ಬೆಂಗಳೂರಿನಲ್ಲಿ ನಿನ್ನೆ ಸುರಿದ ಮಳೆಗೆ ಹಲವೆಡೆ ಅನಾಹುತ; ಪಾಲಿಕೆ ಹೆಲ್ಪ್ ಲೈನ್ಗೆ ಬಂತು ನೂರಾರು ದೂರುಗಳು

ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಕಳೆದ ನಾಲ್ಕೈದು ದಿನಗಳಿಂದ ಭರ್ಜರಿ ಮಳೆಯಾಗುತ್ತಿದ್ದು, ಬಿರುಬಿಸಿಲಿಗೆ ಹೈರಾಣರಾಗಿದ್ದ ಜನರು ಖುಷ್ ಆಗಿದ್ದಾರೆ. ಅದರಂತೆ ನಿನ್ನೆ(ಮೇ.08) ಸುರಿದ ಬಿರುಗಾಳಿ ಸಹಿತ ಮಳೆಗೆ ಜನಜೀವನ ಅಸ್ತವ್ಯಸ್ತವಾಗಿದ್ದು, ಹಲವೆಡೆ ಮರಗಳು ಧರೆಗುರುಳಿದಿವೆ. ಈ ಹಿನ್ನಲೆ ಪಾಲಿಕೆ ಹೆಲ್ಪ್ ಲೈನ್ಗೆ ನೂರಾರು ಕರೆಗಳು ಬಂದಿವೆ.

ಬೆಂಗಳೂರಿನಲ್ಲಿ ಮಳೆಯಿಂದ ಅವಾಂತರ, ಪಾಲಿಕೆ ಹೆಲ್ಪಲೈನ್ಗೆ ದೂರು

ಬಿ ಮೂರ್ತಿ, ನೆಲಮಂಗಲ | Updated By: ಕಿರಣ್ ಹನುಮಂತ್ ಮಾದಾರ್

Updated on:May 09, 2024 | 6:19 PM

ಬೆಂಗಳೂರು, ಮೇ.09: ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ಮಳೆಯ(Bengaluru Rain) ದರ್ಶನಕ್ಕಾಗಿ ಕಾದು ಕಾದು ಸುಸ್ತಾಗಿದ್ದರು. ವರುಣ ದೇವನಿಗಾಗಿ ಹಲವರು ಪ್ರಾರ್ಥನೆ ಕೂಡ ಮಾಡಿದ್ದರು. ಅದರಂತೆ ವರುಣ ಕೃಫೆ ತೋರಿದ್ದು, ಕಳೆದ ನಾಲ್ಕೈದು ದಿನಗಳಿಂದ ಸಿಲಿಕಾನ್ ಸಿಟಿಯಲ್ಲಿ ಭರ್ಜರಿ ಮಳೆಯಾಗಿದೆ. ಬಿಸಿಲಿನ ಬೇಗೆಗೆ ಕಂಗಾಲಾಗಿದ್ದ ಜನರು ನಿಟ್ಟುಸಿರು ಬಿಟ್ಟಿದ್ದಾರೆ. ಆದರೆ, ಇದೇ ಮಳೆ ನಗರದ ಕೆಲವೆಡೆ ಅನಾಹುತವನ್ನೇ ಸೃಷ್ಟಿ ಮಾಡಿದ್ದು, ನಿನ್ನೆ ಸುರಿದ ಮಳೆಗೆ ಬೆಂಗಳೂರಿನ ಹಲವೆಡೆ ಮರಗಳು ಧರೆಗುರುಳಿದಿವೆ.

ಪಾಲಿಕೆ ಹೆಲ್ಪ್ ಲೈನ್ಗೆ ಬಂತು ನೂರಾರು ದೂರುಗಳು

ಬಿರುಗಾಳಿ ಸಹಿತ ಮಳೆಯ ಆರ್ಭಟಕ್ಕೆ ಮರಗಳು, ರೆಂಬೆ, ಕೊಂಬೆ ಉರುಳಿದ ಬಗ್ಗೆ ಪಾಲಿಕೆ ಹೆಲ್ಪ್ ಲೈನ್ಗೆ ನೂರಾರು ದೂರುಗಳು ದಾಖಲಾಗಿವೆ. ಜೊತೆಗೆ ವಿವಿಧ ವಲಯಗಳಿಂದ ಮರ ಬಿದ್ದ ಬಗ್ಗೆ ದೂರು ಬರುತ್ತಿದ್ದಂತೆ ಸಿಬ್ಬಂದಿಗಳು ತೆರಳಿ ಸಮಸ್ಯೆ ಬಗೆಹರಿಸಿದ್ದಾರೆ.

ಎಲ್ಲೆಲ್ಲಿ ಎಷ್ಟು ಮರ-ಕೊಂಬೆ ಬಿದ್ದ ಬಗ್ಗೆ ದೂರು

ದೂರು ದಾಖಲು	ತೆರವು
ಆರ್.ಆರ್. ನಗರ – 70	04
ದಕ್ಷಿಣ ವಲಯ -16	08
ಬೊಮ್ಮನಹಳ್ಳಿ -2	02
ಪಶ್ಚಿಮ ವಲಯ -30	10
ಯಲಹಂಕ ವಲಯ -7	03
ಪೂರ್ವವಲಯ -24	12
ದಾಸರಹಳ್ಳಿ ವಲಯ -3	01

ಇನ್ನು ಆರ್.ಆರ್. ನಗರ ವಲಯದಿಂದ ಅತೀ ಹೆಚ್ಚು ಅಂದರೆ ಬರೊಬ್ಬರಿ 70 ಮರ ಬಿದ್ದ ದೂರು ದಾಖಲಾಗಿದೆ.

ಇದನ್ನೂ ಓದಿ: ಬೆಂಗಳೂರಿನಲ್ಲಿ ಮಳೆ ಅವಾಂತರ, ಬೋರ್ ಬ್ಯಾಂಕ್ ರಸ್ತೆ ಕುಸಿತ

ಮಳೆಗಾಲ ಶುರುವಾದ ಹಿನ್ನಲೆ ಈ ಬಾರಿ ಮಳೆ ಅವಾಂತರಗಳನ್ನು ಬೇಗ ಬಗೆಹರಿಸಲು ಬಿಬಿಎಂಪಿ ಹೊಸ ಪ್ಲಾನ್ ಮಾಡಿದ್ದು, ವಲಯವಾರು ವಿಪತ್ತು ನಿರ್ವಹಣೆಯ ಕಂಟ್ರೋಲ್ ರೂಂ ಸ್ಥಾಪನೆ ಮಾಡಿದೆ. ಸಹಾಯವಾಣಿ ಸಂಖ್ಯೆ 1533 ಜೊತೆಗೆ ವಿವಿಧ ಎಂಟು ವಲಯಗಳಲ್ಲಿ ಪ್ರತ್ಯೇಕವಾಗಿ ಕಂಟ್ರೋಲ್ ರೂಮ್‌ ಓಪನ್ ಆಗಿದೆ.