ಬೀದಿನಾಯಿ ನಿಯಂತ್ರಣಕ್ಕೆ ಏನೆಲ್ಲ ಕ್ರಮ?: ಸುಪ್ರೀಂಗೆ ವರದಿ ಸಲ್ಲಿಸಿದ ಕರ್ನಾಟಕ

ಬೆಂಗಳೂರು, ನವೆಂಬರ್​ 05: ಕರ್ನಾಟಕ ಮಾತ್ರವಲ್ಲದೆ ದೇಶದ ಬಹುತೇಕ ರಾಜ್ಯಗಳಲ್ಲಿ ಬೀದಿನಾಯಿಗಳ ಹಾವಳಿ ಪ್ರಕರಣಗಳು ಹೆಚ್ಚಿರೋದನ್ನು ಮನಗಂಡ ಸುಪ್ರೀಂಕೋರ್ಟ್​ ಈ ಬಗ್ಗೆ ಸ್ವಯಂ ಪ್ರೇರಿತ ವಿಚಾರಣೆ ನಡೆಸುತ್ತಿದೆ. ಹೀಗಾಗಿ ಬೀದಿನಾಯಿಗಳ ಕಡಿವಾಣಕ್ಕೆ ರಾಜ್ಯಗಳು ಕೈಗೊಂಡ ಕ್ರಮಗಳ ಬಗ್ಗೆ ವರದಿ ಕೇಳಿತ್ತು. ಈ ಹಿನ್ನಲೆ ಸುಪ್ರೀಂಕೋರ್ಟ್​ಗೆ ರಾಜ್ಯ ಸರ್ಕಾರ ಅಫಿಡವಿಟ್​​ ಸಲ್ಲಿಸಿದ್ದು, ಆ ಕುರಿತ Exclusive ಮಾಹಿತಿ ಟಿವಿನೈನ್ ಗೆ ಲಭ್ಯವಾಗಿದೆ.

2023ರ ಗಣತಿ ಪ್ರಕಾರ GBA ವ್ಯಾಪ್ತಿಯಲ್ಲಿ ಒಟ್ಟು 2,66,968 ಬೀದಿನಾಯಿಗಳಿವೆ ಎಂದು ಸುಪ್ರೀಂಕೋರ್ಟ್​ಗೆ ಸಲ್ಲಿಸಿರುವ ಅಫಿಡವಿಟ್​ನಲ್ಲಿ ರಾಜ್ಯ ಸರ್ಕಾರ ತಿಳಿಸಿದೆ.

ವಿಭಾಗವಾರು ಬೀದಿನಾಯಿಗಳ ಸಂಖ್ಯೆ

• ಬೆಂಗಳೂರು ನಾರ್ತ್-51,433
• ಬೆಂಗಳೂರು ಸೌತ್- 56,247
• ಬೆಂಗಳೂರು ಈಸ್ಟ್- 61,367
• ಬೆಂಗಳೂರು ವೆಸ್ಟ್- 63,340

ಇದನ್ನೂ ಓದಿ:  ಬೀದಿ ನಾಯಿಗಳ ಹಾವಳಿ: ವರದಿ ಸಲ್ಲಿಸದ ಕರ್ನಾಟಕ ಸೇರಿ ಇತರ ರಾಜ್ಯಗಳಿಗೆ ಸುಪ್ರೀಂಕೋರ್ಟ್​ ಛೀಮಾರಿ

ಆಕ್ರಮಣಕಾರಿ ನಾಯಿಗಳ ನಿರ್ವಹಣೆಗಾಗಿ ದೂರುಗಳನ್ನು ದಾಖಲಿಸಲು ಟೋಲ್-ಫ್ರೀ ಹೆಲ್ಪ್‌ಲೈನ್ ಇದೆ. ನಾಯಿ-ಮಾನವ ಸಂಘರ್ಷವನ್ನು ಕಡಿಮೆ ಮಾಡಲು 400 ನಾಯಿ ಆಹಾರ ಸ್ಪಾಟ್‌ಗಳನ್ನು ಗುರುತಿಸಲಾಗಿದೆ. 88,572 ರೇಬಿಸ್ ಲಸಿಕೆ‌ ಹಾಕಲಾಗಿದ್ದು, 2024-25ರಲ್ಲಿ 35,891 ನಾಯಿಗಳಿಗೆ ಶಸ್ತ್ರ ಚಿಕಿತ್ಸೆ ನಡೆಸಲಾಗಿದೆ ಎಂದು ರಾಜ್ಯ ಸರ್ಕಾರ ಮಾಹಿತಿ ನೀಡಿದೆ.

ಪ್ರತಿದಿನ ನಾಯಿ ಸಂತಾನ ಹರಣ ಚಿಕಿತ್ಸೆ

• ಬೆಂಗಳೂರು ನಾರ್ತ್- 26
• ಬೆಂಗಳೂರು ಸೌತ್- 27
• ಬೆಂಗಳೂರು ಈಸ್ಟ್- 20
• ಬೆಂಗಳೂರು ವೆಸ್ಟ್- 35

ಪುರಸಭೆಗಳ ವ್ಯಾಪ್ತಿಯಲ್ಲಿವೆ 3 ಲಕ್ಷ ಬೀದಿನಾಯಿಗಳು

GBA ವ್ಯಾಪ್ತಿಯಲ್ಲಿ 21 ನಾಯಿ ಹಿಡಿಯುವ ವಾಹನಗಳಿದ್ದು, ಪಶು ಸಂಗೋಪನಾ ಇಲಾಖೆಯಿಂದ‌ ಪ್ರತಿ 5 ವರ್ಷಕ್ಕೊಮ್ಮೆ ಬೀದಿ ನಾಯಿಗಳ ಗಣತಿ ಮಾಡಲಾಗುತ್ತೆ. 2019ರ ಗಣತಿ ಪ್ರಕಾರ ಪುರಸಭೆಗಳ ವ್ಯಾಪ್ತಿಯಲ್ಲಿ ಅಂದಾಜು 3,03,303 ಬೀದಿ ನಾಯಿಗಳಿದ್ದು,ಅವುಗಳನ್ನು ಹಿಡಿಯಲು ಮತ್ತು ಸಾಗಿಸಲು 197 ವಿಶೇಷ ವಿನ್ಯಾಸದ ವಾಹನಗಳು ಮತ್ತು ಪಂಜರಗಳಿವೆ. ಬೀದಿ ನಾಯಿಗಳ ವಸತಿಗಾಗಿ 91 ಡಾಗ್ ಪೌಂಡ್‌ಗಳನ್ನು ಸ್ಥಾಪಿಸಲಾಗಿದೆ. ಪುರಸಭೆಗಳಾದ್ಯಂತ 301 ನಾಯಿ ಹಿಡಿಯುವ ಸಿಬ್ಬಂದಿ ನಿಯೋಜಿಸಲಾಗಿದ್ದು, ಸಾಮೂಹಿಕ ಬಂಜೆತನ ಅಭಿಯಾನದ ಮೂಲಕ 60,662 ಬೀದಿ ನಾಯಿಗಳಿಗೆ ಶಸ್ತ್ರಚಿಕಿತ್ಸೆ ಮಾಡಲಾಗಿದೆ. ನಾಯಿಗಳ ದಾಳಿ ಕುರಿತು ಎಲ್ಲಾ ಪುರಸಭೆಗಳಲ್ಲಿ ಸಹಾಯವಾಣಿ ಕಾರ್ಯನಿರ್ವಹಣೆ ಮಾಡುತ್ತಿದ್ದು, ಜನವರಿ 2025ರಿಂದ ಇಲ್ಲಿಯವರೆಗೆ 4,026 ದೂರುಗಳನ್ನು ಸ್ವೀಕರಿಸಿ ತಕ್ಷಣವೇ ಪರಿಹರಿಸಲಾಗಿದೆ ಎಂದು ಸರ್ಕಾರ ತಿಳಿಸಿದೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​ ಮಾಡಿ.

Published On - 2:15 pm, Wed, 5 November 25