ತಮಿಳುನಾಡು ವಿಧಾನಸಭೆಯ ಸಂಪ್ರದಾಯ ಮುರಿದ ಸಿಎಂ ವಿಜಯ್: ಸಿಎಂ ಕುರ್ಚಿ ಬಿಟ್ಟು ಸಚಿವರ ಪಕ್ಕದಲ್ಲಿ ಕುಳಿತ ನಾಯಕ
ತಮಿಳುನಾಡು ಸಿಎಂ ವಿಜಯ್ ವಿಧಾನಸಭೆಯಲ್ಲಿ ದಶಕಗಳ ಸಂಪ್ರದಾಯ ಮುರಿದು, ಸಚಿವರೊಂದಿಗೆ ಕುಳಿತು ಗಮನ ಸೆಳೆದರು. ವಿಪಕ್ಷ ನಾಯಕ ಉದಯನಿಧಿ ಸ್ಟಾಲಿನ್ ಅಧಿಕಾರಿಗಳ ಗೈರಿಗೆ ಆಕ್ಷೇಪ ವ್ಯಕ್ತಪಡಿಸಿದಾಗ, ಸ್ಪೀಕರ್ ಹಿರಿಯ ಅಧಿಕಾರಿಗಳು ಕಡ್ಡಾಯವಾಗಿ ಹಾಜರಿರುವಂತೆ ಸೂಚಿಸಿದರು. ಸಿಎಂ ಅವರ ಈ ನಡೆಯನ್ನು ರಾಜಕೀಯ ಸಹೋದ್ಯೋಗಿಗಳೊಂದಿಗೆ ನೇರ ಸಂಪರ್ಕ ಸಾಧಿಸುವ ಸಂದೇಶ ಎಂದು ವ್ಯಾಖ್ಯಾನಿಸಲಾಗುತ್ತಿದೆ.
ಚೆನ್ನೈ, ಆಗಸ್ಟ್ 28: ತಮಿಳುನಾಡು(Tamil Nadu) ವಿಧಾನಸಭೆಯ ಕಲಾಪದಲ್ಲಿ ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ಅವರು ದಶಕಗಳಿಂದ ನಡೆದುಕೊಂಡು ಬಂದಿದ್ದ ಸಂಸದೀಯ ಸಂಪ್ರದಾಯವನ್ನು ಮುರಿದು ಅಚ್ಚರಿ ಮೂಡಿಸಿದ್ದಾರೆ. ಗುರುವಾರ ಮಧ್ಯಾಹ್ನದ ಕಲಾಪದ ವೇಳೆ ಅವರು ಮುಖ್ಯಮಂತ್ರಿಗಳಿಗೆ ಮೀಸಲಾದ ಪ್ರತ್ಯೇಕ ಕುರ್ಚಿಯಲ್ಲಿ ಕುಳಿತುಕೊಳ್ಳುವ ಬದಲು, ಮುಂದಿನ ಸಾಲಿನಲ್ಲಿ ಸಚಿವರ ನಡುವೆ ಕುಳಿತು ಗಮನ ಸೆಳೆದರು.
ಸಾಮಾನ್ಯವಾಗಿ ಮುಖ್ಯಮಂತ್ರಿಗಳು ಸ್ಪೀಕರ್ ಆಸನದ ಪಕ್ಕದಲ್ಲಿ ಪ್ರತ್ಯೇಕ ಆಸನದಲ್ಲಿ ಕುಳಿತುಕೊಳ್ಳುವುದು ನಿಯಮ. ಆದರೆ ವಿಜಯ್ ಅವರು ಸ್ಪೀಕರ್ ಜೆ.ಸಿ.ಡಿ. ಪ್ರಭಾಕರ್ ಅವರ ಬಲಭಾಗದಲ್ಲಿದ್ದ ತಮ್ಮ ಆಸನವನ್ನು ಬಿಟ್ಟು, ಸಚಿವರಾದ ಕೆ.ಎ. ಸೆಂಗೊಟ್ಟೈಯನ್ ಮತ್ತು ಆಧವ್ ಅರ್ಜುನ ಅವರ ಮಧ್ಯದ ಸಾಲಿನಲ್ಲಿ ಕುಳಿತುಕೊಂಡರು.
ಶಾಸಕರು ಅಥವಾ ಸಚಿವರು ಪರಸ್ಪರ ಚರ್ಚಿಸಲು ಆಸನಗಳನ್ನು ಬದಲಾಯಿಸುವುದು ಸಾಮಾನ್ಯ. ಆದರೆ ಮುಖ್ಯಮಂತ್ರಿಯೊಬ್ಬರು ತಮ್ಮ ಅಧಿಕೃತ ಆಸನ ಬಿಟ್ಟು ಸಚಿವರ ಸಾಲಿನಲ್ಲಿ ಕುಳಿತಿರುವುದು ಸದನದ ಇತಿಹಾಸದಲ್ಲೇ ಅತ್ಯಂತ ಅಪರೂಪದ ಘಟನೆ ಎಂದು ವಿಶ್ಲೇಷಿಸಲಾಗಿದೆ.
ವಿಪಕ್ಷ ನಾಯಕ ಉದಯನಿಧಿ ಆಕ್ಷೇಪ: ವಿರೋಧ ಪಕ್ಷದ ನಾಯಕ ಉದಯನಿಧಿ ಸ್ಟಾಲಿನ್ ಅವರು ಪ್ರಮುಖ ವಿಷಯಗಳ ಚರ್ಚೆಯ ಸಂದರ್ಭದಲ್ಲಿ ಇಲಾಖಾ ಕಾರ್ಯದರ್ಶಿಗಳು ಮತ್ತು ಹಿರಿಯ ಅಧಿಕಾರಿಗಳು ಸದನದಲ್ಲಿ ಗೈರಾಗಿರುವ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದರು.
ಕರೂರ್ ಕಾಲ್ತುಳಿತ ಚರ್ಚೆಯ ಪ್ರಸ್ತಾಪ: ಹಿಂದಿನ ಡಿಎಂಕೆ ಸರ್ಕಾರದ ಅವಧಿಯಲ್ಲಿ ಎಂ.ಕೆ. ಸ್ಟಾಲಿನ್ ಅವರು ಮುಖ್ಯಮಂತ್ರಿಯಾಗಿದ್ದಾಗ ಪ್ರಮುಖ ಚರ್ಚೆಗಳ ವೇಳೆ ಮುಖ್ಯ ಕಾರ್ಯದರ್ಶಿ ಸೇರಿದಂತೆ ಹಿರಿಯ ಅಧಿಕಾರಿಗಳು ಹಾಜರಿರುತ್ತಿದ್ದರು; ಆದರೆ ಈಗಿನ ಆಡಳಿತದಲ್ಲಿ ಅಂತಹ ಗಂಭೀರತೆ ಕಾಣುತ್ತಿಲ್ಲ ಎಂದು ಉದಯನಿಧಿ ಆರೋಪಿಸಿದರು.
ಮತ್ತಷ್ಟು ಓದಿ: ಕಾವೇರಿ ವಿವಾದ: ಸುಪ್ರೀಂ ಕೋರ್ಟ್ನಲ್ಲಿ ಮತ್ತೆ ವಿಚಾರಣೆ ಮುಂದೂಡಿಕೆ, ಕರ್ನಾಟಕಕ್ಕೆ ತಪ್ಪದ ಸಂಕಷ್ಟ
ವಾರ್ ರೂಮ್ನಿಂದ ಕಣ್ಗಾವಲು: ವಿಪಕ್ಷದ ಆರೋಪಕ್ಕೆ ಉತ್ತರಿಸಿದ ಸಚಿವ ಆಧವ್ ಅರ್ಜುನ, “ಇಲಾಖಾ ಕಾರ್ಯದರ್ಶಿಗಳು ಪಕ್ಕದ ಕಂಟ್ರೋಲ್ ವಾರ್ ರೂಮ್ನಲ್ಲಿದ್ದು, ಶಾಸಕರು ಸಭೆಯಲ್ಲಿ ಪ್ರಸ್ತಾಪಿಸುತ್ತಿರುವ ಅಂಶಗಳನ್ನು ದಾಖಲಿಸಿಕೊಳ್ಳುತ್ತಿದ್ದಾರೆ” ಎಂದು ಸಮರ್ಥಿಸಿಕೊಂಡರು.
ಸ್ಪೀಕರ್ ಸೂಚನೆ: ಉದಯನಿಧಿ ಅವರ ಸಲಹೆಯನ್ನು ಪರಿಗಣಿಸಿದ ಸ್ಪೀಕರ್ ಜೆ.ಸಿ.ಡಿ. ಪ್ರಭಾಕರ್, ಮಹತ್ವದ ಕಲಾಪಗಳ ಸಮಯದಲ್ಲಿ ಹಿರಿಯ ಅಧಿಕಾರಿಗಳು ಸದನದಲ್ಲೇ ಕಡ್ಡಾಯವಾಗಿ ಹಾಜರಿರುವಂತೆ ನಿರ್ದೇಶನ ನೀಡಲಾಗುವುದು ಎಂದು ಸ್ಪಷ್ಟಪಡಿಸಿದರು.
ವಿಡಿಯೋ
🚨 சட்டப்பேரவையில் இருக்கை மாற்றம்!
தனியிடம் மாறி அமைச்சர்களுடன் ஆளுங்கட்சி முன் வரிசையில் அமர்ந்தார் முதலமைச்சர் விஜய்! 🏛️🔥#CMVijay #TNSLA #TamilNaduAssembly #Vijay pic.twitter.com/LYHQKUuaWO
— Bharathi Dasan (@MrBharathiDasan) August 27, 2026
ಸದನದ ಸಂಖ್ಯಾಬಲ: ಒಟ್ಟು 234 ಸದಸ್ಯ ಬಲದ ತಮಿಳುನಾಡು ವಿಧಾನಸಭೆಯಲ್ಲಿ ಆಡಳಿತ ಮತ್ತು ವಿರೋಧ ಪಕ್ಷಗಳ ನಡುವಿನ ತೀವ್ರ ಚರ್ಚೆಗಳ ಮಧ್ಯೆ, ಮುಖ್ಯಮಂತ್ರಿ ವಿಜಯ್ ಅವರ ಸರಳ ಅಥವಾ ಅಸಾಮಾನ್ಯ ನಡವಳಿಕೆಗಳು ರಾಜಕೀಯ ವಲಯದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗುತ್ತಿವೆ.
ವಿಡಿಯೋ
JUST NOW 🔔 : Our Chief @TVKVijayHQ Arrived In Assembly !
SABAI : 😊🙏 pic.twitter.com/2nw3Cw1JOK
— Prakash Vijay (@PrakazVijay_Of) August 27, 2026
ಸಂಸದೀಯ ಶಿಷ್ಟಾಚಾರ: ವಿಧಾನಸಭೆಯ ನಿಯಮಾವಳಿಗಳ ಪ್ರಕಾರ ಮುಖ್ಯಮಂತ್ರಿ ಮತ್ತು ವಿರೋಧ ಪಕ್ಷದ ನಾಯಕರಿಗೆ ಮುಂಭಾಗದ ಮೊದಲ ಆಸನಗಳನ್ನು ನಿಗದಿಪಡಿಸಲಾಗಿರುತ್ತದೆ. ಸಚಿವರೊಂದಿಗೆ ಕುಳಿತುಕೊಳ್ಳುವ ಮೂಲಕ ವಿಜಯ್ ಅವರು ಸಹೋದ್ಯೋಗಿಗಳೊಂದಿಗೆ ನೇರ ಸಂಪರ್ಕ ಸಾಧಿಸುವ ಸಂದೇಶ ರವಾನಿಸಿದ್ದಾರೆ ಎಂದು ರಾಜಕೀಯ ಪಡಸಾಲೆಯಲ್ಲಿ ವ್ಯಾಖ್ಯಾನಿಸಲಾಗುತ್ತಿದೆ.
ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ