ಮನೇಲಿ ಒಬ್ಬನೇ ಅಡುಗೆ ಮಾಡ್ತಿದ್ದವನ ಮೇಲೆ ಕುಸಿದುಬಿತ್ತು ಮೇಲ್ಛಾವಣಿ, ಮುಂದೇನಾಯ್ತು?

ಬಾಗಲಕೋಟೆ: ಜಿಲ್ಲೆಯಲ್ಲಿ ನಿರಂತರ ಮಳೆ ಸುರಿಯುತ್ತಿರುವ ಪರಿಣಾಮ ಮಾಳಿಗೆ ಮನೆಯೊಂದರ ಮೇಲ್ಛಾವಣಿ ಕುಸಿದು ವ್ಯಕ್ತಿಯೊಬ್ಬ ಸಿಲುಕಿಕೊಂಡ ಘಟನೆ ಜಮಖಂಡಿ ನಗರದ ಹುಲ್ಯಾಳಕರ್ ಗಲ್ಲಿಯಲ್ಲಿ ಸಂಭವಿಸಿದೆ.

35 ವರ್ಷದ ಪವನ್ ಸವದತ್ತಿ ಮನೆಯಲ್ಲಿ ಒಬ್ಬನೇ ಇದ್ದ ಕಾರಣ ತಾನೇ ಅಡುಗೆ ತಯಾರಿಸುತ್ತಿದ್ದನಂತೆ. ಈ ವೇಳೆ ಸತತ ಮಳೆಯಿಂದ ದುರ್ಬಲವಾಗಿದ್ದ ಮನೆಯ ಮೇಲ್ಛಾವಣಿ ದಿಢೀರ್ ಅಂತಾ ಪವನ್​ ಮೇಲೆ ಕುಸಿದುಬಿದ್ದಿದೆ.

ಅದೃಷ್ಟವಶಾತ್ ಪವನ್​ ಕೂದಲೆಳೆಯಲ್ಲಿ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಕೂಡಲೇ ಸ್ಥಳೀಯರು ಅಗ್ನಿಶಾಮಕ ಸಿಬ್ಬಂದಿಯನ್ನು ಕರೆಸಿ ಪವನ್​ರನ್ನು ರಕ್ಷಿಸಿದ್ದಾರೆ. ಮೇಲ್ಛಾವಣಿ ಕುಸಿತದಿಂದ ಕೊಂಚ ನಲುಗಿಹೋಗಿದ್ದ ಪವನ್​ಗೆ ಸಣ್ಣಪುಟ್ಟ ಗಾಯಗಳಾಗಿದೆ.