ನಡು ರೋಡಲ್ಲಿ ಕೈ ಕೊಡುತ್ತಿರುವ ಬಿಎಂಟಿಸಿ ಟಿಕೆಟ್ ಮಷಿನ್​​ಗಳು: ಕಂಡಕ್ಟರ್ ಮತ್ತು ಪ್ರಯಾಣಿಕರ ಮಧ್ಯೆ ಕಿರಿಕ್

ಬೆಂಗಳೂರು, ಮೇ 11: ಶಕ್ತಿ ಯೋಜನೆ ಆರಂಭವಾದ ಮೇಲೆ ಬಿಎಂಟಿಸಿ ಬಸ್​ನಲ್ಲಿ (BMTC bus)
ಪ್ರತಿದಿನ ನಲವತ್ತು ಲಕ್ಷಕ್ಕೂ ಹೆಚ್ಚು ಪ್ರಯಾಣಿಕರು ಪ್ರಯಾಣ ಮಾಡುತ್ತಿದ್ದಾರೆ. ಆದರೆ ಕಂಡಕ್ಟರ್ ಮತ್ತು ಪ್ರಯಾಣಿಕರ ನಡುವೆ ಕಿರಿಕ್ ಕೂಡ ಹೆಚ್ಚಾಗುತ್ತಿದ್ದು, ಇದಕ್ಕೆ ಕಾರಣ ಅಂದರೆ ಇಟಿಎಂ ಟಿಕೆಟ್ ಮಷಿನ್​ (ETM ticket machine) ಅಂತೆ. ಪದೇ ಪದೇ ಬಿಎಂಟಿಸಿಯ ಟಿಕೆಟ್ ಮಷಿನ್​​ಗಳು ಕೈ ಕೊಡುತ್ತಿವೆ. ಇದರಿಂದ ಟಿಕೆಟ್ ಕೊಡಲು ಆಗದೆ ಕಂಡಕ್ಟರ್​ಗಳು ಪರದಾಡುವಂತಾಗಿದೆ.

ಶಕ್ತಿ ಯೋಜನೆ ಆರಂಭವಾದ ಮೇಲೆ ಬಿಎಂಟಿಸಿ ಬಸ್​ನಲ್ಲಿ ಪ್ರಯಾಣಿಕರು ಕಿಕ್ಕಿರಿದು ತುಂಬುತ್ತಿದ್ದಾರೆ. ಟಿಕೆಟ್ ಕೊಡುವಾಗಲೇ ಟಿಕೆಟ್ ಕೊಡುವ ಇಟಿಎಂ ಮಷಿನ್​​ ಹ್ಯಾಂಗ್ ಆಗುತ್ತಿವೆಯಂತೆ. ಇದರಿಂದ ಸರಿಯಾದ ಸಮಯಕ್ಕೆ ಪ್ರಯಾಣಿಕರಿಗೆ ಟಿಕೆಟ್ ಕೊಡಲು ಆಗದೆ ಕಂಡಕ್ಟರ್​ಗಳು ಪರದಾಡುತ್ತಿದ್ದಾರೆ. ಟಿಕೆಟ್ ಕೊಡುವ ವೇಳೆಯಲ್ಲಿ ಮಷಿನ್​ನಲ್ಲಿ ಟಿಕೆಟ್ ಬರದ ಹಿನ್ನೆಲೆ ಚೆಕ್ಕಿಂಗ್ ಆಫೀಸರ್​ಗಳು ಬಂದಾಗ ಕಂಡಕ್ಟರ್​ಗಳಿಗೆ ನೋಟೀಸ್ ನೀಡ್ತಿದ್ದಾರಂತೆ. ಈ ಬಗ್ಗೆ ಈಗಾಗಲೇ ಬಿಎಂಟಿಸಿ ಎಂ.ಡಿ ಗೆ ದೂರು ನೀಡಿದ್ದಾರೆ ಆದರೆ ಸಮಸ್ಯೆ ಮಾತ್ರ ಬಗೆಹರಿದಿಲ್ಲ ಎಂದು ಸಾರಿಗೆ ನೌಕರರ ಮುಖಂಡ ಜಗದೀಶ್​ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಇದನ್ನೂ ಓದಿ: ದೇವನಹಳ್ಳಿಯಲ್ಲಿ ಮೆಗಾ ಕೋಚಿಂಗ್ ಟರ್ಮಿನಲ್‌ ಸಮೀಕ್ಷೆಗೆ ರೈಲ್ವೆ ಇಲಾಖೆ ಸಮ್ಮತಿ

ಇನ್ನೂ ಟಿಕೆಟ್ ಮಷಿನ್ ಕೈ ಕೊಡುತ್ತಿರುವುದರಿಂದ ಕಂಡಕ್ಟರ್​ಗಳು ಪ್ರಯಾಣಿಕರಿಗೆ ಟಿಕೆಟ್ ಆಮೇಲೆ ಕೊಡುತ್ತೇವೆ ಎಂದು ಮುಂದಕ್ಕೆ ಹೋಗುತ್ತಿದ್ದಾರೆ. ಆ ವೇಳೆ ಲೈನ್ ಚೆಕ್ಕಿಂಗ್ ಆಫೀಸರ್​ಗಳು ಬಂದು ಪ್ರಯಾಣಿಕರಿಗೆ ದಂಡ ಹಾಕುತ್ತಿದ್ದಾರೆ. ಇದಕ್ಕೆ ಪ್ರಮುಖ ಕಾರಣ ಅಂದರೆ ಹಳೆಯ ಇಟಿಎಂ ಮಷಿನ್​ಗಳನ್ನು ಸರಿಯಾಗಿ ನಿರ್ವಹಣೆ ಮಾಡದಿರುವುದಂತೆ.

ಬ್ಯಾಟರಿಗಳು ಡೆಡ್ ಆಗಿದ್ದು ಸರಿಯಾಗಿ ಚಾರ್ಜ್ ಆಗೋದಿಲ್ವಂತೆ. ಟಿಕೆಟ್ ಕೊಡುವ ಪೇಪರ್ ಟಿಕೆಟ್ ರೋಲ್ ಗಳು ಕಳಪೆ ಗುಣಮಟ್ಟದಾಗಿದ್ದು, ಟಿಕೆಟ್ ನೀಡುವ ವೇಳೆ ಸರಿಯಾಗಿ ಟಿಕೆಟ್ ಪ್ರಿಂಟ್ ಆಗುತ್ತಿವಂತೆ. ಈ ಬಗ್ಗೆ ಬಿಎಂಟಿಸಿ ಅಧಿಕಾರಿಗಳ ವಿರುದ್ಧ ಪ್ರಯಾಣಿಕ ವಿಜಯ್ ಎಂಬುವವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಬೆಂಗಳೂರು: ಅಪಾರ್ಟ್​ಮೆಂಟ್​ನಲ್ಲಿ ಬರೋಬ್ಬರಿ 3 ಕೋಟಿ ರೂ. ಮೌಲ್ಯದ ಗಾಂಜಾ ಪತ್ತೆ

ಒಟ್ಟಿನಲ್ಲಿ ಪ್ರಯಾಣಿಕರು ಬಿಎಂಟಿಸಿಯ ಹಳೆಯ ಟಿಕೆಟ್ ಮಷಿನ್​ಗಳನ್ನು ಮೂಲೆಗೆ ಹಾಕಿ ಮೊದಲು ಹೊಸ ಮಷಿನ್​ಗಳನ್ನು ಕಂಡಕ್ಟರ್​ಗಳಿಗೆ ನೀಡಿ ಎಂದು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಅದು ಯಾವಾಗ ಹೊಸ ಮಷಿನ್​ಗಳು ಬರುತ್ತೋ, ಸಮಸ್ಯೆ ಕಡಿಮೆ ಆಗುತ್ತೋ ಕಾದು ನೋಡಬೇಕಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.