ಬ್ರಿಕ್ಸ್ ಶೃಂಗಸಭೆಗೆ ದೆಹಲಿ ಸಜ್ಜು; ಕ್ಸಿ ಜಿನ್ಪಿಂಗ್, ಪುಟಿನ್ಗೆ ಹೇಗಿರಲಿದೆ ಹೋಟೆಲ್ ವ್ಯವಸ್ಥೆ?
ನವದೆಹಲಿಯಲ್ಲಿ ಸೆಪ್ಟೆಂಬರ್ 12ರಿಂದ ಬ್ರಿಕ್ಸ್ ಶೃಂಗಸಭೆ ನಡೆಯಲಿದೆ. ಈ ಶೃಂಗಸಭೆಯಲ್ಲಿ ರಷ್ಯಾ, ಚೀನಾ ಸೇರಿದಂತೆ ಅನೇಕ ರಾಷ್ಟ್ರಗಳ ನಾಯಕರು ಆಗಮಿಸಲಿದ್ದಾರೆ. ಶೃಂಗಸಭೆಗೆ ಇನ್ನೆರಡೇ ದಿನ ಬಾಕಿ ಇರುವುದರಿಂದ ಸಿದ್ಧತೆಗಳು ಕೂಡ ಜೋರಾಗಿಯೇ ನಡೆದಿದೆ. ಬ್ರಿಕ್ಸ್ ಶಂಗಸಭೆಗೂ ಮುನ್ನ ಪ್ರಧಾನಿ ಮೋದಿ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರೊಂದಿಗೆ ದ್ವಿಪಕ್ಷೀಯ ಸಭೆ ನಡೆಸಲಿದ್ದಾರೆ. ಈ ಶೃಂಗಸಭೆಗಾಗಿ ದೆಹಲಿಯ ಐಷಾರಾಮಿ ಹೋಟೆಲ್ಗಳಲ್ಲಿ ವಿವಿಧ ದೇಶಗಳ ಅಧ್ಯಕ್ಷರು, ಪ್ರಧಾನಿಗಳಿಗಾಗಿ ವಿಶೇಷ ವ್ಯವಸ್ಥೆ ಕಲ್ಪಿಸಲಾಗಿದೆ. ಬ್ರಿಕ್ಸ್ ಶೃಂಗಸಭೆಗೆ ಸುಮಾರು 30,000 ಸೆಕ್ಯುರಿಟಿ ಸಿಬ್ಬಂದಿಯನ್ನು ಕೂಡ ನಿಯೋಜಿಸಲಾಗಿದೆ!
Updated on: Sep 10, 2026 | 3:23 PM
ನವದೆಹಲಿ, ಸೆಪ್ಟೆಂಬರ್ 10: ದೆಹಲಿಯಲ್ಲಿ ನಡೆಯಲಿರುವ ಬ್ರಿಕ್ಸ್ ಶೃಂಗಸಭೆಯಲ್ಲಿ (BRICS Summit) ಭಾಗವಹಿಸಲು ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಮತ್ತು ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ದೆಹಲಿಗೆ ಆಗಮಿಸುತ್ತಿರುವ ಹಿನ್ನೆಲೆಯಲ್ಲಿ ದೆಹಲಿಯ ಚಾಣಕ್ಯಪುರಿ ವಲಯದ ಪಂಚತಾರಾ ಹೋಟೆಲ್ಗಳಲ್ಲಿ ಭದ್ರತೆಯನ್ನು ತೀವ್ರಗೊಳಿಸಲಾಗಿದೆ. ರಷ್ಯಾದ ಅಧ್ಯಕ್ಷ ಪುಟಿನ್ ಹಾಗೂ ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಅವರಿಗೆ ಪ್ರತ್ಯೇಕ ಹೋಟೆಲ್ಗಳಲ್ಲಿ ವ್ಯವಸ್ಥೆ ಮಾಡಲಾಗಿದೆ. ಆಯಾ ದೇಶಗಳ ನಾಯಕರ ಜೊತೆ ಬಂದ ನಿಯೋಗ ಅಧ್ಯಕ್ಷರು ಉಳಿದುಕೊಳ್ಳುವ ಹೋಟೆಲ್ನಲ್ಲೇ ವಾಸ್ತವ್ಯ ಹೂಡಲಿದ್ದಾರೆ.
ಮೂಲಗಳ ಪ್ರಕಾರ, ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಸೆಪ್ಟೆಂಬರ್ 11ರಂದು ಮತ್ತು ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಸೆಪ್ಟೆಂಬರ್ 12ರಂದು ಭಾರತಕ್ಕೆ ಆಗಮಿಸಲಿದ್ದಾರೆ. ಇಬ್ಬರೂ ನಾಯಕರು ಪಾಲಂನ ವಾಯುಪಡೆ ನಿಲ್ದಾಣದಲ್ಲಿ ಇಳಿದು, ನಂತರ ಚಾಣಕ್ಯಪುರಿಯ ತಮ್ಮ ಹೋಟೆಲ್ಗಳಿಗೆ ತೆರಳಲಿದ್ದಾರೆ.
ಚೀನಾ, ರಷ್ಯಾ ಅಧ್ಯಕ್ಷರಿಗೆ ಕಟ್ಟುನಿಟ್ಟಿನ ಭದ್ರತಾ ವ್ಯವಸ್ಥೆ:
ಚೀನಾ ಮತ್ತು ರಷ್ಯಾದ ಸ್ವಂತ ರಕ್ಷಣಾ ಪಡೆಗಳು ಈಗಾಗಲೇ ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು ಮತ್ತು ಭದ್ರತಾ ಉಪಕರಣಗಳೊಂದಿಗೆ ಹೋಟೆಲ್ ತಲುಪಿವೆ. ಈ ಎರಡೂ ದೇಶಗಳ ನಾಯಕರು ಉಳಿದುಕೊಳ್ಳುವ ಮಹಡಿಗಳಿಂದ ಹಿಡಿದು ಹೋಟೆಲ್ನ ಟೆರೇಸ್ ಹಾಗೂ ನೆಲಮಹಡಿಯವರೆಗೆ ಎಲ್ಲ ಕಡೆಗೂ ಕಟ್ಟುನಿಟ್ಟಿನ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ. ಚೀನಾ ಅಧ್ಯಕ್ಷರ ಭದ್ರತೆಯ ಸಂಪೂರ್ಣ ಉಸ್ತುವಾರಿಯನ್ನು ದೆಹಲಿ ಪೊಲೀಸರ ‘ಸ್ಪೆಷಲ್ ಸೆಲ್’ ವಹಿಸಿಕೊಂಡಿದೆ. ರಷ್ಯಾ ಅಧ್ಯಕ್ಷರು ಉಳಿದುಕೊಳ್ಳುವ ಹೋಟೆಲ್ನಲ್ಲಿ ಹೆಚ್ಚುವರಿ ಡಿಸಿಪಿ ಮತ್ತು ಇಬ್ಬರು ಎಸಿಪಿ ಹಂತದ ಅಧಿಕಾರಿಗಳನ್ನು ಪ್ರತ್ಯೇಕ ಶಿಫ್ಟ್ಗಳಲ್ಲಿ ನಿಯೋಜಿಸಲಾಗಿದೆ.
ಇದನ್ನೂ ಓದಿ: ಬ್ರಿಕ್ಸ್ ಶೃಂಗಸಭೆಗೂ ಮುನ್ನ ಪ್ರಧಾನಿ ಮೋದಿ-ಪುಟಿನ್ ದ್ವಿಪಕ್ಷೀಯ ಮಾತುಕತೆ; ರಷ್ಯಾ ಮಾಹಿತಿ
30,000 ಭದ್ರತಾ ಸಿಬ್ಬಂದಿ:
ವಿಮಾನ ನಿಲ್ದಾಣ, ಹೋಟೆಲ್ಗಳು ಮತ್ತು ಭಾರತ ಮಂಟಪವನ್ನು ಒಳಗೊಂಡಂತೆ ಶೃಂಗಸಭೆಗೆ ಒಟ್ಟು 30,000 ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ. ಇದರಲ್ಲಿ ಅರ್ಧದಷ್ಟು ದೆಹಲಿ ಪೊಲೀಸ್ ಹಾಗೂ ಉಳಿದರ್ಧ ಅರೆಸೈನಿಕ ಪಡೆಗಳ ಸಿಬ್ಬಂದಿಯಾಗಿದ್ದಾರೆ. ಸುಲಭ ಸಂವಹನಕ್ಕಾಗಿ ಭದ್ರತಾ ವಲಯವನ್ನು ವಿವಿಧ ವಲಯಗಳಾಗಿ ವಿಂಗಡಿಸಲಾಗಿದೆ.
ಇಬ್ಬರೂ ನಾಯಕರು ವಾಸ್ತವ್ಯ ಹೂಡಲಿರುವ ಹೋಟೆಲ್ನ ಪ್ರತಿಯೊಬ್ಬ ಉದ್ಯೋಗಿಯ ಹಿನ್ನೆಲೆ ತಪಾಸಣೆಯನ್ನು ದೆಹಲಿ ಹಾಗೂ ಅವರ ಸ್ವಂತ ರಾಜ್ಯಗಳಲ್ಲಿ ನಡೆಸಲಾಗಿದೆ. ಅಲ್ಲದೆ, ಎರಡೂ ದೇಶಗಳ ಅಧ್ಯಕ್ಷರು ತಮ್ಮದೇ ವಿಶೇಷ ವಾಹನಗಳು ಮತ್ತು ಕಾನ್ವಾಯ್ ಕಾರುಗಳನ್ನು ವಿಮಾನದ ಮೂಲಕ ತರಿಸಿಕೊಳ್ಳುತ್ತಿದ್ದಾರೆ.
ಇದನ್ನೂ ಓದಿ: 7 ವರ್ಷಗಳ ನಂತರ ಬ್ರಿಕ್ಸ್ ಶೃಂಗಸಭೆಗೆ ಭಾರತಕ್ಕೆ ಆಗಮಿಸಲಿದ್ದಾರೆ ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್
ವಿವಿಧ ದೇಶಗಳ ಮುಖ್ಯಸ್ಥರು ಶನಿವಾರ ಮಧ್ಯಾಹ್ನ 1.30ರಿಂದ 2.15ರ ನಡುವೆ ಮತ್ತು ಭಾನುವಾರ ಬೆಳಿಗ್ಗೆ 8.50ರಿಂದ 9.25ರ ನಡುವೆ ಪ್ರಮುಖ ಸಭೆ ನಡೆಯುವ ‘ಭಾರತ ಮಂಟಪ’ ತಲುಪಲಿದ್ದಾರೆ. ಅಬುಧಾಬಿಯ ಯುವರಾಜ ಮೊದಲಿಗರಾಗಿ ಹಾಗೂ ಚೀನಾ ಮತ್ತು ರಷ್ಯಾ ಅಧ್ಯಕ್ಷರು ಕೊನೆಯಲ್ಲಿ ಆಗಮಿಸುವ ನಿರೀಕ್ಷೆಯಿದೆ. ಇಬ್ಬರೂ ನಾಯಕರ ಜೊತೆ ಅತಿ ದೊಡ್ಡ ವಾಹನಗಳ ಕಾನ್ವಾಯ್ ಇರಲಿದ್ದು, ಸಂಚಾರ ನಿಯಂತ್ರಣಕ್ಕೆ ಈಗಾಗಲೇ ಹಲವು ಬಾರಿ ‘ರೂಟ್ ರಿಹರ್ಸಲ್’ ನಡೆಸಲಾಗಿದೆ.
ಪ್ರಮುಖ ಜಾಗತಿಕ ನಾಯಕರ ಹೋಟೆಲ್ ವಸತಿ ವಿವರಗಳು:
- ಇರಾನ್ ಅಧ್ಯಕ್ಷರು ಪ್ರತ್ಯೇಕ ಹೋಟೆಲ್ನಲ್ಲಿ ತಂಗಲಿದ್ದಾರೆ.
- ಚೀನಾ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಮತ್ತು ಬೆಲಾರಸ್ ಅಧ್ಯಕ್ಷರು ಒಂದೇ ಹೋಟೆಲ್ನಲ್ಲಿ ತಂಗಲಿದ್ದಾರೆ.
- ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಮತ್ತು ಬಾಂಗ್ಲಾದೇಶದ ವಿಐಪಿ ಗಣ್ಯರಿಗೆ ಒಂದೇ ಹೋಟೆಲ್ನಲ್ಲಿ ವಸತಿ ನೀಡಲಾಗಿದೆ.
- ಇಂಡೋನೇಷ್ಯಾ ಅಧ್ಯಕ್ಷರು, ಇಥಿಯೋಪಿಯಾ ಪ್ರಧಾನಿ, ಕಜಕಿಸ್ತಾನ ಅಧ್ಯಕ್ಷರು ಮತ್ತು ಥಾಯ್ಲೆಂಡ್ ಉಪಪ್ರಧಾನಿ ಒಂದೇ ಹೋಟೆಲ್ನಲ್ಲಿರಲಿದ್ದಾರೆ.
- ಅಬುಧಾಬಿಯ ಯುವರಾಜ, ಸೌದಿ ಅರೇಬಿಯಾ, ಬಹ್ರೇನ್ ಮತ್ತು ಬ್ರೆಜಿಲ್ ಹಣಕಾಸು ಸಚಿವರು ಮತ್ತೊಂದು ಹೋಟೆಲ್ನಲ್ಲಿ ಉಳಿದುಕೊಳ್ಳಲಿದ್ದಾರೆ.
ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
