ಬೆಂ-ಮೈಸೂರು ದಶಪಥ ರಸ್ತೆ ರೆಡಿಯಾಯ್ತು, ಆದ್ರೆ ದಿಂಡಿಗಲ್ ರಾಷ್ಟ್ರೀಯ ಹೆದ್ದಾರಿ ಅಗಲೀಕರಣ 8 ವರ್ಷ ಕಳೆದರೂ ಮುಗಿದಿಲ್ಲ

ಒಂದೆಡೆ ಬೆಂಗಳೂರು ಮೈಸೂರು ದಶಪಥ ರಸ್ತೆ ಸಾವಿರಾರು ಕೋಟಿ ರೂ ವೆಚ್ಚದಲ್ಲಿ ನಿರ್ಮಾಣಗೊಂಡು ಉದ್ಘಾಟನೆಗೆ ಸಜ್ಜುಗೊಂಡಿದೆ. ಆದರೆ ಮತ್ತೊಂಡೆದೆ ಬೆಂಗಳೂರು-ದಿಂಡುಗಲ್ಲು ರಾಷ್ಟ್ರೀಯ ಹೆದ್ದಾರಿ (National Highway 209) ಕಾಮಗಾರಿ ಮಾತ್ರ ಇದುವರೆಗೂ ಕುಂಟುತ್ತಾ ಸಾಗಿದೆ. ಕಳೆದ ಹಲವು ವರ್ಷಗಳಿಂದ ಕಾಮಗಾರಿ ಪೂರ್ಣಗೊಳ್ಳದೇ ವಾಹನ ಸವಾರರು (commuters) ಪರದಾಟ ನಡೆಸುತ್ತಿದ್ದಾರೆ. ಹೌದು ಬೆಂಗಳೂರಿನಿಂದ ಕನಕಪುರ ಮಾರ್ಗವಾಗಿ ದಿಂಡಿಗಲ್ಲಿಗೆ (Dindigul Highway) ಸಂಪರ್ಕ ಕಲ್ಪಿಸುವ ರಾಷ್ಟ್ರೀಯ ಹೆದ್ದಾರಿ 209ರ ರಸ್ತೆ ಅಗಲೀಕರಣ (Road Wwidening) ಕಾಮಗಾರಿ ಪ್ರಾರಂಭಗೊಂಡು ಸುಮಾರು ಎಂಟು ವರ್ಷಗಳು ಕಳೆಯುತ್ತಾ ಬಂದರೂ ಕಾಮಗಾರಿ ಮಾತ್ರ ಪೂರ್ಣಗೊಂಡಿಲ್ಲ. ಹೀಗಾಗಿ ಈ ರಸ್ತೆಯಲ್ಲಿ ಸಂಚರಿಸುವ ವಾಹನ ಸವಾರರು ಪ್ರತಿನಿತ್ಯ ನರಕಯಾತನೆ ಅನುಭವಿಸುವಂತೆ ಆಗಿದೆ.

ಅದೇ ಒಂದೆಡೆ ಸಾವಿರಾರು ಕೋಟಿ ರೂ ವೆಚ್ಚದಲ್ಲಿ ಬೆಂಗಳೂರು-ಮೈಸೂರು ಎಕ್ಸ್ ಪ್ರೆಸ್ ವೇ ಈಗಾಗಲೇ ನಿರ್ಮಾಣಗೊಂಡು ಉದ್ಘಾಟನೆಗೂ ಕೂಡ ಸಜ್ಜಾಗಿದೆ. ಆದರೆ ಬೆಂಗಳೂರು-ದಿಂಡಿಗಲ್ಲು ಕಾಮಗಾರಿ ಮಾತ್ರ ಇದುವರೆಗೂ ಪೂರ್ಣಗೊಳ್ಳುತ್ತಿಲ್ಲ. ಅಂದಹಾಗೆ ಪ್ರಾರಂಭದಲ್ಲಿ ಶೂರತ್ವ ತೋರಿದ್ದ ಟೆಂಡರ್ ಪಡೆದ ಕಂಪನಿ, ಒಂದು ವರ್ಷದ ನಂತರ ಕಾಮಗಾರಿಯನ್ನ ನಿಲ್ಲಿಸಿಯೇ ಬಿಟ್ಟಿದೆ.

ಹೀಗಾಗಿ ಹೆದ್ದಾರಿ ಅಗಲಿಕರಣಕ್ಕೆಂದು ರಸ್ತೆಯಲ್ಲಿಯೇ ಅಲ್ಲಲ್ಲಿ ಗುಂಡಿ ತೋಡಿ, ರಸ್ತೆಯನ್ನ ಡೈವರ್ಷನ್ ಮಾಡಲಾಗಿದೆ. ಇದರಿಂದಾಗಿ ಪ್ರತಿನಿತ್ಯ ಹೆದ್ದಾರಿಯಲ್ಲಿ ಅಪಘಾತಗಳು ಉಂಟಾಗುತ್ತಿವೆ. ಇದುವರೆಗೂ ಹಲವಾರು ಅಪಘಾತ ಪ್ರಕರಣಗಳು ಕೂಡ ದಾಖಲಾಗಿವೆ. ಇದರಿಂದ ಪ್ರತಿನಿತ್ಯ ವಾಹನ ಸವಾರರು ಪರದಾಡುವಂತಾಗಿದೆ. ಇನ್ನು ಇದೇ ವಿಚಾರವಾಗಿ ರಾಜಕೀಯ ಬದ್ದ ವೈರಿಗಳಾದ ಡಿ ಕೆ ಸುರೇಶ್ ಹಾಗೂ ಸಿ ಪಿ ಯೋಗೇಶ್ವರ್ ವೈರತ್ವ ಮರೆತು ಚರ್ಚೆ ನಡೆಸಿದ್ದರು. ಇನ್ನು ಪ್ರತಿನಿತ್ಯ ವಾಹನ ಸವಾರರಿಗೆ ತೊಂದರೆ ಆಗುತ್ತಿದ್ದು, ಈ ಬಗ್ಗೆ ಕೇಂದ್ರ ಸಾರಿಗೆ ಸಚಿವರ ಗಮನಕ್ಕೂ ಕೂಡ ತಂದಿದ್ದಾರೆ.

ಅಂದಹಾಗೆ ಕೇಂದ್ರ ಸರ್ಕಾರವು, ರಾಷ್ಟ್ರೀಯ ಹೆದ್ದಾರಿ 209 ಅನ್ನು ಬೆಂಗಳೂರಿನಿಂದ ಕನಕಪುರದವರೆಗೆ ನಾಲ್ಕು ಪಥ, ಕನಕಪುರದಿಂದ 2 ಪಥ ಮಾಡಲು 2012-13ರಲ್ಲಿ ಚಾಲನೆ ನೀಡಿ 192 ಕಿ. ಮೀ. ಕೆಲಸ ಮಾಡಲು ಟೆಂಡರ್ ಕರೆದಿತ್ತು. ಸದ್ಭವ್ ಕನ್ಸ್ಟ್ರಕ್ಷನ್ ಎಂಬ ಕಂಪನಿ, ಈ ರಸ್ತೆಯನ್ನ ಅಭಿವೃದ್ದಿ ಪಡಿಸುವುದಾಗಿ ಟೆಂಡರ್ ಪಡೆದು 2014 ರಲ್ಲಿ ಕೆಲಸ ಪ್ರಾರಂಭಿಸಿತ್ತು. ಪ್ರಾರಂಭದಲ್ಲಿ ವೇಗವಾಗಿ ಕೆಲಸ ನಡೆದರೂ ಆನಂತರ ಕಾಮಗಾರಿ ನಿಧಾನಗತಿಯಾಗಿತ್ತು.

ಇದೀಗ ಕಾಮಗಾರಿ ಅರ್ಧಕ್ಕೆ ನಿಂತಿದೆ. ಇನ್ನು ಈ ಹೆದ್ದಾರಿ ಮೂಲಕವೇ ಅನೇಕ ಪ್ರವಾಸಿ ಸ್ಥಳಗಳಿಗೆ ಹೋಗಬೇಕು. ಹೀಗಾಗಿ ಹೆದ್ದಾರಿಯಲ್ಲಿ ವಾಹನಗಳ ಸಂಖ್ಯೆ ಹೆಚ್ಚಾಗಿಯೇ ಇವೆ. ಆದ್ರೆ ಕಾಮಗಾರಿ ಮಾತ್ರ ಪೂರ್ಣಗೊಂಡಿಲ್ಲ. ಹೀಗಾಗಿ ಪ್ರಯಾಣಿಕರು ಸಾಕಷ್ಟು ತೊಂದರೆಯನ್ನ ಅನುಭವಿಸುತ್ತಿದ್ದಾರೆ. ಇನ್ನು ಈ ಬಗ್ಗೆ ಇತ್ತೀಚಿಗೆ ರಾಜ್ಯಕ್ಕೆ ಭೇಟಿ ನೀಡಿದ್ದ ಕೇಂದ್ರ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಕೂಡ ಪ್ರತಿಕ್ರಿಯೆ ನೀಡಿದ್ದು, ಕಾಮಗಾರಿ ಆರಂಭಿಸುವುದಾಗಿ ಭರವಸೆ ನೀಡಿದ್ದಾರೆ.

ಒಟ್ಟಾರೆ ರಾಷ್ಟ್ರೀಯ ಹೆದ್ದಾರಿ 209ರ ರಸ್ತೆ ಅಗಲಿಕರಣದ ಕಾಮಗಾರಿ ಕಳೆದ ಎಂಟು ವರ್ಷಗಳಿಂದ ಕುಂಟುತ್ತಲೇ ಸಾಗಿದೆ. ಹೀಗಾಗಿ ಪ್ರತಿನಿತ್ಯ ವಾಹನ ಸವಾರರು ಪರದಾಡುವಂತಾಗಿದೆ. ಈಗಾಗಲೇ ಸಾರಿಗೆ ಸಚಿವ ಗಮನಕ್ಕೂ ಕೂಡ ಬಂದಿದ್ದು, ಇನ್ನಾದ್ರು ಕಾಮಗಾರಿ ಆರಂಭಗೊಂಡು ವಾಹನ ಸವಾರರಿಗೆ ಅನುಕೂಲವಾಗುತ್ತ ಕಾದು ನೋಡಬೇಕು.

ವರದಿ: ಪ್ರಶಾಂತ್ ಹುಲಿಕೆರೆ, ಟಿವಿ9, ರಾಮನಗರ