ಬಳಸಿದ PPE ಕಿಟ್ ಧರಿಸಿ ಓಡಾಡಿದ ಮಾನಸಿಕ ಅಸ್ವಸ್ಥ, ಸ್ಥಳೀಯರಲ್ಲಿ ಶುರುವಾಯ್ತು ಆತಂಕ, ಎಲ್ಲಿ?

ವಿಜಯಪುರ: ಆರೋಗ್ಯ ಸಿಬ್ಬಂದಿ ಹಾಗೂ ಅಧಿಕಾರಿಗಳು ತಾವು ಬಳಸಿದ PPE ಕಿಟ್​ಗಳನ್ನು ಸರಿಯಾಗಿ ವಿಲೇವಾರಿ ಮಾಡದೆ ಹಾಗೇ ಬಿಸಾಡಿರುವ ಘಟನೆ  ನಗರದಲ್ಲಿ ಬೆಳಕಿಗೆ ಬಂದಿದೆ.  ಮನಗೂಳಿ ರಸ್ತೆಯಲ್ಲಿರುವ ಸ್ಮಶಾನದ ಬಳಿಯಲ್ಲೇ ಬಿಟ್ಟು ಹೋಗಿದ್ದು ಇದರಿಂದ PPE ಕಿಟ್​ಗಳು ಗಾಳಿಗೆ ಅತ್ತಿತ್ತ ಹಾರಾಡುತ್ತಿದೆ. ಇದರಿಂದ ಸ್ಥಳೀಯರಲ್ಲಿ ಆತಂಕ ಶುರುವಾಯ್ತು.

PPE ಕಿಟ್​ಗಳನ್ನು ಹಾಗೆಯೇ ಬಿಸಾಡಿ ಹೋಗಿದ್ದರಿಂದ ಅಲ್ಲಿಯೇ ಓಡಾಡುತ್ತಿದ್ದ ಮಾನಸಿಕ ಅಸ್ವಸ್ಥನೊಬ್ಬ ಅದನ್ನು ಧರಿಸಿ ಓಡಾಡಲು  ಪ್ರಾರಂಭಿಸಿದ. ಇದನ್ನು ಕಂಡ ಸ್ಥಳೀಯರಲ್ಲಿ ಮತ್ತಷ್ಟು ಆತಂಕ ಹೆಚ್ಚಾಯ್ತು. ಇನ್ನು ಈ ಬಗ್ಗೆ ಟಿವಿ9 ಸುದ್ಧಿ ಪ್ರಸಾರಮಾಡುತ್ತಿದ್ದಂತೆ ಕೂಡಲೆ ಎಚ್ಚೆತ್ತ ಮಹಾನಗರ ಪಾಲಿಕೆ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿ  PPE ಕಿಟ್​ಗಳಿಗೆ ಬೆಂಕಿ ಹಚ್ಚಿ ಸುಟ್ಟುಹಾಕುವ ಮೂಲಕ ನಾಶಪಡಿಸಿದರು.