Afternoon Sleep: ಮಧ್ಯಾಹ್ನ ಹೆಚ್ಚು ಹೊತ್ತು ನಿದ್ರೆ ಮಾಡಿದರೆ ರಾತ್ರಿ ನಿದ್ದೆ ಏಕೆ ಬರುವುದಿಲ್ಲ?

ಮಧ್ಯಾಹ್ನ ಊಟವಾದ (Meal) ಬಳಿಕ ಸ್ವಲ್ಪ ಹೊತ್ತು ಮಲಗುವುದು ಹಲವರಿಗೆ ದಿನನಿತ್ಯದ ಅಭ್ಯಾಸ. ಆದರೆ ಕೆಲವೊಮ್ಮೆ ಸ್ವಲ್ಪ ಹೊತ್ತು ಎಂದು ಮಲಗಿದವರು ಒಂದೆರಡು ಗಂಟೆಗಳ ಬಳಿಕ ಎದ್ದು, ರಾತ್ರಿ ಹಾಸಿಗೆಗೆ ಹೋದರೂ ನಿದ್ದೆ ಬರುವುದಿಲ್ಲ. ಇದಕ್ಕೆ ಕಾರಣ ಏನು? ಮಧ್ಯಾಹ್ನದ ನಿದ್ದೆಗೂ ರಾತ್ರಿ ನಿದ್ದೆಗೂ ನಿಜವಾಗಿಯೂ ಸಂಬಂಧವಿದೆಯೇ?.

ನಮ್ಮ ನಿದ್ದೆಯನ್ನು ಮುಖ್ಯವಾಗಿ ಎರಡು ವ್ಯವಸ್ಥೆಗಳು ನಿಯಂತ್ರಿಸುತ್ತವೆ. ಒಂದು ಸರ್ಕೇಡಿಯನ್ ರಿದಮ್, ಅಂದರೆ ದೇಹದ ಆಂತರಿಕ ಜೈವಿಕ ಗಡಿಯಾರ. ಇನ್ನೊಂದು ಸ್ಲೀಪ್ ಪ್ರೆಶರ್, ಅಂದರೆ ನಾವು ಹೆಚ್ಚು ಸಮಯ ಎಚ್ಚರವಾಗಿದ್ದಂತೆ ದೇಹದಲ್ಲಿ ನಿದ್ದೆಯ ಅಗತ್ಯ ಹೆಚ್ಚಾಗುವ ಪ್ರಕ್ರಿಯೆ.

ಮಧ್ಯಾಹ್ನ ಹೆಚ್ಚು ನಿದ್ದೆ ಮಾಡಿದರೆ ಏನಾಗುತ್ತದೆ?

ಬೆಳಗ್ಗೆಯಿಂದ ಹಲವು ಗಂಟೆಗಳ ಕಾಲ ಎಚ್ಚರವಾಗಿರುವುದರಿಂದ ದೇಹದಲ್ಲಿ ನಿದ್ದೆಯ ಒತ್ತಡ ನಿಧಾನವಾಗಿ ಹೆಚ್ಚಾಗುತ್ತದೆ. ಅದಕ್ಕಾಗಿಯೇ ಮಧ್ಯಾಹ್ನ ನಿದ್ದೆ ಬರುತ್ತದೆ. ಆದರೆ ನೀವು ಮಧ್ಯಾಹ್ನ ಹೆಚ್ಚು ಹೊತ್ತು ಮಲಗಿದರೆ, ಆ ಸಮಯದಲ್ಲಿ ಸಂಗ್ರಹವಾಗಿದ್ದ ನಿದ್ದೆಯ ಒತ್ತಡದ ಒಂದು ಭಾಗ ಕಡಿಮೆಯಾಗುತ್ತದೆ.

ನಂತರ ರಾತ್ರಿ ಮಲಗುವ ಸಮಯ ಬಂದಾಗ ದೇಹಕ್ಕೆ ತಕ್ಷಣವೇ ನಿದ್ದೆ ಮಾಡುವಷ್ಟು ಸ್ಲೀಪ್ ಪ್ರೆಶರ್ ಇರದೇ ಇರಬಹುದು. ಹೀಗಾಗಿ ಹಾಸಿಗೆಯಲ್ಲಿ ಮಲಗಿದ್ದರೂ ನಿದ್ದೆ ಬರಲು ಹೆಚ್ಚು ಸಮಯ ಬೇಕಾಗಬಹುದು.

ಉದಾಹರಣೆಗೆ, ಮಧ್ಯಾಹ್ನ 20-30 ನಿಮಿಷಗಳ ಸಣ್ಣ ನಿದ್ದೆ ಮಾಡಿದರೆ ಹೆಚ್ಚಿನವರಿಗೆ ಸಮಸ್ಯೆಯಾಗದೇ ಇರಬಹುದು. ಆದರೆ ಮಧ್ಯಾಹ್ನ ಒಂದು ಅಥವಾ ಎರಡು ಗಂಟೆ ಮಲಗಿದರೆ ರಾತ್ರಿ ನಿದ್ದೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಹೆಚ್ಚಾಗುತ್ತದೆ.

ನಿದ್ದೆ ಮಾತ್ರವಲ್ಲ, ಸಮಯವೂ ಮುಖ್ಯ

ಮಧ್ಯಾಹ್ನ ಯಾವ ಸಮಯದಲ್ಲಿ ನಿದ್ರೆ ಮಾಡುತ್ತೀರಿ ಎಂಬುದೂ ಮುಖ್ಯ. ಸಂಜೆ ಹೊತ್ತಿಗೆ ಹತ್ತಿರವಾಗಿ ಅಥವಾ ತಡವಾಗಿ ದೀರ್ಘ ಸಮಯ ಮಲಗುವುದು ರಾತ್ರಿ ನಿದ್ದೆಯನ್ನು ಹೆಚ್ಚು ತಡಮಾಡಬಹುದು. ಏಕೆಂದರೆ ಅದು ರಾತ್ರಿ ಮಲಗುವ ವೇಳೆಗೆ ದೇಹದ ನಿದ್ದೆಯ ಅಗತ್ಯವನ್ನು ಕಡಿಮೆ ಮಾಡಬಹುದು.

ಊಟ ಮಾಡಿದ ತಕ್ಷಣ ನೀರು ಕುಡಿಯಬಾರದು ಎನ್ನುವುದು ನಿಜವೇ? ವಿಜ್ಞಾನ ಹೇಳುವುದೇನು?

ಆದರೆ ಪ್ರತಿಯೊಬ್ಬರಿಗೂ ಒಂದೇ ರೀತಿಯ ಪರಿಣಾಮ ಇರುವುದಿಲ್ಲ. ರಾತ್ರಿ ಸಾಕಷ್ಟು ನಿದ್ದೆ ಮಾಡುವ ವ್ಯಕ್ತಿಗೆ ಮಧ್ಯಾಹ್ನದ ಚಿಕ್ಕ ನಿದ್ದೆ ಆರಾಮ ನೀಡಬಹುದು. ರಾತ್ರಿ ನಿದ್ದೆ ಈಗಾಗಲೇ ಕಡಿಮೆಯಾಗಿರುವವರು ಅಥವಾ ನಿದ್ದೆಯ ಸಮಸ್ಯೆ ಹೊಂದಿರುವವರು ದೀರ್ಘವಾದ ಮಧ್ಯಾಹ್ನದ ನಿದ್ದೆಯಿಂದ ಹೆಚ್ಚು ತೊಂದರೆ ಅನುಭವಿಸಬಹುದು.

ಹಾಗಾದರೆ ಮಧ್ಯಾಹ್ನ ಎಷ್ಟು ಹೊತ್ತು ಮಲಗಬೇಕು?

ಮಧ್ಯಾಹ್ನ ನಿದ್ದೆ ಬೇಕೆನಿಸಿದರೆ ಚಿಕ್ಕ ಅವಧಿಯ ನಿದ್ದೆ ಉತ್ತಮ ಆಯ್ಕೆಯಾಗಬಹುದು. ಸಾಮಾನ್ಯವಾಗಿ 20-30 ನಿಮಿಷಗಳಷ್ಟು ನಿದ್ದೆ ಮಾಡಿ ಎಚ್ಚರಗೊಳ್ಳುವ ಅಭ್ಯಾಸ ರಾತ್ರಿ ನಿದ್ದೆಗೆ ದೊಡ್ಡ ಅಡ್ಡಿ ಪಡಿಸದಿರಬಹುದು. ಸಾಧ್ಯವಾದರೆ ಮಧ್ಯಾಹ್ನದ ಆರಂಭದ ವೇಳೆಯಲ್ಲೇ ನಿದ್ದೆ ಮಾಡುವುದು ಉತ್ತಮ.

ರಾತ್ರಿ ಪ್ರತಿದಿನ ನಿದ್ದೆ ಬರಲು ತಡವಾಗುತ್ತಿದ್ದರೆ, ಮಧ್ಯಾಹ್ನದ ನಿದ್ದೆಯ ಅವಧಿ ಮತ್ತು ಸಮಯವನ್ನು ಗಮನಿಸಿ. ಪ್ರತಿದಿನ ಒಂದೇ ಸಮಯಕ್ಕೆ ಮಲಗುವುದು, ಬೆಳಗ್ಗೆ ಒಂದೇ ಸಮಯಕ್ಕೆ ಏಳುವುದು ಮತ್ತು ರಾತ್ರಿ ಮಲಗುವ ಮುನ್ನ ಹೆಚ್ಚು ಬೆಳಕು ಹಾಗೂ ಮೊಬೈಲ್ ಬಳಕೆಯನ್ನು ಕಡಿಮೆ ಮಾಡುವುದು ಕೂಡ ನಿದ್ದೆಯ ಕ್ರಮವನ್ನು ಸರಿಪಡಿಸಲು ಸಹಾಯ ಮಾಡಬಹುದು.

ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ