ವಿಜಯಪುರದ ಸಿದ್ದಸಿರಿ ಸೌಹಾರ್ದ ಬ್ಯಾಂಕ್‌ನಲ್ಲಿ ಅಕ್ರಮ ನೇಮಕಾತಿ: ಕೋಟ್ಯಂತರ ರೂ ಗುಳುಂ

ವಿಜಯಪುರ, ಸೆಪ್ಟೆಂಬರ್​​ 30: ಶಾಸಕ ಬಸನಗೌಡ ಪಾಟೀಲ್​ ನೇತೃತ್ವದಲ್ಲಿ 2006ರಲ್ಲಿ ಸಿದ್ಧಸಿರಿ ಸೌಹಾರ್ದ ಸಹಕಾರಿ ಸಂಘ ನಿಯಮಿತ ಸ್ಥಾಪನೆಯಾಗಿತ್ತು. 5 ಲಕ್ಷ ರೂ ಬಂಡವಾಳದೊಂದಿಗೆ ಆರಂಭವಾಗಿದ್ದ, ಸಂಘ ಇದೀಗ 6 ಸಾವಿಕ್ಕೂ ಅಧಿಕ ಕೋಟಿ ರೂ ವಹಿವಾಟು ನಡೆಸುತ್ತಿದೆ. ಇಂತಹ ಸೌಹಾರ್ದ ಸಹಕಾರಿ ನಿಯಮಿತದಲ್ಲಿ ಸಿಬ್ಬಂದಿ ನೇಮಕಾತಿಯಲ್ಲಿ ಅವ್ಯವಹಾರ ನಡೆದಿರುವ ಆರೋಪ ಕೇಳಿಬಂದಿದೆ.

ನಡೆದಿದ್ದೇನು?

ವಿಜಯಪುರ ಜಿಲ್ಲೆಯಲ್ಲೇ ದೊಡ್ಡ ಸೌಹಾರ್ದ ಸಹಕಾರಿ ಸಂಘ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಶ್ರೀ ಸಿದ್ಧಸಿರಿ ಸೌಹಾರ್ದ ಸಹಕಾರಿ ಸಂಘದಲ್ಲಿ ಸಿಬ್ಬಂದಿ ನೇಮಕಾತಿಯಲ್ಲಿ ಹಣಕಾಸು ದುರುಪಯೋಗದ ಆರೋಪ ಕೇಳಿಬಂದಿದೆ. ನಗರ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ 2006 ರಲ್ಲಿ 500 ಷೇರು ಸದಸ್ಯರ 5 ಲಕ್ಷ ರೂ ಬಂಡವಾಳದಿಂದ ಶ್ರೀ ಸಿದ್ದಿಸಿರಿ ಸೌಹಾರ್ದ ಸಹಕಾರಿ ಸಂಘ ನಿಯಮಿತ ಸ್ಥಾಪನೆ ಮಾಡಿದ್ದರು. ಸದ್ಯ 6140 ಕೋಟಿ ರೂ ವಹಿವಾಟು ನಡೆಸುವಷ್ಟು ಈ ಸಂಘ ಬೆಳೆದಿದೆ. ಆದರೆ ಇಲ್ಲಿ ನೇಮಕವಾಗುವ ಸಿಬ್ಬಂದಿ ಭದ್ರತಾ ಠೇವಣಿ ಹಣದಲ್ಲಿ ಗೋಲ್ಮಾಲ್ ಆಗಿದೆ ಎಂಬ ಆರೋಪ ಕೇಳಿಬಂದಿದೆ.

ಇದನ್ನೂ ಓದಿ: ಶ್ರೀ ಸಿದ್ದೇಶ್ವರ ಸಹಕಾರಿ ಬ್ಯಾಂಕ್ ನೇಮಕಾತಿ: 60 ವಿವಿಧ ಹುದ್ದೆಗಳಿಗೆ ಅರ್ಜಿ ಆಹ್ವಾನ, 10th ಪಾಸಾಗಿದ್ರೆ ಸಾಕು!

ಶ್ರೀ ಸಿದ್ದಿಸಿರಿ ಸೌಹಾರ್ದ ಸಹಕಾರಿ ಸಂಘ ನಿಯಮಿತದಿಂದ ಇದೀಗ ಸಿದ್ದಸಿರಿ ಮಲ್ಟಿ ಸ್ಟೇಟ್ ಮಲ್ಟಿ ಪರ್ಪಸ್ ಕೋ-ಆಪರೇಟಿವ್ ಸೊಸೈಟಿ ಲಿಮಿಟೆಡ್​ ಆಗಿ ಮಾರ್ಪಾಡಾಗಿದೆ. ಶಾಸಕ ಯತ್ನಾಳ್​ ಪುತ್ರ ರಾಮನಗೌಡ ಅಧ್ಯಕ್ಷರಾಗಿದ್ದಾರೆ. ಈ ಹಿಂದೆ ಜಂಟಿ ವ್ಯವಸ್ಥಾಪಕ ನಿರ್ದೇಶಕ ರಾಘವೇಂದ್ರ ಅಣ್ಣಿಗೇರಿ ಹಣಕಾಸಿನ ದುರುಪಯೋಗ ಮಾಡಿಕೊಂಡಿರುವ ಆರೋಪ ಕೇಳಿಬಂದಿದೆ. ಈ ಹಿನ್ನೆಲೆ ಸೊಸೈಟಿಯ ಸಿಇಓ ಜೋತಿಬಾ ಖಂಡಾಗಳೆ, ರಾಘವೇಂದ್ರ ಅಣ್ಣಿಗೇರಿ ಮೇಲೆ ಹಣಕಾಸಿನ ದುರುಪಯೋಗ ಮಾಡಿಕೊಂಡಿದ್ದಾರೆಂದು ದೂರು ನೀಡಿದ್ದಾರೆ.

28 ಅಭ್ಯರ್ಥಿಗಳಿಂದ 1.41 ಕೋಟಿ ರೂ ಹಣ ಪಡೆದ ಆರೋಪ

ಅಷ್ಟಕ್ಕೂ ಈ ಹಿಂದೆ ಜಂಟಿ ವ್ಯವಸ್ಥಾಪನ ನಿರ್ದೇಶಕ ಹಾಗೂ ಯತ್ನಾಳ್​ ಬಲಗೈ ಬಂಟನಾಗಿದ್ದ ರಾಘವೇಂದ್ರ ಅಣ್ಣಿಗೇರಿ ಮೇಲೆ ದೂರು ದಾಖಲಾಗಿದ್ದು ಏಕೆ ಎಂದು ನೋಡುವುದಾದರೆ ರಾಘವೇಂದ್ರ ಅಣ್ಣಿಗೇರಿ ಕಳೆದ 2019 ರಿಂದ 2025 ರವರೆಗೆ ಸೊಸೈಟಿಯ ವಿವಿಧ ಹುದ್ದೆಗಳ ನೇಮಕಾತಿಗಾಗಿ ತೆಗೆದುಕೊಳ್ಳುವ ಭದ್ರತಾ ಠೇವಣಿ ಹಣವನ್ನು ಸೊಸೈಟಿಗೆ ಭರಿಸದೇ ತಾನೇ ಬಳಕೆ ಮಾಡಿಕೊಂಡು ವಂಚನೆ ಮಾಡಿದ್ಧಾರೆಂದು ದೂರು ದಾಖಲಾಗಿದೆ. ಒಟ್ಟು 28 ಅಭ್ಯರ್ಥಿಗಳಿಂದ 1 ಕೋಟಿ 41 ಲಕ್ಷ 50 ಸಾವಿರ ರೂ ಪಡೆದುಕೊಂಡು ಸೊಸೈಟಿಗೆ ಕಟ್ಟದೇ ಬಳಕೆ ಮಾಡಿದ್ದಾರೆ.

ವಿವಿಧ ಹುದ್ದೆಗಳಿಗೆ ನೇಮಕವಾದ ಅಭ್ಯರ್ಥಿಗಳು ಅತ್ಯಂತ ಕೌಶಲ್ಯ ಹೊಂದಿದ್ದಾರೆ, ಬಡವರಿ​ದ್ದಾರೆ, ಅವರಿಗೆ ಭದ್ರತಾ ಠೇವಣಿ ಹಣ ಭರಸುವುದಕ್ಕೆ ಆಗಲ್ಲ ಎಂದು ಆಡಳಿತ ಮಂಡಳಿಯವರಿಗೆ ಸುಳ್ಳು ಮಾಹಿತಿ ನೀಡಿದ್ದಾರೆಂದು ಬ್ಯಾಂಕ್ ದೂರಿನಲ್ಲಿ ಉಲ್ಲೇಖವಾಗಿದೆ. 1.41 ಕೋಟಿ ರೂ ಹಣ ದುರುಪಯೋಗ ಹಾಗೂ ಆ ಹಣದಿಂದ ಬರಬೇಕಾದ ಲಾಭಾಂಶ 90 ಲಕ್ಷ ರೂ ಹಾನಿ ಮಾಡಿದ್ದಾನೆಂದು ದೂರು ನೀಡಿದ್ದಾರೆ. ಇದರ ಜೊತೆಗೆ ಇತರೆ ಕೆಲ ಸಿಬ್ಬಂದಿಗಳಿಂದ ಪಡೆದ ಹಣವನ್ನು ವಾಪಸ್ ನೀಡಿದ್ದು, ಇನ್ನು ಸ್ವಲ್ಪ ಹಣವನ್ನು ರಾಘವೇಂದ್ರ ಅಣ್ಣಿಗೇರಿ ನೀಡಬೇಕಿದೆಯಂತೆ.

ರಾಘವೇಂದ್ರ ಅಣ್ಣಿಗೇರಿದು ಎನ್ನಲಾದ ಆಡಿಯೋ ವೈರಲ್

ಈ ವಿಚಾರ ಆಡಳಿತ ಮಂಡಳಿ ಗಮನಕ್ಕೆ ಬರುತ್ತಿದ್ದಂತೆ ರಾಘವೇಂದ್ರ ಅಣ್ಣಿಗೇರಿ ತ್ಮಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರಂತೆ. ಯಾವಾಗ ಸಿಬ್ಬಂದಿಗಳ ಠೇವಣಿ ಹಣ ಪಡೆದುಕೊಂಡ ವಿಚಾರ ಬಹಿರಂಗವಾಯಿತ್ತೋ ಆಗ ಹಣ ನೀಡಿದ ಅಭ್ಯರ್ಥಿಗಳಿಗೆ ಕರೆ ಮಾಡಿರುವ ರಾಘವೇಂದ್ರ ಅಣ್ಣಿಗೇರಿ, ‘ಯಾವುದೇ ವಿಷಯ, ಯಾರ ಮುಂದೆ ಹೇಳಬೇಡಿ. ನಿಮ್ಮ ಹಣ ನಿಮಗೆ ವಾಪಸ್ ನೀಡುತ್ತೇನೆ’ ಎಂದು ಅವರದ್ದು ಎನ್ನಲಾದ ಆಡಿಯೋ ಸಹ ವೈರಲ್ ಆಗಿದೆ.

ರಾಘವೇಂದ್ರ ಅಣ್ಣಿಗೇರಿಗೆ ಹೇಳಿದ್ದಿಷ್ಟು 

ಈ ಆರೋಪ ಹಾಗೂ ದೂರಿನ ಕುರಿತು ಟಿವಿ9 ತಂಡ ರಾಘವೇಂದ್ರ ಅಣ್ಣಿಗೇರಿಗೆ ಕರೆ ಮಾಡಿದ್ದು,  ‘ಸ್ಥಳಿಯವಾಗಿ ಲಭ್ಯವಿಲ್ಲ’ ಎಂದಿದ್ದಾರೆ. ಜೊತೆಗೆ ದೂರಿನ ವಿಚಾರ ಕುರಿತು ‘ನಾನು ನನ್ನ ಕಾನೂನು ಸಲಹೆಗಾರರ ಜೊತೆಗೆ ಚರ್ಚೆ ಮಾಡಿ ನಂತರ ಪ್ರತಿಕ್ರಿಯೆ ನೀಡುವುದಾಗಿ’ ಹೇಳಿದ್ದಾರೆ. ಸದ್ಯ ಈ ಆರೋಪದ ತನಿಖೆಯ ಬಳಿಕವಷ್ಟೇ ನಿಜಾಂಶ ಬಯಲಿಗೆ ಬರಲಿದೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.