ಪಾನ್ ಬೀಡಾ ಬೆಲೆ ಹೆಚ್ಚಳ, ಜಗಿಯುವುದು ಕಷ್ಟ ಎಂದ ಪಾನ್ ಪ್ರಿಯ
ಊಟ ಆದ ಮೇಲೆ ಒಂದ್ ಪಾನ್ ತಿಂದರೆ ಆಹಾರ ಸರಿಯಾಗಿ ಜೀರ್ಣ ಆಗುತ್ತೆ ಅಂತ ಪಾನ್ ಪ್ರೀಯರ ನಂಬಿಕೆ. ಹೀಗಾಗಿ ಅನೇಕರು ಪಾನ್ ತಿನ್ನುತ್ತಾರೆ. ಮನೆಯಲ್ಲಿ ಶುಭ ಸಮಾರಂಭ ಇದ್ದಾಗ ಪಾನ್ ಬೀಡಾ ಬೇಕೆ ಬೇಕು. ಹಬ್ಬದ ಊಟವಾದ ಮೇಲೆ ಪಾನ್ ತಿಂದಾಗ ಮಾತ್ರ ಸಮಾಧಾನ ಆಗುವವರು ಇದ್ದಾರೆ. ಆದರೆ ಇದೀಗ ಪಾನ್ಗಳ ಬೆಲೆ ಕಹಿಯ ಅನುಭವ ಕೊಡುತ್ತಿದೆ.
ಬೆಂಗಳೂರು, ಜೂನ್ 08: ಪಾನ್ಗಳಿಗೆ (Pan) ಹೆಚ್ಚಾಗಿ ವೀಳ್ಯದೆಲೆ (Betel), ಕೊಲ್ಕತ್ತಾ, ಮದ್ರಾಸ್, ಮೈಸೂರು ಎಲೆಗಳನ್ನು ಹೆಚ್ಚಾಗಿ ಬಳಸುತ್ತಾರೆ. ಎಲೆಗಳ ಬೆಲೆ ಒಂದು ಕಟ್ಗೆ 800 ರಿಂದ 900 ರೂಪಾಯಿಗೆ ಏರಿಕೆಯಾಗಿದ್ದು, ಇದರಿಂದ ಪಾನ್ಗಳ ಬೆಲೆಯೂ ಏರಿಕೆಯಾಗಿದೆ. ಈ ಹಿಂದೆ ಸ್ವೀಟ್ ಪಾನ್ಗಳು 5 ರಿಂದ 10 ರೂಪಾಯಿ ಸಿಗುತ್ತಿದ್ದವು. ಆದರೆ ಇದೀಗ ಪಾನ್ ಬೀಡಾಗಳ ಪ್ರಾರಂಭಿಕ ಬೆಲೆ 20 ರೂ.ಗಳಿಂದ 60 ರೂ.ವರೆಗೂ ಏರಿಕೆಯಾಗಿವೆ. ಚಾಕೊಲೇಟ್ ಪಾನ್ (Chocolate pan) ಈ ಹಿಂದೆ 40 ರೂ. ಇತ್ತು, ಆದರೆ ಇದೀಗ 50 ರೂಪಾಯಿಯಾಗಿದೆ.
ಮಲೈಯೆ ಬೀಡಾ 40 ರೂ. ಇತ್ತು. ಇದೀಗ 45 ರೂ. ಆಗಿದೆ. ಕೊಲ್ಕತ್ತ ಸಾದಾ ಪಾನ್ 20 ರಿಂದ 30, ಆರೆಂಜ್ ಡ್ರೈ ಫ್ರೂಟ್ ಬೀಡಾ 25 ರಿಂದ 20, ಚಾಕೊಲೇಟ್ ಪಾನ್ 25 ರಿಂದ 15, ವೆನಿಲಾ ಪಾನ್ 25 ರಿಂದ 30, ಚಾಕೊಲೇಟ್ ಡೇಟ್ಸ್ 25 ರಿಂದ 40, ವೆನಿಲಾ ಡೇಟ್ಸ್ 20 ರೂ. ಆಗಿದೆ. ಮುಂದಿನ ದಿನಗಳಲ್ಲಿ ಇನ್ನೂ ಹೆಚ್ಚಾಗುವ ಸಾಧ್ಯತೆ ಎಂದು ವ್ಯಾಪಾರಸ್ಥ ಸಂದೀಪ್ ಪಾಂಡೆ ಹೇಳಿದರು.
ಈ ಹಿಂದೆ ಎಲೆ ಅಡಿಕೆ ತಿನ್ನುತ್ತಿದ್ವಿ, ಬಳಿಕ ಪಾನ್ ಪೀಡಾಗಳನ್ನು ತಿನ್ನಲು ಶರು ಮಾಡಿದ್ವಿ. ಈ ಹಿಂದೆ ಕಡಿಮೆ ಬೆಲೆ ಪಾನ್ಗಳು ಸಿಗುತಿದ್ದವು. ಆದರೆ, ಈಗ ಪಾನ್ಗಳ ಬೆಲೆ ಏರಿಕೆಯಾಗಿದೆ. ಒಂದೊಂದು ಏರಿಯಾದಲ್ಲಿ ಒಂದೊಂದು ಬೆಲೆ ಇದೆ. ಸಿಕ್ಕಾಪಟ್ಟೆ ಜಾಸ್ತಿಮಾಡಿದ್ದಾರೆ. ಆದರೂ ತಿನ್ನುತ್ತೇವೆ. ಬಿಡಲು ಆಗುತ್ತಿಲ್ಲ ಎಂದು ಗ್ರಾಹಕ ಗುರುರಾಜ್ ಹೇಳಿದರು.
ಒಟ್ಟಿನಲ್ಲಿ ದಿನದಿಂದ ದಿನಕ್ಕೆ ಎಲ್ಲ ವಸ್ತುಗಳ ಬೆಲೆ ಏರಿಕೆಯಾಗುತ್ತಿದ್ದು, ಸದ್ಯ ಪಾನ್ಗಳ ಬೆಲೆ ಏರಿಕೆಯಾಗಿರುವುದು ಪಾನ್ ಪ್ರಿಯರಿಗೆ ಶಾಕ್ ಆಗಿದೆ.
ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
