ವರಮಹಾಲಕ್ಷ್ಮೀ ಹಬ್ಬದ ಎಫೆಕ್ಟ್: ಕೆಆರ್ ಮಾರ್ಕೆಟ್​ನಲ್ಲಿ ಹೂವು-ಹಣ್ಣುಗಳ ಬೆಲೆ ಗಗನಕ್ಕೆ, ಗ್ರಾಹಕರಿಗೆ ಬೆಲೆ ಏರಿಕೆ ಶಾಕ್

ಬೆಂಗಳೂರು, ಆಗಸ್ಟ್ 20: ನಾಡಿನೆಲ್ಲೆಡೆ ವರಮಹಾಲಕ್ಷ್ಮೀ ಹಬ್ಬಕ್ಕೆ (Varamahalakshmi festival) ತಯಾರಿ ಜೋರಾಗಿದ್ದು, ರಾಜಧಾನಿ ಬೆಂಗಳೂರಿನ (Bengaluru) ಮಾರುಕಟ್ಟೆಗಳಲ್ಲಿ ಖರೀದಿ ಭರಾಟೆ ರಂಗೇರಿದೆ. ಹಬ್ಬಕ್ಕೆ ಕೇವಲ ಒಂದು ದಿನಗಳಷ್ಟೇ ಬಾಕಿ ಇರುವ ಹಿನ್ನೆಲೆಯಲ್ಲಿ ಸಿಲಿಕಾನ್ ಸಿಟಿ ಮಂದಿ ಕೆಆರ್ ಮಾರ್ಕೆಟ್ (ಕೃಷ್ಣರಾಜೇಂದ್ರ ಮಾರುಕಟ್ಟೆ) ಸೇರಿದಂತೆ ನಗರದ ಪ್ರಮುಖ ಮಾರುಕಟ್ಟೆಗಳಿಗೆ ಮುಗಿಬಿದ್ದಿದ್ದಾರೆ. ಆದರೆ, ಹಬ್ಬದ ಪ್ರಯುಕ್ತ ಹೂವು ಮತ್ತು ಹಣ್ಣುಗಳ ದರ ಗಗನಕ್ಕೇರಿದ್ದು, ಸಾರ್ವಜನಿಕರ ಜೇಬಿಗೆ ಕತ್ತರಿ ಬೀಳುತ್ತಿದೆ.

ವರಮಹಾಲಕ್ಷ್ಮೀ ಪೂಜೆ ಹಾಗೂ ಅಲಂಕಾರಕ್ಕಾಗಿ ಹೂವು-ಹಣ್ಣುಗಳಿಗೆ ಭಾರಿ ಬೇಡಿಕೆ ಬಂದಿದೆ. ಇದನ್ನು ಬಂಡವಾಳ ಮಾಡಿಕೊಂಡಿರುವ ವ್ಯಾಪಾರಿಗಳು ದರವನ್ನು ದುಪ್ಪಟ್ಟು, ಮುಮ್ಮಡಿಗೆ ಹೆಚ್ಚಿಸಿದ್ದಾರೆ. ಕಳೆದ ವಾರಕ್ಕೆ ಹೋಲಿಸಿದರೆ ಈ ವಾರ ಬೆಲೆಗಳಲ್ಲಿ ಭಾರಿ ಏರಿಕೆ ಕಂಡುಬಂದಿದೆ.

ಹೂವುಗಳ ದರ ವಿವರ (ಕೆಜಿಗಳಲ್ಲಿ)

• ಸೇವಂತಿಗೆ: ಕಳೆದ ವಾರ ₹150 ಇದ್ದದ್ದು, ಈಗ ₹450 ತಲುಪಿದೆ.
• ಮಲ್ಲಿಗೆ: ಕಳೆದ ವಾರ ₹500 ಇದ್ದದ್ದು, ಈಗ ₹1,200 ಕ್ಕೆ ಏರಿಕೆಯಾಗಿದೆ.
• ಕನಕಾಂಬರ: ಕಳೆದ ವಾರ ₹2,000 ಇದ್ದ ದರ, ಈಗ ಬರೋಬ್ಬರಿ ₹5,000 ರಿಂದ ₹6,000 ವರೆಗೆ ಜಿಗಿದಿದೆ.
• ತಾವರೆ ಹಾರ: ₹500 ಇದ್ದುದು ಈಗ ₹2500 ಕ್ಕೆ ಏರಿಕೆ
• ಗುಲಾಬಿ ಹಾರ: 200 ರಿಂದ 500 ರೂ.ಗೆ ಏರಿಕೆ
• ಸಂಪಿಗೆ ಹಾರ: 500 ರೂ. ಇದ್ದುದು 3500 ರೂ.ಗೆ
• ಮಲ್ಲಿಗೆ ಹಾರ: 500 ರೂ. ಇದ್ದುದು 1500 ರೂ.ಗೆ
• ದುಂಡು ಮಲ್ಲಿಗೆ ಹಾರ: 2000 ರೂ. ಇದ್ದುದು 5000 ರೂ.ಗೆ

ಹಣ್ಣುಗಳ ದರ ವಿವರ (ಕೆಜಿಗಳಲ್ಲಿ)

• ಸೇಬು: ₹110 ಇದ್ದದ್ದು, ಈಗ ₹270 ಆಗಿದೆ.
• ದಾಳಿಂಬೆ: ₹120 ಇದ್ದದ್ದು, ಈಗ ₹260 ಕ್ಕೆ ಏರಿಕೆಯಾಗಿದೆ.
• ಕಿತ್ತಳೆ: ₹80 ಇದ್ದದ್ದು, ಈಗ ₹180 ಆಗಿದೆ.
• ಏಲಕ್ಕಿ ಬಾಳೆಹಣ್ಣು: ₹50 ಇದ್ದದ್ದು, ಈಗ ₹100 ತಲುಪಿದೆ.
• ಮೂಸಂಬಿ: ₹100 ರಷ್ಟಿದ್ದ ದರ ₹150 ಕ್ಕೆ ಜಿಗಿದಿದೆ.
• ಬಾಳೆಹಣ್ಣು: 50 ರೂ.ನಿಂದ 100 ರೂ.ಗೆ ಏರಿಕೆ
• ದ್ರಾಕ್ಷಿ: 70 ರೂ.ನಿಂದ 170 ರೂ.ಗೆ ಏರಿಕೆ
• ಅನಾನಸ್: 60 ರೂ.ನಿಂದ 150 ರೂ.ಗೆ ಏರಿಕೆ

ಬೆಲೆ ಏರಿದ್ದರೂ ಕಮ್ಮಿಯಾಗದ ಖರೀದಿ ಉತ್ಸಾಹ

ಹೂವು-ಹಣ್ಣುಗಳ ಬೆಲೆ ಎಷ್ಟೇ ಏರಿಕೆಯಾಗಿದ್ದರೂ, ವರ್ಷಕ್ಕೊಮ್ಮೆ ಬರುವ ವರ ಮಹಾಲಕ್ಷ್ಮೀ ಹಬ್ಬವನ್ನು ವಿಜೃಂಭಣೆಯಿಂದ ಆಚರಿಸಲೇಬೇಕು ಎಂಬ ಉದ್ದೇಶದಿಂದ ಸಾರ್ವಜನಿಕರು ಬೆಲೆ ಏರಿಕೆಯ ನಡುವೆಯೂ ಸಾಲು ಸಾಲಾಗಿ ನಿಂತು ಖರೀದಿ ಮಾಡುತ್ತಿದ್ದಾರೆ. ಮಾರುಕಟ್ಟೆಗಳಲ್ಲಿ ಬೆಳಿಗ್ಗೆಯಿಂದಲೇ ಸಾರ್ವಜನಿಕರ ದಂಡು ಹರಿದುಬರುತ್ತಿದ್ದು, ಸಂಚಾರ ದಟ್ಟಣೆಯೂ ಉಂಟಾಗಿದೆ.

ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ