ಹುಬ್ಬಳ್ಳಿಯಲ್ಲಿ ನವರಾತ್ರಿ ವಿನೂತನ ಆಚರಣೆ: ಕಬ್ಬು ಬೆಳೆಗಾರರ ಸಂಕಷ್ಟ ನಿವಾರಣೆಗೆ ದೇವಿಗೆ ಕಬ್ಬಿನಿಂದ ವಿಶೇಷ ಅಲಂಕಾರ

ಹುಬ್ಬಳ್ಳಿ, ಅ.20: ನಾಡಿನೆಲ್ಲಡೆ ದಸರಾ ಹಾಗೂ ನವರಾತ್ರಿ ಹಬ್ಬದ ಸಂಭ್ರಮ ಕಳೆಗಟ್ಟಿರುವ ಬೆನ್ನಲ್ಲೇ, ಹುಬ್ಬಳ್ಳಿಯ ನಾಗಶೆಟ್ಟಿಕೊಪ್ಪದ ನಿವಾಸಿಗಳು ಕಬ್ಬು ಬೆಳೆಗಾರರ ಪರವಾಗಿ ನಿಂತು ವಿನೂತನ ಹಾಗೂ ಮಾದರಿ ಕಾರ್ಯವೊಂದನ್ನು ಮಾಡಿದ್ದಾರೆ. ಕಬ್ಬು ಬೆಳೆಗಾರರ ಸಂಕಷ್ಟಗಳು ನಿವಾರಣೆಯಾಗಲಿ ಹಾಗೂ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳಿಗೆ ದೇವಿ ಸದ್ಬುದ್ಧಿ ನೀಡಲಿ ಎಂದು ಪ್ರಾರ್ಥಿಸಿ ನಾಗಶೆಟ್ಟಿಕೊಪ್ಪದ ಶ್ರೀ ಮಹಾಲಕ್ಷ್ಮಿ ದೇವಿಗೆ ಸಂಪೂರ್ಣವಾಗಿ ಕಬ್ಬಿನಿಂದ ವಿಶೇಷ ಅಲಂಕಾರ ಮಾಡಲಾಗಿದೆ.

ಕೃಷಿ ಜಮೀನನ್ನು ನೆನಪಿಸುವಂತೆ ಕಬ್ಬಿನಿಂದ ದೇವಿಯನ್ನು ಶೃಂಗರಿಸಲಾಗಿದ್ದು, “ನಮ್ಮ ರೈತ ನಮ್ಮ ಹೆಮ್ಮೆ” ಎಂಬ ಬರಹಗಳು ಹಾಗೂ ಎತ್ತಿನ ಬಂಡಿಯ ಚಿತ್ರಗಳ ಮೂಲಕ ರೈತರ ಕಷ್ಟ-ನಷ್ಟಗಳನ್ನು ಬಿಂಬಿಸಲಾಗಿದೆ. ಸಕ್ಕರೆಯ ಎಫ್.ಆರ್.ಪಿ ಹಾಗೂ ಎಂ.ಎಸ್.ಪಿ ದರ ಹೆಚ್ಚಳಕ್ಕೆ ಒತ್ತಾಯಿಸಿ ಸೆಪ್ಟೆಂಬರ್ 29 ರಂದು ಹುಬ್ಬಳ್ಳಿಯಲ್ಲಿ ಲಕ್ಷಕ್ಕೂ ಅಧಿಕ ಕಬ್ಬು ಬೆಳೆಗಾರರು ಬೃಹತ್ ಪ್ರತಿಭಟನೆ ನಡೆಸಿದ್ದರು. ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ ನಿವಾಸಕ್ಕೆ ಮುತ್ತಿಗೆ ಹಾಕಲು ತೆರಳಿದ್ದಾಗ ಕೇಶ್ವಾಪುರದ ರಮೇಶ್ ಭವನ ಹಾಗೂ ಮಹಾಲಕ್ಷ್ಮಿ ದೇವಸ್ಥಾನದ ಸುತ್ತಮುತ್ತಲಿನ ಪ್ರದೇಶ ಹಸಿರುಮಯವಾಗಿತ್ತು. ಈ ಐತಿಹಾಸಿಕ ಹೋರಾಟದ ನೆನಪಿಗಾಗಿ ಹಾಗೂ ರೈತರಿಗೆ ಬೆಂಬಲ ಸೂಚಿಸಲು ಈ ವಿಶೇಷ ಅಲಂಕಾರ ಮಾಡಲಾಗಿದೆ.

ಇದನ್ನೂ ಓದಿ: ದಸರಾ ರಜೆಯಿಲ್ಲ, ವಿಶ್ರಾಂತಿಯಿಲ್ಲ: ಎಸ್‌ಎಸ್‌ಎಲ್‌ಸಿ ಮಕ್ಕಳ ಭವಿಷ್ಯಕ್ಕಾಗಿ ಶಿಕ್ಷಕರು ಹಾಗೂ ಗ್ರಾಮಸ್ಥರ ವಿನೂತನ ಪ್ರಯೋಗ

ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ ಅವರ ಮನವಿ ಮೇರೆಗೆ ರೈತರ ಹೋರಾಟಕ್ಕೆ ತಾತ್ಕಾಲಿಕ ಬ್ರೇಕ್ ಬಿದ್ದಿದೆಯಾದರೂ, ಕಬ್ಬು ಬೆಳೆಗಾರರ ಬೇಡಿಕೆಗಳಿಗೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಶೀಘ್ರವಾಗಿ ಸ್ಪಂದಿಸಿ ಶಾಶ್ವತ ಪರಿಹಾರ ಒದಗಿಸಬೇಕು ಎಂದು ನಾಗಶೆಟ್ಟಿಕೊಪ್ಪದ ನಿವಾಸಿಗಳು ದೇವಿಯಲ್ಲಿ ಪ್ರಾರ್ಥಿಸಿದ್ದಾರೆ. ನಾಗಶೆಟ್ಟಿಕೊಪ್ಪ ನಿವಾಸಿಗಳಾದ ಸಂತೋಷ್‌ಕುಮಾರ್ ಹಾಗೂ ಮಲ್ಲೇಶ್ ಬೀಳಗಿ ಮಾತನಾಡಿ, “ನಮ್ಮ ಪ್ರದೇಶದಲ್ಲಿ ಬಹುತೇಕರು ರೈತರಾಗಿದ್ದು, ಸಹವರ್ತಿ ಕಬ್ಬು ಬೆಳೆಗಾರರ ಸಂಕಷ್ಟಕ್ಕೆ ಮಿಡಿಯುವುದು ನಮ್ಮ ಕರ್ತವ್ಯ. ನವರಾತ್ರಿ ವೇಳೆ ದೇವಿಗೆ ಧಾನ್ಯ, ಹೂವುಗಳಿಂದ ಅಲಂಕಾರ ಮಾಡುವುದು ಸಾಮಾನ್ಯ. ಆದರೆ ಈ ಬಾರಿ ರೈತರ ಸಮಸ್ಯೆಗೆ ಬೆಂಬಲ ನೀಡಲು ಕಬ್ಬಿನಿಂದ ಅಲಂಕರಿಸಿ ವಿಶೇಷ ಪೂಜೆ ಸಲ್ಲಿಸಲಾಗಿದೆ” ಎಂದರು.

ಕಬ್ಬಿನಿಂದ ಜಗಮಗಿಸುತ್ತಿರುವ ದೇವಿಯ ದರ್ಶನಕ್ಕೆ ನೂರಾರು ಭಕ್ತರು ಆಗಮಿಸುತ್ತಿದ್ದು, ರೈತರ ಪರವಾಗಿ ನಿಂತ ನಾಗಶೆಟ್ಟಿಕೊಪ್ಪ ನಿವಾಸಿಗಳ ಹೃದಯ ವೈಶಾಲ್ಯತೆಗೆ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ