ಸನ್​ಟ್ಯಾನ್ ಆದ ಚರ್ಮಕ್ಕೆ ನೈಸರ್ಗಿಕವಾಗಿ ಹೊಳಪು ನೀಡುವುದು ಹೇಗೆ?

ಬಿಸಿಲಿನಿಂದ ಕೆಲವರ ತ್ವಚೆ ಬಹಳ ಬೇಗ ಟ್ಯಾನ್ ಆಗಿ ಬಿಡುತ್ತದೆ. ಸೂರ್ಯನ ಬಿಸಿಲು ತಾಗಿದ ಜಾಗದಲ್ಲಿ ಕಪ್ಪು ಕಲೆಗಳು ಉಂಟಾಗುತ್ತವೆ. ಬೇಸಿಗೆ ಅಥವಾ ಚಳಿಗಾಲದಲ್ಲಿ ಸೂರ್ಯನ ಬಿಸಿಲು ನಿಮ್ಮ ಚರ್ಮದ ಹೊಳಪನ್ನು ಕಡಿಮೆ ಮಾಡಬಹುದು. ಸೂರ್ಯನ ಬೆಳಕು ಚರ್ಮದ ಮೇಲೆ ಕಠಿಣವಾಗಿರುತ್ತದೆ. ಇದು ನಿಮ್ಮ ಚರ್ಮದಿಂದ ತೇವಾಂಶವನ್ನು ತೆಗೆದುಹಾಕುತ್ತದೆ. ಹಾಗಾದರೆ, ಮುಖ ಮತ್ತು ತ್ವಚೆಯಿಂದ ಸನ್ ಟ್ಯಾನ್ ತೆಗೆಯುವುದು ಹೇಗೆ? ನಿಮ್ಮ ಚರ್ಮದಿಂದ ಸೂರ್ಯನ ಸುಡುವಿಕೆಯಿಂದ ಉಂಟಾಗುವ ಕಪ್ಪು ಕಲೆಗಳನ್ನು ತಪ್ಪಿಸಲು ಮತ್ತು ತೆಗೆದುಹಾಕಲು ಆಯುರ್ವೇದದ ಕೆಲವು ಸಲಹೆಗಳು ಮತ್ತು ಪರಿಹಾರಗಳು ಇಲ್ಲಿವೆ.

ಅಲೋವೆರಾ ಜೆಲ್:

ಅಲೋವೆರಾ ಜೆಲ್ ತ್ವಚೆಯ ಮೇಲಿನ ಕಲೆಯನ್ನು ಶಮನಗೊಳಿಸುವ ಅಂಶವಾಗಿದೆ. ಸೂರ್ಯನಿಂದ ಉಂಟಾಗುವ ಶಾಖ ಮತ್ತು ಸುಡುವ ಸಂವೇದನೆಯನ್ನು ಶಾಂತಗೊಳಿಸಲು ಇದು ಸಹಾಯ ಮಾಡುತ್ತದೆ. ಅಲೋವೆರಾ ಜೆಲ್ ಅನ್ನು ರೆಫ್ರಿಜರೇಟರ್ ಅಥವಾ ಐಸ್-ಬಕೆಟ್​ನಲ್ಲಿಟ್ಟು, ಸನ್​ ಬರ್ನ್ ಆದ ಜಾಗಕ್ಕೆ ನಿಧಾನವಾಗಿ ಹಚ್ಚಿಕೊಳ್ಳಿ.

ಇದನ್ನೂ ಓದಿ: ಚಳಿಗಾಲದಲ್ಲಿ ಮಗುವಿನ ಕೋಮಲ ತ್ವಚೆಯ ಕಾಳಜಿ ಮಾಡುವುದು ಹೇಗೆ?

ಆಪಲ್ ಸೈಡರ್ ವಿನೆಗರ್:

ಆಪಲ್ ಸೈಡರ್ ವಿನೆಗರ್ ಸೂಕ್ಷ್ಮಜೀವಿಗಳನ್ನು ಕೊಲ್ಲಲು, ಉರಿಯೂತವನ್ನು ಶಾಂತಗೊಳಿಸಲು ಮತ್ತು ನೋವಿನ, ತುರಿಕೆ ಚರ್ಮವನ್ನು ನಿವಾರಿಸಲು ಸಹಕಾರಿಯಾಗಿದೆ.

ಸೌತೆಕಾಯಿ, ರೋಸ್ ವಾಟರ್ ಮತ್ತು ನಿಂಬೆ ರಸ:

ನಿಂಬೆ ನೈಸರ್ಗಿಕ ಬ್ಲೀಚ್ ಆಗಿದೆ ಮತ್ತು ಸೌತೆಕಾಯಿ ಮತ್ತು ರೋಸ್ ವಾಟರ್ ತಂಪಾಗಿಸುವ ಏಜೆಂಟ್​ಗಳಾಗಿವೆ. ಒಂದು ಬಟ್ಟಲಿನಲ್ಲಿ ನಿಂಬೆ ರಸ, ಸೌತೆಕಾಯಿ ಮತ್ತು ರೋಸ್ ವಾಟರ್ ಅನ್ನು ಸಮಾನ ಪ್ರಮಾಣದಲ್ಲಿ ತೆಗೆದುಕೊಳ್ಳಿ. ಹತ್ತಿ ಪ್ಯಾಡ್ ಬಳಸಿ ಈ ಮಿಶ್ರಣವನ್ನು ಟ್ಯಾನ್ ಆದ ಜಾಗಕ್ಕೆ ಹಚ್ಚಿಕೊಳ್ಳಿ.

ಕಡಲೆ ಹಿಟ್ಟು, ಅರಿಶಿನ ಮತ್ತು ಮೊಸರಿನ ಫೇಸ್ ಪ್ಯಾಕ್:

ಟ್ಯಾನ್ ನಿವಾರಣೆ ಮಾಡಿ, ಹೊಳೆಯುವ ತ್ವಚೆಗಾಗಿ 2 ಚಮಚ ಕಡಲೆ ಹಿಟ್ಟು, ಒಂದು ಚಿಟಿಕೆ ಅರಿಶಿನ ಪುಡಿ ಮತ್ತು ಒಂದು ಚಮಚ ಹಾಲು ಅಥವಾ ಮೊಸರನ್ನು ತೆಗೆದುಕೊಳ್ಳಿ. ಒಂದು ಬಟ್ಟಲಿನಲ್ಲಿ ಚೆನ್ನಾಗಿ ಮಿಶ್ರಣ ಮಾಡಿ. ಸ್ವಚ್ಛಗೊಳಿಸಿದ ಮುಖದ ಮೇಲೆ ಈ ಮಿಶ್ರಣವನ್ನು ಹಚ್ಚಿಕೊಂಡು, 15-20 ನಿಮಿಷಗಳ ಕಾಲ ಒಣಗಲು ಬಿಡಿ. ನಂತರ ವೃತ್ತಾಕಾರವಾಗಿ ಸ್ಕ್ರಬ್ ಮಾಡುವ ಮೂಲಕ ಅದನ್ನು ತೊಳೆದುಕೊಳ್ಳಿ.

ಇದನ್ನೂ ಓದಿ: ನಿಮ್ಮ ಹಸುಗೂಸಿನ ಎಳೆ ಚರ್ಮದ ಆರೈಕೆ ಮಾಡುವುದು ಹೇಗೆ?

ನಿಂಬೆ ರಸ ಮತ್ತು ಜೇನುತುಪ್ಪದ ಫೇಸ್​ ಮಾಸ್ಕ್:

ಗಾಜಿನ ಬಟ್ಟಲಿನಲ್ಲಿ ತಾಜಾ ನಿಂಬೆ ರಸವನ್ನು ಹಿಂಡಿ. ಇದಕ್ಕೆ 1 ಚಮಚ ಜೇನುತುಪ್ಪ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಈ ಮಿಶ್ರಣವನ್ನು ನಿಮ್ಮ ಚರ್ಮದ ಮೇಲೆ ಹಚ್ಚಿಕೊಂಡು, 30 ನಿಮಿಷಗಳ ಕಾಲ ಬಿಡಿ. ನಂತರ ನೀರಿನಿಂದ ತೊಳೆಯಿರಿ.

ಜೇನುತುಪ್ಪ ಮತ್ತು ಪಪ್ಪಾಯಿ ಸ್ಕ್ರಬ್ ಪ್ಯಾಕ್:

ಪಪ್ಪಾಯಿ ಹಣ್ಣಿನಲ್ಲಿ ವಿಟಮಿನ್‌ಗಳು ಮತ್ತು ಮಿನರಲ್‌ಗಳಲ್ಲಿ ಸಮೃದ್ಧವಾಗಿರುವ ಪ್ರೋಟಿಯೋಲೈಟಿಕ್ ಪಪೈನ್ ಕಿಣ್ವ ಹೇರಳವಾಗಿದೆ. ಆಯುರ್ವೇದ ಸೂತ್ರಗಳಲ್ಲಿ ಹೇಳಿರುವಂತೆ ಪಪ್ಪಾಯಿಯು ಕಪ್ಪು ಕಲೆಯನ್ನು ಹೋಗಲಾಡಿಸುವವರಲ್ಲಿ ಮುಖ್ಯವಾದ ಅಂಶವಾಗಿದೆ. ಇದನ್ನು ಜೇನುತುಪ್ಪದೊಂದಿಗೆ ಮಿಕ್ಸ್ ಮಾಡಿದಾಗ ಈ ಸ್ಕ್ರಬ್ ಅದ್ಭುತವಾದ ಎಫ್ಫೋಲಿಯೇಟಿಂಗ್ ಮತ್ತು ಬ್ಲೀಚಿಂಗ್ ಫೇಸ್ ಪ್ಯಾಕ್ ಆಗಿ ಕಾರ್ಯನಿರ್ವಹಿಸುತ್ತದೆ. ಇದು ಸನ್​ಟ್ಯಾನ್ ಅನ್ನು ತೆಗೆದುಹಾಕಲು ಮತ್ತು ನಿಮ್ಮ ಚರ್ಮವನ್ನು ತೇವಗೊಳಿಸಲು ಸಹಾಯ ಮಾಡುತ್ತದೆ.

ಇನ್ನಷ್ಟು ಜೀವನಶೈಲಿಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ