Holi 2024: ಮನೆಯಲ್ಲಿಯೇ ನೈಸರ್ಗಿಕ ಬಣ್ಣಗಳನ್ನು ತಯಾರಿಸುವುದು ಹೇಗೆ?

ಭಾರತದಲ್ಲಿ ವಿಶೇಷವಾಗಿ ಆಚರಿಸುವ ಹಬ್ಬಗಳಲ್ಲಿ ಒಂದು ಈ ಹೋಳಿ. ಬಣ್ಣಗಳೇ ಹೋಳಿ ಹಬ್ಬವನ್ನು ಇನ್ನಷ್ಟು ಕಲರ್ ಫುಲ್ ಆಗಿಸುತ್ತದೆ. ಯಾವುದೇ ಜಾತಿ ಮತ, ಬೇಧ ಭಾವವಿಲ್ಲದೇ ಓಕುಳಿಯಾಟವನ್ನು ಆಡಿ ಸಂಭ್ರಮಿಸುವ ಹಬ್ಬವಾಗಿದೆ. ಮನೆಯಲ್ಲಿ ಹಬ್ಬದಡುಗೆಯ ರುಚಿ, ಮೈ ತುಂಬಾ ಬಣ್ಣಗಳ ರಂಗು ಇದೇ ಬಣ್ಣಗಳ ಹಬ್ಬವನ್ನು ವಿಶೇಷವನ್ನಾಗಿಸುತ್ತದೆ. ಈ ಹಿಂದೆ ಹೋಳಿ ಹಬ್ಬಕ್ಕೆ ಬಣ್ಣಗಳನ್ನು ಮನೆಯಲ್ಲೇ ತಯಾರಿಸುತ್ತಿದ್ದರು. ಆದರೆ ಇದೀಗ ಮಾರುಕಟ್ಟೆಯಲ್ಲಿರುವ ಸಿಗುವ ರಾಸಾಯನಿಕ ಬಣ್ಣಗಳ ಬಳಕೆ ಮಾಡುವವರೇ ಹೆಚ್ಚಾಗಿದ್ದಾರೆ.

* ಹಳದಿ ಬಣ್ಣ: ಹಳದಿ ಬಣ್ಣವನ್ನು ಮಾಡಿಕೊಳ್ಳಲು ಕಡಲೆಹಿಟ್ಟು ಮತ್ತು ಅರಿಶಿನವನ್ನು ಬಳಸಬಹುದು. ಕಡಲೆಹಿಟ್ಟಿಗೆ ಒಣಗಿದ ಅರಶಿನ ಕೊಂಬನ್ನು ಕುಟ್ಟಿ ಪುಡಿ ಮಾಡಿ ಸೇರಿಸಿದರೆ ಈ ಬಣ್ಣವು ಸಿದ್ಧವಾಗುತ್ತದೆ. ಇಲ್ಲವಾದರೆ ಮನೆಯ ತೋಟದಲ್ಲಿರುವ ಹಳದಿ ಬಣ್ಣದ ಹೂವುಗಳನ್ನು ಪುಡಿ ಮಾಡಿ ಒಣಗಿಸಿ ಹಳದಿ ಬಣ್ಣವನ್ನು ತಯಾರಿಸಬಹುದು.

* ಕೆಂಪು ಬಣ್ಣ: ಕೆಂಪು ಬಣ್ಣಕ್ಕಾಗಿ ಕೆಂಬಣ್ಣದ ದಾಸವಾಳ ಹೂವುಗಳು ಹಾಗೂ ಗುಲಾಬಿ ಹೂವುಗಳ ಎಸಳನ್ನು ಬಳಸಬಹುದು. ಈ ಹೂವಿನ ಎಸಳನ್ನು ಒಣಗಿಸಿ ಪುಡಿ ಮಾಡಿ ಇದಕ್ಕೆ ಅಕ್ಕಿ ಹಿಟ್ಟನ್ನು ಬೆರೆಸಿದರೆ ಕೆಂಪು ಬಣ್ಣವು ಸಿದ್ಧವಾಗುತ್ತದೆ. ಇಲ್ಲವಾದರೆ ಅರಶಿನಕ್ಕೆ ನಿಂಬೆ ರಸವನ್ನು ಸೇರಿಸಿ ಒಣಗಿಸಿದರೆ ಕೆಂಪು ಬಣ್ಣವು ಸಿದ್ಧವಾಗುತ್ತದೆ.

* ಕೆನ್ನೆರಳೆ ಬಣ್ಣ : ಬೀಟ್ ರೂಟ್ ಚೂರುಗಳನ್ನು ಕತ್ತರಿಸಿ ನೀರಿನಲ್ಲಿ ಕುದಿಸಿ ಕೆನ್ನೆರಳೆ ಬಣ್ಣದ ನೀರನ್ನು ತಯಾರಿಸಬಹುದು. ಇಲ್ಲವಾದರೆ ಈ ಬೀಟ್ ರೂಟ್ ಚೂರುಗಳನ್ನು ಕತ್ತರಿಸಿ ಪುಡಿ ಮಾಡಿಕೊಂಡು ಅಕ್ಕಿ ಹಿಟ್ಟಿನೊಂದಿಗೆ ಬೆರೆಸಿ ಒಣಗಿಸಿದರೆ ಕೆನ್ನೆರಳೆ ಬಣ್ಣವಾಗುತ್ತದೆ.

ಇದನ್ನೂ ಓದಿ: ಅಡುಗೆ ಮನೆಯಲ್ಲಿ ಲಭ್ಯವಿರುವ ಪದಾರ್ಥಗಳನ್ನು ಬಳಸಿ ದೇಸಿ ಪಾನೀಯ ತಯಾರಿಸಿ

* ಹಸಿರು ಬಣ್ಣ : ನೈಸರ್ಗಿಕವಾಗಿ ಸಿಗುವ ಮದರಂಗಿ ಎಲೆ ಅಥವಾ ಹಸಿರು ಎಲೆಗಳನ್ನು ಒಣಗಿಸಿ ಪುಡಿಮಾಡಿ ಬಣ್ಣಗಳ ಎರಚಾಟಕ್ಕೆ ಈ ಹಸಿರು ಬಣ್ಣವನ್ನು ಬಳಸಬಹುದು.

* ಕಂದು ಬಣ್ಣ: ಮರದ ತೊಗಟೆಯನ್ನು ಮಿಕ್ಸಿ ಜಾರಿಗೆ ಹಾಕಿ ರುಬ್ಬಿಕೊಂಡು, ಇದಕ್ಕೆ ಕಡಲೆ ಹಿಟ್ಟು ಅಥವಾ ಅಕ್ಕಿ ಹಿಟ್ಟನ್ನು ಸೇರಿಸಿದರೆ ಕಂದುಬಣ್ಣ ರೆಡಿಯಾದಂತೆಯೇ. ಇಲ್ಲವಾದರೆ ಮನೆಯಲ್ಲಿ ಕಾಫಿ ಪುಡಿಯಿದ್ದರೆ ನೀರಿಗೆ ಹಾಕಿ ಕುದಿಸಿ ಅದಕ್ಕೆ ರೋಸ್ ವಾಟರ್ ಸೇರಿದಂತೆ ನೈಸರ್ಗಿಕವಾಗಿ ತಯಾರಾದ ಈ ಕಂದು ಬಣ್ಣವನ್ನು ಹೋಳಿ ಹಬ್ಬಕ್ಕೆ ಬಳಸಬಹುದು.

ಇನ್ನಷ್ಟು ಜೀವನಶೈಲಿಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ