ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ ಮಂಗಳೂರು ಮಹಾನಗರ ಪಾಲಿಕೆ: 1,375 ಕೋಟಿ ಸಾಲವಾಗಿದ್ದರೂ ಇನ್ನೂ ಮುಗಿಯದ ಒಳಚರಂಡಿ ಕಾಮಗಾರಿ!

ಮಂಗಳೂರು, ಅಕ್ಟೋಬರ್​​ 06: ಕರ್ನಾಟಕ ಸರ್ಕಾರ ಆರ್ಥಿಕ ಸಂಕಷ್ಟದಲ್ಲಿದೆ ಎಂಬ ಸುದ್ದಿ ರಾಜ್ಯದಲ್ಲಿ ಹಲ್​​ಚಲ್​​ ಸೃಷ್ಟಿಸಿರುವ ನಡುವೆಯೇ ಮಂಗಳೂರು ಮಹಾನಗರ ಪಾಲಿಕೆ ಕೂಡ ಸಾಲದ ಸುಳಿಗೆ ಸಿಲುಕಿ ಒದ್ದಾಡುತ್ತಿರುವ ಸ್ಫೋಟಕ ವಿಚಾರವೀಗ ಬಹಿರಂಗಗೊಂಡಿದೆ. ಪಾಲಿಕೆಯ ಸಾಲ ಬಡ್ಡಿ ಸಹಿತ 1,375 ಕೋಟಿ ರೂಪಾಯಿಗಳಿಗೆ ಏರಿಕೆಯಾಗಿದ್ದು, ಈ ಸಾಲಕ್ಕೆ ರಾಜ್ಯ ಸರ್ಕಾರವೇ ಜಾಮೀನು ನೀಡಿದೆ. 20 ವರ್ಷಗಳ ಹಿಂದಿನ  ಸಾಲಕ್ಕೆ ಪಾಲಿಕೆ 1 ಸಾವಿರ ಕೋಟಿ ಬಡ್ಡಿ ಪಾವತಿಸಬೇಕಿದ್ದು, ಏಷ್ಯನ್ ಡೆವಲಪ್ಮೆಂಟ್ ಬ್ಯಾಂಕ್​​ಗೆ ಹಣ ತೀರಿಸಲಾಗದೇ ಪಾಲಿಕೆಯೀಗ ಸಂಕಷ್ಟಕ್ಕೆ ಸಿಲುಕಿದೆ ಎನ್ನಲಾಗಿದೆ.

20 ವರ್ಷಗಳು ಕಳೆದರೂ ಮುಗಿಯದ ಒಳಚರಂಡಿ ಕಾಮಗಾರಿ!

2006ರಲ್ಲಿ ಒಳಚರಂಡಿ ಮತ್ತು ನೀರು ಸರಬರಾಜು ಯೋಜನೆ ಸಂಬಂಧ ಕುಂಡ್ಸೆಂಪ್ ಮೂಲಕ ಕಾಮಗಾರಿ ಆರಂಭಿಸಲಾಗಿತ್ತು. ಈ ಯೋಜನೆಗೆ ಎಡಿಬಿಯಿಂದ 380 ಕೋಟಿ ರೂಪಾಯಿ ಸಾಲ ನೀಡಲಾಗಿತ್ತು. 2006ರ ಬಳಿಕ ಈವರೆಗೆ ಒಂದೇ ಒಂದು ಸಾಲದ ಕಂತು ಪಾವತಿಸಿಲ್ಲ. 2026ರಲ್ಲಿ 380 ಕೋಟಿ ಸಾಲದ ಮರು ಪಾವತಿ ಅವಧಿ ಮುಕ್ತಾಯವಾಗಿದ್ದು, ಸದ್ಯ 380 ಕೋಟಿ ಸಾಲಕ್ಕೆ ಬರೋಬ್ಬರಿ 998 ಕೋಟಿಯಷ್ಟು ಬಡ್ಡಿ ಕಟ್ಟಬೇಕಿದೆ. ಆ ಮೂಲಕ 20 ವರ್ಷಗಳಲ್ಲಿ 1375 ಕೋಟಿಗೆ ಪಾಲಿಕೆ ಸಾಲದ ಹೊರೆ ಏರಿಕೆಯಾಗಿದೆ. 24ಕ್ಕೂ ಹೆಚ್ಚು ಡಿಮ್ಯಾಂಡ್ ನೋಟಿಸ್ ಕೊಟ್ಟರೂ ಪಾಲಿಕೆ ಡೋಂಟ್​ಕೇರ್ ಎಂದಿದ್ದು, 2006ರಲ್ಲಿ ಆರಂಭವಾದ ಒಳಚರಂಡಿ ಕಾಮಗಾರಿ ಇನ್ನೂ ಪೂರ್ಣಗೊಂಡಿಲ್ಲ ಎಂಬುದಿಲ್ಲಿ ಮತ್ತೊಂದು ಮಹತ್ವದ ವಿಚಾರವಾಗಿದೆ.

ಇದನ್ನೂ ಓದಿ: 500 ರೂ.ಗೆ ನವದುರ್ಗಿಯರ ದರ್ಶನ: ಮಂಗಳೂರು ದಸರಾ ಪ್ರವಾಸಕ್ಕೆ ಮತ್ತೊಂದು ಹೊಸ KSRTC ವಿಶೇಷ ಪ್ಯಾಕೇಜ್

‘ಮಂಗಳೂರನ್ನೇ ಮಾರಿದರೂ ಸಾಲ ತೀರಲ್ಲ’

ಇನ್ನು ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಮಂಗಳೂರು ದಕ್ಷಿಣ ಕ್ಷೇತ್ರದ ಶಾಸಕ ವೇದವ್ಯಾಸ ಕಾಮತ್​​, ಮಂಗಳೂರು ಮಹಾನಗರ ಪಾಲಿಕೆಯ ಸಾಲ 1,375 ಕೋಟಿ ರೂಪಾಯಿ ಮಾತ್ರವಲ್ಲ. 20 ವರ್ಷಗಳ ಸಾಲಗಳ ಎಲ್ಲ ದಾಖಲೆ ತೆಗೆದರೆ ಇನ್ನಷ್ಟು ಶಾಕ್​​ ಆಗಲಿದೆ. ಅದೆಲ್ಲವನ್ನು ತೀರಿಸೋಕೆ ಮಂಗಳೂರೇ ಸಾಕಾಗಲ್ಲ. ಸರ್ಕಾರ ಅನುದಾನ ನೀಡದ ಕಾರಣ ಇಂತಹ ಸಮಸ್ಯೆ ಬಂದಿದೆ. ಇದಕ್ಕೆ ರಾಜ್ಯ ಸರ್ಕಾರವೇ ನೇರ ಹೊಣೆ. ಸಚಿವ ಯತೀಂದ್ರ ಸಿದ್ದರಾಮಯ್ಯ ಮೊನ್ನೆ ಬಂದು ಪಾಲಿಕೆ ರಿವ್ಯೂ ಮೀಟಿಂಗ್ ಮಾಡಿದರಾದರೂ, ಆಗ ಈ ಬಗ್ಗೆ ಚಕಾರ ಎತ್ತಿಲ್ಲ ಎಂದವರು ಆರೋಪಿಸಿದ್ದಾರೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.

Published On - 11:33 am, Tue, 6 October 26