ಕೃಷ್ಣದೇವರಾಯ ಪಾಲಿಕೆ ಬಜಾರ್: ದಕ್ಷಿಣ ಭಾರತದ ಮೊದಲ ಹವಾನಿಯಂತ್ರಿತ ಮಾರುಕಟ್ಟೆ ಬೆಂಗಳೂರಿನಲ್ಲಿ!

ಬೆಂಗಳೂರು, ಆಗಸ್ಟ್​ 26: ದಕ್ಷಿಣ ಭಾರತದಲ್ಲೇ ಮೊದಲ ಭೂಗತ ಹವಾನಿಯಂತ್ರಿತ ಮಾರುಕಟ್ಟೆ (Air conditioned Palike Bazaar) ಬೆಂಗಳೂರಿನ (Bengaluru) ವಿಜಯನಗರದ (Vijayanagar) ಮೆಟ್ರೋ ನಿಲ್ದಾಣದ ಪಕ್ಕದಲ್ಲಿ ನಿರ್ಮಾಣವಾಗಿದೆ. ಬರೊಬ್ಬರಿ 13 ಕೋಟಿ ರೂ. ವೆಚ್ಚದಲ್ಲಿ  ಕೃಷ್ಣದೇವರಾಯ ಪಾಲಿಕೆ ಬಜಾರ್​ನ್ನು ನಿರ್ಮಣ ಮಾಡಲಾಗಿದೆ. ಈ ಮಾರುಕಟ್ಟೆಯನ್ನು ಭಾನುವಾರ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಉದ್ಘಾಟನೆ ಮಾಡಿದರು. ಈ ಪಾಲಿಕೆ ನಿರ್ಮಾಣ ಮಾಡಲು ಬರೊಬ್ಬರಿ 7 ವರ್ಷ ಸಮಯ ಬೇಕಾಯಿತು. ಪಾಲಿಕೆ ಬಜಾರ್​ ಅನೇಕ ವಿಶೇಷತೆಗಳನ್ನು ಒಳಗೊಂಡಿದೆ.

ಹವಾನಿಯಂತ್ರಿತ ಪಾಲಿಕೆ ಮಾರುಕಟ್ಟೆ ದೆಹಲಿ ಬಿಟ್ಟರೇ, ಎರಡನೇಯದ್ದು ಬೆಂಗಳೂರಿನಲ್ಲಿದೆ. ಈ ಮಾರುಕಟ್ಟೆಯು 136 ಮೀಟರ್ ಉದ್ದ ಮತ್ತು 11 ಮೀಟರ್ ಅಗಲವಿದೆ. ಒಟ್ಟು 80 ಅಂಗಡಿಗಳನ್ನು ಹೊಂದಿದೆ. ಪಾಲಿಕೆ ಬಜಾರ್​ ಕೇಂದ್ರೀಯ ಹವಾನಿಯಂತ್ರಣವನ್ನು ಹೊಂದಿದ್ದರೆ, 31 ಅಂಗಡಿಗಳು ಪ್ರತ್ಯೇಕ ಹವಾನಿಯಂತ್ರಣ ಸೌಲಭ್ಯ ಹೊಂದಿವೆ.

ಪಾಲಿಕೆ ಬಜಾರ್ ಒಳಗೆ ಪ್ರವೇಶಕ್ಕೆ ಐದು ದ್ವಾರಗಳಿವೆ. 145 ದೀಪಗಳು, ಎರೆಡು ಎಸ್ಕಲೇಟರ್​ಗಳು ಮತ್ತು ಒಂದು ಲಿಫ್ಟ್​ ಹೊಂದಿದೆ. ಪ್ರತಿ ಅಂಗಡಿಗಳ ಬಳಿ ಫೈಯರ್ ಸೇಫ್ಟಿ ಸಿಲಿಂಡಾರ್ ವ್ಯವಸ್ಥೆ ಮಾಡಲಾಗಿದೆ. ಇಷ್ಟೆಲ್ಲ ವಿಶೇಷತೆಗಳಿಂದ ಕೂಡಿರುವ ಭೂಗತ ಮಾರುಕಟ್ಟೆಯಿಂದ ಬೀದಿಬದಿ ವ್ಯಾಪರಿಗಳಿಗೆ ಅನುಕೂಲವಾಗಿದೆ.‌ ಜೊತೆಗೆ ಟ್ರಾಫಿಕ್ ಸಮಸ್ಯೆ ಕೂಡ ಪರಿಹಾರವಾಗಲಿದೆ.

ಇದನ್ನೂ ಓದಿ: ಬೆಂಗಳೂರಿನಲ್ಲಿ ಡೆಂಗ್ಯೂ ಹೆಚ್ಚಳ: ಸೊಳ್ಳೆ ನಿಯಂತ್ರಣಕ್ಕೆ ಓವಿ ಟ್ರ್ಯಾಪ್ ಅಳವಡಿಸಿದ ಬಿಬಿಎಂಪಿ

ಭೂಗತ ಪಾಲಿಕ ಬಜಾರ್​ ನಿರ್ಮಾಣದಿಂದ 20-30 ವರ್ಷಗಳಿಂದ ಬೀದಿಬದಿಯಲ್ಲೇ ವ್ಯಾಪಾರ ಮಾಡುತ್ತ ಜೀವನ ಸಾಗಿಸುತ್ತಿರುವ ವ್ಯಾಪಾರಿಗಳು ಸಂತೋಷಗೊಂಡಿದ್ದಾರೆ. ಇಷ್ಟು ದಿನ ಮಳೆ,ಗಾಳಿ ಬಿಸಿಲಿನಲ್ಲಿ ವ್ಯಾಪಾರ ಮಾಡುತ್ತ ಜೀವನ ನಡೆಸಿದ್ದೇವೆ. ಇನ್ಮುಂದೆ ಈ ಸಮಸ್ಯೆಗಳಿಂದ ಮುಕ್ತಿ ಸಿಗಲಿದೆ ಎಂದು ವ್ಯಾಪರಸ್ಥರು ಸಂತಸ ವ್ಯಕ್ತಪಡಿಸಿದರು.

ಈ ಹವಾನಿಯಂತ್ರಿತ ಪಾಲಿಕೆ ಬಜಾರ್​ನಿಂದ ವ್ಯಾಪಾರಸ್ಥರಿಗೆ ಮಾತ್ರವಲ್ಲದೆ ಗ್ರಾಹಕರಿಗೂ ತುಂಬ ಅನುಕೂಲವಾಗಲಿದೆ. ರಸ್ತೆಬದಿಯಲ್ಲಿ ವಸ್ತುಗಳನ್ನ ಕೊಳ್ಳುವುದಕ್ಕೆ ಗ್ರಾಹಕರು ಹೆಣಗುತ್ತಿದ್ದರು. ಟ್ರಾಫಿಕ್​ ಮಧ್ಯೆ ವಸ್ತುಗಳನ್ನು ಖರೀದಿಸಲು ಗ್ರಾಹಕರಿಗೆ ಕಿರಿಯಾಗುತ್ತಿತ್ತು. ಇದರಿಂದ ಸಾಕಷ್ಟು ಬಾರಿ ಗ್ರಾಹಕರು ವಾಪಸ್ಸು ಹೋಗಿರುವ ಉದಾಹರಣೆಗಳು ಇವೆ. ಆದರೆ, ಪಾಲಿಕೆ ಬಜಾರ್​ನಿಂದ ಗ್ರಾಹಕರು ಪರದಾಡುವುದು ತಪ್ಪುತ್ತದೆ.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ

Published On - 3:05 pm, Mon, 26 August 24