ವ್ಯಾಕ್ಸಿನ್ ಬಗ್ಗೆ ಮೊದಲು ನೆಗೆಟಿವ್ ಮಾತಾಡಿದ್ರು; ಜನರ ಆ ತಪ್ಪು ತಿಳಿವಳಿಕೆಯೂ ಪ್ರೊಡಕ್ಷನ್ ಮೇಲೆ ಪರಿಣಾಮ ಬೀರಿತು: ಪ್ರಹ್ಲಾದ್ ಜೋಶಿ

ಹುಬ್ಬಳ್ಳಿ: ರಾಜ್ಯ ಸೇರಿದಂತೆ ದೇಶಾದ್ಯಂತ ಕೊರೊನಾ ವ್ಯಾಕ್ಸಿನ್​ ಕೊರತೆಗೆ ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ವಿಶೇಷ ವ್ಯಾಖ್ಯಾನ ನೀಡಿದ್ದಾರೆ. ಆರಂಭದಲ್ಲಿ ಭಾರತದಲ್ಲಿ ಸರಾಗವಾಗಿ ಕೊರೊನಾ ವ್ಯಾಕ್ಸಿನ್ ತಯಾರಾಗುತ್ತಿತ್ತು. ಆಗ ಎಷ್ಟೋ ಜನ ವ್ಯಾಕ್ಸಿನ್ ಬಗ್ಗೆ ಏನೇನೋ ಮಾತನಾಡಿದರು. ಹೆಚ್ಚಾಗಿ ನೆಗೆಟಿವ್ ಅಗಿಯೇ ಮಾತನಾಡಿದರು. ಅದರ ಪರಿಣಾಮವಾಗಿ ಕಂಪನಿಗಳು ಪ್ರೊಡಕ್ಷನ್ ಕಡಿಮೆ ಮಾಡಿದವು. ಹಾಗಾಗಿ ತಪ್ಪು ತಿಳಿವಳಿಕೆಯೂ ಪ್ರೊಡಕ್ಷನ್ ಮೇಲೆ ಪರಿಣಾಮ ಬೀರಿದೆ ಎಂದು ಸಚಿವ ಪ್ರಹ್ಲಾದ್ ಜೋಶಿ ವಿವರಣೆ ನೀಡಿದ್ದಾರೆ.

ಜುಲೈ ತಿಂಗಳಲ್ಲಿ ಎಲ್ಲರಿಗೂ ವ್ಯಾಕ್ಸಿನ್: ಕೋರ್ಟ್ ಹೇಳುವ ಮೊದಲೇ ಪ್ರಧಾನಿ ನರೇಂದ್ರ ಮೋದಿ ಸರ್ಕಾರ ಕೆಲಸ ಮಾಡುತ್ತಿದೆ. ಯುದ್ಧೋಪಾದಿಯಲ್ಲಿ ನಾವು ಕೆಲಸ ಮಾಡುತ್ತಿದ್ದೇವೆ. ಜುಲೈ ತಿಂಗಳಲ್ಲಿ ಎಲ್ಲರಿಗೂ ವ್ಯಾಕ್ಸಿನ್ ಸಿಗುತ್ತೆ. ಇಲ್ಲಿಯವರೆಗೆ ಕೋವಿಡ್ ನಿಯಂತ್ರಣಕ್ಕೆ ಎಲ್ಲ ರೀತಿಯಲ್ಲಿ ಪ್ರಯತ್ನ ಮಾಡಿದ್ದೇವೆ. ಆಕ್ಸಿಜೆನ್ ಕೊರತೆಯಾಗದಂತೆ ಪ್ರಯತ್ನ ಮಾಡಿದ್ದೇವೆ. 80 ಆಕ್ಸಿಜೆನ್ ಕಾನ್ಸನ್ಟ್ರೇಟರ್ಸ್ ಪೈಕಿ 30 ಡೆಲೆವರಿ ಆಗಿವೆ. ಒಂದಕ್ಕೆ 53 ಸಾವಿರ ರೂ. ಬೆಲೆ ಇದೆ. 5 ಲೀಟರ್ ನಲ್ಲಿ ಇಬ್ಬರಿಗೆ ನಾವು ಚಿಕಿತ್ಸೆ ಕೊಡಬಹುದು. ಮೊದಲು 1% ಮಾತ್ರ ಮೆಡಿಕಲ್ ಗೆ ಬಳಕೆಯಾಗುತ್ತಿತ್ತು. ಆದರೆ ಈಗ ಶೇಕಡಾ 7ರಷ್ಟು ಬಳಕೆಯಾಗುತ್ತಿದೆ. 230 ಟ್ಯಾಂಕರ್ ಗಳನ್ನ ವಾಯು ಮಾರ್ಗದ ಮೂಲಕ ತರಿಸಲಾಗಿದೆ. ಕೊರೊನಾ ಸಮಯದಲ್ಲಿ 40ಕ್ಕೂ ಹೆಚ್ಚು ದೇಶಗಳು ಸಹಾಯ ಮಾಡಿವೆ. ರಾಜ್ಯದ 28 ಆಸ್ಪತ್ರೆಗಳಲ್ಲಿ ಆಕ್ಸಿಜೆನ್ ಉತ್ಪಾದನೆಗೆ ಅನುಮೋದನೆ ಕೊಟ್ಟಿದ್ದೇವೆ ಎಂದು ಸಚಿವ ಪ್ರಹ್ಲಾದ್ ಜೋಶಿ ವಿವರಿಸಿದರು.

ಇಷ್ಟು ಪ್ರಮಾಣದಲ್ಲಿ ಆಕ್ಸಿಜೆನ್ ಕೊರತೆಯಾಗುತ್ತೆ ಅಂತ ಯಾರೂ ಹೇಳಿರಲಿಲ್ಲ ರೆಮ್‌ಡಿಸಿವಿಯರ್ 38 ಲಕ್ಷ ಉತ್ಪಾದನೆಯಾಗುತ್ತಿತ್ತು. ಇದೀಗ ಒಂದು ಕೋಟಿ ಉತ್ಪಾದನೆಗೆ ಏರಿಸಲಾಗಿದೆ. ಮೊದಲ ಬಂದ ವೇವ್ ರೀತಿಯಲ್ಲೇ ಎರಡನೇ ವೇವ್ ಇರುತ್ತೆ ಅಂತ ಹೇಳಲಾಗುತ್ತಿತ್ತು. ಆದ್ರೆ ಇಷ್ಟು ಪ್ರಮಾಣದಲ್ಲಿ ಬರುತ್ತೆ ಅಂತಾ ಹೇಳಿರಲಿಲ್ಲ. ಇಷ್ಟು ಪ್ರಮಾಣದಲ್ಲಿ ಆಕ್ಸಿಜೆನ್ ಕೊರತೆಯಾಗುತ್ತೆ ಅಂತ ಯಾರೂ ಹೇಳಿರಲಿಲ್ಲ. ಫೆಬ್ರವರಿಯಲ್ಲಿ ಆರಂಭವಾದಾಗ ಈ ರೀತಿ ಆಕ್ಸಿಜನ್ ಬೇಕಾಗುತ್ತೆ ಅಂತಾನೂ ಗೊತ್ತಿರಲಿಲ್ಲ ಎಂದು ಹುಬ್ಬಳ್ಳಿಯಲ್ಲಿ ಜೋಶಿ ಹೇಳಿದರು.

(people had negetive thoughts about corona vaccine so that affected its production says union minister pralhad joshi in hubli)

Published On - 2:09 pm, Fri, 14 May 21