. ಬ್ಯಾಂಕ್ಗಳಿಂದ ಫಿಕ್ಸೆಡ್ ಡೆಪಾಸಿಟ್ಗಳ ಮೇಲೆ ಉಚಿತ ಇನ್ಷೂರೆನ್ಸ್ ಹಾಗೂ ಹೆಲ್ತ್ಕೇರ್ ಅನುಕೂಲಗಳನ್ನು ನೀಡುತ್ತವೆ.
ಆದಾಯ ತೆರಿಗೆ ಅನುಕೂಲಗಳು ಭಾರತೀಯ ಬ್ಯಾಂಕ್ಗಳು ತೆರಿಗೆ ಉಳಿತಾಯ ಫಿಕ್ಸೆಡ್ ಡೆಪಾಸಿಟ್ಗಳನ್ನು ನೀಡುತ್ತವೆ. ಆದಾಯ ತೆರಿಗೆ ಕಾಯ್ದೆ 1961 ಸೆಕ್ಷನ್ 80C ಅಡಿಯಲ್ಲಿ ಹೂಡಿಕೆದಾರರು ತೆರಿಗೆ ವಿನಾಯಿತಿ ಕ್ಲೇಮ್ ಮಾಡಬಹುದು.
ಖಾತ್ರಿ ರಿಟರ್ನ್ ಬ್ಯಾಂಕ್ ಫಿಕ್ಸೆಡ್ ಡೆಪಾಸಿಟ್ ರಿಟರ್ನ್ಸ್ನಲ್ಲಿ ಯಾವುದೇ ಏರಿಳಿತ ಇರುವುದಿಲ್ಲ. ಬ್ಯಾಂಕ್ ಎಫ್ಡಿಯಲ್ಲಿ ಸಣ್ಣ ಸಣ್ಣ ಮೊತ್ತವನ್ನು 15 ದಿನದಿಂದ 3 ತಿಂಗಳ ಕಡಿಮೆ ಅವಧಿಗೆ ಮಾಡಬಹುದು.
ಬ್ಯಾಂಕ್ ಎಫ್.ಡಿ.ಗಳ ಸರಳ ನಿರ್ವಹಣೆ ಇತ್ತೀಚಿನ ದಿನಗಳಲ್ಲಿ ಬ್ಯಾಂಕ್ ಫಿಕ್ಸೆಡ್ ಡೆಪಾಸಿಟ್ಗಳಿಗೆ ದೀರ್ಘ ಪ್ರಕ್ರಿಯೆಗಳ ಅಗತ್ಯ ಇಲ್ಲ. ಈಗಿನ ಇಂಟರ್ನೆಟ್ ಬ್ಯಾಂಕಿಂಗ್ ಕಾಲದಲ್ಲಿ ಯಾರಾದರೂ ತಮ್ಮ ಕಂಪ್ಯೂಟರ್ ಅಥವಾ ಲ್ಯಾಪ್ಟಾಪ್ ಮೂಲಕ ಕೆಲವು ನಿಮಿಷಗಳಲ್ಲಿ ಎಫ್ಡಿ ಖಾತೆ ತೆರೆಯಬಹುದು ಮತ್ತು ಕ್ಲೋಸ್ ಮಾಡಬಹುದು.
ಇದನ್ನೂ ಓದಿ: Bank fixed deposits: ಹಿರಿಯ ನಾಗರಿಕರ ವಿಶೇಷ ಫಿಕ್ಸೆಡ್ ಡೆಪಾಸಿಟ್ಸ್ಗಳ ಬಡ್ಡಿ ದರ ಜೂನ್ 30ರ ತನಕ ವಿಸ್ತರಣೆ
ಇದನ್ನೂ ಓದಿ: ಎಸ್ಬಿಐ ಫಿಕ್ಸೆಡ್ ಡೆಪಾಸಿಟ್ಸ್ ವರ್ಸಸ್ ಅಂಚೆ ಕಚೇರಿ ಡೆಪಾಸಿಟ್ಸ್; ಎಲ್ಲಿ, ಎಷ್ಟು ಬಡ್ಡಿ ಸಿಗುತ್ತದೆ?
(Here are the 5 benefits of bank fixed deposits apart from monthly interest income to investor)
Published On - 4:10 pm, Wed, 5 May 21
