Makar Sankranti 2025: ಸಂಕ್ರಾಂತಿ ಹಬ್ಬಕ್ಕೆ ಉತ್ತರ ಕರ್ನಾಟಕದ ಸ್ಪೆಷಲ್ ತಿನಿಸು ಹುಗ್ಗಿ, ಇಲ್ಲಿದೆ ರೆಸಿಪಿ
ಸುಗ್ಗಿ ಹಬ್ಬ ಎಂದೇ ಕರೆಸಿಕೊಳ್ಳುವ ಮಕರ ಸಂಕ್ರಾಂತಿ ಹಬ್ಬಕ್ಕೆ ತಯಾರಿ ಜೋರಾಗಿ ನಡೆಯುತ್ತಿದೆ. ಭಾರತದಾದಂತ್ಯ ಸಂಭ್ರಮದಿಂದ ಆಚರಿಸಲಾಗುವ ಈ ಹಬ್ಬದ ಆಚರಣೆಯು ರಾಜ್ಯದಿಂದ ರಾಜ್ಯಕ್ಕೆ ವಿಭಿನ್ನವಾಗಿರುತ್ತದೆ. ಈ ಮಕರ ಸಂಕ್ರಾಂತಿಗೆ ಮನೆಯಲ್ಲಿ ವಿವಿಧ ಬಗೆಯ ಖಾದ್ಯಗಳನ್ನು ತಯಾರಿಸಲಾಗುತ್ತದೆ. ಈ ಸುಗ್ಗಿ ಹಬ್ಬಕ್ಕೆ ಉತ್ತರ ಕರ್ನಾಟಕದ ಭಾಗಗಳಲ್ಲಿ ಅಕ್ಕಿ ಅಥವಾ ಗೋಧಿಯಿಂದ ಹುಗ್ಗಿಯನ್ನು ಮಾಡಿ ಸವಿಯುತ್ತಾರೆ. ಹಾಗಾದ್ರೆ ರುಚಿ ರುಚಿಕರವಾದ ಹುಗ್ಗಿ ರೆಸಿಪಿ ಮಾಡೋದು ಹೇಗೆ? ಇಲ್ಲಿದೆ ಸಂಪೂರ್ಣ ಮಾಹಿತಿ.
ಸಾಂದರ್ಭಿಕ ಚಿತ್ರ
ಮಕರ ಸಂಕ್ರಾಂತಿಯು ಕ್ಯಾಲೆಂಡರ್ ನಲ್ಲಿ ಮೊದಲ ಹಬ್ಬವಾಗಿದೆ. ಸುಗ್ಗಿಯನ್ನು ಸಾರುವ ಹಬ್ಬವಿದು, ದ್ರಾವಿಡ ಸಂಪ್ರದಾಯವನ್ನು ಪಾಲಿಸುವವರಿಗೆ ಇದೊಂದು ವಿಶೇಷ ದಿನವಾಗಿದೆ. ಈ ಸಂಕ್ರಾಂತಿ ದಿನದಂದು ಉತ್ತರ ಕರ್ನಾಟಕ ಸೇರಿದಂತೆ ವಿವಿಧ ಭಾಗಗಳಲ್ಲಿ ವಿವಾಹಿತ ಹಾಗೂ ಅವಿವಾಹಿತ ಹೆಣ್ಣುಮಕ್ಕಳು ಎಳ್ಳು-ಬೆಲ್ಲ, ಕೊಬ್ಬರಿ, ನೆಲಗಡಲೆ, ಕಬ್ಬು, ಬಾಳೆಹಣ್ಣು, ಸಕ್ಕರೆ ಅಚ್ಚು ಹೀಗೆ ನಾನಾ ರೀತಿ ತಿನಿಸುಗಳನ್ನು ಎಲ್ಲರಿಗೂ ಹಂಚಿ ಸಂಭ್ರಮಿಸುತ್ತಾರೆ. ಈ ಹಬ್ಬಕ್ಕೆ ಮನೆಯಲ್ಲಿ ವಿವಿಧ ಸಿಹಿ ತಿಂಡಿ ಹಾಗೂ ಖಾದ್ಯಗಳನ್ನು ತಯಾರಿಸಲಾಗುತ್ತದೆ. ಈ ಉತ್ತರ ಕರ್ನಾಟಕದ ಭಾಗಗಳಲ್ಲಿ ಹುಗ್ಗಿಯು ವಿಶೇಷವಾಗಿದ್ದು, ಈ ರೆಸಿಪಿ ಮಾಡುವ ವಿಧಾನ ಇಲ್ಲಿದೆ.
ಹುಗ್ಗಿ ಮಾಡಲು ಬೇಕಾಗುವ ಸಾಮಗ್ರಿಗಳು
- ನಾಲ್ಕು ಕಪ್ ಅಕ್ಕಿ
- ಎರಡು ಕಪ್ ಹೆಸರು ಬೇಳೆ
- 50 ಗ್ರಾಂ ಶೇಂಗಾ
- ಕಾಲು ಚಮಚ ಅರಿಶಿನ ಪುಡಿ
- ಒಂದು ಚಮಚ ಜೀರಿಗೆ
- ಅರ್ಧ ಚಮಚ ಮೆಣಸಿನ ಕಾಳು
- ಅರ್ಧ ಒಣ ಕೊಬ್ಬರಿ ತುರಿ
- ಒಂದು ಚಮಚ ತುಪ್ಪ
- ರುಚಿಗೆ ತಕ್ಕಷ್ಟು ಉಪ್ಪು
ಹುಗ್ಗಿ ಮಾಡುವ ವಿಧಾನ
- ಮೆಣಸು, ಜೀರಿಗೆ, ಒಣ ಕೊಬ್ಬರಿಯನ್ನು ತುಪ್ಪದಲ್ಲಿ ಹುರಿದು ಪುಡಿ ಮಾಡಿಟ್ಟುಕೊಳ್ಳಿ.
- ತದನಂತರದಲ್ಲಿ ಒಂದು ಪಾತ್ರೆಯಲ್ಲಿ 10 ಕಪ್ ನೀರು ಹಾಕಿ, ಅದರಲ್ಲಿ ಅಕ್ಕಿ ಮತ್ತು ಹೆಸರು ಬೇಳೆ ಹಾಕಿಕೊಳ್ಳಿ.
- ಅದಕ್ಕೆ ಅರಿಶಿಣ, ಶೇಂಗಾ, ಪುಡಿ ಮಾಡಿಕೊಂಡಿಟ್ಟ ಮಿಶ್ರಣ, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಕುಕ್ಕರಿನಲ್ಲಿ ಇಟ್ಟು 4 ಸೀಟಿ ಬರುವವರೆಗೆ ಬೇಯಿಸಿಕೊಳ್ಳಿ.
- ಐದು ನಿಮಿಷದ ಬಳಿಕ ಕುಕ್ಕರ್ ಮುಚ್ಚಳ ತೆಗೆದು ಬೆಣ್ಣೆ ಹಾಕಿಕೊಂಡು ಈ ರುಚಿಕರವಾದ ಹುಗ್ಗಿಯನ್ನು ಸವಿಯಬಹುದು.
ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ